Mundialın açılışı möhtəşəm şou ilə yadda qaldı

Braziliyada futbol üzrə XX dünya çempionatının ilk matçı başlamazdan əvvəl San-Paulu şəhərindəki "Arena Korintians" stadionunda təntənəli açılış mərasimi keçirilmişdir.

Mərasimdə 600-dən çox artist iştirak edirdi. Onlar parlaq ifaları ilə Braziliyanın qədim zamanlardan tutmuş bugünkü günədək tarix və mədəniyyətini canlandırdılar.

Mundialın rəsmi mahnısını - "We Are One" ("Biz birik") kompozisiyasını Cennifer Lopes, Pitbul və Klaudia Leytte ifa etdilər.

Son məqamda mərasimin proqramında dəyişiklik edilmişdi. Braziliya Prezidenti Dilma Rusef və FİFA-nın rəhbəri Yozef Blatter çıxışdan imtina etdilər. Görünür, onlar ötən il Konfederasiyalar Kubokunun açılışında baş vermiş hadisənin təkrarlanmasından ehtiyatlanırdılar: o vaxt tamaşaçılar dövlət başçısının və beynəlxalq futbol təşkilatının prezidentinin çıxışına mane olmuş, onları fitə basmışdılar. Bu dəfə Rusef və Blatter meydana belə, çıxmadılar, tribunadan havaya göyərçin buraxmaqla kifayətləndilər.

Azərbaycan.-2014.- 12 iyun.- S.6.