Sosial sifariş: uşaqlara sevgi dolu bir ev

"SOS Uşaq Kəndləri-Azərbaycan" Assosiasiyasının "Günərzi Qayğı Mərkəzi" layihəsi də bu məqsədi daşıyır

Hər bir körpənin dünyaya gəlişi ailənin sevincinə səbəb olur. Lakin elə ailələr də olur ki, orada dünyaya gələn körpənin taleyi bir sıra səbəblərdən üzünə gülmür. Ona görə də körpələrə və uşaqlara qayğı nəinki dövlətin, eyni zamanda, cəmiyyətin və ictimaiyyətin mənəvi borcuna, sosial sifarişinə çevrilir.

Respublikamızda uşaqların sosial hüquqlarının müdafiəsi və onlara hərtərəfli qayğı özünü bariz şəkildə göstərməkdədir. Nəinki dövlət strukturlarının, eləcə də Qeyri-Hökumət Təşkilatlarının fəaliyyət proqramlarında bu məsələ daim diqqət mərkəzində saxlanılır. Çünki cəmiyyətdə elə ailələr var ki, dünyaya gətirdikləri körpələr həddi-buluğa çatmamış bir sıra problemlərlə üz-üzə qalır, sosial, maddi və mənəvi qayğıya ciddi ehtiyac duyurlar. Bu riski azaltmaq və ailələrin öz problemlərini həll etməsinə kömək baxımından belə uşaqlar üçün yaradılan "SOS Uşaq Kəndləri-Azərbaycan" Assosiasiyası bir sıra layihələr həyata keçirir. Belə sosial təyinatlı layihələrdən biri də adıçəkilən assosiasiyanın Əmək və Əhalinin Sosial Müdafiəsi Nazirliyi ilə birgə əməkdaşlıq çərçivəsində Yevlaxda reallaşdırdığı "Günərzi Qayğı Mərkəzi"dir.

Mərkəz Azərbaycan Respublikası Prezidentinin "Sağlamlıq imkanları məhdud uşaqlara və sosial təhlükəli vəziyyətdə olan, yetkinlik yaşına çatmayanlara sosial xidmət göstərilməsi sahəsində əlavə tədbirlər haqqında" 9 yanvar 2013-cü il tarixli sərəncamına əsasən, Əmək və Əhalinin Sosial Müdafiəsi Nazirliyindən alınan sosial sifarişlə yaradılıb. Ötən ilin avqust-dekabr ayları ərzində kompleks sosial xidmətlər göstərən assosiasiya cari ilin iyulundan isə "Günərzi Qayğı Mərkəzi" layihəsinin icrasına başlayıb.

"SOS Uşaq Kəndləri-Azərbaycan" Assosiasiyası uşaqlara sevgi dolu bir ev bəxş etmək istiqamətində peşəkar fəaliyyətə başlayandan bir çox uğurlu işlər həyata keçirib. Budəfəki layihə isə Yevlax rayonu ərazisində 3-12 yaş arası, çətin şəraitdə yaşayan uşaqların sosial kimsəsizliyinin aradan qaldırılması, onların dövlət uşaq müəssisələrinə yerləşdirilməsinin minimuma endirilməsi, bu tipli ailələrin yardımçısına çevrilməsi məqsədi daşıyır.

"Günərzi Qayğı Mərkəzi"nin əsas məramı Yevlax rayonu ərazisində yerləşən tək valideynli (qəyyumu, himayəçisi olan), ata-anasını itirərək qohumlarının (əmək qabiliyyətli yaşda olan nənə, baba, əmi, dayı, bibi, xala, yetkinlik yaşına çatmış bacı və ya qardaş) himayəsində qalan, birinin əlilliyi və ya xəstəliyi olan, digərinin (və ya hər iki valideyninin) isə daimi iş yerinin olmaması səbəbindən günün çox hissəsini (12-14 saat) günəmuzd qaydada işləyən valideynlərin övladları, həmçinin inteqrativ təhsilə cəlb oluna bilən sağlamlıq imkanları məhdud uşaqlara qayğı göstərməkdir.

Burada məktəbəqədər (3-6 yaş arası) və məktəb yaşlı (7-12) uşaqlardan ibarət iki qrup yaradılıb. Ehtiyaclar nəzərə alınmaqla, mərkəz uşaqların fiziki inkişafına, onların cəmiyyətə uyğunlaşmasına yardım, gündəlik həyat vərdişlərinin aşılanması, maraq və bacarıqlarından asılı olaraq dərnəklərə cəlb edilməsi, asudə vaxtlarının səmərəli təşkili, ev tapşırıqlarının hazırlanmasına kömək kimi vacib xidmətlər göstərilir. Onu da qeyd edək ki, daim sosial risk altında olan uşaq və ailələrə 15 ildən artıq bir dövrdə yüksək keyfiyyətli alternativ qayğı göstərmək assosiasiyanın fəaliyyətinin əsasını təşkil edir. Əlbəttə, burada məqsəd yalnız sadalananlar deyil, eyni zamanda, bu kateqoriyaya aid uşaqların sağlam ruhda böyüməsi, arzuolunmaz yollardan, ziyanlı vərdişlərdən uzaqlaşdırılması, cəmiyyətin tam yararlı üzvünə çevrilməsidir.

Məhəmməd NƏRİMANOĞLU

Azərbaycan. - 2014.- 15 avqust.- S. 6.