SABİRABAD - inkişaf və abadlıq məkanı
Davamlı sosial-iqtisadi inkişafa nail olan, dünyadakı nüfuzu durmadan artan, regionun siyasi, iqtisadi və mədəni mərkəzinə çevrilən Azərbaycan bu gün özünün müəyyən edilmiş hədəflərinə doğru inamla irəliləyir, ötən ili bütün sahələrdə böyük uğurlarla başa vurur. Son 10 ildə ümumi daxili məhsulun 3 dəfədən çox, dövlət büdcəsi gəlirlərinin 16 dəfə, sənaye məhsulları istehsalının 2,7 dəfə, strateji valyuta ehtiyatlarının 31 dəfə, daxili mənbələr hesabına əsas kapitala yönəldilən investisiyaların həcminin 18,4 dəfə, o cümlədən qeyri-neft sektoruna qoyulan investisiyaların 21,6 dəfə, orta aylıq əməkhaqqının 5,5 dəfə, pensiyaların 9,3 dəfə artması, 1 milyon 200 mindən çox yeni iş yerinin açılması, yoxsulluq səviyyəsinin 5,3 faizə enməsi ölkəmizdə elmi əsaslara söykənən və düşünülmüş inkişaf siyasətinin həyata keçirildiyini, sıçrayışlı sosial-iqtisadi inkişafa nail olunduğunu göstərir.
Ötən il hər sahədə uğurlar qazanılıb
Sürətli inkişaf dövrünü yaşayan, dünya iqtisadi sisteminə fəal inteqrasiya yolu seçmiş Azərbaycan iqtisadiyyatı 2013-cü ildə də dinamik inkişafını davam etdirmiş və ötən ili yüksək sosial-iqtisadi göstəricilərlə, dayanıqlı inkişafa yönəlmiş mühüm tədbirlərin reallaşdırılması ilə başa vurmuşdur. Respublika Prezidenti İlham Əliyevin sədrliyi ilə bu ilin yanvar ayının 9-da Nazirlər Kabinetinin 2013-cü ilin sosial-iqtisadi inkişafının yekunlarına və 2014-cü ildə qarşıda duran vəzifələrə həsr olunmuş iclasında bu məsələlər ətraflı müzakirə olundu, ölkə rəhbəri iqtisadiyyatın bütün sahələrindəki vəziyyəti geniş təhlil edərək gələcək vəzifələri müəyyənləşdirdi. Qeyd olundu ki, dünya iqtisadiyyatında böhran davam etsə də, respublikada həyata keçirilən uğurlu siyasət sayəsində əvvəlki illərdə olduğu kimi, 2013-cü ildə də ümumi makroiqtisadi sabitlik qorunmuş, iqtisadiyyatın tarazlı və dayanıqlı inkişafı təmin edilmiş, sahibkarlığın inkişafı, yeni müəssisələrin yaradılması və iş yerlərinin açılması sahəsində əsaslı işlər görülmüş, əhalinin sosial rifahı daha da yaxşılaşmışdır.
2013-cü
il Sabirabad rayonu üçün də
yaddaqalan olmuşdur. Rayon İcra Hakimiyyətinin
başçısı Nazim İsmayılovla söhbətimiz
də bu barədə oldu. O dedi ki, Prezident İlham
Əliyevin qeyd etdiyi kimi, indi elə bir problem yoxdur ki, Azərbaycan
dövləti onu həll etmək iqtidarında olmasın. Prezidentin islahatlar kursu ölkəmizin
inkişafını təmin edib. İqtisadiyyatın
inkişafı bütün istiqamətlərdə
genişmiqyaslı tədbirlərin görülməsinə
şərait yaradıb. İqtisadi
potensialımızın ildən-ilə artması, neftdən əldə
edilən vəsaitdən düzgün istifadə olunması,
büdcə gəlirlərinin durmadan çoxalması
perspektivi imkanların daha da genişlənəcəyinə
inamı artırır. Dövlət
başçısının yürütdüyü iqtisadi
inkişaf strategiyasının əsas qayələrindən
biri regionların tarazlı inkişafına nail olmaqdır. Sabirabad rayonu da Prezident İlham Əliyevin diqqət
və qayğısı ilə əhatə olunub. Dövlət proqramları çərçivəsində,
həmçinin Kür-Araz daşqınlarından sonra həyata
keçirilən yüksək səviyyəli abadlıq və
quruculuq işləri bu diqqətin və qayğının
bariz təcəssümüdür".
