Gənclərə dövlət
qayğısı yüksək səviyyədədir
Hər bir tarixi hadisə özünəməxsus taleyini
yaşayır.
Lakin yaşanan taleyin də öz tarixi olur.
2014-cü il Gənclər və İdman
Nazirliyinin 20 illik fəaliyyətinin tarixidir. Hazırda nazirlik,
necə deyərlər, öz adına layiq 20 illik gənclik
ömrünü yaşayır. Bu yaşda arzular isə
bitib-tükənmir...
Nazirliyin
20 illik yubileyi ərəfəsində indiyə qədər
görülən işlərə, əldə olunan nailiyyətlərə nəzər
saldıqda, bir daha əmin olursan ki, gənclər və idman siyasətinin uğurla həyata
keçirilməsində dövlətimizin bu sahəyə
göstərdiyi qayğı və diqqət əvəzsizdir. Əlbəttə, öncə nazirliyin
yaranmasının təşəbbüskarı olan
ümummilli lider Heydər Əliyevin tarixi xidmətlərini,
uzaqgörən və ardıcıl siyasətini xüsusi qeyd
etmək lazımdır. Ulu öndərin
mübariz həyat tərzi, zəngin irsi, milli dəyərlərə
bağlılığı, işi və şəxsi keyfiyyətləri,
fenomenal istedadı onu hər bir gəncin idealına
çevirmişdir.
1996-cı
ildə ümummilli liderin təşəbbüsü ilə
keçirilən Azərbaycan gənclərinin I forumu
respublikanın hər yerində gənclərlə aparılan
işin nəzərəçarpacaq dərəcədə
canlanmasına təkan verdi. Forumdan sonra gənc
istedadların "Qızıl kitabı"nın təsis
edilməsi, təqvimə Azərbaycan gəncləri
gününün daxil olunması, hər üç ildən
bir gənclər forumunun keçirilməsi, "Dövlət
gənclər siyasəti haqqında" fərmanın, "Gənclər
siyasəti haqqında" qanunun imzalanması və digər tədbirlər
gənclərin təşkilatlanmaya meylinin artmasına,
müasir gənclər hərəkatının
formalaşmasına şərait yaratdı. Və
bütün bunlar Heydər Əliyev siyasi kursuna xas olan
ardıcıllıqla həyata keçirildi.
Ölkənin
taleyüklü məsələlərində
gəncliyin sözü və birliyi aparıcı, həlledici
amilə çevrildi. Hazırda gənclər
dövlət idarəçiliyi, iqtisadiyyat, mədəniyyət,
idman və digər sahələrdə uğurla
çalışır, ölkəmizi şərəflə,
yüksək səviyyədə təmsil edirlər.
Qürurla demək olar ki, bu gün Azərbaycan gəncliyi üzərinə
götürdüyü şərəfli vəzifələrin
öhdəsindən layiqincə gəlməyi bacarır.
1994-cü ildə imzalanmış "Əsrin
müqaviləsi"ndən başlayan yol 2003-cü ildə
xalqın seçimi ilə Heydər Əliyevin
yaratdığı dövlətçilik ənənələrinin
layiqli davamçısı kimi hakimiyyətə gələn
Prezident İlham Əliyevin başladığı kursla yeni məcraya
qədəm qoydu. İqtisadi layihələrin təntənəsi
Azərbaycanın inkişaf və tərəqqisini, beynəlxalq
aləmdə mövqeyinin möhkəmlənməsini təmin
etdi. İndi "Azərbaycan 2020: gələcəyə
baxış" İnkişaf Konsepsiyası ölkəmizdə
sosial rifahın, əhalinin maddi vəziyyətinin
yaxşılaşdırılması kimi prioritet vəzifələri
müəyyən edib.
1997-ci ildə Milli Olimpiya Komitəsinin prezidenti
seçildiyi vaxtdan bəri Azərbaycan gəncliyinin liderinə
çevrilmiş İlham Əliyevin son on ildə
siyasi-iqtisadi, sosial-mənəvi layihələrində idman və
gənclik mövzusunun xüsusi yeri olub.
Gəncliklə bağlı dövlət siyasətindən
söz düşmüşkən iki tarixi qərarı
xüsusi qeyd etmək lazımdır. 2005-2009-cu və
2011-2015-ci illəri əhatə edən "Azərbaycan gəncliyi"
Dövlət Proqramı gənclər siyasətinin müasir
dövrdə prioritet vəzifələrinin müəyyən
edilməsi, onların icrası baxımından mühüm sənədlər
oldu. Proqramlar beynəlxalq təcrübəyə
və tarixi-mədəni irsə, zəngin adət-ənənələrimizə
uyğun həyata keçirilib və hazırda ikinci sənədin
icrası uğurla davam edir.
