Qafqaz arxeologiyası üçün yenilik: «Qarabağın arxeoloji abidələri xəritəsi» tərtib edilib

Qarabağ ərazisində aparılan arxeoloji tədqiqatların nəticələri açıqlanıb. Arxeologiya və Etnoqrafiya İnstitutunun direktoru Maisə Rəhimova bildirib ki, 2010-2013-cü illərdə Qarabağ düzənliyində, Ağdamın işğal edilməmiş ərazilərində və Ağcabədi rayonunun şimal-qərbində araşdırmalar aparılıb.

Verilən məlumatda göstərilir ki, arxeoloji kəşfiyyat təxminən 990 kvadratmetr ərazini əhatə edir. 169 arxeoloji abidə elektron qeydiyyata alınıb və "Qarabağın arxeoloji abidələri xəritəsi" tərtib edilib. Abidələrin qeydiyyatı ilə yanaşı, 2011-2012-ci illərdə Mədəniyyət və Turizm Nazirliyinin "Azərbərpa" Elmi-Tədqiqat Layihə İnstitutu ilə birgə Füzuli rayonunun Babı kəndindəki XIII-XIV əsrlərə aid Şeyx Babi türbəsində arxeoloji qazıntı və bərpa-konservasiya işləri də aparılıb ki, nəticədə 2700 kvadratmetr ərazidə xanəgah kompleksi tamamilə qazılaraq üzə çıxarılıb.

Ekspedisiya qrupu İsmayılbəytəpə Neolit dövrü yaşayış məskənində 400, Leylatəpə mədəniyyətinə aid Fərmantəpə yaşayış yerində isə 100 kvadratmetr ərazidə arxeoloji qazıntı işləri aparıb. Hər iki abidənin xronoloji dövrünün təyini üçün götürülmüş nümunələr analiz məqsədilə Yaponiya və İsrailin müvafiq laboratoriyalarına göndərilib.

Azərbaycan. - 2014.- 14 avqust.- S. 7.