İlaxır çərşənbələrin
birincisi – «Sular novruzu»
Üzü Novruza sarı
Suya gedən igidin
Saçı məxmər təkidi.
Allah, məni su elə,
Su gözəllər yüküdü.
Xalqımızın ulu bayramlarından ən möhtəşəmi
olan Novruz erkən dövr mifik düşüncə
və təsəvvürləri,
ayin, etiqad, inanc və mərasimləri
özündə yaşadan
və bu günümüzə yetirən
humanizm və həmrəylik kimi bəşəri duyğuları
qabarıq şəkildə
göstərən kulturoloji
sistemdir. Novruz insana həyat verən, ilk insanın yaranmasında biliavasitə
iştirak edən 4 müqəddəs ünsürün
adı ilə bağlıdır ki, bunlar Su, Od,
Yel və Torpaqdır. Mərasim folklorumuzda törəniş
təsəvvürlərini yaradan həmin müqəddəs ünsürlər
İlaxır çərşənbələrin
rəmzinə çevrilmiş,
yaradılış və
həyatvericilik funksiyasını
formalaşdırmışdır. Əski inanc və etiqadlara görə 4 çərşəbənin
hər birində bir ünsür "dirilir", oyanır, təzələnir və bununla bağlı olaraq xalq arasında
müxtəlif ayin və mərasimlər keçirilmişdir. Artıq Novruzun
müjdəçisinə çevrilən
İlaxır çərənbələr
yurdumuza qədəm qoyur.
Boz ayın
4 çərşənbəsindən birincisi Su çərşənbəsidir. Su çərşənbəsi
xalq arasında həm də "Əzəl çərşənbə",
"Sular Novruzu",
"Gözəl çərşənbə",
"Gül çərşənbə"
və s. adlandırılır.
Məlumdur ki, təbiətdə və insan həyatında
suyun yeri və əhəmiyyəti
müstəsnadır. Su həyat mənbəyidir və dünyanın yaranması məhz su ünsürü ilə bağlıdır.
Su - kimyəvi təsir göstərən,
həyat üçün
vacib olan mütəhərrik ionlar qrupunun yaranması üçün əlverişli
mühitdir. Su biokimyəvi proseslərin gedişini, orqanizmdə temperatur, qida və maddələr mübadiləsini tənzimləyir.
Qeyd etmək yerinə düşər ki, insan orqanizminin
təqribən 70 faizi,
baş-beyinin isə
90 faizi sudan
ibarətdir. Suyun ən əhəmiyyətli
xassələrindən biri
onun yaddaşıdır.
Su verilən informasiya
və ya kənar təsirlərin daşıyıcısıdır. Yaponiya alimi Masaru Emotonun apardığı təcrübələrə
görə, Su deyilən
sözlərin mənasına
uyğun olaraq reaksiyalar verir. Oxunan dualar, deyilən fikirlər suyun keyfiyyətinə müəyyən
təsir göstərir.
Məlumdur ki, türk xalqlarının
mifoloji düşüncəsində
su müqəddəs hesab olunur, su
kultu mühüm yer tutur. Xalq arasında
Su tanrısı Abanın
və Nahidin adı ilə bağlı çox qədim süjetlər yaranıb. Elə bu səbəbdən
də suyun müqəddəsliyini, paklığını
tərənnüm edən
Novruzun başlıca rəmzlərindən olan
Su çərşənbəsi meydana gəlmişdir.
Su çərşənbəsi,
suya inam, suya tapınma ilə bağlıdır.
Çox
erkən dövrlərdən
insanlar hələ gün doğmamış su üstünə gedər, pak, təmiz, axar suda yuyunar və
bununla da özlərini paklanmış
hesab edərdilər.
Əski inanclara görə, Su çərşənbəsində
insanlar axar sudan gətirib
evə, həyət-bacaya
səpər, bununla da müşküllükdən,
çətinlikdən, azar-bezardan
azad olmalarına inam bəsləyərdilər.
Suyun müqəddəsliyi
erkən folklor mənbələrində, o cümlədən
"Kitabi-Dədə Qorqud"da
Qazan xanın "Su həq didarın görmüşdür" ("Su tanrının üzünü
görmüşdür") müraciətində, "Koroğlu"da
Qoşabulağın timsalında,
Xızırın dirilik
çeşməsində içdiyi
suda əyan olmuşdur. Su həmçinin
sağlamlıq rəmzidir.
Su çərşənbəsində
müəyyən ayinlər
icra edilərdi ki, bunların öz mahiyyəti, özəllikləri diqqəti
cəlb edir. Məsələn, Su çərşənbəsində
subay qızlar evə axar sudan "lal su" gətirərkən
bir kimsə ilə danışmazdılar.
Suyu bir neçə qaba qoyub saxlayardılar.
Qızlar bir yerə yığışar, hərə
öz üzüyünü
saçına sürtüb
suya salar, üzük suda neçə dəfə cingildəsə, demək həmin yaşda qızın gəlin köçəcəyi ehtimal
edilərdi.
Su çərşənbəsində
insanlar sübh tezdən axar suyun üstünə gedər, "ağırlığım-uğurluğum
suya, azar-bezarım suya" deyib su üstündə dərdlərini danışar
və sanki öz çətinliklərini
"təzə su"
üstündə qoyub
gedərdilər. Beləliklə də Su çərşənbəsi
mərasimi icra olunardı və bu mərasim aşağıdakı nəğmə
ilə başa çatardı:
Sel çapar, su çapar,
Bir günah iştədim,
Gəl onu tut, apar.
Sel çapar, su çapar,
Gəl apar, gəl apar...
