“Məktəbi-tərbiyə” yaratmaqla “xalq
müəllimi” adını qazandı
Məhəmməd Tağı Sidqi
-160
XIX əsrin sonuncu onilliyinin əvvəlində kiçik bir əyalət şəhəri, əslində isə şeir-sənət ocağı, qədim mədəniyyət və memarlıq məskəni olan Ordubadda yeni bir maarif işığı yanmağa, ziya çeşməsi qaynamağa başladı. Burada “Əxtər”, yəni, “Ulduz” adlı yeni məktəb yaradıldı. Bu məktəbi yaradan Məhəmməd Tağı Səfərov (Sidqi) idi. Həmin Sidqi ki, sonralar xalq ona “böyük ustad”, “xalq müəllimi” adını verdi.
Görkəmli maarifçi mütəfəkkirin yaydığı savad, bilik ziyası bütün Naxçıvanı bürüdü. Sidqi həqiqətən də xalqın savadlanmasına böyük qüvvə sərf etdi, klassik maarifçilərlə yeni nəsil maarifçiləri arasında varislik körpüsü saldı. O, Azərbaycanda milli maarifçiliyin inkişafında ən yaxşı ənənələri yaradanlardan oldu. Ulu öndər Heydər Əliyev maarif fədaisinin xidmətlərini yüksək dəyərləndirərək demişdir: “Naxçıvanda təhsilin, ümumiyyətlə, mədəniyyətin inkişafında mütəfəkkir Məhəmməd Tağı Sidqinin böyük rolu olmuşdur”.
Məhəmməd Tağı Kərbəlayi Səfər oğlu Səfərov Azərbaycan tarixinə maarifçi, pedaqoq, şair, publisist kimi daxil olmuşdur (Sidqi onun təxəllüsü idi). 1854-cü il martın 22-də Ordubad şəhərində dünyaya göz açmışdı. Mədrəsə təhsili almasına baxmayaraq, klassik Şərq poeziyasını və fəlsəfəsini mükəmməl öyrənmişdi. O, gənclik dövründə ailəsini dolandırmaq üçün ticarətlə məşğul olmuş, çalışdığı yer birbaşa təyinatından daha çox ziyalıların, ədəbiyyat həvəskarlarının toplaşdığı mədəni mərkəzi, qiraətxananı əvəz etmişdi.
M.T.Sidqiyə tarixi, arxitekturası, abidələri ilə zəngin olan Ordubad kimi zəngin mədəni məkanda doğulmaq, yaşamaq səadəti qismət olmuşdu. Tale yolları Sidqini ən əvvəl burada tarixi romanlar ustadı Məmməd Səid Ordubadinin atası, görkəmli şair Fəqir ağanın açdığı yeni üsullu məktəb və yaratdığı “Əncüməni-şüəra” ədəbi məclisinə gətirmişdi.
Sidqi Ordubad ədəbi mühitinin yetirməsi idi. O dövrdə Ordubadda
Hacı Ağa Fəqir, Hüseyn Bikəs, Əliqulu
Münzib, Nəqqaş, Əhmədağa Şəmi,
Hacı Ələsgər, Ələkbər Bəzzaz kimi
ziyalılar yaşayıb yaradırdılar.
1892-ci ildə Sidqi Ordubad şəhərində
İbrahim xan mədrəsəsinin yerləşdiyi binada ana
dilində məktəb açır və onu “Əxtər”
adlandırır. “Əxtər”in yaranması o zaman təkcə
Ordubad üçün deyil, bütün Naxçıvan elləri
üçün əlamətdar hadisəyə çevrilir.
Köhnə mollaxanalardan fərqli olaraq bura dərslərin
ana dilində keçirildiyi bir məktəb idi. O, ruhani
məktəblərindən həm də təlim və tərbiyə
üsulları ilə fərqlənirdi. Burada ana dili, hesab,
coğrafiya, hifzi-səhiyyə, fars və ərəb
dilləri tədris edilirdi. Şagirdlərin
döşəmədə, həsirin üstündə deyil,
partalarda oturması da məktəbdəki yeniliklərdən idi.
Valideynlər qısa zamanda uşaqlarının
savadlandığını görüb sevinirdilər. Beləliklə,
“Əxtər”ə rəğbət də artırdı.
Sidqi məktəb üçün əlyazma
şəklində ana dili, coğrafiya və hesabdan dərsliklər
hazırlamışdı.
