Qonağa, «xoş gəldin» demək azərbaycanlıların adətidir

Yaxud Qubada formalaşan turizm brendi

Füsunkar təbiəti, əlverişli coğrafi mövqeyi ilə Azərbaycan hələ qədimdən dünyanın diqqətini özünə cəlb edib. Məhz bunun nəticəsidir ki, məşhur səyyahların gündəliklərində Azərbaycanın adına rast gəlinir, ölkəmizin nadir təbiət gözəlliklərindən, maddi mədəniyyət abidələrindən, təbii sərvətlərindən geniş söz açılır. Böyük İpək yolunun keçdiyi əsas ölkələrdən olan Azərbaycana tarixən diqqət kifayət qədər yüksək olub. Bu isə daha çox sayda əcnəbilərin ölkəmizə gəlişini stimullaşdırıb.

Azərbaycan həm də böyük turizm potensialı olan ölkə kimi diqqət çəkir. Xalqımızın tarixən qonaqpərvər xüsusiyyəti ilə seçilməsi, son illər ərzində turizm sahəsində uğurla həyata keçirilən dövlət siyasəti, infrastruktur layihələrinin gerçəkləşdirilməsi Azərbaycana marağın daha da yüksəlməsinə səbəb olub. Bu gün turizmin sürətlə inkişaf etdiyi Azərbaycanda xeyli iş görülür, istirahətə və səyahətə gələnlər üçün lazımi şərait yaradılır.

Azərbaycan neft-qaz ölkəsi olmaqla yanaşı, burada qeyri-neft sektorunun, xüsusilə aqrar sahənin və turizmin inkişafı üçün geniş imkanlar var. Turizmin daha sürətli inkişaf etdirilməsi məqsədilə həyata keçirilən dövlət siyasəti, atılan addımlar öz səmərəsini verir. Ölkəmizdə 2011-ci il "Turizm ili" elan edilmiş və bu sahədə görülən işlərin miqyası daha da genişləndirilmişdir.

Turizmin inkişafında regionların xüsusi çəkisinin davamlı surətdə artması isə bölgələrdə əhalinin maddi rifah halının yüksəlməsinə təsirsiz ötüşmür, rayonların ümumi iqtisadi inkişafı prosesində oynadıqları rolu daha da yüksəldir. Əsrarəngiz təbiətə malik olan Azərbaycanın şimal rayonları, o cümlədən də Quba hər zaman turistlərin maraq göstərdiyi sevimli məkanlar sırasında yer alıb. Bu yerlər təkcə təbii gözəllikləri ilə yox, həm də qədim tarix-mədəniyyət abidələri, sənətkarlıq nümunələri ilə də məşhurdur. İnsanı valeh edən meşələrlə örtülü dağların qoynunda yerləşən, şəlaləli çayları, soyuq bulaqları olan Quba rayonu səyahət həvəskarlarının, təbiət vurğunlarının, turistlərin ən çox xoşladıqları məkanlardandır.Təkcə onu demək kifayətdir ki, isti yay günlərində, hətta şaxtalı, qarlı havada paytaxtdan şimal istiqamətində gedən yolda maşınlar sıralanır.

Bakıdan 150 kilometr şimalda yerləşən, Şahdağın ətəklərində qərar tutmuş Quba nəinki Azərbaycanın, eləcə də bütün Qafqazın gözəl guşələrindən biridir. İlin bütün fəsillərində burada səyahətə çıxan minlərlə təbiət həvəskarına rast gəlmək mümkündür. İsti aylarda gözəlliyi ilə göz oxşayan meşələri, qışda ağappaq qara bürünmüş dağ və dərələri buraya yolu düşənləri ovsunlayır, onları təkrar-təkrar bu diyara qayıtmağa məcbur edir.

Dövlət tərəfindən bu rayonda da turizm potensialının gücləndirilməsinə böyük diqqət göstərilir. Quba Olimpiya İdman Kompleksi, SPA mərkəzləri, Xınalıq kəndi, qədim xalçaçılıq sənətinin inciləri rayonun simasının təzahürləridir.

Quba rayon mədəniyyət və turizm mərkəzinin əməkdaşı Mətləb Şıxbabayev bizimlə söhbətdə dedi ki, Qubadakı istirahət mərkəzləri ilin bütün fəsillərində fəaliyyət göstərir. Rayonda bu sahədə çalışanlar vaxtaşırı xüsusi kurslarda iştirak edir, təcrübələrini artırırlar. İstirahət mərkəzlərinin təkcə xarici görkəmi deyil, daxili xidmətləri də müasir qaydalara cavab verməlidir. Qubada buna xüsusi diqqət yetirirlər.

Qubanın coğrafi mövqeyi, təbii şəraiti elədir ki, hamının diqqətini cəlb edir. Bu yerlərdə turizmin daha geniş miqyas alması, inkişafı üçün hər cür şərait var. Əlaqədar təşkilatların əsas vəzifəsi bu səfalı guşələrdə, əsrarəngiz təbiətin qoynunda istirahətin və xidmətin təşkilinin müasir tələblər səviyyəsində qurulmasına nail olmaqdan ibarətdir.