Erkən
təsəvvürlərə görə Su çərşənbəsində
Su tanrısı Aban ilə bağlı nəğmələr, "Yada
nəğmələri" oxunardı, onların bir qisminə diqqət yetirək:
Aban Abana gəldi,
Aban imana gəldi,
Abana yol verin,
Abana qol verin...
Al Aban haylı gəlib,
Al Aban paylı gəlib.
Xurcununda
seli var,
Boxçasında yeli var.
Hay verin Abana,
Pay verin Abana,
Xan Aban haylı olsun,
Doqqası saylı olsun...
yaxud:
Qalxdım, yoxuşa getdim
Abana tuş getdim.
Hayladım Abanı
Sayladım Abanı.
Aban bu payımı verdi,
Aban su sayımı verdi
Gözlədim Abanın nübarını,
Suvardım Abanın Ağ
atın
Aban su verdi
- içərsən.
Aban su verdi
-
Torpağa səpərsən,
Bəhrəsini görərsən
Gözlədim Abanın nübarın,
Suvardım Abanın Ağ atın.
Aban bu payımı verdi,
Aban su payımı verdi.
Yadam, yadama gəldi
Yadam adama gəldi
Yadam gəldi sel oldu,
Yadam gəldi yel oldu
Yadam hər yerdə başdı
Yadam dağları aşdı...
Su çərşənbəsi ilə bağlı müxtəlif mif mətnləri mövcud olmuş və bu günümüzə qədər qorunub saxlanmışdır. Burada əcdadlarımızın suyun müqəddəsliyinə
inamı suya tapınma təsəvvürləri
öz əksini tapmışdır. Folklorumuzun
solmaz səhifələrinə
yazılmış bir
mif mətninə diqqət yetirək: "Deyirlər dünyada övladı ilə meşədə yaşayan
Oğuz oğlu yolda bir qurda
rast gəlir. Qurd onun qabağını kəsib yalvarır ki, "Ey oğuz
oğlu, gözümün
ağı-qarası bir
qızım var. Dünən
ovçular onun qarnını doğram-doğram
elədilər. İndi gümanım
sənədir. Sabah sübh tezdən Buz bulağının suyundan götürüb qızımın yaralarına
töksən sağalar.
Mən də sənə borclu qalmaram. Oğuz nəslinə əbədiyyət
verərəm.
Oğuz oğlunun ürəyi kövrəldi. Sübh tezdən Buz
bulağa gəldi.
Gördü adamlar bulaq başına Su çərşənbəsinə
yığışıblar. Oğuz oğlu da su
üstündə əl-üzünü
yudu. Bir qab su alıb qurd balasının yanına gəldi. Suyu töküb onun
yaralarını yudu.
Qurd balası gözlərini açdı. Yaraları sağaldı.
Dönüb gözəl bir
qız oldu.
Qurd qızını Oğuzun
oğluna verdi.
Qurd dedi ki, bu izdivac
sənə əbədi
həyat və qüdrət verəcək.
Oğuz oğlu, sənin övladından törəyəcək
yeddi oğul yeddi ölkənin qüdrərtli xaqanı olacaqdır.
Qurd bu sözləri deyib bir qızına, bir də Oğuzun
oğluna baxdı. Sonra da canını Allaha tapşırdı. Oğuz oğlu
qurdun qızı ilə evləndi. Ondan dünyaya gələn yeddi igid yeddi
xaqan oldu, türkün nəslini yeddi ölkəyə yaydı".
Xalqımızın şifahi yaddaşında milli etnik həyatı,
erkən baxışları,
mənəvi əxlaqi
dəyərləri tərənnüm
edən və artıq milli təfəkkürdə qətiləşən
bədii mətnlər
toplusunda suya inam və tapınma
ilə bağlı çox nümunələrə
rast gəlmək olar. Onlar ibrətamizlik rəmzi
olan atalar sözü və məsəllərdə, bayatılarda,
inanclarda türkəçarələrdə,
tapmacalarda bu günümüzlə səsləşməkdədir.
Həmin nümunələrdən
bir qisminə nəzər salaq:
Su səni,
Su göyərtmiş süsəni,
Keçmə namərd körpüsündən,
Qoy aparsın su səni...
* * *
Su axır samanlıqdan,
Yol keçir
qaranlıqdan.
Çalış yaxşılıq elə,
Nə çıxar
yamanlıqdan?
Su olan yerdə dirilik olar.
Su axdığı yerdən
bir də axar.
Sulu el - abadan, susuz
el - viran olar.
Su axarında salınan el-oba
barlı-bərəkətli olar.
Su dolu qabla qabağına çıxsalar
işin avand olar.
Su kiçiyindir, yol
böyüyün.
Lal axan sudan
keçməzlər.
Səfərə çıxan adamın
arxasınca su atarlar.
Yuxuda su görmək aydınlıqdır.
Su çərşənbəsi ərəfəsində Günəş zodiak qurşağında "Dolça" bürcündən "Balıqlar" bürcünə daxil olur. Ona görə də Əzəl çərşənbə süfrəsində ağzına qızıl keçirilmiş balıq və bir dolça su olmalıdır.
Bu gün Novruzun ilk çərşənbəsi olan Su çərşənbəsidir. Xalq arasında belə bir gözəl deyim var: "Su qədər ömrün olsun", "Su aydınlıqdır". Arzu edirik ki, ulu xalqımızın, millətimizin ömrü su qədər uzun və intəhasız, gələcəyi aydın olsun! Su çərşənbəniz mübarək!
Ülkər NƏBİYEVA,
Bakı Dövlət Universitetinin
dosenti
Azərbaycan.-2014.- 25 fevral.- S.12.