Elə həmin
il İrəvan qubernatorunun hesabatına əlavə
olunan icmalda “Əxtər” haqqında da məlumat verilmişdi.
Məktəb haqqında artıq quberniyanın hər
tərəfində geniş təsəvvür var idi.
1894-cü ildə Sidqi dövrün qabaqcıl
ziyalılarının, xüsusilə Cəlil Məmmədquluzadənin
xahişi və təkidi ilə Naxçıvana gəlir. Gəldiyi ilk
gündən də şəhərin mədəni həyatında
fəal iştirak etməyə başlayır. İki
dost həmin ilin sentyabr ayında M.F.Axundzadənin “Hekayəti
Molla İbrahimxəlil kimyagər” komediyasının
tamaşasının oynanılması üçün İrəvan
xalq maarif müfəttişliyinə müraciət edir.
Naxçıvanda Sidqi təbii ki, öz fəaliyyət
meydanını genişləndirmək imkanı qazanır. Camaat burada da
təxminən “Əxtər” kimi bir məktəbin
yaradılması arzusu ilə Sidqiyə müraciət edir.
Məktəb yaradılanda ona Yamxana, Əbrəqunus,
Təzəkənd, Çay Şahbuz, Cəhri, Nehrəm kəndlərinin
ziyalıları dəstək verirlər. Naxçıvanda
eyni quruluşda yaratdığı məktəbə Sidqi “Məktəbi-tərbiyə”
adını verir.
Bu təhsil ocağında dünyəvi fənlər
keçilirdi.
Belə ki, tədrisə hesab, tarix, coğrafiya fənləri,
Azərbaycan, rus, ərəb və fars dilləri
dərsləri daxil edilmişdi. Məktəbdə Azərbaycan,
ərəb və fars dillərini Sidqinin
özü tədris edirdi. Dərs prosesində
istifadə olunan coğrafi xəritə, qlobus, yazı lövhəsi
maraqlı yeniliklər idi.
Yeri gəlmişkən qeyd edək ki, vaxtilə Sidqinin
burada tətbiq etdiyi “Ədəb qaydaları” bu günədək
qorunub saxlanır. O zaman uşaqlara etika dərsləri keçilirdi.
“Məktəbi-tərbiyə”yə hələ ilk dəfə
100-ə qədər şagird qəbul edilmişdi. Bu da məscid
məktəblərinə vurulan zərbə demək idi.
İrəvan qubernatoru 1895-ci ilə aid hesabatında
qeyd edirdi ki, son vaxtlar müsəlmanlar arasında
düzgün təşkil edilmiş məktəb açmaq
sahəsində dönüş hiss edilir. Hesabat
ilində Naxçıvan şəhərində belə bir məktəb
açılmışdır ki, orada rus dili də məcburi fənn
kimi tədris edilir.
1896-cı ildə “Məktəbi-tərbiyə” rus-Azərbaycan
məktəbinə çevrilir və o, xalq məktəblər
direksiyasının tabeliyinə keçir. Sidqi məktəb
müdirliyindən azad edilir. Çünki
müəllimlik üçün şəhadətnaməsi
yox idi, həm də rus dilini yaxşı bilmirdi. Bununla belə, Sidqi məktəbin inkişafına çalışır,
bütün gücünü və bacarığını əsirgəmirdi.
Camaat ona əvvəlki kimi hörmət bəsləyirdi.
Sidqinin ən böyük arzularından biri azərbaycanlı
qızların təhsil alması idi. Uzun sürən mübahisə və
təbliğatdan sonra 1896-cı ildə o, “Qız məktəbi”ni təsis edir. Məktəb fəaliyyətə
başlayanda orada cəmi 8 qız təhsil alırdı.
Sidqi qızlara dünyəvi təhsil verməklə
yanaşı, onlara “Töhfeyi-bənat, yainki qızlara hədiyyə”
əsərini yazır. Mütəxəssislərin
fikrincə, bu əsər indi də tərbiyəvi əhəmiyyətini
itirməyib və onun Azərbaycan pedaqoji fikir tarixində
öz yeri var.
XIX əsrin sonu - XX əsrin əvvəllərində
qızların təhsil alması və oğlanların yeni
üsullu məktəblərdə oxuması bir sıra cahil
mollalar tərəfindən dinə qarşı çıxmaq
kimi dəyərləndirilirdi. M.T.Sidqi isə
camaatı inandırmağa çalışırdı ki, bu
işdə bir qəbahət yoxdur. O, Qurani-Kərimdən
də misal gətirirdi.