Ötən
il sabirabadlılar üçün ən
yaddaqalan hadisə Prezident İlham Əliyevin rayona səfəri
olmuşdur. Dövlət başçısı
səfər çərçivəsində 8 obyektin
açılışında və təqdimatında
iştirak etmişdir. Şəhərin yenidən
qurulmuş mərkəzi meydanı, orada ucaldılmış
ulu öndərin abidəsi, Yeni Azərbaycan Partiyası rayon təşkilatı
üçün yeni tikilmiş üçmərtəbəli
inzibati bina, 2013-cü ildə inşa olunmuş Heydər
Əliyev Mərkəzi, Heydər Əliyev Parkında
aparılan genişləndirmə və yenidənqurma işləri,
Bulaqlı kəndində istifadəyə verilmiş 52 nəfərin
çalışdığı müasir istixana kompleksi,
Bakı-Sabirabad yolunun yenidən qurulması işləri
ölkə Prezidenti tərəfindən yüksək qiymətləndirilmişdir.
Prezident Sabirabad ictimaiyyətinin nümayəndələri ilə
görüşündə bu barədə demişdir:
"Çox işlər görülübdür. Sabirabad abadlaşır, gözəlləşir.
Mən keçən dəfə iki il əvvəl
olmuşam burada. Görürəm ki, çox
böyük dəyişikliklər vardır. Gözəl binalar tikilir, köhnə binalar bərpa
edilir, parklar salınır".
Ötən
il Sabirabadda iqtisadiyyatın bütün sahələrində
2012-ci illə müqayisədə daha yüksək nəticələrin
əldə edilməsi ilə də əlamətdar
olmuşdur. Belə ki, ötən il istehsal olunan məhsulun həcmi
299 milyon 843 min manat, sənaye məhsulu istehsalı 5 milyon 286
min manat, kənd təsərrüfatı məhsulları
istehsalı 167 milyon 195 min manat təşkil etmişdir.
Əhaliyə 602 min manat həcmində rabitə, 39 milyon 808
min manat həcmində pullu xidmət, 4 milyon 426 min manat həcmində
nəqliyyat xidməti, 5 milyon 994 min manat həcmində iaşə
xidməti göstərilmişdir. Pərakəndə
əmtəə dövriyyəsi 167 milyon 872 min manata
çatmışdır. Əvvəlki illə
müqayisədə 2013-cü ildə sənaye, kənd təsərrüfatı
məhsullarının həcmi, rabitə, nəqliyyat, iaşə
və pullu xidmətlər, pərakəndə əmtəə
dövriyyəsi xeyli artmışdır. 46 milyon 673 min
manatlıq tikinti-quraşdırma işləri
görülmüş, əsas kapitala yönəldilən
investisiyaların həcmi 77 milyon 647 min manat olmuşdur.
Rayonda
sahibkarlığın inkişafı üçün
yaradılmış münbit şəraitin nəticəsidir
ki, iqtisadiyyatın əsas sahələrində qeyri-dövlət
sektorunun xüsusi çəkisi artaraq kənd təsərrüfatında
və nəqliyyatda 100 faiz, tikintidə 81,3
faiz, sənayedə 25,3 faiz olmuşdur. Ticarət xidmətinin
99,9 faizi, pullu xidmətin 68,8 faizi
qeyri-dövlət sektorunun payına düşür.
Ötən
il rayon büdcəsi 26 milyon 327 min manat məbləğində
proqnozlaşdırılmışdı. Büdcənin mədaxil
hissəsinin proqnozuna 47 milyon 628 min manat və ya 180,9 faiz əməl edilmişdir. Proqnoza
artıqlaması ilə əməl olunmasına səbəb
rayonun sosial-iqtisadi inkişafına dövlət tərəfindən
qoyulan investisiyalardır.
