Uğurların təməlində düşünülmüş siyasət, məqsədyönlü islahatlar dayanır

Nazirlər Kabinetinin 6 ayın yekunlarına həsr olunmuş iclasında

bu bünövrə üzərində yeni nailiyyətlərin qazanılmasına

inam ifadə edilmişdir

2014-cü ilin ötən 6 ayında qazanılmış uğurlar, qarşıya qoyulmuş bütün vəzifələrin müvəffəqiyyətlə həll olunması Azərbaycanın hərtərəfli inkişafının davam etdiyini bir daha təsdiqləyir. Bütün bunların təməlində dayanan isə düzgün düşünülmüş siyasət, sabitlik, iqtisadi islahatlardır. Nazirlər Kabinetinin bu ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclasında görülmüş işlərdən ətraflı bəhs edilmiş, həyata keçiriləcək tədbirlər vurğulanmışdır.

Nailiyyətlərimizi hamı görür. "Fitch", "Standard and Poors" və "Moodys" reytinq agentlikləri bir çox inkişaf etmiş ölkələrin reytinqlərini azaltdıqları halda, Azərbaycanın kredit reytinqini yüksəltmişlər. Onların hər biri Azərbaycan iqtisadiyyatına investisiya səviyyəli kredit reytinqi vermişdir. Bununla yanaşı, Dünya Bankı, Beynəlxalq Valyuta Fondu və AYİB kimi təşkilatların ölkənin iqtisadiyyatına dair proqnozları nikbin olmuşdur.

İndi Azərbaycanda əlverişli investisiya mühiti var. İstər xarici, istərsə də daxili investorlar müxtəlif sahələrə inamla sərmayə yönəldirlər. Neft kapitalının insan kapitalına, infrastruktur layihələrinə yönəldilməsi öz bəhrəsini verir. Qeyri-neft sektorundakı 7 faiz artım bunun sübutudur. Bu sektorun vacib sahələrindən olan kənd təsərrüfatında təxminən 6 faiz artım var.

Azərbaycanın valyuta ehtiyatları getdikcə artır. Nazirlər Kabinetinin iclasında adambaşına düşən valyuta ehtiyatlarına görə ölkəmizin dünyada aparıcı yerlərdə olduğunu qeyd edən Prezident İlham Əliyev demişdir: "Bizim 54 milyarddan çox valyuta ehtiyatlarımız vardır. Bu da bizə inam, əminlik verir, imkan verir ki, bundan sonra da böyük infrastruktur və sosial layihələrimizi icra edək".

Dövlət başçısı xüsusilə "Şahdəniz-2", TANAP və TAP layihələri üzərində dayanaraq onların icrası nəticəsində ölkənin bundan sonra azı 100 il qaz ixracından böyük fayda götürəcəyini və dünyadakı rolunun daha da artacağını demişdir.

"Şahdəniz-2" layihəsi ilə bağlı tenderlərdə xarici şirkətlərlə yanaşı, yerli müəssisələr də fəal iştirak etmiş və qalib gəlmişlər. Bu isə o deməkdir ki, ölkə vətəndaşları üçün minlərlə yeni iş yerləri açılacaq.

Dövlət özəl sektorun inkişafına da diqqət və qayğı göstərir. Energetiklərlə bağlı olan şirkətlərimizə, eləcə də inşaat, xidmət müəssisələrinə "Şahdəniz-2", TANAP layihələrində fəal iştirak etmək tövsiyə olunur. Çünki bu, həm ölkənin, həm də ayrı-ayrı vətəndaşların gəlir götürməsi, insanların öz məşğulluq problemini həll etməsi deməkdir.

Məşğulluq problemlərindən söz düşmüşkən, bu il üçüncü regional inkişaf proqramının qəbul edilməsi nəticəsində 6 ay ərzində artıq 65 min iş yeri açılmışdır. Bunun 52 mini daimi iş yerləridir. Yeri gəlmişkən onu da qeyd edək ki, 2003-cü ildən indiyədək, yəni birinci regional inkişaf proqramının icra olunmasına başlandığı vaxtdan 1 milyonu daimi olmaqla 1 milyon 300 min yeni iş yeri açılıb. Görülən əsaslı tədbirlər nəticəsində indi Azərbaycanda işsizlik cüzi səviyyədədir.

