“Azərbaycan”ın bayram təbriki

Bu gün Azərbaycanın milli mətbuatının yaranmasının 139-cu ili tamam olur. Azərbaycan jurnalistikasının keçdiyi şərəfli və keşməkeşli yol məhz 1875-ci il iyul ayının 22-dən – “Əkinçi” qəzetinin ilk nömrəsinin işıq üzü gördüyü gündən başlanır. Təsadüfi deyil ki, Azərbaycan jurnalistləri bu günü öz peşə bayramları kimi qeyd edirlər.

Geniş mənada götürdükdə bu möhtəşəm tarix bütün xalqın bayramıdır. Çünki mətbuat ölkənin, dövlətin, xalqın keçmişinin, bugünkü həyatının güzgüsüdür. O, hər gün hər bir vətəndaşın həyatına daxil olur, insanları yaşadıqları dövr, ətrafda baş verən hadisələr haqqında məlumatlandırır.

Adətən hər il 22 iyul günü, hətta bundan xeyli əvvəl də jurnalist kollektivlərini, ayrı-ayrı qələm sahiblərini öz oxucuları təbrik edirlər. Rəsmi dövlət qəzeti, Milli Məclisin orqanı “Azərbaycan”ın redaksiyasında isə bu gün həmin ənənəyə yeni bir çalar da əlavə olundu. Qəzet özünün ən fəal müəlliflərini, onunla sıx yaradıcılıq əməkdaşlığı edən iri təşkilatların mətbuat xidmətində çalışan həmkarlarının bayramını təbrik etdi.

Artıq müəllifin öz əlyazmasını götürüb xeyli vaxt itirərək redaksiyaya gəldiyi, yaxud yazdıqlarını zərfə qoyub göndərdiyi zamanlar arxada qalıb. İndi elektron ünvanlar var, axı. Ona görə də qəzetin ən fəal müəlliflərinin dəvətlə redaksiyaya gəlməyi, bir gün jurnalistlərlə eyni ab-havada yaşamağı, sıx əməkdaşlıq etdikləri bu yaradıcı insanlarla söhbətləşməyi, fikir mübadiləsi aparmağı yerinə düşdü. “Azərbaycan”çılar qəzetin fəal müəlliflərini əliboş qarsılamadılar. Onlardan 12 nəfəri “Azərbaycan”la səmərəli, fəal və operativ əməkdaşlığa, milli mətbuatın inkişafına verdiyi töhfəyə görə qəzetin təsis etdiyi diploma layiq görüldülər. Bu münasibətlə qəzetin Mətbuat tarixi muzeyində tədbir düzümləndi.

“Azərbaycan” qəzetinin Baş redaktoru, Milli Məclisin deputatı Bəxtiyar Sadıqov çıxış edərək mətbuatımızın tarixindən söhbət açdı, hazırda “Əkinçi”nin ənənələrinin “Azərbaycan” qəzeti tərəfindən uğurla davam etdirildiyini vurğuladı:

- Bu gün Azərbaycan mətbuatının qarşısında duran ən böyük problemlərdən biri peşəkarlıq məsələsidir. Biz redaksiya daxilində əsl peşəkarlar yetişdirməyə çalışırıq. Peşəkar jurnalistin yetişməsi isə uzun və çətin prosesdir. Hər bir yazının hasilə gəlməsi üçün nə qədər enerji sərf edilir. Çətinliklər çəkmək, müxtəlif fikirləri söz donuna geyindirib sistemli, süjetli, oxunaqlı şəkildə ağ kağıza köçürmək asan deyil. Amma bu vacibdir, vətənə, xalqa xidmətin bir yoludur. Bütün bunlardan əlavə biz çalışırıq ki, qəzetin ətrafına öz sahələrinin biliciləri, həmçinin qələm işlətmək istedadına malik olan insanları cəlb edək. Buna da əksər hallarda nail oluruq. İkinci məsələ odur ki, biz qəzetçilərin çətinliklərindən biri ilkin mənbədən faktları əldə etmək, dəqiq, operativ informasiya almaq və onları oxuculara çatdırmaqdır. Bu işdə isə bizə müxtəlif təşkilatların mətbuat xidmətləri kömək edirlər. Burada da peşəkarlıq lazımdır. Çünki mətbuat xidmətlərində məhz peşəkarlar çalışanda onlarla işləmək asan və səmərəli olur.