Dövlət
Proqramında nəzərdə tutulan bütün tədbirlər
həyata keçirilib
Azərbaycanda uğurla həyata keçirilən
davamlı inkişaf strategiyasının mühüm həlqələrindən
olan regionların sosial-iqtisadi inkişafı Dövlət
proqramları ölkənin bütün sahələrində
ciddi inkişaf dinamikasına və keyfiyyət dəyişikliyinə
təkan verən strateji sənədlərdir. Dövlət
proqramlarında regionlarda yeni istehsal və emal müəssisələrinin
yaradılması, infrastruktur təminatının və
kommunal xidmətlərinin səviyyəsinin yüksəldilməsi,
yeni iş yerlərinin açılması nəzərdə
tutulmuşdur. Sabirabad Rayon İcra Hakimiyyətinin
başçısı Nazim İsmayılovun sözlərinə
görə, ikinci Dövlət Proqramının icrası nəticəsində
rayonda sosial-iqtisadi problemlərin həlli və infrastruktur
layihələrinin yerinə yetirilməsi sahəsində əsaslı
işlər görülmüş, bir sıra
sosialyönümlü obyektlər tikilərək istifadəyə
verilmiş, yeni yollar və körpülər tikilmiş,
genişmiqyaslı abadlıq-quruculuq işləri həyata
keçirilmişdir. Bu dövrdə 6 məktəb binası,
1 xəstəxana, 3 həkim və tibb məntəqəsi
tikilmiş, 23 məktəb, 4 xəstəxana, 5 həkim və
tibb məntəqəsi, 17 mədəniyyət obyekti əsaslı
təmir edilmişdir. Rayon mərkəzində
Dövlət Bayrağı Meydanı qurulmuş, maliyyə
idarəsi üçün yeni üçmərtəbəli
bina tikilmiş, rayon icra hakimiyyəti və dövlət
müəssisələri yerləşən inzibati
binaların fasadları müasir qaydada təmir olunmuş,
rayon Mədəniyyət Evində əsaslı təmir
işlərinə başlanılmışdır. Müasir tələblərə cavab verən 205
çarpayılıq mərkəzi rayon xəstəxanasının
tikintisi davam etdirilir. Şəhərdə
su və kanalizasiya sisteminin yenidən qurulması işlərinə
başlanılmış, yeni asfalt və beton zavodları
istifadəyə verilmişdir.
Xatırladaq
ki, ötən il Prezident İİham
Əliyev Sabirabad rayonunun sosial-iqtisadi inkişafının
sürətləndirilməsinə dair əlavə tədbirlər
haqqında iki dəfə sərəncam
imzalamışdır. Sərəncamlara əsasən Sabirabad
şəhərində abadlıq-quruculuq işlərinin davam
etdirilməsi, Dövlət Proqramında rayon üzrə
müəyyən olunmuş tədbirlərin həyata
keçirilməsinin sürətləndirilməsi, həmçinin
iyirmi iki min nəfər əhalinin yaşadığı 12
yaşayış məntəqəsini birləşdirən
Nizami-Əliləmbəyli-Azadkənd-Sarxanbəyli avtomobil
yolunun tikintisi məqsədilə Sabirabad Rayon İcra Hakimiyyətinə
maliyyə vəsaiti ayrılmışdır. Dövlət
başçısının bu sərəncamları rayonda
sosial-iqtisadi inkişafın, quruculuq və abadlıq işlərinin
sürətləndirilməsinə böyük təkan
vermişdir. Nizami-Əliləmbəyli-Azadkənd-Sarxanbəyli
avtomobil yolunun 20 kilometrlik məsafəsi keçən ilin
dekabr ayında istifadəyə verilmiş, yola 120 min kvadratmetr
asfalt döşənmişdir.
