Məktəblilər bölgələri gəzdikcə Vətənimizə daha ürəkdən bağlanırlar

“Ölkəmizi tanıyaq” maarifləndirici tur-aksiyasının iştirakçıları olan Astara və Lerik məktəbliləri avqustun 20-də Gəncə ilə tanışlığı dahi söz ustası Nizami Gəncəvinin məqbərəsində davam etdirdilər.

AzərTAc xəbər verir ki, məqbərəni ziyarət edən şagirdlər burada bələdçi ilə dialoqa girərək onları maraqlandıran suallarla müraciət etdilər. Hər bir sualın cavabından razı qalan ekskursiya iştirakçıları qeydlər də apardılar. Sonra məqbərəni əhatə edən ərazini gəzən məktəblilər görkəmli söz ustadının 870 illik yubileyi ərəfəsində aparılan abadlıq və yenidənqurma işləri ilə tanış oldular. Nizami muzeyində şairin yaşadığı dövrü əks etdirən eksponatlara baxan Astara və Lerik rayonlarının şagirdləri məqbərə qarşısında xatirə şəkli çəkdirdilər.

Günortadan sonra şəhər mərkəzindəki Şah Abbas məscidində, Cavad xan türbəsində, “Çökək hamam” və Karvansarayda olan şagirdlərə bu tarixi-memarlıq abidələri haqqında ətraflı məlumat verildi.

Avqustun 21-də Astara və Lerik məktəbliləri Şəmkir və Göygöl rayonlarına ekskursiyalarını davam etdirəcəklər.

Azərbaycan. - 2014.- 22 avqust.- S. 4.