İş yeri varsa, deməli, insanın dolanışığı, xoş güzəranı da var. Bunu təsdiqləyən təkcə orta aylıq əməkhaqqının 440 manata, yaxud 560 dollara çatması deyil, həm də insanların rahat yaşaması üçün qurulan infrastrukturlardır. Məsələn, hazırda 80-dən çox təhsil müəssisəsi, 40-dan çox səhiyyə ocağı tikilməkdə, yaxud təmir olunmaqdadır. Bu da sosial sahəyə diqqətin bir nümunəsidir.

Ölkədə demoqrafik vəziyyətin ürəkaçan olması da əhalinin getdikcə artan maddi rifah halından xəbər verir. Ölkə Prezidenti bu məqamı vurğulayaraq demişdir: "Ancaq onu nəzərə almalıyıq ki, bizim uğurlu iqtisadi və siyasi addımlar nəticəsində Azərbaycanda, - bu da çox sevindirici bir haldır, - əhali sürətlə artır. İldən-ilə artan əhali hökuməti də, əlbəttə ki, daha fəal olmağa çağırmalıdır. Eyni zamanda, bu, onu deməyə əsas verir ki, yeni iş yerlərinin açılması daimi proses olmalıdır".

Azərbaycan Prezidenti ilin ötən 6 ayının nailiyyətlərlə yola salındığı kimi, növbəti yarımilliyin də uğurlu olacağına inamını bildirmişdir. Görüləcək işlər bir daha xatırlanmış, vacib məsələlərə diqqət yönəldilmiş, tapşırıqlar verilmişdir. Həm də hər bir işin təkcə həcmi deyil, keyfiyyəti də önə çəkilmişdir: "Xüsusilə nəzərə alsaq ki, ölkə qarşısında maliyyə problemi kimi bir problem durmur, - bizim maliyyə vəziyyətimiz yaxşıdır, kifayət qədər vəsaitimiz vardır, - ona görə də infrastruktur layihələrinin icrası ilə bağlı heç vaxt yubanma olmamalıdır. Burada əsas şərt keyfiyyət və sürətdir. Əlbəttə ki, bütün aidiyyəti qurumlar keyfiyyətə ciddi diqqət yetirməlidirlər. Elə etməlidirlər ki, xərclənən vəsait lazımi səviyyədə təmin edilsin".

Kənd yollarının rahatlığının təmin olunması istiqamətində işlər yenə də davam etdirilir. Bu işin tempi deməyə əsas verir ki, növbəti 3-4 ildə Azərbaycanda təmir olunmamış kənd yolu qalmayacaq.

Sənayemizin inkişafı yenə də diqqət mərkəzindədir. 2014-cü ilin "Sənaye ili" elan olunması bunu bir daha təsdiqləyir. Sənaye istehsalının artırılmasına yenə də investisiyalar yönəldiləcək. İndi texnoparklar yaradılır və burada da dövlət öz üzərinə böyük məsuliyyət götürür, yəni maliyyə töhfəsi verir. Gələcəkdə isə texnoparklarla yanaşı, sənaye klasterlərinin yaradılması da nəzərdə tutulur.

"Elə etməliyik ki, bütün şəhərlərimizə içməli su xətləri çəkək".

"Çalışmalıyıq ki, qazlaşdırmanı Azərbaycanda 95, bəlkə də 97 faizə çatdıraq".

"Yeni bazarlara çıxmalıyıq, regional bazarlara çıxırıq. Çalışmalıyıqki, Avropa bazarlarına da böyük həcmdə kənd təsərrüfatı məhsulları ilə çıxa bilək".

Nazirlər Kabinetinin iclasında Prezident İlham Əliyevin qarşıya qoyduğu bu məsələlər sübut edir ki, Azərbaycan hər bir sahədə qazandığı nailiyyətlə kifayətlənməyib yeni hədəflərə doğru irəliləyir. Bunların hamısı ölkənin iqtisadi qüdrətinin artmasına, vətəndaşların rifahının daha da yüksəlməsinə yönəldilən tədbirlərdir.

Flora SADIQLI,

Azərbaycan.-2014.- 12 iyul.- S.5.