Azərbaycanda hər ilin bir sahəyə həsr
olunması kimi gözəl ənənə formalaşıb. Bu mənada
2007-ci ilin "Gənclər ili" elan edilməsi Prezident
İlham Əliyevin müəyyənləşdirdiyi dövlət
siyasətində gənclik mövzusunun nə qədər
aktual və əhəmiyyətli olduğunu bir daha
vurğulamış oldu.
İl ərzində
keçirilən xüsusi tədbirlər planına uyğun
olaraq gənclərin ictimai-siyasi, sosial-iqtisadi həyatda, mədəni-mənəvi
mühitin formalaşmasında fəal iştirakı və
onların hüquqlarının müdafiəsinin təmin
edilməsi və müvafiq qanuni bazanın möhkəmləndirilməsi,
bütün istiqamətlər üzrə müvafiq
proqramların səmərəli həyata keçirilməsi,
istedadlara dövlət qayğısının
artırılması, elm, təhsil, iqtisadiyyat, mədəniyyət,
dövlət idarəçiliyi və digər sahələrdə
gənclərin xidmətlərinin qiymətləndirilməsi və
onların təşəbbüsünə dəstək verilməsi
kimi vəzifələr müəyyənləşdi. Ən əsası,
il boyu görülən işlər
sonrakı illərin də fəaliyyət proqramının təməl
daşı oldu.
Cənab
İlham Əliyev gənclər qarşısında
çıxışlarının birində demişdir:
"Siz bütün işlərdə mənə arxalana bilərsiniz.
Mən də sizə arxalanıram". Bu
sözlərin arxasında gənclər və idman sahəsində
gənclərin
rifahının yüksəlməsi
üçün dövlət səviyyəsində
görülən işləri, tədbirləri xatırlamaq
kifayətdir. Masallı,Tərtər, Mingəçevir
və Lənkəranda gənclər
mərkəzlərinin açılışı zamanı
ölkə başçısı cənab İlham
Əliyevin gənclərlə keçirdiyi görüşlər,
apardığı fikir
mübadiləsi, dəyərli tövsiyələri
onların hər birinin həyatında unudulmaz tarixi hadisədir.
2011-ci ilin dekabr ayında Azərbaycan Respublikası
Prezidentinin sərəncamı ilə Gənclər Fondunun
yaradılması da mühüm əhəmiyyətə
malikdir. Fond şəffaflığı təmin etmək məqsədilə
ölkəmizdə ilk dəfə fəaliyyətini yalnız
internet şəbəkəsi vasitəsilə həyata
keçirir. Ötən dövr ərzində
bu qurum tərəfindən respublikanın təkcə yerli əhəmiyyətli
deyil, həm də beynəlxalq səviyyəli layihələri
dəstəklənib. Burada xüsusi qeyd
olunmalıdır ki, məhz Azərbaycan Gənclər Fondu ilk
dəfə olaraq gənclərin fərdi layihələrini dəstəkləyib.
Bu təcrübə hətta bir sıra
qabaqcıl dövlətlər, eyni zamanda beynəlxalq mütəxəssislər
tərəfindən yüksək dəyərləndirilib.
Bu gün müasir dövrün tələblərinə
uyğun olaraq gənclərin dünya mədəniyyətinə
inteqrasiyası, planetin aparıcı ölkələrinin təcrübəsini
öyrənməsi gənc dövlət üçün ən
aktual məsələdir. "2007-2015-ci illərdə
Azərbaycan gənclərinin xarici ölkələrdə təhsili
üzrə Dövlət Proqramı" bu vəzifələri
uğurla icra etməyə kömək edir. Proqram çərçivəsində
5 mindən artıq gəncin dünyanın nüfuzlu ali məktəblərində təhsil
almağa göndərilməsi ilə bağlı tədbirlər
texnoloji inkişaf, innovativ düşüncə əsrində
Azərbaycanın inamlı gələcəyinə verilən ən
böyük töhfələrdən oldu.
Azərbaycan gəncliyi bu gün beynəlxalq aləmdə
seçilməyə, dünya gənclər hərəkatının
aparıcı qüvvələri arasında yer almağa
iddialıdır. Son illər gənclərin beynəlxalq əməkdaşlığı
xeyli genişlənib, ikitərəfli və çoxtərəfli
əlaqələrin olduğu dövlətlərin sayı 62-yə
çatıb. Xarici ölkələrdə "Mən
Azərbaycan haqqında nə bilirəm?" müsabiqəsi
və "Azərbaycanın gənc dostları" mübadilə
proqramlarının həyata keçirilməsi kimi addımlar
həm gəncliyimizin beynəlxalq aləmə inteqrasiyası,
həm də Azərbaycanın təbliği baxımından əhəmiyyətli
təsir vasitəsinə çevrilib. Hazırda orta hesabla il ərzində beynəlxalq mübadilədə
iki minədək gənc iştirak edir. Bu,
2003-cü illə müqayisədə 20 dəfə
çoxdur. Azərbaycan gəncləri beynəlxalq
təşəbbüskarlığı ilə də
seçilməyə başlayıb. 5 beynəlxalq gənclər
platformasının ("Dialoq və Əməkdaşlıq
Uğrunda" İslam
Konfransı Gənclər Forumu, GUAM ölkələrinin
Gənclər Forumu, Dünya Türk Gəncləri Birliyi,
Dünya Gənc Türk Yazarlar Birliyi və "Böyük
İpək Yolu" Beynəlxalq Gənclər İttifaqı)
təşəbbüskarı və təsisçisi Azərbaycan
gəncliyidir.
