Qayğı bizə güc verir

Dövlət başçısına minnətdarlıq

Bütün münaqişə və müharibələr təkcə dağıntılar, ərazi ilhaqları, bəşəriyyətin ən ülvi varlığı olan insan övladının sadəcə məhvi deyil, onların düçar olduqları qəddarlıq və dəhşətlərin də səbəbidir. Ermənistan-Azərbaycan, Dağlıq Qarabağ münaqişəsinin elan olunmamış müharibəyə keçdikdən sonra dağıdıcı, məhvedici terror və qətliamlar nəticəsində 20 min azərbaycanlı həlak olmuş, 4866 nəfər itkin düşmüş, 100 min nəfər yaralanmış, 50 min nəfər müxtəlif dərəcəli xəsarət alaraq əlil və şikəst olmuşdur. Bu təcavüz eyni zamanda Azərbaycan üçün 17 min kvadratkilometr ərazinin (əsasən məhsuldar və təbii sərvətlərlə zəngin) torpaqların işğalı, 900 yaşayış məntəqəsinin və s. dağıdılması, bütünlüklə məhv edilməsi deməkdir.

Əlbəttə, müstəqilliyini yenicə bərpa edən Azərbaycan dövləti və xalqı üçün bu münaqişə həmçinin ölkəyə sosial-iqtisadi və mədəni problemlər də gətirdi. Lakin əsası ulu öndər Heydər Əliyev tərəfindən qoyulan və Azərbaycan Prezidenti İlham Əliyevin çox uğurla davam etdirdiyi məqsədyönlü siyasət nəticəsində dövlətimizin nail olduğu sosial-iqtisadi inkişaf ölkənin bütün sahələrdəki problemlərinin həllini də mümkünləşdirdi. İlk növbədə Ermənistanın təcavüzü nəticəsində doğma, ata-baba yurd-yuvasından didərgin düşmüş bir milyon qaçqın və məcburi köçkünün həyat şəraitinin yaxşılaşdırılması və sosial-məişət problemlərinin həlli diqqət mərkəzində saxlanıldı. Təcavüzün ilk illərində salınmış çadır düşərgələri ləğv edilərək məcburu köçkünlər üçün yeni, müasir, bütün infrastruktura malik qəsəbələr və yaşayış məntəqələri tikildi. Bu qayğıdan məcburi köçkünlərlə yanaşı, torpaqlarımızın müdafiəsi uğrunda qəhrəmancasına vuruşub əlil və şikəst olanlara, eyni zamanda şəhid ailələrinə də pay düşdü.

İqtisadi inkişaf sürətinə görə nəinki Cənubi Qafqazda, hətta bir sıra Avropa dövlətləri arasında liderliyini qoruyub saxlayan Azərbaycanın bu istiqamətdə yürütdüyü sosial-mədəni siyasət nümunəyə çevrildi.

Azərbaycan Prezidenti İlham Əliyevin mart ayında, UNESCO-nun qeyri-maddi irs siyahısına düşən, xalqımızın ümummilli bayramı olan Novruz ərəfəsində imzaladığı növbəti fərman və sərəncamlar bir daha dövlət başçısının bu kateqoriyadan olan vətəndaşlara diqqət və qayğısının daimiliyini göstərdi. Azərbaycan Respublikası Prezidentinin 17 mart 2014-cü il tarixli "Müharibə əlillərinə Azərbaycan Respublikası Prezidentinin təqaüdü"nün artırılması və "Müharibə əlillərinə Azərbaycan Respublikası Prezidentinin təqaüdü"nün təsis edilməsi haqqında" Azərbaycan Respublikası Prezidentinin 2008-ci il 9 sentyabr tarixli fərmanında dəyişiklik edilməsi barədə fərmanda göstərilir ki, müharibə əlillərinə verilən Azərbaycan Respublikası Prezidentinin təqaüdünün aylıq məbləği artırılaraq I qrup müharibə əlillərinə 150 manat, II qrup müharibə əlillərinə 130 manat, III qrup müharibə əlillərinə 100 manat müəyyən edilsin.

Azərbaycan Respublikası Prezidentinin "Azərbaycan Respublikasının ərazi bütövlüyünün, müstəqilliyinin və Konstitusiya quruluşunun müdafiəsi zamanı əlil olmuş və Azərbaycan Respublikasının azadlığı, suverenliyi və ərazi bütövlüyü uğrunda həlak olan, hərbi əməliyyatla əlaqədar itkin düşən və məhkəmə tərəfindən ölmüş elan edilən vətəndaşların uşaqlarının təhsil xərclərinin ödənilməsi haqqında" 18 mart 2014-cü il tarixli sərəncamı ilə isə Azərbaycan Respublikasının ərazi bütövlüyünün, müstəqilliyinin və Konstitusiya quruluşunun müdafiəsi zamanı əlil olmuş və Azərbaycan Respublikasının azadlığı, suverenliyi və ərazi bütövlüyü uğrunda həlak olan, hərbi əməliyyatla əlaqədar itkin düşən və məhkəmə tərəfindən ölmüş elan edilən vətəndaşların Azərbaycan Respublikasının ali təhsil müəssisələrində bakalavriat və magistratura (tibb təhsilində əsas və rezidentura) təhsil səviyyələrində və orta ixtisas təhsili müəssisələrində ödənişli əsaslarla təhsil alan uşaqlarının təhsil müddəti ərzində təhsil haqqı 2014-2015-ci tədris ilindən etibarən Azərbaycan Respublikası Nazirlər Kabinetinin 2010-cu il 25 iyun tarixli 120 nömrəli qərarı ilə təsdiq edilmiş təhsil xərcləri miqdarında dövlət büdcəsinin vəsaiti hesabına ödənilməsi nəzərdə tutulur.

Bu fərman və sərəncamlar ölkə əhalisi, xüsusən müharibə veteranları, şəhid ailələri və məcburi köçkün statuslu Azərbaycan vətəndaşlarının hər biri tərəfindən rəğbət və minnətdarlıq hissi ilə qarşılanır. Kəlbəcərin müdafiəsi illərində Dikyurd, Yellicə, Qaraqaya sərhəd məntəqələrində keşikdə dayanan və erməni təcavüzkarları ilə üz-üzə qalan müharibə veteranı, məcburi köçkün Fərman Bəylərovun ailəsinə də bu qayğıdan pay düşüb. İki övladı ali təhsil müəssisələrində oxuyan (Ramin və Bəhram Bəylərov qardaşları) Fərman Bəylərov dövlət başçısının növbəti dəfə imzaladığı fərman və sərəncamın onların ailəsinə Novruz bayramı töhfəsi kimi dəyərləndirir və minnətdarlığını belə ifadə edir: "Vətəndaşların sosial müdafiəsini düşünən və daim qayğı göstərən dövlətimizin başçısı, Prezident İlham Əliyevin bu dəfə imzaladığı fərman və sərəncam bizi də çox sevindirdi. Bu fərman və sərəncamlar bir daha təsdiqləyir ki, dövlət başçısı hər bir Azərbaycan vətəndaşının Prezidenti olmağa layiqdir. İnanırıq ki, Ermənistanın işğalı altında olan torpaqlarımız düşməndən azad edəcək və orada yenidən məskunlaşma Prezidentin fərman və sərəmcamlarında öz həllini tapacaq. Ona görə də hər bir Azərbaycan vətəndaşı dövlətimizin və onun güclü iradəyə malik başçısının ətrafında sıx birləşib".

Məhəmməd NƏRİMANOĞLU,

Azərbaycan.-2014.- 18 aprel.- S.4.