«Ötən illərə boylananda təəssüflənmirəm...»
Adətən insan müəyyən bir yaşa çatanda dönüb arxaya, keçdiyi ömür yoluna nəzər salır. "İllər, səndə nəyim qaldı?" sözləri əlbəttə ki, təsadüfi yaranmayıb. Xoşbəxt o insandır ki, xəyalən yaşanmış illərə dönəndə xatırlamağa nələri isə tapır. Həm də bu xatirələr onda xoş duyğular yaradır, vaxtilə etdiklərindən, qazandığı uğurlardan, nailiyyətlərdən qürur duyur, sevinir, qəlbi nurla dolur.
Çoxdan tanıdığım, uzun müddət - ötən əsrin 70-90-cı illərində partiya orqanlarında çalışmış, respublikanın tanınmış ziyalı xanımlarından olan Zemfira Həmid qızı Eminova çətin ömür yolu keçib. Amma həyatın ortaya atdığı problemlər onu ruhdan salmayıb, iradəsini və yaşayıb-yaratmaq eşqini sarsıda bilməyib. Bir sözlə, həyat imtahanlarından alnıaçıq çıxıb. Onu tanıyanlar deyirlər ki, "güclü insandır Zemfira Eminova". Bu səbəbdən də onu xoşbəxt xanımlardan biri hesab edirəm.
Beynəlxalq Qadınlar bayramı ərəfəsində Z.Eminova ilə görüşüb xeyli söhbət etdik. Məlum oldu ki, bu xanım qədim ziyalı kökləri olan əsilzadələr nəslinin övladıdır. Ulu babası Hacı Emin Qazax bölgəsində dövrünün sayılıb seçilən, varlı-dövlətli, nüfuzlu şəxslərindən olub. O vaxt Həcc ziyarətinə getmək hər kəsə qismət deyildi. Bəy nəslindən olmaları sonralar Hacı Eminin özünə də, övladlarına da məşəqqətlər gətirib. Zemfira xanımın babası Mustafaya sovet hökuməti çox əziyyət verib. Keçən əsrin 30-cu illərində onu Sibirə sürgün ediblər.
- Əvvəl atamgilin soyadı "Eminbəyli" olub. Sovet dönəmində onu
sadələşdirib "Eminov" ediblər,-
deyə Zemfira xanım söhbətinə davam edir. -
Mustafanın bir qızı və üç oğlu olub ki,
onlardan biri də atam Həmiddir. Anam Sara
Əlihüseyn qızı isə Bakıda anadan olub. Çox cəfakeş, fədakar qadın idi.
Atamla anam ali məktəbdə birlikdə
hüquqşünaslıq ixtisası üzrə təhsil
almışdılar. Lakin atam sonralar pedaqoji məktəb
bitirmiş, uzun müddət maarif sistemində
çalışmışdi.
Həyat Zemfira xanıma hələ uşaqlıq və
yeniyetməlik illərindən öz biliyinə, gücünə
və iradəsinə arxalanmağı öyrədib. Anasının
"özünə güvən" sözləri onun
inamını və qətiyyətini artırıb. 1941-ci
il oktyabrın 13-də Bakıda anadan olan Zemfira xanım əvvəlcə
189 nömrəli məktəbdə oxuyub, sonra isə 6
saylı məktəbə köçürülüb və
oranı bitirib. Azərbaycan Pedaqoji
İnstitutunun tarix fakültəsinin qiyabi şöbəsinə
daxil olub.
Z.Eminova İçərişəhərdə doğulmuşdu
və tərbiyəsində, davranışında
mentalitetimizdən gələn tələblər önəm kəsb
edirdi. Bir sözlə, çox ciddi və məsuliyyətli
idi. İctimai işləri çox sevirdi.
Əvvəlcə pioner, sonra komsomol fəalı
olmuşdu. Məktəb komsomol təşkilatının
üzvü idi. Bəlkə də gələcək
taleyini onun bu bacarığı müəyyənləşdirmiş,
fəaliyyət göstərdiyi sahəyə bu marağı
istiqamətləndirmişdi.
Qiyabi təhsil aldığı üçün Zemfira əmək
fəaliyyətinə erkən yaşlarından
başlamışdı. Əvvəlcə 26, sonra 133 nömrəli
məktəbdə pioner baş dəstə rəhbəri
işləmişdi. Bacarığı, təşkilatçılığı,
insanlarla ünsiyyət qurmaq qabiliyyəti olan gənc
qızın əsl karyerası bundan sonra başlandı.