Həmin
hadisələrin şahidi olmuş, o dövrdə yeniliklərə
maraq göstərmiş ziyalılardan Məşədi
Zeynalabdin sonralar həmin olayları belə
xatırlayırdı: “Mirzə Tağı müəllimlə
mollaların, müşteyidlərin bərk davası
düşdü... Onlar istəmirdilər ki,
Sidqi müəllim qızları oxutsun. Elə
ki Mirzə Tağı müəllim qızların
oxumasını “Quran”ın da tələb etdiyini camaata oxuyub
göstərdi, daha buna şəkk olmadı”.
Sidqinin maarif fədaisi olması dövrünün
görkəmli şəxsiyyətlərinin nəzərindən
qaçmamış və yüksək qiymətləndirilmişdir. Məsələn, Cəlil
Məmmədquluzadə onun maarif və mədəniyyətin tərəqqisinə
göstərdiyi xidmətlər barədə demişdir:
“Sidqinin Vətənimizə etdiyi qulluğun qədrini bilməkdən
ötrü lazımdır müqabilə etmək
camaatımızın savad və maarif aləmində olan indiki
əhvali ilə on il bundan əqdəm halətini. Tərəqqi çox artıq görünür və
əgər söyləsək ki, bu tərəqqinin onda
doqquzuna bais məhz Sidqidir, insafdan və həqiqətdən
bilmərrə uzaq olmaz. O hörmət və məhəbbət
ki, camaatımız mərhuma göstərirdi, indiyə kimi
heç bir şəxsə göstərməyib...”
Məhəmməd Tağı Sidqinin Azərbaycan maarifi
qarşısındakı xidmətləri yalnız təşkil
etdiyi məktəblərlə bitmir. O, “Tərbiyə” məktəbində
müəllim və müdir kimi fəaliyyət göstərdiyi
müddətdə “Heykəli-insana bir nəzər”,
“Puşkin”, “Kəblə Nəsir” kimi mətbu, “Mənəviyyati-mədəniyyət”,
“Həkimanə sözlər”, “Yüz il yatandan sonra” kimi
ictimai-siyasi, fəlsəfi, etik və elmi-pedaqoji əsərlərini
yazmışdır. Bundan əlavə, o,
“Nümuneyi-əxlaq”, “Coğrafiya xüsusunda məlumati-mücmələ”,
“Tənviri-əfkar” (Fikirlərin işığında),
“Müxtəsər coğrafiya risaləsi” və “Təfhimi-insaniyyət”,
“Töhfeyi-bənat, yainki qızlara hədiyyə” adlı dəyərli
dərsliklər yaratmışdır.
Maraqlıdır ki, maarif mövzusu Sidqinin bədii
yaradıcılığında da öz əksini
tapmışdır. O, məktəbi obrazlı şəkildə “cəhalət
dərdinin dərmanı”, müəllimi isə “cəhalət
bağının bağbanı” adlandırmışdır. Dünyanın abad olmasının elmlə
mümkün olduğunu, digər dilləri öyrənməyin
faydasını, kamil insan olmaq qayəsini poetik şəkildə
çatdırmışdır. Oğlu Məmmədəliyə
ünvanladığı öyüd-nəsihət də bədii
şəkildə ifadə olunmuş tərbiyəvi əhəmiyyətli
əsərdir.
Məhəmməd
Tağı Sidqinin yaradıcılığında ata-anaya
hörmət və övlada qayğı məsələlərini
araşdıran pedaqogika üzrə fəlsəfə doktoru
Kamal Camalov yazır: “Məhəmməd Tağı Sidqi istəyirdi
ki, qızlarımız əqidəli, doğrucul, vətənpərvər,
milli mentalitetimizi sevən və onu yad təsirlərdən
qoruyan qadınlar kimi böyüsünlər. Bunun
üçün də qızlarımızın özlərinin
tərbiyə görməyə ehtiyacı vardı. Bu ehtiyacı da ancaq “analar yetişdirəcək məktəblər”
ödəyə bilər. Pedaqoq Sidqi
qadının - qızların təhsil almasını vacib
bilir və göstərirdi ki, gələcək cəmiyyətin
taleyi onların öz uşaqlarına verdiyi tərbiyədən
çox asılıdır. O, qızların ailədə
feodal-patriarxal münasibətlər əsasında tərbiyəsinə
qarşı məktəb tərbiyəsini, sağlam ailə tərbiyəsini
qoyur, oğlanlar kimi qızların da eyni məktəblərdə
oxumasını tələb edirdi. Əgər hər
bir ana məktəb tərbiyəsi görübsə, təbii
ki, uşağının da tərbiyəsi ilə düzgün
məşğul olur”.
