Məktəblilər ümummilli lider Heydər

Əliyevin həyat və fəaliyyətini dərindən öyrənirlər

Ağsu

Ağsu şəhərindəki Heydər Əliyev Mərkəzində ümumtəhsil məktəblərinin XI sinif şagirdləri üçün "Ulu öndər Heydər Əliyev müstəqil Azərbaycanın memarı və qurucusudur" və "Ümummilli lider Heydər Əliyevin ideyaları müasir Azərbaycanın sosial-iqtisadi inkişafının təminatçısıdır" mövzularında açıq dərslər davam edir.

Fevralın 21-də keçirilən növbəti dərsdə şəhərdəki 1, 2, 3 nömrəli, Ağarx, Ülgüc, Təklə, Muradlı kənd tam orta məktəblərindən 75 şagird iştirak etmişdir.

Açıq dərsi Bico kənd orta məktəbinin direktoru, təcrübəli pedaqoq Yaşar Qarayev aparmışdır.

Tədris prosesində şagirdlərə ulu öndər Heydər Əliyevin həyat və fəaliyyəti barədə geniş məlumat verilmişdir. Xüsusilə ümummilli liderin Azərbaycana rəhbərlik etdiyi dövrlərdə ölkəmizin tərəqqisi üçün göstərdiyi fədakarlıqlardan bəhs olunmuşdur. Ötən əsrin 90-cı illərinin əvvəllərində Azərbaycanın təcavüzə məruz qaldığı, anarxiyanın hökm sürdüyü bir vaxtda onun xalqın təkidi ilə hakimiyyətə gəlişi, böyük fədakarlıqla bütün maneələri dəf edərək müstəqil dövləti formalaşdıraraq inkişaf yoluna çıxarması ilə əlaqədar gördüyü işlər barədə bilgilər məktəblilərdə böyük maraq doğurmuşdur.

Açıq dərsdə bu dahi insanın işləyib hazırladığı sosial-iqtisadi inkişaf strategiyası, hazırda xəttin Prezident İlham Əliyev tərəfindən uğurla və yaradıcılıqla davam etdirilməsi, nəticədə Azərbaycanın regionun ən qüdrətli dövlətinə çevrilməsi barədə geniş məlumatlar verilmişdir.

Tədris prosesində şagirdlər həmçinin Heydər Əliyev Mərkəzində ulu öndərin həyat və fəaliyyətinin müxtəlif dövrlərinə aid sənəd və fotoşəkillərlə də maraqla tanış olmuşlar.

Salyan

Fevralın 21-də Salyan Rayon Heydər Əliyev Mərkəzində "Heydər Əliyev müstəqil Azərbaycanın memarı və qurucusudur" mövzusunda açıq dərs keçirilmişdir.

Açıq dərsdə Salyan şəhərindəki 3 nömrəli məktəbin XI sinif şagirdləri iştirak etmişlər.

"Heydər Əliyev müstəqil Azərbaycanın memarı və qurucusudur" mövzusunda məruzə edən şəhərdəki 4 nömrəli məktəbin tarix müəllimi Razıgül Dadaşova ulu öndərin həyat yoluna nəzər salmış, dahi dövlət xadiminin liderlik xarizmasından danışmışdır. Qeyd edilmişdir ki, ümummilli lider Heydər Əliyev ölkə həyatının bütün sahələrində quruculuğun, davamlı inkişaf və islahatların banisidir. Azərbaycanda iqtisadiyyatın yenidən qurulması, aqrar sahənin dirçəldilməsi, peşəkar ordu yaradılması, çevik və balanslaşdırılmış xarici siyasət kursu, hüquqi və demokratik dövlət quruculuğu ulu öndərin adı ilə bağlıdır.

Bildirilmişdir ki, bu gün ümummilli liderin şah əsəri olan müstəqil Azərbaycan dövlətinin sükanı etibarlı əllərdədir. Ölkəmiz Prezident İlham Əliyevin liderliyi ilə dünyada böyük nüfuz qazanmışdır.

Digər çıxış edənlər də ümummilli lider Heydər Əliyevin həyat və fəaliyyəti, 1993-cü ildə xalqın təkidli tələbi ilə Azərbaycanda yenidən siyasi hakimiyyətə qayıtdıqdan sonra gördüyü misilsiz işlər barədə məlumat vermışlər.

Açıq dərslərin Heydər Əliyev Mərkəzində ayda bir dəfə olmaqla 2013-2014-cü tədris ilinin sonunadək davam etdiriləcəyi və rayonun bütün məktəblərini əhatə edəcəyi nəzərdə tutulmuşdur. Ümummilli liderin anadan olmasının 91-ci ildönümü günündə isə dərslərə yekun vurulacaq, fəal müəllim və şagirdlər mükafatlandırılacaqlar.

AzərTAc

Azərbaycan.-2014.- 22 fevral.- S.10.