Leyla
xanım Əliyevanın rəhbərlik etdiyi Rusiyanın Azərbaycanlı
Gənclər Təşkilatı (AMOR) Rusiya Federasiyasında
yaşayan və təhsil alan azərbaycanlı
gənclərin bir araya gətirilərək diaspor və
lobbiçilik işinə cəlb olunmasında, onların fəaliyyətlərinin
əlaqələndirilməsində, gənclərlə
bağlı müxtəlif tədbirlərin keçirilməsində,
onları maraqlandıran mövzularda müzakirələrin
aparılmasında xüsusi rol oynayır.
Gənclər
və İdman Nazirliyi gənclərimizin intellektual, mədəni
inkişafı üçün nəzərdə tutulan layihələrin
dəstəklənməsində, davamlı olmasında
maraqlıdır. İstedadlı gənclərlə iş sahəsində
normativ-hüquqi bazanın təkmilləşdirilməsi
üçün mühüm işlər
görülmüşdür.
"Azərbaycanda
gənc istedadlara dövlət qayğısı
haqqında" Azərbaycan Respublikası Prezidentinin fərmanı
(1996), "Gənc istedadlar üçün xüsusi təqaüdlərin təsis
edilməsi haqqında" Azərbaycan Respublikası
Prezidentinin sərəncamı (1997), "Yaşlı və gənc
nəsil yazıçı, rəssam
və bəstəkarların
yaradıcılıq fəaliyyətini təmin etmək
üçün xüsusi təqaüd
fondu haqqında" Azərbaycan Respublikası Prezidentinin fərmanı
(2007), "Xüsusi istedada malik
olan uşaqların (gənclərin) yaradıcılıq
potensialının inkişafı üzrə" Dövlət
Proqramı (2006-2010) qəbul edilmişdir. Ölkə
Prezidentinin 2 iyul 2013-cü il tarixli fərmanı ilə Gənclər
üçün Prezident mükafatı təsis edilmişdir.
Mükafat elm, mədəniyyət, ədəbiyyat, təhsil və
ictimai fəaliyyət sahələrində fərqlənən
gənclərə ildə bir dəfə təqdim edilir.
Müasir gənclərin intellektual səviyyəsinin
yüksəlməsi istiqamətində Gənclər və
İdman Nazirliyi tərəfindən müxtəlif tədbirlər
həyata keçirilir. Gənc alimlərin, intellektual klubların, şən və
hazırcavablar klubları komandalarının müxtəlif
beynəlxalq tədbirlərdə iştirakı təmin
olunur.
Ölkə
Prezidentinin sərəncamı ilə təsdiq edilmiş
"Azərbaycan Respublikasında 2009-2015-ci illərdə elmin
inkişafı üzrə Milli Strategiya"ya əsasən gənc alimlərin elmi fəaliyyətinin
stimullaşdırılması və onların fundamental elmi-tədqiqat
işlərinin səmərəli aparılması,
yaradıcılıq potensialının artırılması
istiqamətində tədbirlər görülür. Yeniyetmələrin
VI Beynəlxalq Elm Olimpiadası, MDB-nin
iştirakçısı olan dövlətlərdən ali məktəb
tələbələri arasında "İdeya var" elmi
yaradıcılıq müsabiqə-festivalı, gənc alimlərin
I və II respublika innovativ ideya yarmarkaları, "Gənclər
və ekoloji inkişaf uğrunda" Beynəlxalq Bakı elmi-praktik konfransı,
"Avropa məkanında yeni
çağırışlar: gənc alimlərin Beynəlxalq
Bakı Forumu", Dünya Gənc Alimlərinin Beynəlxalq
Bakı Forumunu qeyd etmək olar. Gənc alimlərin elmi əsərlərinin,
məqalələrinin
toplusu müntəzəm olaraq nəşr edilir. Bunlarla yanaşı, Gənclər və İdman
Nazirliyi tərəfindən gənc alimlərin beynəlxalq
konfrans, simpozium, seminarlarda məruzəçi və təqdimatçı
qismində iştirakı daim dəstəklənir.