M.T.Sidqinin qadının, ananın yeni nəslin yetişməsindəki
rolu haqqında fikirləri “Bala tərbiyəsi” hekayəsində
tam dolğunluğu ilə əks olunmuşdur. Burada müəllif
elmi, təhsili üstün tutan bir qadını daş-qaş
hərisi olan digəri ilə qarşılaşdırır.
Gəldiyi nəticə isə belə olur: “Övlada əvvəlinci
təlim və tərbiyə verən anadır. Ananın
rəftarı və kiridarı, hal-hərəkəti
balaların qəlbinin aynasına əks salır”.
Təcrübəli müəllim publisist qələmi ilə
camaata çatdırmaq istəyirdi ki, hər bir kəs
valideynlik borcunu yerinə yetirməli, uşağını cəmiyyətin
yararlı üzvü kimi tərbiyə etməli, onun aqibəti
ilə maraqlanmalıdır. Əxlaqi cəhətdən
möhkəm olan vətəndaşlar tərbiyə etmək
üçün maarifçi pedaqoq anaların özlərinin
qüsursuz olmalarını, onların müəyyən qədər
pedaqoji biliklərə yiyələnmələrini zəruri
hesab edirdi. Sidqi istəyirdi ki, ana
qarşısında duran bu kimi çətin, eyni zamanda şərəfli
və məsuliyyətli vəzifələr mümkün qədər
inandırma, şəxsi nümunə əsasında həyata
keçirilsin.
Beləliklə, dövrünün qabaqcıl ziyalısı
olan Sidqinin mütəfəkkir fikirləri, zəngin
dünyagörüşü onun bədii
yaradıcılığında da öz əksini tam
aydınlığı ilə göstərmişdir. O, çoxşaxəli
yaradıcılığı ilə ədəbiyyatı
mövzu, ideya və sənətkarlıq baxımından yeniləşdirmişdir.
M.T.Sidqi yaradıcılığının bir hissəsini
klassik lirika janrı, əsasən qəzəllər təşkil
edir. Lakin onun qəzəllərində bu janrın ənənəvi
nümunələrindən fərqli cəhətlər
çoxdur. Burada şair məhəbbəti
deyil, ən çox azadlığı, yeni ictimai
baxışları vəsf edirdi.
Taki millətdə
olsun istiqlal,
Etməsin cəhl bizləri pamal - deyirdi şair.
“Dostlardan birinə mədəniyyətin yayılması
haqqında şeir”in isə yalnız adı qəzəldir. Belə ki,
müəllif burada elm, təhsil, savad, mədəniyyətdən
uzaq olan adamları pisləyir. İnsanları
mənasız şeirbazlıqla məşğul olmaqdansa, cəmiyyət
üçün faydalı işlər görməyə
çağırır. Bu istiqamətdə
Sidqi digər əsərlər də yazıb ki, onlardan da biri
“Tərcüman” qəzetinin 10 illiyinə ünvanlanıb.
XIX əsrin sonları - XX əsrin əvvəllərində
Azərbaycan poeziyasında bir sıra yeniliklər baş
verirdi. Sidqinin də bu yeniliklərin geniş yayılmasında
xüsusi yeri vardı. O, yeni janrları, məsələn,
pedaqoji marşı xatırladan maarifçi nəğmə və
şərqiləri təbliğ edirdi. Köhnə
ədəbi ənənələrdən, orta əsrlərin
artıq vaxtı keçmiş mövzu və janrlarından
ayrılmağı zəruri sayırdı. Keçmişin dar çərçivəsində
qapanıb qalmağı fəlakət adlandırırdı.
Sidqinin ədəbi görüşləri də
çox maraqlıdır. Ədib yazırdı
ki, “söz kimi bir ruhi-rəvan və cövhəri-can varsa da,
yenə sözdür”. O, insanların tərəqqisində
söz sənətinin mühüm vasitə olduğunu
vurğulayırdı.
