Azərbaycan ilə Əfqanıstan arasında

əməkdaşlığın perspektivləri müzakirə olunmuşdur

İqtisadiyyat və sənaye naziri Şahin Mustafayev Bakıda səfərdə olan Əfqanıstan İslam Respublikasının xarici işlər naziri Zarar Ahmad Osmaninin başçılıq etdiyi nümayəndə heyəti ilə görüşmüşdür.

Nazirliyin mətbuat xidmətindən AzərTAc-a bildirmişlər ki, nazir Şahin Mustafayev Azərbaycan və Əfqanıstan arasında əməkdaşlığın qarşılıqlı hörmət və faydalı əməkdaşlıq prinsipləri üzərində qurulduğunu diqqətə çatdırmış, siyasi-iqtisadi əməkdaşlığın inkişafında dövlət başçılarının görüşlərinin, aparılan danışıqların xüsusi əhəmiyyətini vurğulamışdır. Bildirilmişdir ki, Azərbaycan və Əfqanıstan İslam Əməkdaşlıq Təşkilatı çərçivəsində fəal əməkdaşlıq edirlər. Ölkələrimiz arasında əlaqələrin genişlənməsinə xidmət edən Azərbaycan-Əfqanıstan Parlamentlərarası Əlaqələr üzrə İşçi Qrupu uğurla fəaliyyət göstərir.

Əfqanıstanın xarici işlər naziri Zarar Ahmad Osmani ölkəmizin qısa müddətdə əldə etdiyi böyük iqtisadi uğurları yüksək qiymətləndirmişdir. Nazir ölkəsinin dinamik inkişaf edən Azərbaycanla əməkdaşlığın daha da genişləndirilməsində maraqlı olduğunu bildirmişdir. Əfqanıstanlı nazir Azərbaycanın mühüm coğrafi mövqeyini, böyük tranzit potensialını, xüsusilə Bakı-Tbilisi-Qars dəmir yolunun tikintisinin geniş tranzit imkanları yaratdığını qeyd edərək, bu sahədə əməkdaşlığın ölkəsi üçün əhəmiyyətini diqqətə çatdırmışdır.

Görüşdə iqtisadi sahədə əməkdaşlığın genişləndirilməsi perspektivləri, o cümlədən Azərbaycanın kənd təsərrüfatı məhsullarının Əfqanıstana ixracı, investisiya layihələrinə dair məlumat mübadiləsi, biznes forum, təqdimat və sərgilərin keçirilməsi, Hökumətlərarası Komissiyanın yaradılması, dövlətimizin böyük tranzit potensialından istifadə etməklə yükdaşımaların artırılması imkanları müzakirə olunmuşdur.

Azərbaycan.-2014.- 20 mart.- S.6.