Məktəbli formalarını haradan almalı?

Bakı Tikiş Evində hazırlanan məktəbli geyimləri Tokioda fəaliyyət göstərən məktəbli formaları muzeyində nümayiş etdirilir

Məktəblilərin yay tətilinin yekunlaşmasına və şagirdlərin yenidən doğma sinif otaqlarına qayıtmalarına təxminən bir aydan da az vaxt qalır. Bu mərhələdə valideynləri daha çox qayğılandıran, fikirlərini məşğul edən məsələlərdən biri də övladlarına məktəb üçün lazım olan dərs ləvazimatlarının, xüsusən də geyim formalarının alınmasdır.

Lakin əsas məqamlardan biri geyim dəstinin qiymət münasibliyi ilə yanaşı, onların keyfiyyət göstəricilərinin yüksək səviyyədə olmasıdır. Bəs, əsl reallıqda bu istiqamətdə vəziyyət necədir? Hər dəfə biz lazım olan geyim dəstini tapa bilirikmi? Əgər çətinlik yaranmışsa, bəs o zaman nə etməli?

"Baki tikiş evi" ATSC-nin idarə heyətinin sədri Fədail Rəhimov bizimlə söhbətə əvvəlcə rəhbərlik etdiyi müəssisə haqqında məlumatla başladı. Bildirdi ki, təxminən 76 il bundan qabaq - 1937-ci ildən fəaliyyətə başlayan müəssisə ilk dövrdə Volodarskinin, sonra Bakıxanovun adını daşıyan fabrik kimi fəaliyyət göstərib. 1998-ci ildən isə adı və hüquqi statusu dəyişdirilərək "Baki tikiş evi" ATSC kimi fəaliyyətini davam etdirməkdədir. Bu qurum, eyni zamanda, respublikada hərbi əhəmiyyətli müəssisə kimi tanınır. Hələ II Dünya müharibəsi dövründə bu müəssisə arxa cəbhədə göstərdiyi uğurlu fəaliyyətə görə Qırmızı Əmək Bayrağı ordeni ilə təltif olunub. Qeyd olunan peşəkarlıq prinsip etibarı ilə müstəqilliyin ilk illərində də öz müsbət təsirini göstərməyə başlayıb. Müstəqil Azərbaycanın ordusu üçün 1992-ci ildən hərbi formaların tikilməsi həyata keçirilib.

Fikirlərini davam etdirən F.Rəhimov dedi: - Sonradan biz hərbi geyimlərin NATO modelinə keçidi ilə bağlı ulu öndər Heydər Əliyev tərəfindən 1994-cü ildə tapşırıq aldıq. Biz Türkiyə müdafiə nazirliyinə müraciət etdik və düz 2 il həmin geyim modellərinin layihələri üzərində çalışdıq. Bütün kollektivin ümumi səyi nəticəsində reallaşdırılan işlər müsbət nəticə verdi və geyim dəstləri ümummilli lider tərəfindən təsdiqləndi. Beləliklə də keçmiş sovet respublikaları arasında ilk dəfə bizim hərbçilər NATO modelinə keçdilər.

2004-cü ildə isə Daxili İşlər Nazirliyinin sifarişinə əsasən, 2004-2006-cı illərdə milli Azərbaycan polisinin formaları üzərində çalışdıq. Bu dəfə də çalışmalarımız uğurlu alındı. Beləliklə, 2006-cı ildən başlayaraq asayiş keşikçilərimiz milli formalarımızı daşıyırlar.

2010-cu ildə isə Azərbaycan Respublikası Təhsil Nazirliyi və Respublika Valideynlər Şurasının müraciətinə əsasən vahid məktəbli forması layihəsi üzərində işlərə başladıq. Təxminən 60-a yaxın modeldə məktəbli formaları hazırladıq. Bu formaların daha uyğun olanının seçilməsi üçün müəllim və valideynlərlə dəfələrlə görüşlər keçirildi, onların fikir və məsləhətləri dinlənildi. Təklif olunan modellər arasından 4-ü bəyənildi. VII-XI siniflər üçün 1 qız, 1 oğlan və I-VI siniflər üçün 1 qız və 1 oğlan geyim modeli seçildi. Layihə böyük uğur qazandı. Artıq 5 ildir ki, müvafiq istiqamət üzrə işlər davam etdirilir.

