Ailə, Qadın və Uşaq Problemləri üzrə Dövlət Komitəsinin

sədri Goranboy şəhərində vətəndaşları qəbul etmişdir

Azərbaycan Respublikasının Prezidenti İlham Əliyevin tapşırıq və tövsiyələrinə uyğun olaraq mərkəzi icra hakimiyyəti orqanlarının rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı müraciət, ərizə və şikayətlərinin müsbət həll edilməsi üçün müvafiq tədbirlər görürlər.

AzərTAc xəbər verir ki, mərkəzi icra hakimiyyəti orqanları rəhbərlərinin 2014-cü ilin aprel ayında şəhər və rayonlarda vətəndaşların qəbulu cədvəlinə uyğun olaraq aprelin 15-də Ailə, Qadın və Uşaq Problemləri üzrə Dövlət Komitəsinin sədri Hicran Hüseynova Goranboy şəhərində vətəndaşları qəbul etmişdir.

Yeni Azərbaycan Partiyası Goranboy rayon təşkilatının inzibati binasında keçirilən qəbulda Goranboy, Tərtər, Bərdə rayonlarının sakinləri, eləcə də Laçın və Xocalı rayonlarından olan məcburi köçkünlər iştirak etmişlər.

Komitə sədri qəbula gələn vətəndaşların hər birini diqqətlə dinləyərək onların müraciətlərinin həlli üçün müvafiq göstərişlər vermişdir. Müraciətlər əsasən əlil uşaqların müalicəsi, qızların təhsildən yayınması, erkən nikah və boşanmaların yaratdığı problemlər, qadınların işlə təminatı, qadın və uşaq hüquqlarının müdafiəsi, alimentlərin ödənilməsindəki çətinliklər və digər məsələlərlə bağlı olmuşdur.

Qəbul zamanı qaldırılan məsələlərin bəziləri yerindəcə həll edilmişdir. Komitənin səlahiyyətlərinə aid olmayan müraciətlər isə müvafiq orqanlara çatdırılmaq üçün qeydiyyata alınaraq nəzarətə götürülmüşdür.

Azərbaycan.-2014.- 16 aprel.- S.5.