Xüsusi
qeyd etmək lazımdır ki, Azərbaycanın birinci
xanımı, UNESCO və ISESCO-nun xoşməramlı səfiri,
Heydər Əliyev Fondunun prezidenti Mehriban xanım
Əliyeva gənclərdən
öz diqqət və qayğısını əsirgəmir. Onun sədrliyi ilə Bakıda "Gənclərin məşğulluq
sammiti" uğurla həyata keçirilmişdir.
Gənclər
arasında
müxtəlif
intellektual oyun növləri təbliğ edilir. "Breyn-rinq", "Nə? Harada?
Nə zaman?" intellektual oyunları üzrə
mütəmadi olaraq keçirilən çempionatlar
çoxsaylı gəncləri öz ətrafında sıx
birləşdirir. Azərbaycanın ilk milli intellektual
oyunu - "Xəmsə" hər il silsilə
tədbir kimi həyata keçirilir. Artıq "Xəmsə"
ölkə sərhədlərini aşaraq beynəlxalq statuslu intellektual oyun proqramlarına daxil
edilmişdir.
İnformasiya
texnologiyalarının
gənclər arasında daha geniş
yayılması üçün
kompüter oyunlarının, həmçinin müasir
texnologiyalardan istifadə etməklə digər
yarışların
keçirilməsinə diqqət artırılıb.
Qalib komandaların kompüter oyunları üzrə dünya çempionatlarında
iştirakı təmin edilib. Müasir texnologiyalar
vasitəsilə gənclər arasında Azərbaycan həqiqətlərini
təbliğ etmək məqsədilə 2012-ci ildə ilk
milli kompüter oyunları - "İşğal altında: Şuşa", "İşğal
altında: Ağdam" hazırlanıb gənclərin istifadəsinə
verilib.
Mədəniyyət insanla ətraf mühit arasında
harmoniya yaradır. Məhz bu cəhətdən "Tələbə
Baharı" festivalı dünya gəncləri arasında həmrəyliyin,
dostluğun, sülhün parlaq təcəssümüdür.
Festival artıq 6 ildir ki, uğurla davam edir.
"Tələbə
Baharı"nın - Tələbələrin
Ümumrespublika Yaradıcılıq Festivalının 2011-ci
ildə MDB-yə üzv dövlətlərin ali təhsil
müəssisələri arasında keçirilməsi
xüsusilə təqdirəlayiq təşəbbüs idi.
Bizim çox zəngin musiqi mədəniyyətimiz,
ifaçılıq sənətimiz var, müasir gənclərimiz
isə milli incəsənətimizin təbliğində, onun
dünya ölkələrində yaxından tanıdılmasında fəal
iştirak edirlər.
Gənclər
və İdman Nazirliyi fəaliyyət göstərdiyi 20 ildə
gənclər arasında Azərbaycanın tarixi və milli irsin təbliği
ilə yanaşı, onlarda müstəqilliyimizin, dövlətçiliyimizin,
torpaqlarımızın müdafiəsinə daim hazır olmaq
ruhunda tərbiyə edilməsinə diqqəti
artırmışdır.
Ölkəmizin dünyada rəqabətədavamlığını
artıra bilən yaradıcı, yüksək intellektual səviyyəsi
olan bacarıqlı gənclərimiz yetişməkdədir. Gənclərimizin
mədəniyyətlərarası dialoqlarda iştirakı Azərbaycan
haqqında əsl həqiqətin üzə
çıxmasında, xalqlar arasında dostluğun,
anlaşmanın daha da möhkəmlənməsində xidmətləri
xüsusi vurğulanmalıdır. Dövlət gənclər
siyasətinin mühüm istiqamətlərindən biri də gənclərin asudə
vaxtının səmərəli təşkili,
sosialyönümlü fəaliyyətlərə cəlb
olunmasıdır. Gənclər arasında
sağlam həyat tərzinin təbliği, onların zərərli
vərdişlərdən uzaqlaşdırılması
başlıca məqsəddir. Bunlara nail olmaq
üçün diqqət yay və qış təlim və
sağlamlıq düşərgələrinin, müsabiqələrin,
intellektual yarışların səmərəli təşkilinə
yönəlmişdir.
Cəmiyyətin
aparıcı qüvvəsi olan sağlam düşüncəli gənclərimizdən fərqli olaraq, zərərli vərdişlərə
aludəliyin qurbanları da az deyil. Gənclər və
İdman Nazirliyinin dəstəyi ilə "Gənclərin
hüquqi maarifləndirilməsi" İctimai Birliyi ilə bu
il iyulun 15-dən "Cəza çəkməkdən
azad edilmiş gənclərin sosial adaptasiyası" mərkəzi
yaradılmışdır. Layihə "Azərbaycan gəncliyi 2011-2015-ci illərdə"
Dövlət Proqramının müvafiq tədbirlər
planında nəzərdə tutulmuşdur.
