Azərbaycan Hökuməti ilə Dünya Bankı arasında
əməkdaşlıq
məsələləri müzakirə olunub
Dekabrın
15-də Baş nazirin müavini Əli Əhmədov Azərbaycanda
səfərdə olan Dünya Bankının sosial müdafiə
və əmək təcrübəsi üzrə meneceri Andryu
Meysonun rəhbərlik etdiyi nümayəndə heyəti ilə
görüşüb.
Nazirlər Kabinetinin mətbuat xidmətindən AzərTAc-a bildiriblər ki, görüşdə Andryu Meyson son illər Azərbaycanda gedən sürətli iqtisadi inkişafdan məlumatlı olduğunu qeyd edib. O, Azərbaycan hökumətinin bu istiqamətdə daha böyük uğurlara nail olacağına əminliyini diqqətə çatdırıb.
Sonra Azərbaycan Respublikasının Prezidenti İlham Əliyevin 2014 –cü il 4 noyabr tarixli Sərəncamı ilə təsdiqlənmiş “2014-2020-ci illər üzrə Pensiya İslahatı Konsepsiyası”nın icrası istiqamətində görülən işlər ətrafında söhbət aparılıb. Bu mühüm prosesdə Dünya Bankının iştirakı məsələsinə toxunan Baş nazirin müavini Əli Əhmədov belə bir nüfuzlu qurumla sosial müdafiə və məşğulluq sahəsində yeni təşəbbüslərlə bağlı dialoqun genişləndirilməsinə xüsusi önəm verildiyini vurğulayıb.
Görüşdə, həmçinin
Azərbaycan Hökuməti ilə Dünya
Bankı arasında 2008-ci ildə imzalanmış “Sosial Müdafiənin İnkişafı” layihəsi
çərçivəsində həyata keçirilən tədbirlərin
icra vəziyyəti, qarşıda duran vəzifələr və hər iki tərəfi maraqlandıran digər məsələlər
ətrafında fikir mübadiləsi
aparılıb.
Azərbaycan.-2014.- 16 dekabr.- S.3.