Filologiya
elmləri doktoru, professor H.Həşimli bu barədə belə
yazır: “Görkəmli yazıçı köhnə ədəbi
ənənələrin vaxtı keçmiş
tematikasından və poetik sistemindən kənara
çıxa bilməyən təqlidçi şairlərin
yaratdıqları çoxsaylı nəzm nümunələrini,
güldən, bülbüldən bəhs edən şablon, əhəmiyyətsiz
şeirləri müasir amallarla uzlaşmayan gərəksiz
söz yığımı hesab edir, onların yeni ədəbiyyatın
inkişafında bir əngəl olduğunu nəzərə
çatdırırdı. Ədəbiyyatı
köhnə buxovlarda saxlamaq istəyənləri,
boş-boş həcvlər yazanları söz sənətinin
əsl vəzifələrindən uzaq sayan görkəmli ədib
belələrini sərt tənqid edirdi”.
Beləliklə, M.T.Sidqi bir şair və
yazıçı kimi fəaliyyət göstərərək
həm uşaq və yeniyetmələr, həm gənclər,
həm də geniş oxucu kütləsi üçün tərbiyəvi
əhəmiyyətli əsərlər, əsasən şeir və
hekayələr yaratmışdır. Lakin onun
çoxşaxəli yaradıcılığı bununla bitməmişdir.
O, rus, ərəb və fars dillərindən
bir sıra dəyərli nümunələri Azərbaycan dilinə
çevirmişdir. Azərbaycan teatrının
inkişafına öz töhfəsini vermişdir. Qurbanəli bəy Şərifzadə, Mirzə Nəsrulla
Əmirov, Cümşüd Paşa Sultanov kimi ziyalılarla əl-ələ
verərək “Həvəskar aktyor dəstəsi”
yaratmışdır. Sidqinin istedadı bu
sahədə də özünü göstərmiş, o həm
aktyor dəstəsinə rəhbərlik etmiş, həm də
tamaşaların rejissoru olmuş və aktyor kimi
çıxış etmişdir.
M.T.Sidqi elmi-pedaqoji dəyərə malik 7 dərsliyin
müəllifidir. Bu dərsliklərin əlyazmaları AMEA-nın
M.Füzuli adına Əlyazmalar
İnstitutunda saxlanılır.
Harada yaşamasından və işləməsindən
asılı olmayaraq Sidqi daim yazıb yaratmışdır. O, qələmini şeirdə,
nəsrdə, publisistika və jurnalistikada sınaqdan
keçirmişdir. Təsadüfi deyil ki, ədəbi
irsinə 300-dən çox qəzəl daxildir. Sidqi “Mənəviyyati-mənəviyyə” adlı
irihəcmli mənzumənin, 1912-ci ildə kitab halında nəşr
olunmuş “Heykəli-insanə bir nəzər” ədəbi-fəlsəfi
traktının, 20-dən çox hekayənin müəllifidir.
“Məktəb hekayələri” silsiləsi ilə Sidqi əslində,
Azərbaycan uşaq nəsrinin ilk yetkin nümunələrini
yaratmışdır. Bu silsiləyə yazıçının “Məktəbə
davam”, “Gözütox uşağın hekayəti”,
“Yalançı uşaq”, “Səxavətli uşaq” və digər
hekayələri daxildir.
Sidqi publisistika sahəsində öz dəsti-xəttini
göstərmişdir. O, “Tərcüman” (Baxçasaray), “Əxtər”
(İstanbul). “Həblümətin” (Kəlkətə), “Kaspi”
(Bakı), “Nasiri” (Təbriz) və digər qəzetlərlə
əməkdaşlıq etmiş, onların səhifələrində
maraqlı yazılarla çıxış etmişdir.
M.T.Sidqi rus dilinə və rus ədəbiyyatına
böyük maraq göstərirdi. O, rus dilini öyrənməyi, rus mədəniyyətini
və ədəbiyyatını təbliğ edirdi. 1899-cu ildə Sidqi böyük rus şairi
A.S.Puşkinin 100 illik yubileyi münasibətilə geniş məruzə
edir və bununla həmin rəğbəti bir daha təsdiqləyir.
