Azərbaycan ilə Serbiya arasında strateji tərəfdaşlıq xalqlarımızın mənafeyinə uyğundur

Avqustun 12-də Azərbaycan Respublikasının Baş naziri Artur Rasizadə ölkəmizdə rəsmi səfərdə olan Serbiya Respublikasının müdafiə naziri Bratislav Qaşiçin başçılıq etdiyi nümayəndə heyəti ilə görüşüb.

Nazirlər Kabinetinin mətbuat xidmətindən AzərTAc-a verilən məlumata görə, Baş nazir Artur Rasizadə Azərbaycan və Serbiya arasında siyasi, humanitar sahələrdə əlaqələrin yüksək səviyyədə olmasından məmnunluğunu ifadə edərək, iqtisadi və hərbi-texniki sahədə də mövcud imkanlardan geniş istifadənin zəruriliyini vurğulayıb.

Bratislav Qaşiç Azərbaycan ilə Serbiya arasında strateji tərəfdaşlığın xalqlarımızın mənafeyinə uyğun olduğunu qeyd edib. Müdafiə naziri ölkəsində baş verən təbii fəlakət zamanı Azərbaycanın göstərdiyi yardıma görə Serbiya hökuməti adından minnətdarlığını bildirib. O, həmçinin Serbiya dövlətinin bütün beynəlxalq tədbirlərdə hər zaman Azərbaycanın yanında olduğunu, xüsusən Ermənistan-Azərbaycan, Dağlıq Qarabağ münaqişəsində ərazi bütövlüyü və sərhədlərin toxunulmazlığı prinsiplərini birmənalı şəkildə dəstəklədiyini bir daha bəyan edib.

Sonda səmimi görüşə görə dərin təşəkkürünü bildirən serbiyalı nazir respublikamızda sürətli iqtisadi inkişafın şahidi olduğunu diqqətə çatdırıb.

Görüşdə Azərbaycan və Serbiya arasında əlaqələrin perspektivlərinə dair tərəfləri maraqlandıran bir sıra məsələlər ətrafında fikir mübadiləsi aparılıb.

Azərbaycan. - 2014.- 13 avqust.- S. 1.