Kann şəhərində keçirilən Azərbaycan mədəniyyəti

günləri çərçivəsində caz musiqisindən ibarət konsert təşkil olunmuşdur

Azərbaycanın birinci xanımı Mehriban Əliyeva konsertdə iştirak etmişdir

Heydər Əliyev Fondunun təşkilatçılığı ilə Fransanın Kann şəhərində davam edən Azərbaycan mədəniyyəti günləri çərçivəsində iyulun 11-də şəhərin Festivallar sarayında, açıq səma altında gənc cazmen İsfar Sarabskinin konserti təşkil olunmuşdur.

Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban Əliyeva konsertdə iştirak etmişdir.

Caz ifaçısı kimi tanınan Əməkdar Artist İsfar Sarabskinin konserti Kann şəhərinin sakinlərinə və qonaqlarına xoş ovqat bəxş etmiş, Azərbaycan mədəniyyət günlərinə daha bir çalar qatmışdır. Kannda musiqi janrları arasında sərbəstliyi ilə seçilən caz sədaları səslənmişdir. Müstəqil, yüngül, eyni zamanda dərin və mənalı musiqi. Bu gecə Azərbaycan məhz bu musiqinin təqdimatı ilə növbəti dəfə Kannın qəhrəmanı olmuşdur.

Caz musiqisinin virtuaz ifaçısı İ. Sarabskinin çıxışı kanlılar və şəhərin qonaqları tərəfindən böyük maraqla qarşılanmışdır.

Ölkəmizdə çox dərin caz ənənələri var. Səbəblərdən biri isə odur ki, Azərbaycanın musiqi mədəniyyətinin əsasında bütövlükdə improvizasiya durur. Bu, bizi caza daha da yaxınlaşdırır. Ölkəmiz Vaqif Mustafazadə, Rafiq Babayev kimi caz ifaçıları ilə fəxr edə bilər. Azərbaycan cazının əsasında müstəqillik və eyni zamanda milli ab - havanın birləşməsi ilə yaradılan fərqli və orijinal bir musiqi janrı dayanır. Bu, Azərbaycan cazının əfsanəsi adlandırılan Vaqif Mustafazadənin muğamdakı improvizasiyalara caz elementlərinin qarışığı ilə təqdim etdiyi yeni mükəmməl tandem - caz-muğam üslubudur.

Beləliklə, Azərbaycan Kann tamaşaçılarının qarşısına fərqli ovqat bəxş edən çılğın caz kompozisiyaları ilə çıxmışdır. Bu gecə Kann şəhərinin ruhunda heç bir qaydalara tabe olmayan, öz qanunları ilə yaşayan və yalnız improvizasiyanı hər şeydən üstün tutan caz ritmləri hökm sürmüşdür.

Əsgər Əliyev

AzərTAc-ın xüsusi müxbiri

Kann

Azərbaycan.-2014.- 13 iyul.- S.3.