Hər bir ölkə, xalq üçün
sağlamlıq ən ümdə vəzifə, ümummilli
lider Heydər Əliyevin təbirincə desək, sağlam
düşüncə tərzi həm də tarixi-mədəni
irsin əsas daşıyıcı qüvvəsidir. Bu baxımdan
idman ictimai-siyasi hadisə kimi xüsusilə gənclərin həyatında
müstəsna rol oynayır. Dövlət
tərəfindən göstərilən qayğı
idmançılarımızda siyasi iradə, liderlik,
özünütəsdiq kimi keyfiyyətləri
aşılamağa kömək edir.
Estetik mədəniyyət, şəxsiyyətin
fiziki və mənəvi inkişafını təmin etmək
dünya olimpiya hərəkatının ən ümdə məqsədlərindən
biridir. İdmanın sülhməramlı, humanist dəyərləri
dünyanın mötəbər yarışlarında
milyonlarla insan arasında ən etibarlı körpülərdir.
İdman həmçinin cəmiyyətin vahid milli ideya ətrafında
birləşməsinə və gənclərdə vətənpərvərlik
hisslərinin formalaşmasına böyük təkan
verir.
1997-ci ildə
ölkənin bədən tərbiyəsi və idman ictimaiyyətinin
çağırışına səs verib Milli Olimpiya Komitəsinin
prezidenti seçilmiş İlham Əliyevin bu sahədə fəaliyyəti
hələ Azərbaycan Prezidenti olmadığı illərdən
səmərəsini, bəhrəsini verdi.
2000-ci ildə Azərbaycan idmançılarının
Sidney Yay Olimpiya Oyunlarında ilk böyük uğurları bu
nailiyyətlərin memarı kimi cənab İlham Əliyevin
liderlik rolunu təsdiqlədi, onun Azərbaycan naminə fəaliyyətinin
potensial imkanlarını bir daha əyani nümayiş etdirdi. 1996-cı ildə Atlanta Yay
Olimpiya Oyunlarında 23 iştirakçıdan ibarət
komandanın nailiyyəti bir gümüş medalla əks
olmuşdusa, dörd il sonra Sidneydə 31
idmançı tərəfindən 2 qızıl və 1
bürünc medal əldə edilmişdir. Bu da
ölkəmizə ilk tarixi zəfərləri gətirdi.
Həmin illər həm də Azərbaycan bədən
tərbiyəsi və idmanın dönüş nöqtəsi,
intibah dövrünün başlanğıcı oldu.
Söz yox ki, olimpiadalar hər dördillik dövr
üçün təkcə böyük idman bayramı, təntənəsi
deyil. Onlar həm də bir hesabat məqamıdır.
Gəlin sadəcə rəqəmlərə müraciət edək
və olimpiya uğurlarının artan tempinə diqqət
yetirək: Afinada (2004-cü il) 38
idmançı ilə biri qızıl olmaqla 5, Pekində
(2008-ci il) 44 iştirakçı ilə yenə biri ən
yüksək əyarlı olmaqla 7 medal
qazanılmışdı. Medalların artan tempi ilk illərin
göstəricisi idisə, 2012-ci il London
Yay Olimpiya Oyunları bu mənada daha bir keyfiyyəti ilə fərqlənirdi.
İdmançılarımız İngiltərənin
paytaxtında rekord sayda - 2-si qızıl, 2-si gümüş
və 6-sı bürünc olmaqla 10 medal qazandılar. Olimpiya komandamız bu göstərici ilə 205
ölkə arasında 30-cu yeri tutdu. Millimiz
Avropa ölkələri sırasında 15-ci, MDB dövlətləri
arasında 5-ci, müsəlman ölkələri arasında
3-cü yerdə qərarlaşdı.
Azərbaycan son illər təkcə olimpiya deyil, elə
paralimpiya hərəkatında da böyük uğurlara imza
atıb. Olimpiya oyunlarından dərhal sonra təşkil
olunan paralimpiya oyunlarında da idman uğurlarımız ilbəil
artır. Fiziki qüsuru olan
idmançılarımız böyük iradə
nümayiş etdirərək sağlam idmançıların
uğurlarını təkrarlamağa, hətta onlardan da
yüksək nəticə göstərməyə nail olurlar.
Son 10 ildə keçirilən 3 paralimpiya
oyunlarında (Afina-2004, Pekin-2008 və London-2012) Azərbaycan
26 medal qazanıb. Bunların 8-i
qızıl, 9-u gümüş, 9-u bürünc əyarında
olub.
Ölkədə qış idmanı növlərinin
inkişafı üçün müvafiq maddi-texniki
bazanın da yaradılmasına başlanılıb. 2010-cı ildə
yeniyetmələr arasında ilk dəfə Sinqapurda təşkil
edilən yay olimpiadasında 5-i qızıl və 3-ü
gümüş olmaqla 12 yeniyetmə idmançımızdan
8-i vətənə medalla döndü. Bu nəticələrə
görə ölkəmiz 204 ölkə arasında 11-ci yeri,
iştirakçıların sayına görə ən
yaxşı nəticə göstərən ölkələr
sırasında 2-ci, Avropada 6-cı, MDB ölkələri
arasında 3-cü yeri tutdu. Bu isə ölkədə
yeni nəsil idmançıların yetişdirilməsi, əhali
arasında bədən tərbiyəsi və idmanın
dayaqlarının möhkəmləndirilməsinin əsas
göstəricilərindən biri kimi qəbul edilə bilər.
