AzərTAc və Moskva Dövlət Linqvistika Universiteti

birgə layihələri davam etdirməkdə maraqlıdırlar

AzərTAc və Moskva Dövlət Linqvistika Universiteti (MDLU) birgə layihələrin davam etdirilməsində maraqlıdır.

Bununla bağlı məsələlər MDLU-nun müəllimləri – professor Marina Poletayeva və dosent Lyudmila Barmina ilə AzərTAc-ın baş direktoru Aslan Aslanovun görüşündə müzakirə olunub.

Moskva Dövlət Linqvistika Universiteti AzərTAc-ın dəstəyi ilə Bakıda “Rusdilli jurnalistika: müasir vəziyyət və inkişaf tendensiyası” mövzusunda ixtisasartırma kursları həyata keçirir. Bu məqsədlə Azərbaycana ezam olunmuş müəllimlər müasir jurnalistika və rus dilinin özəllikləri haqqında ölkəmizin müxtəlif media strukturlarını təmsil edən jurnalistlər üçün təlimlər keçir.

Görüşdə qeyd olunub ki, agentliyin bir neçə əməkdaşı dövlət proqramı çərçivəsində MDLU-da müasir jurnalistika ixtisasına yiyələnib. AzərTAc, eyni zamanda Rusiyanın TASS agentliyi ilə sıx əməkdaşlıq edir, mütəmadi olaraq təcrübə mübadiləsi həyata keçirir. Yüksək tolerantlıq mühitinin hökm sürdüyü Azərbaycanda rus dili və mədəniyyətinə qayğı ilə yanaşılır, AzərTAc rus dilində informasiya buraxılışına böyük önəm verir.

Universitetin kafedra müdiri, professor Marina Poletayeva MDLU-nun rektoru İrina Xaleyevanın adından kursların təşkilinə görə AzərTAc-a minnətdarlığını çatdırdı. O qeyd etdi ki, müasir jurnalistika və rus dilinin dinamik inkişafı belə təlimlərin keçirilməsini zəruri edir. M.Poletayeva Azərbaycan jurnalistlərinin təlimlərdə fəallıq göstərdiyini, hazırlıqlı mütəxəssislər olduğunu vurğuladı. Professor gələcəkdə də AzərTAc və MDLU-nun bu kimi birgə layihələr keçirməsinin maraqla qarşılanacağına əminliyini ifadə etdi.

Görüşdə qonaqlara Azərbaycanın tarixi, mədəniyyəti, keçdiyi inkişaf yolu, Dağlıq Qarabağ münaqişəsi, AzərTAc-ın beynəlxalq media təşkilatlarında fəaliyyəti haqqında da məlumat verildi, müasir jurnalistika ilə bağlı fikir mübadiləsi aparıldı.

Azərbaycan.-2014.- 25 dekabr.- S.6.