Azərbaycanda insan
kapitalının inkişafı və tolerantlıq «ABŞ-Azərbaycan:
gələcəyə baxış» forumunun
sonuncu sessiyasının mövzusu
olmuşdur
Aprelin 30-da Vaşinqtonda "ABŞ-Azərbaycan: gələcəyə baxış" forumu işini davam etdirmişdir.
"American Enterprise Institute"nin elmi əməkdaşı Maykl Rubinin moderatorluğu ilə keçirilən "Ölkənin insan kapitalının inkişafı" mövzusunda panel iclasında Azərbaycanın ABŞ-dakı səfiri Elin Süleymanov, ABŞ-Azərbaycan Ticarət Palatasının icraçı direktoru Süsən Sadıqova, Milli Məclisin deputatı Sevinc Fətəliyeva, İndiana ştatından keçmiş konqresmen Den Berton, Corctaun Universitetinin professoru Brenda Şaffer, Taft Universiteti nəzdində Fletçer məktəbinin diplomatiya professoru Endrü Hess və ARDNŞ-nin vitse-prezidenti Muxtar Babayev çıxış etmişlər.
Səfir Elin Süleymanov Azərbaycanda insan kapitalından danışaraq demişdir ki, "hansı resursların olması əsas deyil, bu resurslardan necə istifadə olunması əhəmiyyətlidir". Səfir ölkənin insan resurslarının inkişafında Azərbaycan rəhbərliyinin rolunu vurğulamışdır. Sonra Süsən Sadıqova çıxış edərək, auditoriyaya Azərbaycan Diplomatik Akademiyası, ARDNŞ-nin Bakı Ali Neft Məktəbi kimi insan kapitalının inkişafı layihələrindən söz açmışdır. O bildirmişdir ki, bu təhsil ocaqlarının məzunları Azərbaycanın gələcəyini quracaq və regional layihələr çərçivəsində boru kəmərləri çəkəcəklər. O, idman komplekslərinin inşası, klubların yaradılması, idmançıların təlim və məşqlərinə sərmayə yatırılması kimi gənclər layihələrindən də söz açmışdır.
Milli Məclisin deputatı Sevinc Fətəliyeva "Azərbaycan 2020: gələcəyə baxış" İnkişaf Konsepsiyasından, son illər Azərbaycanda sosial infrastruktura yatırılan investisiyalardan danışaraq Azərbaycan rəhbərliyinin ölkənin insan kapitalının inkişafına ayırdığı diqqətin nəticələrini nümayiş etdirən statistik məlumatları təqdim etmişdir. Azərbaycanın sosial və iqtisadi inkişafından söz açan keçmiş konqresmen Den Berton Prezident İlham Əliyevi və qanunverici hakimiyyəti sosial inkişaf sahəsindəki nailiyyətlər münasibətilə təbrik etmişdir.
Sonra Corctaun Universitetinin professoru Brenda
Şaffer və Taft Universitetinin professoru Endrü Hess çıxış
etmişlər. B.Şaffer "qara qızıl"ın
insan kapitalına çevrilməsi konsepsiyası
və Azərbaycanda dini azadlığın sosial atributları, E.Hess Azərbaycana xas olan çoxkonfessiyalılıq
və multikulturalizm barədə auditoriyaya məlumat vermişlər.
ARDNŞ-nin vitse-prezidenti
Muxtar Babayev Azərbaycanda insan kapitalına sərmayə
yatırılmasının əhəmiyyətindən söz
açmışdır. Maykl Rubin isə
sosial cəmiyyətin
inkişafında Azərbaycanın
uğurlarını qeyd
etmişdir.
Yaxın
Şərq İnstitutunun
böyük analitiki Aleks Vatankanın moderatorluğu ilə keçirilən "Dialoqun
möhkəmləndirilməsi və tolerantlığa yardım" mövzusunda
yekun panel iclasında Qafqaz Müsəlmanları
İdarəsinin başçısı
Şeyxülislam hacı
Allahşükür Paşazadə,
Sovet Yəhudiləri Milli Konfransının icraçı direktoru Mark
Levin, "Tool Shed Group"un direktoru Ceyson Kats, Con
Hopkins Universitetinin Orta Asiya və Qafqaz
İnstitutunun direktoru
Svante Kornel, Milli Məclisin deputatı Asim Mollazadə, pravoslav icmasının başçısı
Aleksandr İşein, dağ yəhudiləri icmasının başçısı
Melix Yevdayev və katolik icmasının ordinarisi
Vladimir Fekete çıxış
etmişlər.
Panel iclasının iştirakçıları müzakirələr zamanı ölkəmizdə hökm sürən tolerantlıq mühitindən, Azərbaycanda müxtəlif dinlərin və etnik qrupların nümayəndələrinin dinc yanaşı yaşamasından danışmışlar.
Sonra qəbul olmuşdur. Qəbulda Azərbaycanın caz pianoçusu Emil Əfrasiyab çıxış etmişdir. Oklahoma Milli Qvardiyasından general Mayls Dierinq, Kaliforniyadan konqresmen Xaviyer Beserra, Texas ştatından Filemon Vela nitq söyləmişlər. M.Dierinq ABŞ-ın Azərbaycan kimi dostu olmasından qürur hissi duyduğunu bəyan etmiş, X.Beserra inkişaf etməkdə olan ABŞ-Azərbaycan əlaqələrindən danışmışdır.
Gecənin sonunda ABŞ Konqresindəki azlığın lideri və Nümayəndələr Palatasının sədri Nensi Polesi qəbula gələrək, uğurlu əməkdaşlıq münasibətilə ABŞ-ı və Azərbaycanı təbrik etmiş, ikitərəfli əlaqələrin inkişafının davam etdirilməsi arzusunda olduğunu bildirmişdir.
Xatırladaq ki, Vaşinqtonun mərkəzində, məşhur "Willard Intercontinental Hotel"də keçirilən III "ABŞ-Azərbaycan: gələcəyə baxış" forumu ARDNŞ-nin dəstəyi ilə Azərbaycanın Dostları Assambleyası tərəfindən təşkil edilmişdir.
Yusif BABANLI,
AzərTAc-ın xüsusi müxbiri
Vaşinqton
Azərbaycan.-2014.- 2 may.- S.8.