Ümumiyyətlə, son illər Sabirabadda yol
infrastrukturunun yaxşılaşdırılması istiqamətində
xeyli işlər görülmüşdür. Rayon mərkəzində
Heydər Əliyev prospektinə, Nəriman Nərimanov,
İlham İsgəndərov, Vüqar Əhmədov, Mehdi
İbrahimov küçələrinə, Müseyib Şərifzadə
küçəsindən Kür çayı üzərində
inşa olunan körpüyə qədər avtomobil
yollarına 118 min 500 kvadratmetr asfalt döşənmişdir.
Quruzma, Axısxa, Qaralı, Balvar, Qalağayın, Bulduq,
Çöl Beşdəli, Zalqaraağac kəndlərində
ümumi uzunluğu 26,2 kilometr olan kəndarası
yollarda təmir işləri aparılmışdır.
Hazırda Mürsəlli və Yaxa Dəllək kəndlərində
ümumilikdə 8,7 kilometr uzunluğunda kəndarası
yollarda da bu işlər aparılır. Uzunluğu
43 kilometr olan Suqovuşan-Məmişlər-Qaralar-Qəfərli-Əhmədabad-Nərimankənd-Həşimxanlı
avtomobil yolunun isə əsaslı təmiri ilə əlaqədar
məsələ qaldırılmışdır.
Ötən
il Sabirabadda 870 yeni iş yeri
açılmışdır ki, bunun da 749-u daimidir. Ümumilikdə isə ikinci Dövlət Proqramı
qəbul edildiyi müddət ərzində 175 müəssisə
yaradılmışdır. Nəticədə 3232 yeni
iş yeri açılmışdır ki, bunun da 2658-i
daimiidir. Yeni müəssisələrin yaradılmasında və
iş yerlərinin açılmasında dövlət tərəfindən
verilən güzəştli kreditlər mühüm rol
oynayır. Təkcə ötən il 66
layihənin həyata keçirilməsi üçün
Sahibkarlığa Kömək Milli Fondu tərəfindən
rayonda fəaliyyət göstərən sahibkarlıq subyektlərinə
1 milyon 830 min manat güzəştli kredit verilmiş və nəticədə
142 yeni iş yeri açılmışdır.
Kənd təsərrüfatında
məhsuldarlıq ilbəil yüksəlir
Rayon iqtisadiyyatının əsasını aqrar sahə
təşkil edir. Ölkənin ərzaq təhlükəzsizliyi
proqramına sanballı töhfələr verən
sabirabadlılar mütərəqqi texnologiyanı, qabaqcıl
təcrübəni cəsarətlə tətbiq edərək
mühüm nailiyyətlər qazanmışlar. RİH
başçısı Nazim İsmayılov bildirdi ki, ötən
il rayonda istehsal olunan məhsulun yarıdan
çox hissəsi kənd təsərrüfatının
payına düşür. Aqrar sahəyə
dövlət qayğısının, ayrılan subsidiyaların
nəticəsidir ki, Sabirabadda kənd təsərrüfatı
istehsalında ildən-ilə artım müşahidə
olunur. Prezident İlham Əliyevin aqrar
bölmədə idarəetmənin təkmilləşdirilməsinə,
lizinqin genişləndirilməsinə dair, həmçinin kənd
təsərrüfatı məhsulları istehsalçılarına
dövlət dəstəyi haqqında sərəncamları bu
sahənin inkişafına dövlət
qayğısının təzahürüdür. Təkcə
ötən il rayonda 17874 kənd təsərrüfatı məhsulları
istehsalçısına 1 milyon 811 min manat, buğda əkmiş
5559 nəfərə 477,2 min manat yardım verilmişdir.
"Aqrolizinq" ASC-dən və digər bazalardan güzəştli
qaydada 461,3 min manat dəyərində 2296
ton mineral gübrə satışı təşkil
olunmuşdur.