Ötən
il Rusiyanın Kazan şəhərində keçirilmiş
27-ci Dünya Yay Universiadasında 12 proqram üzrə
yarışlara qoşulan Azərbaycanın tələbə
idmançıları 4 qızıl, 5 gümüş və
7 bürünc və ümumən 16 medalla həm kəmiyyət,
həm də keyfiyyət göstəricisinə görə
dünyada 162 ölkə arasında 15-ci nəticə göstərdi.
2013-cü
il 22 sentyabr - 1 oktyabr tarixində İndoneziyanın Palembanq
şəhərində 13 idman növü üzrə
keçirilmiş III İslam Həmrəyliyi Oyunlarında Azərbaycan
komandası 7 idman növündə
(karate, üzgüçülük, atletika, kamandan oxatma,
ağırlıqqaldırma, taekvondo və uşu) 24 medalla (6
qızıl, 9 gümüş, 9 bürünc) komanda
hesabında 46 ölkə arasında 7-ci yeri tutdu.
Bu uğurlar gələcəkdə ölkəmizin məşqçi-müəllim
ehtiyatını zənginləşdirəcək kadrların
öz nümunələri əsasında neçə-neçə
gəncin istedadının parlamasına xüsusi təkan verə
bilər. Belə psixoloji amillərin idmanda rolu
danılmazdır.
Nümunədən danışarkən, idmanın
inkişafı və ölkədə bədən tərbiyəsinin
həyat tərzinə çevrilməsi, onun bir hərəkat
kimi yayılmasında əldə olunan medallarla bahəm əsas
vasitələrdən biri də yarış təşkilatçılığıdır. Onu da qeyd etmək
lazımdır ki, bu gün beynəlxalq idman
yarışlarının təşkilatçılığı
həm də ölkənin təbliğində, milli-mənəvi
dəyərlərin yayılmasında, ölkənin turizm
potensialının inkişafında əhəmiyyətli təsir
vasitəsidir. Əminliklə deyə bilərik
ki, Azərbaycan nüfuzlu beynəlxalq yarışların dəyişməz
ünvanına çevrilib.
Təkcə
cari ilin birinci yarısında milli idman federasiyaları ilə
birlikdə 70 respublika, 20 beynəlxalq
səviyyəli yarış keçirilmiş, 50 beynəlxalq
yarışda ölkə yığma komandalarının
iştirakı təmin olunmuşdur.
İlin birinci yarısında dünya,
Avropa çempionatlarında və birinciliklərində, kubok
yarışlarında 35
qızıl, 37 gümüş
və 50 bürünc medal
əldə edilmişdir.
Bu ilin
aprelində Bakı şəhərində keçirilmiş
Dünya İdman Mətbuatı Assosiasiyasının (AIPS)
77-ci konqresi dünyanın nüfuzlu idman jurnalistlərinin diqqətinin
ölkəmizə yönəldilməsi baxımından
böyük əhəmiyyət daşımış, AIPS-ə
üzv ölkələrdə idman jurnalistikasının
inkişafına, media nümayəndələri arasında əməkdaşlığın
dərinləşməsinə, təşkilatın fəaliyyətinin
təkmilləşdirilməsinə şərait
yaratmışdır. Azərbaycan Respublikasının
Prezidenti cənab İlham Əliyev konqresin
açılış mərasiminə təbrik məktubu
göndərmiş, iştirakçılar üçün təşkil
edilmiş "Xoş
gəlmişsiniz" gecəsində iştirak etmişdir.
Bu il ölkəmizdə Yeniyetmələrin II Olimpiya Yay
Oyunlarına lisenziya xarakterli atletika üzrə Avropa təsnifat
turniri, Bakı şəhərində bədii gimnastika üzrə 30-cu Avropa çempionatı,
taekvondo üzrə Avropa çempionatı, Naxçıvan
Muxtar Respublikasında ümummilli lider Heydər Əliyevin
xatirəsinə həsr olunmuş sərbəst güləş
üzrə gənclər arasında "Naxçıvan
kuboku", şahmat üzrə
"Naxçıvan Open-2014" beynəlxalq şahmat
festivalı, Bakı Tennis
Akademiyasında tennis üzrə beynəlxalq turnir, velosiped idmanı üzrə
"Tour d' Azerbaidjan" beynəlxalq turniri, qol güləşi üzrə XXIV
Avropa çempionatı və digər tədbirlər yüksək
səviyyədə təşkil edilərək
keçirilmişdir.
