Bakıda Dünya Turizm Təşkilatı Avropa Komissiyasının 57-ci iclası çərçivəsində “Səmərəli turizm klasterlərinin inkişafı” mövzusunda seminar keçirilmişdir

Aprelin 3-də Bakıda BMT-nin Dünya Turizm Təşkilatı (UNWTO) Avropa Komissiyasının 57-ci iclası çərçivəsində “Səmərəli turizm klasterlərinin inkişafı” mövzusunda seminar keçirilmişdir.

AzərTAc xəbər verir ki, seminarda, ümumilikdə, 31 ölkənin, həmçinin Dünya Turizm Təşkilatının nümayəndələri, ekspertləri, Avropa ölkələrinin aidiyyəti qurumlarının nümayəndələri iştirak etmişlər.

Mədəniyyət və turizm naziri Əbülfəs Qarayev Dünya Turizm Təşkilatının 57-ci iclasının və seminarın Azərbaycanda təşkil edilməsini yüksək qiymətləndirmişdir. Nazir bildirmişdir ki, bu tədbirlər turizm sahəsində təcrübə və fikir mübadiləsinin aparılması, ölkələrarası əməkdaşlığın genişləndirilməsi baxımından çox əhəmiyyətlidir. Eyni zamanda, bu tədbirlər Azərbaycanın turizm potensialını Avropada təbliğ etməyə geniş imkan yaradır.

Son illər Azərbaycanda turizmin inkişafı baxımından görülmüş işlərdən söz açan Ə.Qarayev bildirmişdir ki, bu sahənin inkişafı Prezident İlham Əliyevin diqqət mərkəzindədir. Dövlətimizin başçısının tapşırığı əsasında beş il bundan əvvəl əsası qoyulan və bu gün minlərlə turistin ən gözəl istirahət mərkəzinə çevrilmiş Qusardakı Şahdağ Qış-Yay Turizm kompleksinin istifadəyə verilməsini Azərbaycanın turizm sahəsində böyük uğuru kimi qiymətləndirən nazir demişdir ki, hazırda bu sahənin inkişafı ilə bağlı işlər davam etdirilir.

Azərbaycanda olmasından məmnunluğunu ifadə edən Dünya Turizm Təşkilatının baş katibi Taleb Rifai ölkəmizin turizmin inkişafına verdiyi dəyərli töhfələrdən söz açmışdır.

Prezident İlham Əliyevin turizmin inkişafına göstərdiyi diqqət və qayğını yüksək qiymətləndirən natiq vurğulamışdır ki, məhz bu işlər nəticəsində Azərbaycanda viza rejimi sadələşdirilmiş və ölkədə elektron viza sisteminin tətbiqinə başlanılmışdır. Bütün bunlar olduqca təqdirəlayiq işlərdir.

Dünya Turizm Təşkilatının baş katibi demişdir ki, qarşıdakı illərdə Azərbaycanın ev sahibliyi edəcəyi birinci Avropa Oyunları, IV İslam Həmrəyliyi Oyunları, eləcə də digər beynəlxalq tədbirlər ölkənin nüfuzunu artırmaqla yanaşı, buraya gələn turistlərin sayında ciddi artıma da müsbət təsir edəcəkdir.

Müasir dünyada klasterlərdən istifadənin vacibliyinə toxunan Taleb Rifai demişdir ki, bu, turizm sahəsində müxtəlif vasitələrdən səmərəli istifadəni təbliğ edir. Bu mütləq dəstəklənməlidir ki, turistlər bundan yararlana bilsinlər. Yeni klasterlərdən səmərəli istifadə Avropa turizminin inkişafına böyük təkan vermişdir. Klasterlərin tətbiqi çox sayda insanın turizmə cəlb edilməsinə və onların səmərəli səyahətinə xidmət edəcəkdir. Hökumət bu işə dəstək verməsə, bu uğurlu olmayacaqdır. İnanıram ki, bu seminarda iştirak edən ekspertlər iştirakçılara seçilmiş mövzuya uyğun dəyərli məlumat verəcəklər.

Dünya Turizm Təşkilatının baş katibi Taleb Rifai seminarın işinə uğurlar arzulamış və bir sıra təkliflərini səsləndirmişdir.

Qeyd edək ki, Dünya Turizm Təşkilatı Avropa Komissiyasının 57-ci iclasının və bu tədbir çərçivəsində seminarın keçirilməsi ilə bağlı qərar Avropa Komissiyasının 56-cı iclasında qəbul edilmişdir. Həmin iclasda Azərbaycan Respublikasının mədəniyyət və turizm naziri Əbülfəs Qarayev ilə Dünya Turizm Təşkilatının baş katibi Taleb Rifai arasında tədbirin Bakıda keçirilməsinə dair saziş imzalanmışdır.

Azərbaycan.-2014.- 4 aprel.- S.4.