Azərbaycan mühüm
tranzit ölkəsi kimi
mövqeyini möhkəmləndirir
Bunun üçün
ölkə ərazisində çoxsaylı beynəlxalq və
yerli layihələr həyata keçirilir
Azərbaycanın əlverişli coğrafi mövqeyi onu dünyanın mühüm trazit ölkəsinə çevirib. Ölkəmiz Avropadan Şərqə, Cənubdan Şimala gedən bütün nəqliyyat infrastrukturunun qovşağı funksiyasını yerinə yetirir. Tarixi İpək yolunun bərpasının da təşəbbüskarı biz olmuşuq. Bununla bərabər Azərbaycan Avropaya enerji daşıyıcılarının ötürülməsində də tranzit ölkə kimi strateji əhəmiyyətə malikdir. İmkanlarımız təkcə öz enerji resurslarımızı Qərbə ötürməklə bitmir. Eyni zamanda, Xəzər dənizinin Şərq sahilində olan neft və qaz resurslarının Avropa bazarına ixrac edilməsində də əhəmiyyətli ölkəyik. Bunun nəticəsidir ki, son bir neçə ildə ölkəmizin beynəlxalq aləmdə iqtisadi nüfuzu ilə bərabər, siyasi çəkisi də artıb.
Məlumdur ki, Bakı-Tbilisi-Qars dəmir yolu tikintisinin təşəbbüskarı Azərbaycandır. Bu layihənin gerçəkləşməsinə Azərbaycana düşmən münasibət göstərən bir çox qüvvələr mane olmaq istədilər və maliyyələşməsinə əngəl törətdilər. Prezident İlham Əliyev öz qəti mövqeyini ortaya qoyaraq layihənin Azərbaycan və Gürcüstana aid hissəsinin maliyyələşməsini ölkəmizin vəsaiti hesabına həyata keçirilməsi barədə qərar qəbul etdi. Artıq bu nəhəng layihə başa çatmaq üzrədir. Proqnozlara görə, gələn ildən bu marşrutla yük daşınmasına başlanacaq. Layihənin əhəmiyyəti barədə onu demək kifayətdir ki, Avropadan Asiyaya yüklərin daşınmasında min kilometrlərlə yol qısalacaq, məhsul ixracının maya dəyəri aşağı düşəcək. Beləliklə, ölkəmiz Avropa ilə Asiyanın idxal və ixrac əməliyyatlarının həyata keçirildiyi mühüm tranzit ölkəsi olacaq.
Bakı-Tbilisi-Qars dəmir yolunun yüksək səviyyədə fəaliyyət göstərməsində Ələt Beynəlxalq Dəniz Limanı xüsusi əhəmiyyətə malikdir. Yaxın vaxtlarda bu limanın tikintisinin birinci mərhələsi tamamlanmalıdır. Ələt limanı Xəzər dənizində beynəlxalq əhəmiyyətli ən böyük dəniz limanı olacaq. Limanın fəaliyyətə başlaması Avropadan Asiyanın şərq və cənubuna transit yüklərinin göndərilməsini asanlaşdıracaq.
Qeyd etdiyimiz kimi, ölkəmiz enerji daşıyıcılarının tranziti sahəsində önəmli rol oynayır. Bakı-Tbilisi-Ceyhan neft kəmərindən Azərbaycanla bərabər Orta Asiyanın digər dövlətləri də istifadə edir. Ancaq ölkəmiz bununla kifayətlənmir, neft və qazın nəqlindən şaxələnmiş infrastruktur layihələrinə üstünlük verir. Prezident İlham Əliyev Nazirlər Kabinetinin 2014-cü ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclasında bu sahədə görülən işlərin əhəmiyyətini vurğulayaraq demişdir: "Bu altı ayda neft-qaz sahəsində, xüsusilə "Cənub" qaz dəhlizi ilə bağlı ciddi addımlar atılmışdır. İlkin tenderlər elan edilmişdir. TANAP layihəsinin icrası, demək olar ki, artıq başa çatmışdır. Tikintiyə hazırlıq dövrü çox uğurla gedir. Hesab edirəm ki, biz bu böyük layihəni vaxtında icra edəcəyik. "Cənub" qaz dəhlizinin təşəbbüskarı Azərbaycandır. Bu layihənin icrası nəticəsində həm Azərbaycan, həm də onun qonşuları və Avropa ölkələri böyük fayda götürəcəklər. Azərbaycan bu sahədə də liderlik keyfiyyətlərini göstərmişdir. Bu üç layihə - "Şahdəniz-2", TANAP və TAP Avropanın enerji xəritəsini dəyişdirəcək, Azərbaycanı çox önəmli iqtisadi və enerji tərəfdaşına çevirəcək və ən vacibi, Azərbaycan xalqının bundan sonra da iqtisadi və maliyyə məsələlərinin həlli sahəsində rifahını təmin edəcəkdir. Biz bu layihələrin ixracı nəticəsində bundan sonra ən azı 100 il ərzində qaz ixracatından böyük fayda götürəcəyik və Azərbaycanın dünyadakı rolu daha da artacaqdır".