Azərbaycan
bədii, elmi, ictimai fikrinin ilk
daşıyıcılarının böyük bir dəstəsi
- Hüseyn Cavid, M.S.Ordubadi, İbrahim Əbilov, Əziz Şərif,
Rza Təhmasib, Əliqulu Qəmküsar, Bəhruz Kəngərli
və neçə belə fikir-sənət bahadırı
özünün müzəffər yürüşünə
M.T.Sidqinin xeyir-duası ilə başlayıb. Bu görkəmli
pedaqoq, şair, publisist özünün 49 illik ömrü ilə
Naxçıvan maarifində elə bir fırtına
qoparmışdı ki, onun əks-sədası bütün
Yaxın Şərqə yayılmışdı.
Sidqinin Qurbanəli Şərifzadə, Paşa ağa
Sultanov, Eynalı Sultanov, Nəsrulla Şeyxov, M.Müctəhdizadə,
Baxşəliağa Şaxtaxtinski kimi müasirləri və
dostları olmuşdu. Bundan əlavə, Şuşa,
Tiflis, İrəvan, Bakı şəhərlərində
yaşayan bir çox görkəmli ziyalılarla məktublaşmış,
dostluq etmişdir.
M.Şahtaxtlı “Şərqi-Rus” qəzetini nəşr
etməyə başlayanda onu alqışlayanlardan biri də məhz
M.T.Sidqi olmuşdur. “Ümid etmək olar ki, az müddətdən
sonra “Şərqi-Rus” qəzeti millətin gənclərinin
qaranlıq ürəklərində nur saçacaq və bilik-mərifət
çırağı cəhalət çölündən səadət,
xoşbəxtlik sarayına aparacaqdır. Sizin
adınız da tarixdə əbədi olaraq həkk
olunacaqdır”.
M.Şahtaxtlı Sidqini qəzetdə işə də
götürmək istəyib. Lakin Sidqi 1902-ci il
yanvarın 1-də bu təklifə cavabında yazıb: “Mən
özümü bu müqəddəs yolda iftixar etməliyəm.
Bu, mənim üçün əbədi bir səadətdir.
Lakin məni bu yoldan çəkindirən bir
maneə varsa, o da ailə vəziyyətimlə əlaqədardır.
Mən onlarsız heç bir yerə gedə
bilmərəm. Allah bərəkət
versin. Altı azyaşlı övladım var, məndən
başqa baxanları yoxdur... Tiflisdə
olmamışam. Bir yerdən başqa yerə
bu qış vaxtında köçmək çox çətin
məsələdir. Məsləhət bilsəniz,
bir neçə vaxt hələlik burada qalım. Buradan yazmaqla, sizinlə əməkdaşlıq etmək
iqtidarındayam”.
“Şərqi-Rus”un təsisçisi və redaktoru bunun
cavabında yazır: “Məşədi can, sənin məhəbbətlə
dolu məktubunu aldım... Tiflisə gəlsəniz,
çox minnətdar olaram. Bizim qəzetdə işləmək
istəyirsinizsə, birinci dəfə sizə 80 manat maaş verə bilərəm. Get-gedə
maaşınız artar. Mənə
inanın, Tiflisə gəlsəniz, əl-ələ verib
çalışarıq. Pul lazım olsa, xəbər
verin, göndərim...
Cavab gözləyirəm.
Sizi qəlbən
sevən: M.Şahtaxtinski, 1903-cü il”.
Sidqinin yuxarıda göstərilən məktubda
böyük sevgi ilə haqqında söhbət
açdığı altı övladından biri oğlu Məmmədəli
idi ki, o, ata yolunun davamçısı - müəllim,
yazıçı, jurnalist oldu.
Məmmədəli 1906-1908-ci illərdə
“İrşad” qəzetində işləmişdi. 1910-1911-ci illərdə
“Molla Nəsrəddin”in müvəqqəti redaktoru olmuşdu.
Cəlil Məmmədquluzadə əziz dostunun
oğluna hörmət bəsləyir və bel
bağlayırdı.
1910-cu il iyunun 9-da Mirzə Cəlil məktubunda
yazırdı: “...Kəndə getməliyəm və burada bir
adam lazımdır ki, “Molla Nəsrəddin”i idarə eləsin.
İki ay gəlib Tiflisdə qala bilsəniz, tez gəlin... Əgər mərhum Sidqi bəradərimin oğlu ilə
gələcəkdə dostluğum baş tutsa,
özümü xoşbəxt hesab edərəm”.