Belə ki, iki ildən sonra, yəni 1966-cı
ildə onu 26 Bakı komissarı (indi Səbail) rayonu komsomol
komitəsində işə dəvət etdilər. Burada
üç il tələbə gənclərlə
iş şöbəsinin müdiri oldu.
Zemfira xanım deyir ki, bir xoşbəxtliyi də həyat
yollarında qarşısına daim yaxşı, xeyirxah
insanların çıxmasıdır. O dövrdə yüksək
dövlət vəzifələrində işləmiş
Qurban Əliyevin məhz belə insanlardan olduğunu xüsusi
vurğulayır və ömrü boyu unutmadığı
hadisəni danışır:
- 1969-cu il idi. Məni rayon partiya komitəsinin
birinci katibinin (Qurban Əliyev rayonun birinci katibi idi) yanına
çağırdılar. İşim barədə,
komsomol komitəsinin fəaliyyəti haqqında xeyli
sorğu-sual etdilər. O zaman rayon komsomol komitəsinin
birinci katibinin yeri boş idi. Rayonun isə 60 min
nəfərlik komsomolçular dəstəsi vardı, təbii
ki, işləmək çox çətin idi. Qurban müəllim mənim fikrimi soruşdu.
Dedim ki, kimi istəyirsiniz göndərin, amma qadın
olmasın. Güldülər və dedilər
ki, yaxşı, sənin fikrini nəzərə alarıq.
Demə, namizəd kimi elə məni nəzərdə
tutublar. Eyni zamanda Mərkəzi Komitənin
də öz namizədi var imiş. Amma
sonda məni seçdilər. Plenuma Qurban
müəllim özü də gəlmişdi.
O vaxt heç
kəs inanmırdı ki, bu zərif, sakit təbiətli bir
qız ona göstərilən etimadı doğrulda biləcək.
Hətta respublika komsomol təşkilatına rəhbərlik
edən Elmira Qafarova demişdi ki, yaxşı qızdır,
amma ona qulaq asmayacaqlar. Lakin çox
keçmir ki, Qafarova onu özünün əvəzinə
nümayəndə heyəti ilə işgüzar səfərə
göndərir. Heyətə MK-nın şöbə
müdiri Cəfər Cəfərov, akademik Əliheydər
Sumbatzadə, bəstəkar Səid Rüstəmov, alim Tofiq
Köçərli və başqaları daxil idi. Bu sanballı qrup Tatarıstanda və Ulyanovsk şəhərində
keçirilən tədbirlərdə Zemfira Eminovaya tez-tez
söz verir, Azərbaycan gəncləri adından
danışmağı ona həvalə edirdi.
Beləliklə, Zemfira xanımın işgüzar fəaliyyəti,
idarəçilik qabiliyyəti təsdiqləyirdi ki, daha məsul
vəzifələrdə çalışa bilər.
1971-ci ildə Z.Eminovanın Bakı şəhər
komsomol komitəsinin katibi vəzifəsində işləməsi
məsləhət görülür. Dörd ildən
çox bu vəzifədə çalışır. Yenə də tələbə gənclərlə
işləyir. Bundan sonra o, 8 il
Bakının Oktyabr (indiki Yasamal) rayon partiya komitəsinin
ideoloji iş üzrə katibi vəzifəsini icra edir. O zaman
30-35 yaşlarında olan cavan bir xanımın hamı ilə
dil tapması, işin öhdəsindən gəlməsi təqdirəlayiq
hal idi.
O illərdə
Azərbaycana rəhbərlik edən ulu öndər Heydər
Əliyev rayona tez-tez gəlirdi. Zemfira xanım
ulu öndərin iştirak etdiyi tədbirlərin məna və
təsirini indi də unuda bilmir. Hər il
9 May Qələbə günündə ulu öndər bir
qayda olaraq Sovet İttifaqı Qəhrəmanı Mehdi
Hüseynzadənin abidəsi önündə keçirilən
tədbirdə iştirak edirdi. Ümummilli lider
Heydər Əliyevin rayona gəlişi əsl bayrama
çevrilirdi. Ulu öndər rayon partiya
komitəsinin katibləri və işçiləri, əhali
ilə səmimi görüşür, söhbət edirdi.
Proqram xarakterli çıxışları, təklifləri
qarşıya qoyulan mərama, məqsədə, vəzifələrə,
bir növ aydınlıq gətirirdi. Bütün
bunlar yeni təşəbbüs və tədbirlərə təkan
verirdi.