Baş redaktor Bəxtiyar Sadıqovun “dəyirmi masa” arxasında əyləşmiş qonaqlara “həmkarlar” deyə müraciət etməyi heç də təsadüfi deyildi. Çünki məhz onlar – öz sahəsinin yüksək ixtisaslı mütəxəssisləri, görkəmli alimləri olan, eləcə də dövlətin aparıcı strukturlarının mətbuat xidmətlərində çalışan bu insanlar Azərbaycanın müasir sosial-iqtisadi yüksəlişini, məqsədyönlü daxili və xarici siyasətini, Prezident İlham Əliyevin həyata keçirdiyi nəhəng işləri, göstərişlərinin yerinə yetirilməsini xalqa anlaşıqlı, ətraflı çatdırmaqda bizə əsl dəstəkçidirlər. Axı bir sıra mövzular var ki, onlar əhatə etdikləri sahə haqqında tam, dolğun məlumat çatdırmaq üçün dərin təhlilə ehtiyac duyurlar. Bugünkü inkişafı, tərəqqini insanlara anlaşıqlı çatdırmaqda da təfəkkürlü anlayışa, təfəkkürlü sözə tələbat çoxdur.

Belə söz sahiblərindən, “Azərbaycan”ın səhifələrində tez-tez imzası görünən və bu gün qəzetin diplomunu alan müəlliflərdən biri Milli Məclisin deputatı Hüseynbala Mirələmovdur. Vaxtının az olmasına baxmayaraq, qəzet üçün çox maraqlı yazılar hazırlayır. Onun hər çıxışında yazıçı yanaşması, əsaslı faktlar, dövlətçilik, dövlətin maraqları öz əksini tapır və həm müəllifə, həm də qəzetə hörmət qazandırır.

Qəzetin digər fəal müəllifi professor Müşfiq Atakişiyevdir. Ölkədə aparılan iqtisadi islahatlar, regionların inkişafına yönəldilən dövlət proqramlarının necə yerinə yetirilməsi, sahibkarlığın inkişafı və bir çox digər məsələlərin elmi və iqtisadi təhlili məhz Müşfiq müəllimin iqtisadçı və alim qələminin süzgəcindən keçir.

Əməkdar jurnalist Yusif Kərimov isə “Azərbaycan”ın oxucularının diqqətini öz oxunaqlı və məntiqli publisistikası ilə cəlb edib. Yusif müəllim gözəl qələm sahibidir. Uzun illərdir jurnalistika, publisistika və bədii söz sahəsində qələm çalır. O, həm də Azərbaycan jurnalistlərinin böyük bir dəstəsinin ustadı, qəzetin bilavasitə hazırlandığı məkanda – redaksiyalarda müəllimi olub. Qələmi bu gün də əlindədir və ən yaxşı, ən aktual yazılarını “Azərbaycan”a təqdim edir.