Əldə olunan idman nailiyyətlərinə gəlincə,
müqayisəli təhlil üçün sadəcə onu
qeyd etmək yerinə düşər ki, 1992-ci ildə cəmi
23 (olimpiya növləri üzrə 7) medal
qazanılmışdısa, 2002-ci ildə bu rəqəm 175
(olimpiya növləri üzrə 63) idi. Sonrakı illərdə
idman uğurlarının həm medal sayı, həm də
növ çeşidi artan templə davam edib. 2013-cü ildə mötəbər yarışlarda
782 medal qazanılıb və onlardan 280-i qızıl əyarlı
olub.
Son illər idmanın artan tempi haqqında danışarkən
Azərbaycan idmanında 2012-ci ildən xüsusi söz
açmaq lazımdır. Prezident İlham Əliyevin sərəncamı
ilə "İdman ili" elan edilən 2012-ci il
Azərbaycana böyük uğurlar gətirdi. İlin
sonlarında Avropa Olimpiya Komitəsi ilk dəfə 2015-ci ildə
qitənin ən böyük yarışının - I Avropa
Oyunlarının keçirilmə hüququnu Azərbaycana verdi. Bir qayda olaraq, olimpiya oyunları kimi məsuliyyətli
və çoxşaxəli idman tədbirinə hazırlıq
üçün 6-7 il vaxt tələb
olunur. Lakin Azərbaycanda quruculuq işlərinin
vüsəti, iqtisadi potensialın ildən-ilə yüksəlməsi
ölkəmizə olan inamı xeyli artırıb. Azərbaycanın bu gün idmanda ən yaxşı
tərəfdaş kimi tanınması, yarış təşkilatçılığında
hökumətin verdiyi vədlərə əməl etməsi
sadəcə idman prizmasından deyil, həm də Odlar yurdunun
beynəlxalq nüfuzunun əsas göstəricisidir.
Hazırda
Bakı gələn il təşkil ediləcək
bu möhtəşəm idman bayramına hazırlaşır.
Ölkə başçısının müvafiq fərmanı
ilə I Avropa Oyunlarını
yüksək səviyyədə keçirmək məqsədilə
Heydər Əliyev Fondunun prezidenti, Milli Olimpiya Komitəsi
İcraiyyə Komitəsinin üzvü Mehriban xanım
Əliyevanın sədrliyi ilə Təşkilat Komitəsi
yaradılmışdır.
I Avropa
Oyunlarından əlavə, FİDE-nin konqresində 2015-ci ildə
şahmatçıların dünya kuboku, bir il
sonra keçiriləcək şahmat olimpiadasının
paytaxtımıza həvalə olunması da yarış təşkilatçılığında
Azərbaycanın artıq ən nüfuzlu turnirlərə də
ev sahibliyi etmək iqtidarında olduğunu əyani
nümayiş etdirir. Bu mənada ən son qərar - 2017-ci il İslam Oyunlarının Bakıda
keçirilməsi ilə bağlı verilən qərar idman
sahəsində daha bir sərhədin aşılması deməkdir.
Əlbəttə, bütün bunlar gələcəkdə
Azərbaycanı Olimpiya Oyunları kimi bəşəriyyətin
ən böyük idman bayramını təşkil etməyə
aparan yoldur.
Ümumi təhlillərə müraciət edəndə,
əlbəttə ki, inkişaf edən iqtisadi potensial, əhalinin
yüksələn maddi rifahı olmadan bunlara nail olmaq
mümkün deyildi. İdmançıların
yarışlarda uğurlu çıxışı
üçün ilk növbədə onların məşq
şəraitinin yüksək səviyyədə olması vacibdir.
Bu baxımdan Bakıda, eləcə də
ölkənin digər şəhər və rayonlarında
istifadəyə verilən, tikilməkdə olan müasir
olimpiya idman kompleksləri mühüm əhəmiyyət kəsb
edir.
Bu il
Prezident İlham Əliyevin iştirakı ilə sayca 41-ci olan
Göygöl Olimpiya İdman Kompleksinin, Bakıda Milli Gimnastika
Arenasının, Respublika İdman Tibb, Diaqnostika və
Reabilitasiya İnstitutunun açılış mərasimləri
keçirilmişdir. Eyni zamanda, Bakı şəhərində
3 gənclər evi fəaliyyətə başlamış,
Daşkəsən rayonunda Gənclərin Təlim və
İstirahət Mərkəzi isə açılışa
hazırlanmışdır.
5 olimpiya
idman kompleksinin və 2 idman kompleksinin tikintisi, eləcə də
Lənkəran Olimpiya İdman Kompleksinin yenidən
qurulması, Bakı şəhərində Olimpiya Hərəkatı
və İdman Muzeyinin inşası həyata keçirilir.
