Stefen Kanitz: Biz Ermənistanın
işğalçılıq siyasətinə artıq dözmək
fikrində deyilik
Almaniyanın
Xristian Demokrat İttifaqının ölkə parlamentindəki
deputatı Stefen Kanitz Avropa Azərbaycan Cəmiyyətinin (AAC)
Ermənistan-Azərbaycan, Dağlıq Qarabağ
münaqişəsinə dair suallarını
cavablandırıb.
Stefen Kanitz BMT Təhlükəsizlik Şurasının məlum qətnamələrini dəstəklədiyini bəyan edib. Almaniyalı deputat deyib ki, beynəlxalq ictimaiyyət Dağlıq Qarabağı Azərbaycan Respublikasının ayrılmaz hissəsi kimi tanıyır. Erməni siyasətçiləri bunun əksinə getməklə odla oynayırlar.
S.Kanitz qeyd edib ki, Avropada ərazi bütövlüyü prinsipinin tətbiqi Ermənistanın Azərbaycana qarşı zorakılığına qədər birmənalı qəbul olunurdu. Ermənistan Azərbaycan ərazisinin böyük bir hissəsini və Dağlıq Qarabağı işğal etməklə, özünü beynəlxalq hüquq standartlarından nəzərəçarpacaq dərəcədə kənarlaşdırıb. Belə bir davranış parlamentarilər tərəfindən xoş qarşılana bilməz.
“Avropa Şurasının Parlament Assambleyası (AŞPA) açıq-aydın bəyan edib ki, Ermənistanın işğalçılıq siyasəti beynəlxalq hüquqa ziddir. AŞPA-nın həmin qətnaməsini rəhbər tutan Almaniya və Avropa münaqişənin həlli istiqamətində Azərbaycanın göstərdiyi səyləri dəstəkləyir. Sovet İttifaqının süqutundan sonra Ermənistan qeyri-qanuni olaraq Azərbaycanın Dağlıq Qarabağ bölgəsini və onun ətrafındakı yeddi rayonu işğal edərək, bir milyona yaxın azərbaycanlını didərgin vəziyyətinə salıb. İnsanların bu acınacaqlı durumuna biganə qalmaq olmaz. Buna görə də biz münaqişənin sülh yolu ilə həlli üçün cəhdlərimizi gücləndirməliyik”, - deyə S.Kanitz vurğulayıb.
Almaniyalı deputat bəyan
edib ki, Avropa ictimaiyyəti Ermənistanın beynəlxalq
hüquqa, insan hüquq və azadlıqlarına qarşı
yönələn hərəkətlərini qətiyyətlə
pisləyir. Ermənistan beynəlxalq səviyyədə məsuliyyət
və cavabdehlik daşıyır. Biz Ermənistanın
işğalçılıq siyasətinə artıq dözmək
fikrində deyilik.
Azərbaycan. - 2014.- 9 avqust.- S. 3.