İsmayıllı məktəblilərinin Yaponiyanın İto şəhərinə səfəri davam edir

Xəbər verdiyimiz kimi, Yaponiyanın İto şəhəri ilə qardaşlaşmış İsmayıllı rayon məktəblilərinin bir qrupu ilk dəfə bu ölkəyə səfərə gəliblər. Artıq 10 gündən çoxdur ki, azərbaycanlı məktəblilər İto şəhərində "İnternational Homestay Club"un nümayəndələri tərəfindən təşkil edilən rəngarəng tədbirlərə qatılır, yaponiyalı həmyaşıdları ilə dostluq əlaqələri qururlar.

İsmayıllı Rayon Təhsil Şöbəsinin müdiri Rasim Orucov səfər barədə təəssüratlarını AzərTAc-ın Yaponiyadakı xüsusi müxbiri ilə bölüşüb.

R.Orucov deyib: "Prezident İlham Əliyevin rəhbərliyi ilə Azərbaycanın beynəlxalq əlaqələri genişlənir. Müxtəlif ölkələr, o cümlədən Yaponiya ilə də dostluq münasibətləri möhkəmlənir. İsmayıllı məktəbliləri ilk dəfə ötən ilin noyabrında Azərbaycanın İsmayıllı rayonu ilə Yaponiyanın Şizuoka prefekturasının İto şəhəri arasında imzalanmış dostluq mübadiləsi haqqında sazişə əsasən, bu şəhərə səfərə gəliblər. Səfərdə İsmayıllı rayonunun 1 və 6 nömrəli tam orta məktəblərinin 6 şagirdi iştirak edir. Bizim şagirdlər artıq bir neçə ildir ki, İto şəhərinin məktəbliləri ilə məktublaşırlar. Bu şəhərlərin bir-birinə yaxınlaşmasında həmin məktublar xüsusi rol oynayıb. Gələn il isə yapon məktəblilərinin İsmayıllı rayonuna səfəri planlaşdırılır. Səfərin ilk iki günündə azərbaycanlı şagirdlər Tokionun görməli yerləri ilə tanış olub, Azərbaycanın Yaponiyadakı səfirliyinə baş çəkiblər. Səfər zamanı yaponiyalı dostlarımız bizə zəngin səfər proqramı hazırlayıblar. Şagirdlərimiz "Homstay" proqramı çərçivəsində həmyaşıdlarının ailələrində yaşayaraq, burada yapon həyat tərzini, ailədaxili münasibətləri və milli mədəniyyəti yaxından öyrənirlər. Azərbaycanlı məktəbliləri İto şəhərinin meri, şəhər parlamentinin sədri qəbul edərək, onlara uğurlar arzulayıblar. Yerli mətbuat şagirdlərimizin İtoya səfəri ilə bağlı geniş məlumatlar yayıb.

Proqrama uyğun olaraq, İto şəhər musiqi məktəbində milli musiqi alətləri haqqında onlara məlumat verilib, oğlanlar əlbəyaxa döyüş növlərinin öyrədildiyi məktəbdə olublar. Azərbaycanlı uşaqlar yapon milli geyimini - kimanonu öz əyinlərində yoxlamaq imkanı da əldə ediblər. Həmçinin uşaqlar İtonun tarixi və görməli yerlərini də ziyarət ediblər, Fuci dağında və Hakone istirahət mərkəzində olublar. İto şəhərinin Turizm Agentliyinin Azərbaycana, İsmayıllı rayonuna dair təşkil etdiyi guşə şagirdlərimizin böyük sevincinə səbəb olub.

Hər il avqustun 8-dən 10-dək İto şəhərində təşkil olunan Angin Maçuriyə - Yay festivalına qatılan məktəblilərimiz burada təbilçilərin müsabiqəsini, digər rəngarəng proqramları və möhtəşəm atəşfəşanlığı da maraqla izləyiblər. Səfərin yüksək səviyyədə təşkilində əməyi olmuş həm Azərbaycan, həm də yapon tərəfinin nümayəndələrinə öz minnətdarlığımızı bildiririk".

Məktəblilərimiz avqustun 13-də Vətənə dönəcəklər.

Vüqar AĞAYEV,

AzərTAc-ın xüsusi müxbiri

Azərbaycan. - 2014.- 12 avqust.- S. 7.