“Qonaq qonağı sevər, ev yiyəsi hər ikisini”

Ölkə rəhbərinin 2011-ci ili “Turizm ili” elan etməsi ilə respublikanın turizm bazarında canlanma yarandı. Turizmin inkişafına təkan verən bu sərəncamın uğurlu nəticəsi idi ki, ölkəyə turist axını daha da gücləndi, səyahət-istirahət istiqamətlərində uğurlu yeniliklərə imza atıldı. Paytaxt və regionlarda keçirilən beynəlxalq tədbirlərin turizmin inkişafında oynadığı əvəzsiz rolu bir fakt kimi əsas tutaraq deyə bilərik ki, Azərbaycan öz qonaqlarına qüsursuz xidmətin ən gözəl nümunəsini göstərdi. Bu reallıq Dövlət Statistika Komitəsinin 2013-cü il üçün hazırladığı əvvəlki illərlə müqayisəli təhlilində statistik rəqəmlərdə də öz əksini tapıb.

Belə ki, komitənin yaydığı məlumata görə, 2013-cü ildə əvvəlki illə müqayisədə mehmanxana və mehmanxana tipli müəssisələrdə yerləşdirilmiş şəxslərin sayı 6,6 faiz artaraq 666,3 min nəfər olub. Onların da 59,3 faizi xarici ölkə vətəndaşlarıdır.

Mehmanxana və mehmanxana tipli müəssisələrdə müvəqqəti yerləşmə xidmətindən yararlananların əsas hissəsi (82,1 faiz) turizm məqsədilə səfər edənlər olub. Turistlərin 41,4 faizi istirahət və əyləncə, 42,6 faizi işgüzar məqsədlə səfər edib. İstirahət və əyləncə məqsədilə Bakı şəhəri, Naxçıvan Muxtar Respublikası, Xaçmaz, Quba, Qəbələ, Şəki, Şamaxı, Balakən, Mingəçevir, Masallı, Lənkəran, İsmayıllı və Lerikə səfər edənlərin sayı daha çox olub.

2013-cü ildə mehmanxana və mehmanxana tipli müəssisələrdə 395,5 min nəfər xarici ölkə vətəndaşı gecələyib. Onların əsas hissəsini Rusiya, Böyük Britaniya, Türkiyə, Amerika Birləşmiş Ştatları, Almaniya, İran, Ukrayna, Gürcüstan, Fransa, Çin, İtaliya və Qazaxıstan vətəndaşları təşkil edib.

Mehmanxanalarda qalan əcnəbilərin 79,1 faizi ölkəmizə turizm məqsədilə səfər edib. Ötən illə müqayisədə bu müəssisələrin xidmətlərindən istifadə edən Rusiya, ABŞ, Gürcüstan, Fransa, Hindistan, İsveç, İtaliya, Türkiyə, İran, Niderland, Kanada Norveç, Ukrayna, Qazaxıstan və Rumıniya vətəndaşlarının sayında daha çox artım müşahidə olunub.

Komitənin yaydığı son statistik məlumatlara görə, ötən il Azərbaycanda fəaliyyət göstərən mehmanxana və mehmanxana tipli müəssisələrin gəlirlərində də artım müşahidə olunur. Belə ki, onların gəlirləri 2012-ci illə müqayisədə 11,2 faiz artaraq 171,3 milyon manata çatıb. Gəlirlərin 64,7 faizi nömrələrin satışından, 23,4 faizi içkilər də daxil olmaqla, qida məhsullarının satışından, qalan hissəsi isə digər xidmətlərin göstərilməsindən əldə edilib. Müəssisələrin xərcləri 31,4 faiz artaraq 145,5 milyon manat təşkil edib. Qeyd edək ki, 2013-cü ildə ölkədə 530 mehmanxana və mehmanxana tipli müəssisə fəaliyyət göstərib.

2013-cü ildə ölkə üzrə mehmanxana və mehmanxana tipli müəssisələrin yüklənmə səviyyəsi 13,5 faiz təşkil edib. Bu göstərici Bakıda, Naxçıvan Muxtar Respublikasında, Ağstafa, Qəbələ, Masallı, Xaçmaz, Lənkəran, Quba, Şamaxı, Qax, Qusar, Şəki və digər rayon və şəhərlərdə nisbətən daha yüksək olub.

Prezident İlham Əliyevin müasir dünyanın diqqət mərkəzində duran turizm sahəsinə xüsusi qayğı ilə yanaşdığı bir zamanda sadalanan uğurların qısa müddət ərzində qazanılması səmərəli fəaliyyət göstəricisi kimi bir örnəkdir. Bir zamanlar belə bir deyim var idi: “Qonaq qonağı sevməz, ev yiyəsi heç birini”. Ölkədə turizmin inkişafı və Azərbaycan qonaqpərvərliyi fonunda bu deyimin dəyişərək “Qonaq qonağı sevər, ev yiyəsi hər ikisini” kimi səslənməsi reallığa uyğundur.

Məmməd AĞAYEV,

Azərbaycan.-2014.- 20 aprel.- S.8.