Bakı
şəhərində keçiriləcək I Avropa
Oyunları zamanı çimərlik voleybolu, çimərlik
futbolu, 3x3 basketbol, su polosu idman növləri üzrə beynəlxalq
yarışların keçiriləcəyi Avropa Oyunları
Parkının tikintisi, Su İdmanı Sarayının
inşası, Heydər Əliyev adına İdman Konsert
Kompleksinin əsaslı təmiri, Stend
Atıcılığı üzrə İdman Kompleksinin
sökülərək yenidən qurulması, Bakı İdman
Sarayının (Əl Oyunları Sarayı) əsaslı təmiri,
65000 tamaşaçı tutumu
olan Olimpiya stadionunun tikintisi işləri davam etdirilir.
I Avropa
Oyunları ilə əlaqədar kamandan oxatma idman növü
üzrə yarışların keçirilməsi
üçün T.Bəhramov adına Respublika Stadionunda
müvəqqəti qurğuların qurulması, boks,
qılıncoynatma, karate, taekvondo, voleybol idman növləri üzrə
yarışlar üçün Bakı Kristal Zalında arakəsmələrin
qurulması və müvəqqəti qurğularla təchiz
edilməsi, kanoe idman yarışlarının təşkili məqsədilə
Mingəçevir "Kür" Olimpiya Tədris İdman Mərkəzində əlavə
işlərin yerinə yetirilməsi, BMX velosipedi
və dağ velosipedi yarışları
üçün veloparkların tikintisinə hazırlıq
işləri yerinə yetirilir.
Gələn
il Avropa Oyunlarında qitənin 49 ölkəsindən
6000-dən artıq idmançının Azərbaycana gəlməsi
gözlənilir. İdmançılar 19 idman
növündə öz qüvvələrini sınayacaqlar.
Azərbaycan mədəniyyətlərin,
sivilizasiyaların qovuşduğu tarixi məkandır. Beynəlxalq
yarışların ölkəmizdə təhlükəsiz, ədalətli
prinsiplər əsasında keçirilməsi idmanın sərhədsiz,
geniş coğrafiyaya malik olmasını bir daha önə
çəkir.
Son illər
Azərbaycan Respublikası MDB, Avropa, Asiya, Yaxın Şərq
ölkələri ilə əməkdaşlıq sazişi və memorandumlara imza atıb. Gənclər
və idman hərəkatının daha da genişlənməsi,
birgə keçirilən tədbirlərdə təcrübə mübadiləsinin aparılması prioritet məsələlərdən
biridir.
Bildiyimiz kimi, olimpiya oyunları dünyada gedən
müharibələrin, zorakılığın əleyhinədir. Beynəlxalq Olimpiya Komitəsinin
sabiq prezidenti Samaranç "İdmanın manifesti"ndə
yazırdı: "İdman universal gücü ilə beynəlxalq arenada qardaşlıq və
sülhün bərqərar olmasında başlıca qüvvədir.
Hələ beynəlxalq təşkilatların
yaranmasından çox əvvəl insan şəxsiyyətini
ucaldan olimpiya idealları ayrı-ayrı sərhədlərdə
yaşayan xalqların həmrəyliyinə səbəb
olmuşdur. İdman həyatı bəzəyir,
dünyada ədalətə və sülhə doğru cəhdləri
daha da artırır". Doğrudan da,
idman, əslində, mənəvi tərbiyə, harmonik
inkişafdır. Çünki əsas
sosial-mədəni dəyərlər idmanın yüksək
nailiyyətləri ilə sıx bağlıdır.
Tarixi proseslər göstərir ki, olimpiya hərəkatı
dünyada sülhün və sağlam gələcəyin təminatıdır. Bu, dövlətimizin gənclər
və idman siyasətində
bir daha özünü göstərir.
Ümummilli lider Heydər Əliyevin dediyi kimi, "Azərbaycan
gəncinin potensial gücü çox böyükdür. Həm fiziki
gücü böyükdür, həm də onun mənəvi
iradəsi böyükdür. Əgər
biz hamımız idmanın inkişafına şərait
yaratsaq, idmanı kütləvi etsək və bütün
insanlar üçün bədən tərbiyəsini mütləq
onların həyatının bir hissəsinə çevirsək,
xalqımızın fiziki sağlamlığını, mənəvi
sağlamlığını təmin edəcəyik".
20 illik fəaliyyəti dövründə ulu öndərin
tövsiyələri və qarşımıza qoyduğu vəzifələri
layiqincə yerinə yetirməyi özünün əsas məqsədi
olaraq müəyyənləşdirmiş Gənclər və
İdman Nazirliyinin bundan sonrakı fəaliyyətində də
sağlam gənclik və bədən tərbiyəsinin kütləviliyi,
beynəlxalq idman uğurları başlıca istiqamət
olacaqdır.
Azad
RƏHİMOV,
Azərbaycan Respublikasının Gənclər
və idman naziri
Azərbaycan.-2014.-26 iyul.-S.4.