Fədail Rəhimov satışa çıxarılan formaların uşaqlar və yeniyetmələr üçün nəzərdə tutulduğunu əsas götürərək geyimlərin materialının keyfiyyətinə məxsusi diqqət yetirildiyini qeyd etdi. Paltarların tikildiyi parçalar Türkiyənin məşhur tekstil şirkətlərindən olan BOSSAdan alınır və beynəlxalq tələblərə cavab verən laboratoriyalarda yoxlanıldıqdan sonra istehsala buraxılır.

Valideynlərin bu formalardan razılıq etmələrindən qürurlandıqlarını bildirən müəssisə rəhbəri geyimin keyfiyyətinə 2 il müddətinə zəmanət verildiyini dedi.

Bütün bunlarla yanaşı, F.Rəhimov üçün narahatlıq doğuran məqamlar da az deyil. Onlardan ən birincisi son dövrlər istehlak bazarına çoxlu sayda saxta məktəbli formalarının daxil olmasıdır. Müsahibimizin dedikləri: - Bu gün təəssüfdoğurucu məqam ondan ibarətdir ki, bir qrup işbazlar Çin Xalq Respublikasının Urumçi vilayətindən üzərinə Bakı Tikiş Evinin (BTE) emblemi vurulmuş, xarici görkəminə görə diqqət yetirmədən seçilməsi çətin olan külli miqdarda məktəbli formaları idxal ediblər. Lakin həmin formaların keyfiyyəti BTE-də istehsal olunanlarla müqayisəyə gəlmir. Təxminən 20 gün geyildikdən sonra Çindən gətirilən bu geyimlər qızarmağa başlayır. Nəticədə valideynlər BTE-yə müraciət edərək formanın keyfiyyətsiz olmasından şikayətlənirlər. Həmin valideynlərə bildiririk ki, biz yalnız ATSC-nin firma mağazalarından alınan geyimlərə cavabdehlik daşıyırıq. Bizim mağazalardan alınan formalar keyfiyyətsiz olarsa, onların qəbzlə birlikdə geri qaytarılacağı halda yeni forma ilə dəyişdirilməsinə hazırıq. Məlumatımıza görə, artıq ölkə ərazisinə saxta yolla bizim ticarət nişanımızdan istifadə edilməklə təxminən 40 min ədəddən çox forma gətirilərək paytaxtın "Binə", "Sədərək", "Bakıxanov", "8-ci km" və digər ərazilərdəki ticarət obyektlərində satışı təşkil olunur.

F.Rəhimov valideynlərə müraciət edərək xahiş etdi ki, əsla gigiyenik və mənşə sertifikatı olmayan məktəbli formalarını almasınlar. Çünki bu formalar aşağı keyfiyyətli parçadan tikildiyindən onlar gigiyenik baxımdan sağlamlıq üçün təhlükəlidir. Riskləri qabaqcadan sığortalamağın yeganə yolu formaların alınması üçün Bakı Tikiş Evinə müraciət etməkdir. Bizim bütün formalar Azərbaycan Dövlət Standartlaşdırma, Metrologiya və Patent üzrə Dövlət Komitəsi tərəfindən təsdiqlənmiş sertifikata malikdir.

Hətta BTE-nin formaları Serbiyadan olan anoloji qurumlardan birinin də marağına səbəb olub. Bu amil əsas götürülərək buradan alınan 2 model məktəbli forması poçtla Yaponiyaya göndərilib. Formalar Tokioda fəaliyyət göstərən məktəbli formaları muzeyinə qoyulub. Bu da müvafiq formaların keyfiyyət göstəricilərindən xəbər verir.

Bu yerdə bir neçə il əvvəl ölkəmizdə geniş şəkildə yayılmış: "Hamı yerli mal alsın, xeyir Vətənə qalsın!" şüar xarakterli çağırışı yada düşür. Doğrudan da, əgər hər hansı yerli məhsul bütün keyfiyyət meyarlarına cavab verirsə və o xüsusi olaraq gələcəyimiz olan uşaqlar üçün nəzərdə tutulubsa, biz ondan nə üçün imtina etməliyik? Məgər milli təəssübkeşliyimizi artırmağın, özümüzə inamın vaxtı çatmayıbmı?

Əli SƏLİMOV

Azərbaycan. - 2014.- 16 avqust.- S.6.