1975-ci ildə Zemfira xanım ailə həyatı qurur. İki
övladı dünyaya gəlir. Lakin onun
ailə səadəti uzun sürmür. Qəfildən həyat
yoldaşını itirir:
- Oğlum beş günlük olanda atası dünyasını dəyişdi.
Əvvəlcə inanmadım, çünki
çox zarafatcıl idi, qəribə söhbətləri
olurdu. Amma ölümü həqiqət
idi. Gedib məzarını gözlərimlə
gördüm, sonra inandım. O zaman qızımın iki
yaşı vardı. Oğluma isə babam Eminin adını
qoymaq istəyirdim, amma Rüfət adını verdim -
heç üzünü də görmədiyi atasının
adınıE
Həyatın bu amansız sınağı da Zemfira
xanımı sındıra, onun mənəvi gücünü
azalda bilmədi. İşdən-gücdən qalmadı, təsəllisini
yenə insanlarla ünsiyyətdə tapdı, qol
çırmayıb evin həm kişisi, həm qadını
oldu, övladlarına atanı da əvəz edə bildi.
Ali Partiya Məktəbini qiyabi yolla bitirdi.
Ümummilli lider Heydər Əliyev Moskvaya, SSRİ rəhbərliyinə
gedəndən bir müddət sonra respublikada, elə Zemfira
xanımın həyatında da çox şey dəyişdi. Hətta ulu öndərin
etimad göstərdiyi, irəli çəkdiyi kadrlara da
münasibət birmənalı olmadı... Z.Eminova o
dövrü belə xatırlayır: "1980-ci illərin
birinci yarısında rayon partiya komitəsinə yeni birinci
katib gələndə onun iş üsulları,
özünü necə aparması mənə çox qəribə
göründü. Çox vaxt kimin hansı
bölgədən olduğu ilə maraqlanır, işləri
də həmin bölgü əsasında aparırdı.
Doğrusu, o zaman kimin haradan olduğunu heç
bilmirdim də. Ulu öndərin rəhbərliyi
dövründə insanlar həmişə bilik, bacarıq və
səriştələrinə, yüksək şəxsi
keyfiyyətlərinə görə fərqlənirdilər.
Biz bu meyarlarla işləmişdik. Hər hansı məsələdə meydana mərdi-mərdanə
girir, mədəni səviyyəmizi, siyasi əqidəmizi,
dünyagörüşümüzü, inamımızı,
amalımızı, məsləkimizi uca tutur, saf amallarla
yaşayıb işləyirdik".
O zaman
prinsipial, nöqsanlarla barışmaz olan Zərifə Eminova
yaranmış yeni vəziyyətdə rayon partiya komitəsində
təbii ki, işləyə bilmir.
Zemfira xanım deyir ki, indiyə qədər
yaşadığı ən unudulmaz dövr ulu öndər
Heydər Əliyevin rəhbərliyi ilə işlədikləri
illərdir.
Heydər Əliyevlə işləməyin həm asan, həm
də çətin olduğunu söyləyir: "Asan idi ona
görə ki, iş düzgün təşkil
olunmuşdu, hərə öz öhdəsinə düşən
vəzifəni bilirdi. Xalq böyük bir dahiyə
arxalanmışdıE Çətin idi ona görə ki, məsuliyyət
vardı. Həddini aşana ulu öndərin bir kinayəli
baxışı bəs idi..."
Zemfira
Eminova beş il (1983-1988-ci illərdə)
Maarif Nazirliyində məktəbəqədər təhsil idarəsinin
rəisi oldu. Amma görünür partiya işi
bu xanımın alnına yazılmışdı. 1988-ci ildə ona Bakının Nərimanov rayon
partiya komitəsinin katibi vəzifəsi
tapşırıldı. Yenə də
ideoloji sahədə işləməyə başladı.
Zemfira xanımın tükənməz enerjisi, cəsarəti,
qətiyyəti hər yerdə ətrafdakıların diqqətini
cəlb edirdi. Yorulmaq bilmədən daim hərəkətdə
olmaq, yeni-yeni adamlarla ünsiyyət yaratmaq, həyatın
müxtəlif problemləri, tərəfləri ilə üzləşmək,
onları dəf etmək bu insana rahatlıq, dinclik gətirirdi.
Hər yeni təşəbbüsə
böyük həvəslə qoşulurdu. Hamı bir-birinə dəstək və kömək
göstərərək işi müvəffəqiyyətlə
apara bilirdi. Beləcə, bu iş Sov.İKP
dağılana qədər davam etdi.