Respublikamıza təşrif buyuran turistlərin böyük bir hissəsi məhz bu bölgəni seçir. Onu da bildirək ki, turist təkcə pul xərcləyən deyil, həm də informasiya daşıyıcısıdır. Turistin səfər etdiyi yerlərin təbiəti, yol-rizi, səfalı bulaqları barədə öz ölkəsinə daşıdığı məlumatın əhəmiyyəti böyükdür. İstirahət zamanı qarşılaşdığı və yaxud heç vaxt görmədiyi qeyri-adi nə varsa, bunları yaddaşında saxlayan turist özündən sonra həmin yerlərə yeni axının təşkilatçısına çevrilir.

M.Şıxbabayev bildirdi ki, digər bir məsələ süfrə mədəniyyətinə diqqət yetirilməsidir. Milli adət-ənənəmizə, mətbəxdə, süfrədə səliqə-sahmana, nəzakətli davranışa xüsusi fikir verilməlidir. Turizm mövsümünün əvvəllərində əməkdaşlarımız "Məstərgah", "Nazlı bulaq", "Retro", "Şane", "Cənnət bağı" istirahət mərkəzlərində olaraq, müasir tələblərin yerinə yetirilmə qaydalarını yoxlamışlar. Nəticələr ürəkaçandır, çünki hələ keçən ildən başlayaraq yaradılan kurslarda təcrübə toplayan gənclər xidmət qaydalarına yiyələnmişlər.

İyun ayından başlayaraq həftənin şənbə və bazar günləri Qubanın mərkəzində xüsusi konsert proqramları təşkil edilir. Girəcəkdə inşa edilən möhtəşəm Heydər Əliyev seyrəngahında hər gün onlarla xarici ölkədən gəlmiş turistlərlə rastlaşmaq mümkündür. Buradakı Heydər Əliyev və gənclər mərkəzləri, yaşıl teatr, əzəmətli musiqili fontan qonaqların yaddaşında xüsusi izlər buraxır. Həmçinin dövlət rəmzləri, tariximiz barədə məlumatlar səsləndirilir. Tədbirlərdə Azərbaycanın tanınmış şairlərinin şeirləri oxunur, yazıçıların əsərlərindən səhnələr göstərilir. Axşamlar xüsusi viktorinalar keçirilir. Sonrakı aylarda kəndlərdə konsert proqramları ilə çıxışlar edilir. Konsert proqramlarında təkcə yerli musiqiçilər deyil, respublikanın tanınmış müğəniləri də çıxış edirlər.

Piyada gəzintilər turistlərin ən çox üstünlük verdikləri hərəkət vasitəsidir. Yaşıl meşələr, sıx ormanlar buraya gələnləri, sözün həqiqi mənasında valeh edir. Ayağı həmişə mərmər üstə olanların torpağa ehtiyacı olur. Bəzən onların çoxu çadırlarda qalmağa üstünlük verirlər. Onu da vurğulayaq ki, ölkəmizə təşrif buyuran turistlərin sayının artmasına əsas səbəb iqtisadi yüksəlişimizdir. Təkcə ötən il Qubaya gələn turistlərin sayı əvvəlki onillikdəkindən qat-qat çox olub.

Bu gün Qubanın elə bir kəndini, elə bir guşəsini tapmazsan ki, orada xarici ölkələrdən gəlmiş turistlərlə rastlaşmayasan. Bəzən bu insanlar dəstə-dəstə velosiped, yaxud motosikletlərlə Qubada istirahət etməkdən zövq alırlar.

Nazirlər Kabinetinin bu ilin ilk altı ayının yekunlarına dair keçirilən yığıncaqda Azərbaycan Prezidenti İlham Əliyev bildirmişdir: "Azərbaycanın nefti var və buna görə ölkə iqtisadiyyatı inkişaf edir. Əlbəttə, son illərdə bu amil öz rolunu oynamışdır. Ancaq bizim uğurlu siyasətimizin nəticəsində bu gün neftdən asılılıq böyük dərəcədə aşağı düşmüşdür və ümumi daxili məhsulumuzun böyük hissəsi qeyri-neft sektorunda yaranır".

Respublikamızda həyata keçirilən uğurlu iqtisadi siyasət nəticəsində bu asılılıq azalmaqdadır. Qeyri-neft sektorunun inkişafı neçə-neçə sahədə sıçrayışa səbəb olmuşdur. Turizmin inkişafı bu istiqamətdə xüsusilə diqqəti cəlb edir. Bu gün Qubada təkcə turizm deyil, eyni zamanda milli adətlərimizə uyğun bir brend formalaşır. Gələcəkdə onun daha da inkişaf etdirilməsi gərəkdir. Çünki Şimal bölgəsinin turizm potensialı zəngindir. Qubada bu sahədə işlər isə artıq start vəziyyətindən sonrakı mərhələdədir.

Akif ƏLİYEV

Azərbaycan. - 2014.- 1 avqust.- S. 4.