«ASAN» brendi
dünya ölkələri
üçün istinad
yeri ola
bilər
"ASAN xidmət" mərkəzlərində göstərilən
xidmət, şəffaflıq,
mədəniyyət ölkəmizin
hər bir yerində özünü
göstərməlidir. Biz ölkəmizi müasirləşdiririk,
ölkəmiz uğurla
inkişaf edir. Hər bir sahədə gözəl nəticələr
vardır və olacaqdır.
İlham ƏLİYEV
"ASAN xidmət" ifadəsi artıq insanların yaddaşına
problemlərinin rahat və operativ qaydada həll edilməsi kimi həkk olunub. "ASAN xidmət" "vahid pəncərə" prinsipinə
əsaslanaraq, əhali
ilə ünsiyyətdə
sivil, mədəni yanaşmanı tətbiq edir. Azərbaycan Respublikasının Prezidenti yanında Vətəndaşlara Xidmət
və Sosial İnnovasiyalar üzrə
Dövlət Agentliyi
"ASAN xidmət" mərkəzlərində
dövlət qurumları
tərəfindən işin
keyfiyyətli yerinə
yetirilməsinə nəzarət
edir. Azərbaycan
Prezidentinin 2012-ci il 5 sentyabr tarixli fərmanı ilə təsdiq edilmiş "Vətəndaşlara
Xidmət və Sosial İnnovasiyalar üzrə Dövlət Agentliyi haqqında Əsasnamə"nin tələblərinə
görə, agentlik standartın yaradılması,
optimallaşdırılması və xidmət göstərən orqanların
nəzarət və qiymətləndirilməsini, bu
sahədə idarəetmə
sisteminin təkmilləşdirilməsini
həyata keçirir.
Elə bunun nəticəsidir ki, bu gün
"ASAN xidmət" mərkəzləri
vətəndaş məmnunluğunun
təmin edilməsi istiqamətində yeni yanaşmanın formalaşdırılmasına,
ölkədə dövlət
qulluqçusu-vətəndaş münasibətlərinin keyfiyyətcə
yeni mərhələyə
keçməsinə xidmət
edir.
"ASAN xidmət"
insanlara xidmət mədəniyyəti aşılayır
"ASAN xidmət" mərkəzlərində vətəndaşlara
göstərilən diqqəti,
şəffaflıq və
operativliyi gərək
gözünlə görəsən
ki, dəyərləndirə
biləsən. Bu dəfə
Yasamal rayonu A.M.Şərifzadə 157 ünvanında
yerləşən 3 saylı
Bakı "ASAN xidmət"
mərkəzinə baş
çəkdik. Burada
da hər iş yüksək səviyyədə təşkil
olunub. Bu reportajda, əsasən, 3 saylı Bakı "ASAN xidmət"
mərkəzində göstərilən
xidmətlərdən və
əməkdaşların fəaliyyətindən
bəhs edəcəyik:
öncə qeyd edək ki, 3 saylı Bakı "ASAN xidmət" mərkəzi
2013-cü il sentyabrın 25-də fəaliyyətə
başlayıb. Bu günə qədər mərkəzə 360 mindən
çox müraciət
daxil olub.
İlk olaraq notarius xidməti ilə tanış olduq. Əməkdaşlar kompüter arxasında
yüksək əzmlə
çalışırdılar. Qrup rəhbəri Xuraman Əliyeva bizimlə söhbətində böyük
məsuliyyətlə işlədiklərini
və vətəndaş
məmnunluğunun çox
önəmli olduğunu
bildirdi. O, iş fəaliyyəti zamanı nəzərə
çarpan bəzi problemlər barədə də danışdı:
"Biz "ASAN xidmət"in prinsipləri əsasında
fəaliyyət göstəririk.
Sovet dövründə daşınmaz
əmlakların qeydiyyatı
ilə bağlı bir sıra problemlər
olub. Əsasən də əmlakın
addan-ada keçirilməsi,
bağışlanması və
vərəsəliklə bağlı
problemlər yaşanıb.