Yaradılmış
şərait nəticəsində 2013-cü ildə əvvəlki
ildən 576 hektar çox, yəni 56945 hektarda əkin
aparılmaqla kənd təsərrüfatı məhsullarının
istehsalı 2012-ci ilə nisbətən 11,0
faiz artaraq 167,1 milyon manata çatmışdır. Ötən
il 76687 ton taxıl, 3146 ton pambıq, 14358 ton kartof, 62890 ton
bostan, 1975 ton qarğıdalı, 43236 ton tərəvəz,
15470 ton meyvə və giləmeyvə, 154919 ton yem məhsulları
istehsal edilmişdir. Əvvəlki illə
müqayisədə rayon üzrə 2013-cü ildə
taxıl, kartof, bostan, yem, meyvə və giləmeyvə məhsulları
çox istehsal olunmuşdur.
Torpaqların
suvarılması və meliorasiya işlərinin
aparılması məqsədilə ötən il 1427 kilometr uzunluqda
kanallar, 450 kilometr
uzunluğunda dren-kollektor şəbəkəsi lildən
təmizlənmişdir. Prezident İlham
Əliyevin tapşırığına əsasən iri
taxılçılıq təsərrüfatlarının
yaradılması ilə bağlı ilkin mərhələdə
Dövlət Ehtiyat Fond torpaqlarının və
qış-otlaq sahələrinin 5000 hektarında meliorasiya tədbirlərinin
aparılması nəzərdə tutulmuşdur. Nəticədə rayonun Muğan Gəncəli,
Moranlı, Sarxanbəyli kəndlərində suvarmadakı
problemlər həllini tapacaq.
Artıq Sabirabadda sahibkarlıq fəaliyyəti ilə məşğul
olan kənd təsərrüfatı məhsulları
istehsalçıları arasında da ixtisaslaşma prosesi
genişlənmişdir. Hazırda 244 kənd təsərrüfatı
və xidmət təşkilatları fəaliyyət göstərir
ki, onlarn da 11-i kooperativ, 119-u özəl, 82-i xidmət təşkilatı,
32-si fərdi sahibkardır. Rayonun Axısxa və
Çölbeşdəli kəndlərində torpaq mülkiyyətçiləri
pay torpaqlarını könüllü şəkildə birləşdirərək
istehsal kooperativləri yaratmışlar.
Aparılan islahatlar rayonda heyvandarlığın
inkişafı üçün əlverişli şərait
yaratmışdır. Bu sahədə əsas diqqət heyvanların
cins tərkibinin yaxşılaşdırılmasına,
quşçuluğun inkişaf etdirilməsinə,
baytarlıq xidmətinin yüksəldilməsinə, yem
bazasının möhkəmləndirilməsinə yönəldilmişdir.
Son bir ildə mal-qaranın sayı 1,6 min baş artaraq 113,1 min
başa, xırda buynuzlu mal-qaranın sayı 5 min baş
artaraq 197,5 min başa, quşların sayı 105 min baş
artaraq 983 min başa çatmışdır. Ət
istehsalı (diri çəkidə) 14000 ton, süd
istehsalı 88661 ton, yun istehsalı 444 ton, yumurta istehsalı 55
milyon 139 min ədəd olmuşdur. Əvvəlki illə
müqayisədə ət istehsalı 900 ton (10,6
faiz), süd istehsalı 4080 ton (4,8 faiz), yun istehsalı 26 ton
(6,2 faiz) çox olmuşdur.
Kommunal
sahədə infrastruktur yenilənir
Əhalini
dayanıqlı elektrik enerjisi ilə təmin etmək məqsədilə
ötən il rayonda bir sıra tədbirlər
həyata keçirilmişdir. 31 transformator təmir
edilmiş, Vidadi-2 və Minbaşı, Kovlar, Hacıbəbir və
Həşimxanlı yarımstansiyalarında transformatorlar
yenisi ilə əvəzlənmiş, Quruzma və Nizami
yarımstansiyalarında yenidənqurma işləri
aparılmışdır. Bir sıra kənd
yaşayış məntəqələrində həyətyanı
sahələrdən keçən və təhlükə mənbəyi
olan yararsız xətlər təzələnmişdir.
