Azərbaycan Respublikasının Xarici İşlər Nazirliyi
Avropa Şurasının baş
katibinin və Avropa
Şurası Parlament Assambleyasının
sədrinin Azərbaycana səfərləri ilə
bağlı açıqlama yaymışdır
Azərbaycan
Respublikasının Xarici İşlər Nazirliyi Avropa
Şurasının (AŞ) baş katibi Torbörn Yaqlandın
və Avropa Şurası Parlament Assambleyasının (AŞPA)
sədri xanım Ann Brasörün Azərbaycana səfərləri
ilə bağlı açıqlama yaymışdır.
Açıqlamada
bildirilir ki, cari il mayın 20-dən 23-dək AŞ-nin baş
katibi Torbörn Yaqland və AŞPA-nın sədri xanım
Ann Brasör Azərbaycanda səfərdə olmuş və Azərbaycan
Respublikasının Prezidenti İlham Əliyev, Milli Məclisin
sədri Oqtay Əsədov və digər dövlət rəsmiləri
tərəfindən qəbul edilmişlər.
Azərbaycan
rəsmiləri ilə keçirilmiş görüşlərdə
Azərbaycanın AŞ Nazirlər Komitəsində sədrlik
prioritetləri, Ermənistan–Azərbaycan, Dağlıq
Qarabağ münaqişəsi, aktual beynəlxalq və regional
məsələlər, eləcə də Avropa
Şurasının baş katibi T.Yaqlandın Azərbaycan da
daxil olmaqla bütün AŞ üzv ölkələrində
ümumi durumu əks etdirən “Avropada insan hüquqları,
demokratiya və qanunun aliliyinin vəziyyətinə dair”
hesabatı kontekstində fikir mübadiləsi
aparılmışdır.
Səfər
zamanı T.Yaqlandın iştirakı ilə qarşıdakı
illərdə Azərbaycan və təşkilat arasında əməkdaşlığın
başlıca çərçivəsini təşkil edəcək
AŞ-nin Azərbaycan üzrə 2014-2016-cı illər
üçün Fəaliyyət Planının təqdimatı
olmuşdur.
4
saylı “ASAN xidmət” mərkəzinə səfər edən
baş katib Azərbaycanda bu xidmətin fəaliyyətini
yüksək qiymətləndirmiş və bunun digər
AŞ ölkələri üçün müsbət
nümunə kimi çıxış edə biləcəyini
bildirmişdir.
Ann
Brasörün sədrliyi ilə AŞPA daimi komitəsinin Azərbaycan
Respublikasının Milli Məclisində iclası
keçirilmişdir. Ann Brasör çıxışında
bildirmişdir ki, üzv dövlətlərin ərazi
bütövlüyünə hörmət təşkilatın
fundamental prinsipidir. Ermənistan-Azərbaycan, Dağlıq
Qarabağ münaqişəsinə toxunan Ann Brasör Avropa
Şurası Parlament Assambleyasının 2005-ci ildə qəbul
edilmiş 1416 saylı qətnaməsini xatırladaraq,
AŞPA-nın Azərbaycanın ərazi
bütövlüyünə dəstəklə bağlı
birmənalı və prinsipial mövqedə olduğunu
vurğulamışdır.
AŞPA-nın 2005-ci ildə qəbul edilmiş 1416 saylı qətnaməsi BMT Təhlükəsizlik Şurasının 822, 853, 874 və 884 saylı qətnamələrinin yerinə yetirilməsini və işğal olunmuş ərazilərdən silahlı qüvvələrin çıxarılmasını tələb edir.
Azərbaycan Respublikası Milli Məclisinin sədri Oqtay Əsədov AŞPA ilə əlaqələrdən və Azərbaycanın AŞ-nin Nazirlər Komitəsinə sədrliyindən danışmış və Ermənistan-Azərbaycan, Dağlıq Qarabağ münaqişəsinə toxunmuşdur.
İclasda Azərbaycanın xarici işlər naziri Elmar Məmmədyarov, eyni zamanda, AŞ-nin Nazirlər Komitəsinin sədri statusunda çıxış etmişdir. Nazir çıxışında Azərbaycanın xarici siyasəti, iqtisadi inkişafı, ölkədə aparılan siyasi islahatlar və mövcud olan tolerantlıq mühiti, Ermənistan–Azərbaycan, Dağlıq Qarabağ münaqişəsi haqqında AŞPA üzvlərinə geniş məlumat vermişdir. O
bildirmişdir ki, Ermənistan-Azərbaycan münaqişəsinin bu günədək həll olunmaması, Azərbaycan ərazisinin 20 faizinin Ermənistan tərəfindən işğalının davam etməsi və bir milyondan artıq azərbaycanlı qaçqın və məcburi köçkünün öz tarixi torpaqlarına dönə bilməməsi AŞ-nin əsasını təşkil edən fundamental prinsiplərə və demokratik dəyərlərə zidd olaraq, regionun hərtərəfli inkişafına və demokratik proseslərə xələl gətirir.
Elmar Məmmədyarov AŞ-nin Nazirlər Komitəsinin sədri statusunda AŞPA-nın üzvləri ilə
müxtəlif beynəlxalq məsələlərə dair fikir mübadiləsi
aparmışdır. Müzakirələrdə AŞ-nin bir üzv dövlətinin digər üzv dövlətin ərazisini işğal etməsinin qəbuledilməzliyi
vurğulanmışdır.
Azərbaycan.-2014.- 25 may.- S.3.