Xalq Cəbhəsi hakimiyyətə gələndə
Zemfira Eminova onların məqsəd və məramını,
niyyətlərini tez bir zamanda anladı. Dərhal da
özü üçün qərar çıxardı ki,
burada işləyə bilməyəcək. Düşündü ki, bəlkə heç təzə
hakimiyyət də onunla işləmək istəmədi.
Amma səriştəsini, peşəkarlığını,
idarəçilik qabiliyyətini nəzərə alıb onu
buraxmaq istəmirdilər, Zemfira xanım isə qürur və
əqidəsinə sadiq qalaraq ərizəsini yazıb işdən
uzaqlaşdı.
Lakin bu, məsələnin bir tərəfi idi. O, ailəsini nə ilə
dolandıracaqdı? Ömrü boyu şərəflə
işləmiş, vicdanına ləkə salmamış bu mərd
Azərbaycan qadını nəinki sərvət, heç
"dar gün üçün" dolanışıq xərci
də toplamamışdı. İndi isə öhdəsində
iki azyaşlı uşaq, qoca anası qalmışdı...
Tanrı ona yenə də bir qapı açıb ailəni
ağır vəziyyətdən çıxardı. O vaxt Zemfira Eminova Bakı
şəhər sovetinin deputatı, gənclər və idman
komissiyasının sədri idi. Şəhər
İcraiyyə Komitəsi onun elə həmin komissiyada işləməsinə
imkan yaratdı.
1993-cü ildə - ölkənin ən ağır
günlərində xalqın təkidli tələbi ilə
ümummilli lider Heydər Əliyev yenidən hakimiyyətə
qayıtdı.
Bundan sonra Zemfira xanımı Yasamal Rayon İcra
Hakimiyyətinə işə dəvət etdilər. Bütün məsələlər cəmi bir ay ərzində
həll olundu. Onu heç yerə söhbətə
çağırmadılar, heç bir sual vermədilər,
heç nə soruşmadılar. Sadəcə
təyin etdilər, çünki tanıyırdılar,
etimadı doğruldacağını bilirdilər. Beləcə,
Zemfira Eminova yeddi il də burada icra hakimiyyəti
başçısının müavini vəzifəsində
çalışdı. Təqaüdə isə Mərkəzi
Seçki Komissiyasında 11 il işlədikdən
sonra çıxdı.
Ulu öndərlə dəfələrlə tədbirlərdə
iştirak edən, onun rəhbərliyi ilə məsul vəzifələrdə
çalışıb etimadı doğruldan Z.Eminova
düzdür, həmişə fəxarət hissi keçirib. Amma bundan
istifadə edərək sonralar özünə imtiyazlar istəməyib.
Həmin illərdə böyük rəhbərin
keçirdiyi tədbirlərdəki iştirakını əks
etdirən şəkillər də toplayıb saxlamayıb.
Məqsədi, məramı yalnız etimadı
doğrultmaq olub. Amma bu yaxınlarda nəşr
olunmuş bir kitabda ulu öndərlə birgə çəkilmiş
şəklinə rast gəlib.
Bu şəkil Zemfira xanımın xəyalını
uzaq illərə qanadlandırdı. 1980-ci il idi. Bir də xəbər yayıldı ki, ulu öndər
Uşaq Nevroloji Xəstəxanasının
yaxınlığındakı əraziyə gəlib. Həmin vaxt rayon partiya komitəsinin birinci katibi
işlə əlaqədar başqa sahəyə getmişdi.
Zemfira xanım vaxt itirmədən
özünü ulu öndərin gəldiyi əraziyə
yetirir. Elə etmək lazım idi ki, hər iş
qaydasında olsun, rayonun ünvanına söz gəlməsin. Burada düzənlənən tədbirdə Heydər
Əliyev Zemfira xanımla bir saatadək həmsöhbət
olur. Tədbir qaydasında keçir.
Bax, Zemfira xanıma uzaq illərdən soraq, xatirə gətirən,
indiyə qədər görmədiyi və çəkildiyini
güman etmədiyi şəkil həmin gündən yadigar
idi.
Azərbaycanın bugünkü yüksəlişini
Zemfira Eminova qürur hissi ilə izləyir. Deyir ki, ulu
öndərin layiqli davamçısı Prezident İlham
Əliyev tərəfindən ölkənin inkişafına
yönəldilən siyasət hərtərəfli və
uzaqgörəndir, böyük gələcəyə
hesablanıb. Bu baxımdan müxtəlif
sahələrin inkişafına istiqamətləndirilən
çoxsaylı Dövlət Proqramları xüsusilə
önəm kəsb edir.
