Qarabağın rəmzi xarı bülbülü Vaşinqtona bahar ab-havası gətirdi

Azərbaycan Respublikasının ABŞ-dakı səfirliyinin təşəbbüsü və Qarabağ Fondunun təşkilatçılığı ilə martın 18-də Birləşmiş Ştatların Botanika bağında (US Botanical Garden Conservatory) Qarabağın rəmzi olan xarı bülbül gülünün təqdimat mərasimi keçirilmişdir.

AzərTAc xəbər verir ki, Vaşinqtona bahar ab-havasını gətirən xarı bülbül Botanika bağında çalışanları öz gözəlliyi ilə valeh etmişdir. Xarı bülbül gülünün yetişdirilməsinə münbit şərait yaradan mütəxəssislər qeyd etmişlər ki, xarı bülbül digər güllərdən öz həssaslığı ilə fərqlənir.

Botanika bağının bitkilər üzrə mütəxəssisi Bill MakLaqlinin sözlərinə görə, xarı bülbül Botanika bağında keçirilən orxideya güllərinə həsr olunmuş simfoniyada yer alacaqdır. Qeyd etmək istərdik ki, Botanika bağı 1820-ci ildə yaradılmış və Şimali Amerikanın ən qədim botanika bağlarından hesab olunur. ABŞ Botanika bağı muzey statusuna malikdir.

Azərbaycan.-2014.- 19 mart.- S.7.