İqtisadiyyat və sənaye naziri Qobustanda vətəndaşları qəbul etmişdir

Prezident İlham Əliyevin tapşırıq və tövsiyələrinə uyğun olaraq mərkəzi icra hakimiyyəti orqanları rəhbərlərinin yerlərdə vətəndaşların qəbulu ilə əlaqədar əvvəlcədən tərtib olunmuş qrafikə əsasən, iqtisadiyyat və sənaye naziri Şahin Mustafayev fevralın 21-də Qobustanda vətəndaşları qəbul etmişdir.

Nazirliyin müvafiq struktur rəhbərlərinin də iştirak etdikləri qəbulda Qobustan və Şamaxı rayonlarından olan 70 nəfər vətəndaşın müraciət və təkliflərinə baxılmışdır.

Müraciətlər əsasən sahibkarlıq fəaliyyəti, güzəştli kreditlərin verilməsi, istehsal, emal və xidmət sahələrinin yaradılması, kredit ittifaqının Sahibkarlığa Kömək Milli Fondu ilə əməkdaşlığa cəlb edilməsi, yerli istehsal müəssisələrinin ixracının dəstəklənməsi və sair məsələlərlə bağlı olmuşdur.

Qəbulda vətəndaşların müraciətləri diqqətlə dinlənilmiş, bir sıra məsələlər yerindəcə həllini tapmış, bəzilərinin isə araşdırılaraq həll olunması üçün müvafiq struktur rəhbərlərinə tapşırıqlar verilmişdir. Nazirliyin səlahiyyətinə aid olmayan məsələlərlə bağlı müraciətlər isə müvafiq qurumlara göndərilmək üçün nəzarətə götürülmüşdür.

Qəbula gələn sahibkarlarla müzakirələr aparılmış, müasir heyvandarlıq komplekslərinin, iri taxılçılıq təsərrüfatlarının, logistik mərkəzlərin, istixanaların, yerli xammala əsaslanan sənaye müəssisələrinin yaradılması, çörək və şirniyyat, damazlıq yumurta, tikinti materialları istehsalı ilə bağlı onların təklifləri dinlənilmiş, investisiya layihələrinin maliyyələşdirilməsi barədə müvafiq göstərişlər verilmişdir.

Vətəndaşlar mərkəzi icra hakimiyyəti orqanları rəhbərlərinin yerlərdə onlarla görüşündən, müraciət və təkliflərinə operativ baxılmasından razılıq etmiş, bunun üçün Prezident İlham Əliyevə minnətdarlıqlarını bildirmişlər.

AzərTAc

Azərbaycan.-2014.- 22 fevral.- S.9.