Onu da qeyd
edək ki, ölkə Prezidentinin tapşırığı
ilə 2013-cü ildə Sabirabad pilot rayon kimi
seçilərək 14 yaşayış məntəqəsi
üzrə elektrik təsərrüfatının yenidən
qurulması nəzərdə tutulmuş bu məqsədlə
"Azərenerji" ASC-yə lazımi vəsait
ayrılmışdır. Hazırda bununla
bağlı işlər davam etdirilir.
Azərbaycan Prezidenti İlham Əliyevin 2013-cü ildə
Sabirabada səfərindən sonra rayonda əhalinin təbii
qazla təminatı sahəsində də işlər sürətləndirilmişdir. 2013-cü ildə
görülən işlər nəticəsində təbii
qaz istifadəçilərinin sayı 3621 abonent artaraq 12945-ə
çatmışdır. Şəhərin
qazlaşma işləri ümumən başa
çatdırılmışdır. Rayonun Bulduq,
Mürsəlli, Şıxlar, Qaratəpə, Qaralar, Quruzma,
Qaraqaşlı və Surra kəndlərinə, ümumilikdə
15 kəndə təbii qaz verilmişdir. Hazırda
rayonun 11 kəndində qazlaşma işləri aparılır
və yaxın zamanlarda 3 kəndə təbii qazın verilməsi
təmin olunacaqdır.
Sabirabad şəhərinin su və kanalizasiya sisteminin
yenidən qurulması işlərinə də
başlanılmışdır. Layihəyə əsasən,
Talış su kəmərindən Sabirabad şəhərinə
su xətti çəkilir. Həmin xətt
vasitəsilə su borusu keçən ərazilərdə yerləşən
və rayon mərkəzinə yaxın olan kəndlərə
içməli suyun verilməsi nəzərdə
tutulmuşdur.
Digər kəndlər də bu layihələrdən kənarda
qalmamışdır. Rayonun 24 kəndində modul tipli sudurulducu
qurğular tikilmişdir. 26 kənddə isə
bu tipli qurğuların tikintisinə hazırlıq işləri
görülür.
"Borcumuz
ölkə Prezidentinin göstərdiyi diqqət və
qayğıya əməli işlə cavab verməkdir"
Fevralın 5-də Heydər Əliyev Mərkəzində
Prezident İlham Əliyevin sədrliyi ilə keçirilən
regionların sosial-iqtisadi inkişafı Dövlət
proqramlarının icrasına həsr olunmuş konfransda
qarşıya böyük vəzifələr qoyulmuşdur. Sabirabad
RİH-nin başçısı Nazim İsmayılov bildirdi
ki, ikinci proqramda rayon üzrə nəzərdə tutulan tədbirlər
həyata keçirilmişdir. İndi
regionların sosial-iqtisadi inkişafı ilə bağlı
2014-2018-ci illər üçün üçüncü
Dövlət Proqramı hazırlanır. Proqrama
daxil edilmək üçün Sabirabad rayonu üzrə
qarşıda duran vəzifələr ümumiləşdirilmiş
və bu barədə təkliflər hökümətə təqdim
edilmişdir. "Bizim borcumuz Prezidentin
rayonumuza göstərdiyi diqqət və qayğıya əməli
işimizlə cavab verməkdir. Odur ki, Sabirabadı
Muğanın daha abad, daha füsunkar mərkəzinə
çevirmək üçün qüvvələri səfərbər
etmişik".
Ulu öndər Heydər Əliyevin Azərbaycana birinci rəhbərliyi
dövründə böyük inkişaf yolu keçən
Sabirabad indi daha sürətlə inkişaf edir, Muğanın
abad və füsunkar mərkəzinə çevrilir. Bu gün
Sabirabadın hər bir guşəsi tikinti meydanını
xatırladır. Hər yerdə abadlıq
və quruculuq, işgüzarlıq əhval-ruhiyyəsi duyulur.
Sabirabadlılar bundan sonra da doğma
rayonlarının yüksəlişi üçün qüvvələrini
əsirgəməyəcəklər.
Lazım
QULİYEV,
Azərbaycan.-2014.- 18 fevral.- S.4.