Məmmədəli Sidqi ədibin şəxsi həyatında
ona həyanlığını, eləcə də jurnalın
ən çətin illərində öz bilik və
istedadını əsirgəməmişdi. Sidqi “Molla Nəsrəddin”də
çətin və məsuliyyətli işləri yerinə
yetirməli olurdu. O, maliyyə, senzura ilə bağlı
məsələləri həll edir, gələn
yazıları növbəti nömrə üçün
seçib hazırlayırdı. Cavan idi. Mirzə Cəlilin daimi məsləhətləri,
işgüzar məktubları ona bu işləri layiqincə
yerinə yetirməyə kömək edirdi.
Tapşırıqlar çox və çətin idi. Lakin Sidqi
onların öhdəsindən uğurla gələ bilirdi.
1913-cü ildə oğul Sidqi Bakı şəhərində və Bülbülə kəndində müəllim işləyir. Eyni zamanda yerli qəzetlərə, “Molla Nəsrəddin”ə məqalələr yazır, hətta bəzən həvəskar aktyorların tamaşalarında kiçik rollarda oynayır. Hətta 1917-ci ildə Bakıda A.M.Şərifzadənin rejissorluğu ilə səhnəyə qoyulmuş “Ölülər” pyesində Şeyx Nəsrullah rolunu ifa edir.
“Molla Nəsrəddin”in fəal əməkdaşı Ömər Faiq Nemanzadə, şair Mirzə Ələkbər Sabir, ədəbiyyatşünas Firudin bəy Köçərli, mürəttib İsmayıl Həqqi M.Sidqini səmimiyyətinə və qabiliyyətinə görə sevmişdilər. Sonralar bu sıraya şair Səməd Mənsur, dramaturq Cəfər Cabbarlı, aktyor Kazım Ziya və başqaları da daxil olmuşdu. Sidqi dövrünün bir çox qabaqcıl ziyalıları ilə məktublaşırdı.
1917-ci ildən Məmmədəli Sidqi “Sovqat” və “Kommunist” qəzetlərində işləmiş və beləliklə, ata yolunu davam etdirmiş, daşıdığı soyadının nüfuzunu uca tutmuşdur.
Bu gün isə Məhəmməd Tağı Sidqinin yolunu yüzlərlə mənəvi övladı davam etdirir. Onlar təhsil, ədəbiyyat, mədəniyyət, jurnalistika sahələrində fəaliyyət göstərirlər.
Adının əbədiləşdirilməsi üçün də əməli tədbirlər görülüb. Naxçıvan Dövlət Kukla Teatrı M.T.Sidqinin adını daşıyır. Maarif fədaisinin adı eləcə də Naxçıvan şəhərindəki 4 nömrəli və Ordubad şəhərindəki 1 nömrəli orta məktəblərə verilmişdir. Naxçıvanda onun adına küçə də var.
M.T.Sidqinin yaradıcılığı da ətraflı araşdırılıb. Vaxtilə Cəlil Məmmədquluzadə, Hüseyn Cavid, Qurbanəli Şərifzadə, Əziz Şərif, Əliqulu Qəmküsar onun haqqında dəyərli əsərlər, xatirələr yazmışlar. Son onilliklərdə isə Əziz Mirəhmədov, Feyzulla Qasımzadə, İbrahim Mollayev, İsa Həbibbəyli, Şövqi Novruzov, Əsgər Qədimov və digər görkəmli alimlər onun irsini öyrənib, tədqiq edib, dəyərləndiriblər.
2014-cü
il M.T.Sidqinin yubileyi ilidir. Naxçıvan
MR Ali Məclisinin Sədri 2014-cü il
avqustun 20-də “Görkəmli pedaqoq, maarifçi və
şair Məhəmməd Tağı Sidqinin 160 illik yubileyinin
keçirilməsi haqqında” sərəncam imzalayıb. Yubiley münasibətilə artıq bir sıra tədbirlər
keçirilib. Ordubadda Sidqinin ev-muzeyinin
yaradılması qərara alınıb.
Görkəmli pedaqoq, maarifçi və ədib Məhəmməd
Tağı Sidqinin adı və xatirəsi bütün Azərbaycan
elləri üçün əzizdir.
İradə ƏLİYEVA,
Azərbaycan.-2014.- 30 dekabr.- S.11.