"ASAN xidmət" fəaliyyətə başlayandan
sonra insanların bu sahədəki problemləri bir daha qabarıq şəkildə üzə
çıxdı. Hazırda vərəsəliklə
bağlı "ASAN xidmət"
mərkəzlərinə kütləvi
şəkildə müraciətlər
olur".
Xuraman Əliyeva əlavə etdi ki, vətəndaşların
hüquqi maarifləndirilməsi
ilə bağlı da müəyyən problemlər mövcuddur:
"Yasamal rayonunda aparılan tikinti-quruculuq işlərinin və özbaşına tikililərin
çox olması bu ərazidə qayğıları artırıb.
Bəzi insanların gözləmə mədəniyyəti
bir az
aşağıdır. Bu da sovet dönəmindən
qalan bir psixologiyadır. Bu kimi hallar əvvəlcə
bizə təsir etsə də, indi normal qarşılayırıq.
Çünki insanlar yeniliklərə
tədricən uyğunlaşmalıdırlar.
Bunlar yavaş-yavaş insanlara aşılanmalıdır".
Bəzi xidmətlər barədə
insanlar məlumatsızdır
3 saylı Bakı
"ASAN xidmət" mərkəzində
cari ilin mart ayından etibarən Azərbaycan Respublikasının
Səfərbərlik və
Hərbi Xidmətə
Çağırış üzrə Dövlət Xidmətinin (SHXÇDX) Hərbi
qeydiyyat bölməsi
də fəaliyyətə
başlayıb. SHXÇDX-nin
"ASAN xidmət" mərkəzindəki
müfəttişi Sitarə
Qurbanova dedi ki, burada göstərilən
xidmət hələ ki, hərbi qeydiyyatdan ibarətdir. Yəni hərbi xidmət keçmiş şəxsləri respublikanın
74 rayonundan (Naxçıvan
istisna olmaqla) qeydiyyatdan çıxarıb Bakının
bütün rayonlarına
hərbi qeydiyyata salmaq mümkündür. Sumqayıt isə buraya daxil deyil. Çünki Sumqayıt üzrə
ayrıca "ASAN xidmət"
mərkəzi fəaliyyət
göstərir. Yaxın aylarda
mərkəzdə SHXÇDX-nin digər xidmətlərinin də göstərilməsi gözlənilir.
Müfəttişin sözlərinə görə, Hərbi qeydiyyat bölməsi 3 saylı Bakı "ASAN xidmət" mərkəzində
fəaliyyətə başlayandan
bəri 680 nəfərdən
çox vətəndaş
müraciət edib.
Bunlar sırf qeydiyyatdan çıxıb-düşmə ilə əlaqədar olub.
Əmlak Məsələləri Dövlət
Komitəsinin mərkəzdəki
qrup rəhbəri Elçin Quliyev də göstərilən
xidmətlər barədə
bəzi məqamlara aydınlıq gətirdi. Onun dediyinə görə, torpaqların özəlləşdirilməsi,
fərdi yaşayış
evlərinin ilkin qeydiyyatı kimi məsələlərə hələ
ki "ASAN xidmət"də
baxılmır: "Bu məsələlərlə
bağlı bilavasitə
mühəndislər əraziyə
getməli, araşdırmalıdırlar.
Yəni görüləsi işlər
daha dərin olduğuna görə, hələ ki bu fəaliyyət "ASAN
xidmət"də yer
almayıb. Həmin xidmətlərlə
bağlı bizə müraciətlər çox
olur. Bu da
insanların məlumatsızlığından
irəli gəlir.
Əvvəllər bunlarla bağlı
daha çox müraciət olurdu, indi xeyli azalıb.