Azərbaycanın
birinci xanımı, Heydər Əliyev Fondunun prezidenti, Milli Məclisin
deputatı Mehriban Əliyevanın milli-mənəvi, mədəni
dəyərlərimizin qorunması və təbliği sahəsindəki
fəaliyyətini dönə-dönə qeyd edir: "Mehriban
xanımın böyük xeyirxahlıq, xeyriyyəçilik fəaliyyəti
ümumən ölkədə bu vacib işin xeyli
canlanmasına səbəb olmuşdur. Bu nəcib
missiyadan ən çox bəhrələnən Azərbaycan
qadınları, Azərbaycan körpələridir".
Bu barədə Zemfira xanım bəzi qeydlərini qələmə
də alıb.
O yazır: "Bir sıra xəstəliklərdən əziyyət çəkən
uşaqların sağlamlığına, qaçqın və
məcburi köçkün ailələrinin
övladlarının təhsilinə və
istedadlarının üzə çıxmasına göstərilən
qayğı, digər xeyirxah məqsədlərə yönəldilmiş
layihələri xatırlatmaq kifayətdir. Yeri gəlmişkən
qeyd edim ki, ölkə həyatının müxtəlif sahələrində
həllini gözləyən problemlərin
reallaşdırılmasında yaxından iştirak edən
Heydər Əliyev Fondu elmə və təhsilə sonsuz diqqət
və qayğı istiqamətində yeni-yeni ənənələrin
təməlini qoymuşdur. Təhsil sahəsində
görülən işlər sırasında respublikanın
müxtəlif bölgələrində həyata keçirilən
"Yeniləşən Azərbaycana yeni məktəb"
proqramı müstəsna əhəmiyyət
daşıyır. Bu proqram təhsilin səviyyəsinə
birbaşa təsir edən problemlərin həllinə - tədris
prosesinin günün tələbləri səviyyəsində
qurulmasına imkan verən müasir məktəb
binalarının inşasına istiqamətlənmişdir.
Yaxşı yadımdadır ki, cəmiyyətin müxtəlif
təbəqələrinin diqqətini bu məsələyə
yönəltmək məqsədilə 2005-ci ilin iyun ayında
müvafiq qurumların, habelə beynəlxalq təşkilatların
iştirakı ilə "dəyirmi masa" təşkil
edilmiş, proqramın həyata keçirilməsi
üçün yeni məktəb binalarının layihələri
hazırlanmışdı.
Layihənin
gerçəkləşməsi ilə bağlı fondun prezidenti
Mehriban xanımın cəmiyyətə
ünvanladığı əməkdaşlıq
çağırışı geniş əks-səda
doğurmuş, az sonra Azərbaycanın
müxtəlif bölgələrində, hətta ən ucqar
dağ kəndlərində məktəb tikintisi geniş
vüsət almışdır.
Bu
yaxınlarda dövlət başçısı İlham
Əliyev bir çıxışında dedi ki, 10 ildə Azərbaycanda
3000 məktəb tikilib. Bu, şərhə
ehtiyacı olmayan bir faktdır. Onu da
vurğulamağa ehtiyac yoxdur ki, bu böyük işdə
Mehriban xanımın xidməti misilsizdir".
Heydər Əliyev Fondunun vitse-prezidenti Leyla
Əliyevanın gördüyü işlər, əsasən
Xocalı soyqırımı barədə həqiqətlərin
dünyaya çatdırılması istiqamətində sərf
etdiyi əmək də Zemfira xanımın ürəyindən
xəbər verir.
"Bu, bünövrəsi ulu öndər Heydər
Əliyev tərəfindən qoyulmuş nəcib missiyanın
uğurlu davamıdır", - deyir. Bunları gördükcə
unudulmaz Zərifə xanım Əliyevanı bir daha
xatırlayır. Z.Eminova onu yaxşı
tanıyırdı, səmimi münasibətləri
olmuşdu. Zərifə xanımın bir həkim,
ictimai xadim və nəcib insan olduğunu çox
müşahidə etmişdi. İndi onun
ocağındakı xanımların
xeyirxahlığını görəndə və xalq naminə
həyata keçirdikləri işlərə baxanda çox fərəhləndiyini
söyləyir.
Respublikanın tanınmış ziyalı xanımı,
xalqı üçün çalışmış insan,
gözəl müəllim, ana və nənə Zemfira Eminova
xoş, xeyirxah duyğularla yaşayır.
İradə
ƏLİYEVA,
Azərbaycan.-2014.- 8 mart.- S.5.