Əmək və əhalinin sosial müdafiəsi naziri Səlim Müslümov

Beynəlxalq Əmək Təşkilatının nümayəndələri ilə görüşüb

Fevralın 19-da əmək və əhalinin sosial müdafiəsi naziri Səlim Müslümov Azərbaycanda səfərdə olan Beynəlxalq Əmək Təşkilatının (BƏT) məşğulluq məsələləri üzrə baş mütəxəssisi Olqa Kulayeva və texniki məsələlər üzrə baş müşaviri Mixayil Puçkin ilə görüşmüşdür.

Görüşdə S.Müslümov Prezident İlham Əliyevin rəhbərliyi ilə ölkəmizdə makroiqtisadi sabitliyin və vətəndaş firavanlığının təminatı, insan kapitalının inkişafı istiqamətində aparılan siyasət və əldə olunan nailiyyətlər barədə qonaqlara ətraflı məlumat vermişdir.

Nazir bildirmişdir ki, milli iqtisadiyyatın son 10 ildə 3 dəfədən çox artdığı Azərbaycanda 900 mini daimi olmaqla 1 milyon 200 mindən çox yeni iş yeri yaradılmış, işsizliyin səviyyəsi 5 faizə, yoxsulluq təxminən 10 dəfə azalaraq 5,3 faizə enmişdir.

Qeyd etmişdir ki, qarşıya qoyulan məqsədlərdən biri gənclərin potensial imkanlarından tam istifadə üçün lazımi şəraitin yaradılması, onların məşğulluğunun təmin edilməsi və müasir dövrün tələblərinə cavab verən çevik gənc kadr potensialının formalaşdırılmasıdır.

Respublikada gənclərin məşğulluğunun, həmçinin, əmək bazarına daxil olan gənc işçi qüvvəsinin rəqabətqabiliyyətliliyinin, peşə-ixtisas təhsili sistemi ilə əmək bazarı arasında uyğunluğun təmin olunmasının daim diqqətdə saxlanıldığını vurğulayan S.Müslümov gənclərin səmərəli məşğulluğunun təmin edilməsi və bütövlükdə gənclərin problemlərinin həllində hökumətin bütün vasitələrdən istifadə etdiyini qeyd etmişdir.

Nazir bildirmişdir ki, bununla bağlı gənc mütəxəssisləri işlə təmin edən işəgötürənləri həvəsləndirmək üçün müvafiq vasitələrdən istifadə olunmaqla maliyyə və vergi güzəştlərinin tətbiqi mexanizminin yaradılması, təhsil sisteminin işəgötürənlərin iqtisadiyyatın inkişafı ilə bağlı artan tələblərinə uyğunlaşdırılması, təhsil müəssisələrində peşəyönümü işinin gücləndirilməsi, fasiləsiz təhsilin təmin edilməsi, gənclər üçün əmək yarmarkalarının və əmək birjalarının yaradılması və digər tədbirlərin həyata keçirilməsi böyük əhəmiyyət kəsb edir.

S.Müslümov qeyd olunan sahədə aparılan fəal işlərin nəticəsi kimi, son illərdə Azərbaycanın dünya miqyasında gənclərin məşğulluğu üzrə BMT-nin elan etdiyi on lider ölkə sırasına daxil edildiyini diqqətə çatdırmışdır.

Görüşdə əhalinin, o cümlədən gənclərin məşğulluğunun təminatı sahəsində BƏT-lə uğurlu əməkdaşlıq təcrübəsindən söz açılmışdır.

Qeyd olunmuşdur ki, ötən müddətdə Azərbaycan bu təşkilatın çoxsaylı konvensiyalarına qoşulmuş, bu sənədlərdən irəli gələn müddəalar əsasında milli qanunvericiliyini mütərəqqi beynəlxalq standartlara uyğun təkmilləşdirmişdir. Xüsusən də ölkəmiz layiqli əməyin təminatı ilə bağlı əməkdaşlıqda BƏT üçün strateji önəm kəsb edən bir ölkəyə çevrilmişdir.

Aparılan müzakirələr zamanı gənclərin məşğulluğunun təmin edilməsi sahəsində gələcək əməkdaşlıq imkanları nəzərdən keçirilmişdir. Eyni zamanda ölkəmizlə BƏT arasında əməkdaşlığın davamı kimi, Azərbaycanda "MDB-də Gənclərin Məşğulluğu üzrə Tərəfdaşlıq" adlı Texniki Əməkdaşlıq layihəsinin həyata keçirilməsi, o cümlədən qeyd olunan layihənin icrası üzrə iş planı, gənclərə yönəlmiş aktiv əmək bazarı proqramları və digər məsələlər ətrafında fikir mübadiləsi aparılmışdır.

AzərTAc

Azərbaycan.-2014.- 20 fevral.- S.7.