Hazırda ölkə ərazisində magistral yolların tikintisi
uğurla davam edir. Son vaxtlar
bu sahədə görülən işlərin
keyfiyyətinə də önəm verilir.
İndi nəinki
magistral yollar, kəndlərarası yollar
da beynəlxalq standartlara uyğun tikilir. Bu sahəyə
son dövrlər böyük
məbləğdə vəsait
ayrılır. Prezident tərəfindən
hər ay müxtəlif
bölgələrdə kəndarası
yolların tikilməsinə
vəsait ayrılması
barədə sərəncam
verilir. Bölgələrdə icra edilən
belə infrastruktur layihələri onların
iqtisadi inkişafına
da səbəb olur. Belə ki, abad yolu olan kəndlərdə
turizm sürətlə
inkişaf edir və yerli əhalinin
məşğulluğunu təmin
edir.
İnfrastruktur layihələrinin icrası
yük və sərnişin daşımalarının
ildən-ilə artmasına
təkan verir. Dövlət
Statistika Komitəsindən
verilən məlumatda
qeyd edilir ki, nəqliyyat sektorunda fəaliyyət göstərən təsərrüfat
subyektləri tərəfindən
cari ilin yanvar-iyul ayları ərzində 124,9 milyon ton yük daşınıb. Bu göstərici
ötən ilin müvafiq dövrü ilə müqayisədə
2,5 faiz çoxdur.
Daşınan qeyri-neft
yüklərinin həcmi
isə artıb - 3,6 faiz. Nəqliyyat
vasitələri ilə
daşınan yüklərin
56,2 faizi avtonəqliyyat,
29,4 faizi boru kəməri, 9,8 faizi dəmir yolu, 4,6 faizi dəniz nəqliyyatı vasitələri
ilə həyata keçirilib. Bu sektorda
da qeyri-dövlət müəssisələrinin fəaliyyəti
daha aktivdir. Belə ki, hesabat
dövründə özəl
bölmədə yükdaşımanın
həcmi 4,8 faiz artaraq ümumi
yükdaşımasının 75,8 faizini təşkil edib. Həmin dövrdə nəqliyyatçılar
1 milyard nəfərə
(ötən ilin eyni dövrü ilə müqayisədə
5 faiz çox) sərnişinə xidmət
göstərib. Sərnişinlərin
87,4 faizi avtomobil, 12,3 faizi metro nəqliyyatının xidmətlərindən
istifadə edib.
Yanvar-iyul
ayları ərzində
dəmir yolu ilə daşınan yüklər 12,2 milyon, dəniz nəqliyyatı ilə daşınan yüklər
isə 5,7 milyon ton təşkil edib. Nəqliyyat sektorunda daşımaların
həcminə görə
ən böyük paya malik avtomobil
nəqliyyatıdır. Bu dövrdə avtomobil nəqliyyatı ilə 70,2 milyon ton yük,
878,4 milyon sərnişin
daşınıb. Hava nəqliyyatı
ilə sərnişin
daşınmasında 6 faiz
artım müşahidə
edilib. Magistral neft kəmərləri ilə 27,6 milyon
ton neft nəql edilib və ötən ilin müvafiq dövrü ilə müqayisədə
10 faiz artım qeydə alınıb. Nəqletmənin dörddə üç
hissəsi Bakı-Tbilisi-Ceyhan neft ixracı
kəməri ilə həyata keçirilib.
Magistral qaz kəmərləri ilə
hesabat dövründə
12,7 milyard kubmetr qaz ixrac
edilib ki, bu da ötən
ilin eyni dövrü ilə müqayisədə 9,3 faiz
çoxdur.
Ölkəmizdə nəqliyyat infrastrukturunun daha da inkişaf
etdirilməsi istiqamətində
görülən işlər
uğurla davam etdirilir. Məqsəd, qeyd etdiyimiz
kimi, dünyanın ən mühüm strateji tranzit ölkələri sırasına
qoşulmaqdır. Həyata keçiriləcək
yeni layihələr bizi bu istəyimizə
çatdıracaq. Dövlət
başçısı İlham
Əliyev Nazirlər Kabinetinin son iclasında demişdir: "Nəqliyyat
sektorunun inkişafı
ilə bağlı demək istəyirəm ki, yaxın günlərdə Heydər
Əliyev Beynəlxalq
Aeroportunun yeni
avtovağzal kompleksi istifadəyə veriləcəkdir.
Bu, dünya miqyasında
ən gözəl avtovağzal komplekslərinin
arasında olacaqdır,
həm xarici görünüşü, həm
daxili rahatlığı
çox gözəldir,
ən yüksək standartlara cavab verir. Nəzərə alsaq ki, Azərbaycanda çoxsaylı
beynəlxalq tədbirlər
artıq adi hal alıbdır, əlbəttə, bu aeroportun ölkəmizin ümumi inkişafında rolu çox böyük olacaqdır.
Bu, ölkəmizə bir giriş qapısıdır. Əlbəttə, yeni aerovağzal kompleksinin tikintisi hesab edirəm ki, tarixi hadisədir".
Rüstəm
KAMAL
Azərbaycan. - 2014.- 26 avqust.- S. 3.