Azərbaycan-Avstriya əlaqələrinin

bütün sahələrdə inkişafı çox sevindiricidir

Aprelin 1-də Azərbaycan Respublikası Milli Məclisinin sədri Oqtay Əsədov Avstriya Milli Şurasının nümayəndə heyəti ilə görüşmüşdür.

AzərTAc xəbər verir ki, görüşdə Oqtay Əsədov qədim tarixə malik olan Azərbaycan-Avstriya münasibətlərinin inkişafının məmnunluq doğurduğunu söyləmişdir. Əlaqələrimizin inkişafında hər iki ölkənin prezidentlərinin rolunu xüsusi vurğulayan Oqtay Əsədov demişdir ki, yüksək səviyyəli qarşılıqlı səfərlər və görüşlər zamanı aparılan danışıqlar, imzalanmış sənədlər hərtərəfli əməkdaşlığın genişlənməsi üçün möhkəm hüquqi baza yaratmışdır.

Milli Məclisin sədri dövlətlərarası münasibətlərin inkişafında parlamentlərin rolunu xüsusi vurğulamışdır. Son 10 ildə Azərbaycanda bütün sahələrdə müşahidə olunan sürətli inkişafdan söhbət açan O.Əsədov ölkəmizin Avropaya inteqrasiyası sahəsində çox mühüm işlərin görüldüyünü diqqətə çatdırmışdır.

Ermənistan-Azərbaycan, Dağlıq Qarabağ münaqişəsindən bəhs edən sədr beynəlxalq ictimaiyyətin bu problemin həlli istiqamətində daha ciddi səy göstərməsinin vacibliyini vurğulamışdır. O, bildirmişdir ki, BMT Təhlükəsizlik Şurasının münaqişənin həlli ilə bağlı qəbul etdiyi dörd qətnaməyə məhəl qoymayan Ermənistan torpaqlarımızın 20 faizini işğal altında saxlayır. Buna baxmayaraq işğalçı dövlətə heç bir sanksiya tətbiq edilmir.

Avstriya Milli Şurasının ikinci prezidenti Karlheinz Kopf səfər zamanı nümayəndə heyətinə göstərilən yüksək qonaqpərvərliyə görə minnətdarlığını bildirmişdir. O, qeyd etmişdir ki, xalqlarımız arasında əlaqələrin qədim tarixi vardır və münasibətlərimizin bu gün də bütün sahələrdə inkişaf etməsi çox sevindiricidir.

Qonaq Azərbaycanın qısa müddətdə bu qədər nailiyyət qazanmasını yüksək qiymətləndirmiş və Avropaya inteqrasiya istiqamətində ölkəmizə daim dəstək göstərməyə hazır olduqlarını söyləmişdir.

Görüşdə qarşılıqlı maraq doğuran məsələlər ətrafında fikir mübadiləsi aparılmışdır.

Azərbaycan.-2014.- 2 aprel.- S.1.