Gənclər və idman nazirinin qəbulunda vətəndaşları narahat edən bir sıra məsələlər yerindəcə həllini tapdı

Prezident İlham Əliyevin tapşırığına əsasən, mərkəzi icra hakimiyyəti orqanlarının rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı müraciətlərinin həllinə kömək edirlər.

AzərTAc xəbər verir ki, növbəti belə qəbul avqustun 29-da Mingəçevir şəhərindəki Heydər Əliyev Mərkəzində keçirildi. Gənclər və idman naziri Azad Rəhimov Mingəçevir şəhərindən, Ağdaş, Bərdə, Tərtər, Göyçay, Kürdəmir, Ucar, Zərdab, Yevlax və Ağsu rayonlarından olan vətəndaşları qəbul etdi.

Vətəndaşlar daha çox təmsil etdikləri bölgələrdə idman bölmələrinin açılması, kəndlərdə idman zallarının və futbol meydançalarının tikintisi, mənzil şəraitinin yaxşılaşdırılması, güzəştli ipoteka krediti, işlə təmin olunmaq, gənclər təşkilatlarının yaradılması və qeydiyyata alınması, gənclərin asudə vaxtlarının səmərəli təşkili üçün Gənclər mərkəzlərinin inşası və digər məsələlərlə bağlı müraciət etdilər.

Gənclər və İdman Nazirliyinin müvafiq şöbələrinin, struktur qurumlarının və tabeliyində olan təşkilatların rəhbərlərinin də iştirak etdikləri qəbulda Azad Rəhimov gün ərzində 40-dan çox vətəndaşın müraciətinə baxdı.

Qəbul zamanı vətəndaşları narahat edən bəzi məsələlər yerindəcə həllini tapdı, Gənclər və İdman Nazirliyinin səlahiyyətlərinə aid olmayan müraciətlər isə müvafiq qurumlara çatdırılmaq üçün qeydiyyata alındı.

Sonra nazir Azad Rəhimov Mingəçevir şəhərinin, Ağdaş, Bərdə, Tərtər, Göyçay, Kürdəmir, Ucar, Zərdab, Yevlax və Ağsu rayonlarının gənclər və idman idarələrinin rəisləri ilə də görüşərək onlara qəbulun yekunları ilə bağlı müvafiq tapşırıqlar verdi.

Azərbaycan. - 2014.- 30 avqust.- S.9.