“Azərbaycan” qəzetinin diplomu ilə təltif olunan iqtisad elmləri doktoru Qüdrət Kərimov, YAP Qadınlar Şurasının sədri, professor Nurlana Əliyeva və yeddi strukturun mətbuat xidmətinin rəhbərinin də redaksiya ilə əməkdaşlığı yüksək dəyərləndirildi. Milli Məclisin mətbuat katibi Akif Nəsirov, Daxili İşlər Nazirliyinin mətbuat xidmətinin rəhbəri Sadiq Gözəlov, İqtisadiyyat və Sənaye Nazirliyinin mətbuat xidmətinin rəhbəri Abbas Əliyev, Yeni Azərbaycan Partiyasının mətbuat xidmətinin rəhbəri Hüseyn Paşayevin ünvanına redaksiya ilə səmərəli əməkdaşlıq əlaqələri yaratdıqları üçün xoş sözlər deyildi. Eləcə də Rabitə və Yüksək Texnologiyalar Nazirliyinin, “Azərbaycan Hava Yolları” QSC-nin və Dövlət Sosial Müdafiə Fondunun mətbuat xidməti rəhbərləri Müşfiq Əmirov, Məhərrəm Səfərli və Əmrah Cəfərova redaksiyanı dəqiq və operativ məlumatlarla mütəmadi təmin etdikləri üçün təşəkkür bildirildi.

Bir daha qeyd edildi ki, bu gün diplomla təltif olunanlar mətbuatı qəlbən sevən, öz istedadları və bilgiləri ilə “Azərbaycan” qəzetinə bacardığı qədər kömək göstərən insanlardır və onlara gələcək işlərində, yaradıcılıqlarında müvəffəqiyyətlər arzu edildi.

Diploma layiq görülənlər bunu onların əməyinə verilən yüksək qiymət kimi dəyərləndirdilər. “Azərbaycan”ın ölkənin baş qəzeti olduğunu vurğulayaraq onunla əməkdaşlıq etməkdən qürur və məmnunluq duyduqlarını bildirdilər. “Dövlətimizin, dövlətçiliyimizin maraqlarının keşiyində dayandığı üçün bu qəzet oxucuların ruhuna çox yaxındır” – dedilər.

İqtisadiyyat və Sənaye Nazirliyinin mətbuat xidmətinin rəhbəri Abbas Əliyev ən vacib məlumatları “Azərbaycan” qəzetində dərc etməyə üstünlük verdiklərini bildirdi. Ümumiyyətlə, çalışdığı sahədə oxucuların ən dəqiq məlumatları məhz bu qəzetdə axtardıqlarını və tapdıqlarını söylədi.

Əməkdar jurnalist Yusif Kərimov yaxşı qəzetin həmişə işıq, nur mənbəyinə bənzədildiyini xatırlatdı. O, “Azərbaycan” qəzetinin həmçinin müəlliflərlə əməkdaşlıq əlaqələri yaratmaq, öz ətrafına müxtəlif sahələrdə çalışan müəllifləri toplamaq təcrübəsini təqdirəlayiq hesab etdi.

Milli Məclisin mətbuat katibi Akif Nəsirov dedi: “On ildən sonra, yüz ildən sonra Azərbaycanın bugünkü və hərgünkü siyasi xəritəsinə nəzər salmaq istəyənlər onun əsl mənzərəsini “Azərbaycan” qəzetində görəcəklər. Çünki onu ən geniş və dəqiq formada ictimaiyyətə çatdıran “Azərbaycan” qəzetidir. Qəzet, eyni zamanda inkişafımıza mane olan neqativ halları, bir sıra mətbuat orqanlarında, televiziya kanallarında olan çatışmazlıqları da cəsarətlə göstərir. “Azərbaycan” həm də insanlarla ünsiyyət qurmağı bacaran qəzetdir. Onun ətrafında bacarıqlı müəlliflərin toplanması, müxtəlif təşkilatların mətbuat xidmətlərinin qəzetlə sıx əməkdaşlığı da məhz bu ünsiyyətin bəhrəsidir”.

Sonda qonaqlara hədiyyə - “Azərbaycan” qəzetinin nəşr etdiyi kitabların dəsti təqdim edildi. Fotomüxbirimiz bu görüşün ən xoş anlarını obyektivə aldı.

Flora SADIQLI,

Azərbaycan.-2014.- 22 iyul.- S.5.