Burada göstərilən xidmətlərə
isə fərdi yaşayış evlərinin
çıxarışlarının təkrar qeydiyyatı, texniki pasportların təsdiqi, "Forma 1" arayışlarının
bir gün ərzində verilməsi və s. daxildir. Bütün bunlar elektronlaşmış
şəkildə həyata
keçirilir. Yəni göstərilən
hər bir xidmət, hər bir sənəd birbaşa elektron bazaya ötürülür.
Bunun bir xeyri də
odur ki, notariat birbaşa bizim elektron bazaya daxil olaraq
"Forma 1" arayışını dərhal verə bilir".
"Hələ də inana bilmirəm..."
"ASAN xidmət" mərkəzlərinin ən
operativ xidmətlərindən
biri Daxili İşlər Nazirliyinin
xidmətlərinə aid olan
şəxsiyyət vəsiqəsinin
verilməsi və dəyişdirilməsidir. Təcrübə də göstərir ki, ən çox
vətəndaş müraciəti
məhz şəxsiyyət
vəsiqəsinin alınması
ilə bağlıdır.
Mərkəzə şəxsiyyət vəsiqəsi üçün
gün ərzində
450-500 müraciət daxil
olur. Qrup rəhbərinin sözlərinə
görə, bəzən
vərəndaşlarla münasibət
qarşılıqlı olmur:
"Bizim məqsədimiz
hər kəslə mehriban davranmaq, vətəndaşları xoş
əhval-ruhiyyə ilə
qarşılamaq və
yola salmaqdır. Təəssüflər olsun ki, bəzi vətəndaşlarda
müəyyən aqressiya
hiss olunur. Bu şəxslərin də hər hansı bir yolla problemlərini
çözməyə çalışırıq.
Ümumilikdə isə işlərimiz
tam qaydası ilə davam edir. Tərəfimizdən heç bir
ciddi nöqsan qeydə alınmayıb".
Operativ xidmət
sahələrindən biri
də xarici pasportların verilməsi və dəyişdirilməsidir. Bununla bağlı
3 saylı Bakı
"ASAN xidmət" mərkəzinə
gün ərzində
500-600 müraciət edilir,
200-300 sənəd qəbul
olunur. Müraciətlərin 40 faizi Yasamal
rayonunun payına düşür. Sözügedən bölmənin qrup rəhbəri bildirdi ki, hər zaman
vətəndaşları məmnun
yola salmağa çalışırlar.
Qeyd edək
ki, Bakı şəhəri üzrə
xarici pasportların verilməsi və dəyişdirilməsi ilə
bağlı "ASAN xidmət"
mərkəzləri arasında
heç bir məhdudiyyət yoxdur. Yəni yaşadığı
yerdən asılı
olmayaraq, vətəndaş
istədiyi "ASAN xidmət"
mərkəzinə müraciət
edərək xarici pasport almaq və
ya dəyişdirmək
üçün sənəd
verə bilər.
"Hələ də
inana bilmirəm, heç 5 dəqiqə çəkmədi..." - bir
paytaxt sakininin öz sevincini yoldaşı ilə paylaşdığını eşitdik. Onlara yaxınlaşdıq.
Ziyəddin adlı bu şəxs vaxtı bitmiş sürücülük vəsiqəsini
dəyişibmiş: "ASAN xidmət" barədə
çox eşitmişdim,
açığı, inanmırdım
ki, belə xidmətlər olur. Amma ilk dəfə müraciət
etdim və çox sevindim. Həqiqətən, təqdirəlayiq xidmətdir".
Vətəndaşların məmnunluğunu, gülər
üzünü görüb
xoş əhval-ruhiyyə
ilə 3 saylı Bakı "ASAN xidmət"
mərkəzini tərk
edirik. İnanırıq ki, Azərbaycana
məxsus "ASAN" brendi
yaxın gələcəkdə
ölkəmizin hər
tərəfini əhatə
etməklə, dünya
ölkələri üçün
də bir istinad obyekti olacaq.
Elgün MƏNSİMOV
Azərbaycan. - 2014.- 26 avqust.- S. 7.