Qazaxıstan Azərbaycanla əməkdaşlığın

daha da genişləndirilməsində maraqlıdır

Fevralın 28-də iqtisadiyyat və sənaye naziri Şahin Mustafayev ölkəmizdə səfərdə olan Qazaxıstan Respublikası Manqistau vilayətinin akimi Alik Aydarbayevlə görüşmüşdür.

Nazirliyin mətbuat xidmətindən bildirmişlər ki, görüşdə əməkdaşlığın daha da genişləndirilməsi perspektivləri, Azərbaycanın kənd təsərrüfatı məhsullarının Qazaxıstanın qərb rayonlarına ixracı və bunun üçün müvafiq logistik mərkəzin, xüsusi iqtisadi zonaların yaradılması sahəsində Qazaxıstan təcrübəsinin öyrənilməsi, hər iki ölkə şirkətlərinin birgə layihələrdə iştirak imkanları, investisiya layihələrinə dair məlumat mübadiləsi, iş adamları arasında işgüzar əlaqələrin genişləndirilməsi, eləcə də iqtisadiyyatın müxtəlif sahələrində əlaqələrin inkişafı ilə bağlı fikir mübadiləsi aparılmışdır.

Nazir Şahin Mustafayev Azərbaycan və Qazaxıstan arasında əməkdaşlığın qarşılıqlı hörmət və faydalı əməkdaşlıq prinsipləri üzərində qurulduğunu diqqətə çatdırmış, siyasi-iqtisadi əməkdaşlığın inkişafında dövlət başçılarının qarşılıqlı rəsmi səfərlərinin, aparılan danışıqların xüsusi əhəmiyyətini vurğulamışdır. Bildirilmişdir ki, əlaqələrin genişlənməsində parlamentlərarası işçi qrupları, iqtisadi əməkdaşlıq üzrə Birgə Hökumətlərarası Komissiya da uğurla fəaliyyət göstərir. İki ölkə arasında müqavilə-hüquq bazası yaradılmış, indiyədək təkcə iqtisadi sahədə 20-dən çox sənəd imzalanmışdır. Azərbaycanda 50-dən çox Qazaxıstan kapitallı şirkət qeydiyyatdan keçmişdir. Qazaxıstanda isə sənaye, tikinti, kənd təsərrüfatı, ticarət və digər sahələrdə 300-dən çox Azərbaycan şirkəti fəaliyyət göstərir.

Nazir Şahin Mustafayev qonaqlara Azərbaycan iqtisadiyyatı, qazanılmış nailiyyətlər, ölkəmizin iştirakçısı olduğu irimiqyaslı layihələr, həmçinin yaradılmış müasir istehsal və emal müəssisələri barədə də məlumat vermişdir.

Qazaxıstan Respublikası Manqistau vilayətinin akimi Alik Aydarbayev ölkəsində iqtisadiyyatın müxtəlif sahələrinin inkişafı istiqamətində həyata keçirilən tədbirlər barədə danışmış, ölkəsinin dinamik inkişaf edən Azərbaycanla əməkdaşlığın daha da genişləndirilməsində maraqlı olduğunu qeyd etmişdir.

Azərbaycana səfəri çərçivəsində Qazaxıstan nümayəndə heyəti bir sıra görüşlər keçirmiş, müxtəlif sahələrdə fəaliyyət göstərən müəssisələrin fəaliyyəti ilə tanış olmuşdur.

Azərbaycan.-2014.- 1 mart.- S.10.