İnkişafın Azərbaycan modeli: regionların sosial-iqtisadi yüksəlişi

"Azərbaycan" qəzetinin Salyan Rayon İcra

Hakimiyyəti ilə birgə keçirdiyi "dəyirmi masa"

Ötən 10 ildə qazanılan möhtəşəm nailiyyətlər göstərir ki, Azərbaycanın yüksəlişi, dinamik inkişafı dönməz xarakter alıb və ölkəmiz bölgəmizin güc mərkəzinə çevrilib. Sözsüz ki, bu uğurların həlledici amili ulu öndər Heydər Əliyev tərəfindən əsası qoyulmuş və bu gün Prezident İlham Əliyevin rəhbərliyi altında inamla davam etdirilən inkişaf siyasətidir. Bu siyasətin uğurla davam etdirilməsi, dövrün tələblərinə uyğun məzmun və keyfiyyətcə yeniləndirilməsi nəticəsində Azərbaycan dünyaya bir çox sahələr üzrə nümunə göstərir. Əldə edilən uğurlar inkişafın Azərbaycan modelini də formalaşdırıb. Hazırda bu model inkişaf edən ölkələrin diqqətini cəlb edir.

İnkişafın Azərbaycan modelinin mühüm cəhətlərindən biri ölkənin bütün regionlarının tarazlı yüksəlişidir. Bu günlərdə "Azərbaycan" qəzetinin Salyan Rayon İcra Hakimiyyəti ilə birgə keçirdiyi "dəyirmi masa" da bu mövzuya həsr olunmuşdu. Tədbir iştirakçıları əvvəlcə ulu öndər Heydər Əliyevin abidəsi önünə gül dəstəsi qoydular.

Tədbiri giriş sözü ilə açan "Azərbaycan" qəzetinin Baş redaktoru, Milli Məclisin deputatı Bəxtiyar Sadıqov dedi:

- Hər bir xalq, hər bir dövlət onu azadlığa qovuşduran, bu yolda bütün maneələri aradan qaldıran, inkişafını təmin edən liderləri ilə fəxr edir. Müstəqil dövlətçiliyimizə gedən nahamar yollarda biz də çox çətinliklər gördük, hətta azadlığımızı növbəti dəfə itirmək təhlükəsi ilə üzləşdik. Əgər həmin ağır günlərdə ulu öndər Heydər Əliyev kimi lider olmasaydı, bu gün inkişaf edən müstəqil Azərbaycan da yaşamazdı. Yalnız Heydər Əliyev siyasi dühası xalqımızın azad və güclü dövlətə sahib olmaq arzusunu reallığa çevirdi. Məhz Heydər Əliyevin qətiyyəti, yenilməz siyasi iradəsi sayəsində müasir Azərbaycan dövləti quruldu, ölkəmiz dünya məkanında müstəqil dövlət kimi özünün layiqli yerini tuta bildi.

Ümummilli lider Heydər Əliyevin 1993-cü ildə xalqın təkidli tələb və istəyi ilə yenidən hakimyyət sükanının arxasına keçməsindən və siyasi sabitliyi təmin etməsindən sonra ilk addımlarından biri Azərbaycanın yeni dövr üçün inkişaf konsepsiyası oldu. Ulu öndərin irəli sürdüyü müasir dövlətçilik konsepsiyası Azərbaycanın tarixi ənənələrini və yeni Avropa dəyərlərini özündə birləşdirən unikal inkişaf modeli idi. Bu inkişaf xəttinin həyata keçirilməsi nəticəsində müstəqil Azərbaycan dövlətinin iqtisadi əsaslarının möhkəmləndirilməsi, bazar iqtisadiyyatının formalaşdırılması, dövlət idarəetməsinin təkmilləşdirilməsi, vətəndaşların sosial və iqtisadi hüquqlarının dolğun təmin edilməsi istiqamətində son dərəcə mühüm işlər görüldü, böyük uğurlar əldə olundu. Heydər Əliyevin qətiyyətli siyasəti nəticəsində 1994-cü ildən başlayaraq həyata keçirilən uğurlu neft strategiyası, neft gəlirləri əsasında yaradılmış möhkəm maliyyə-iqtisadi baza hesabına qeyri-neft sektorunun dinamik inkişafı və ölkə iqtisadiyyatının diversifikasiyası, özəl sektorun inkişafına hərtərəfli dövlət dəstəyi, regionların inkişafı, insan kapitalının formalaşdırılması, səmərəli beynəlxalq iqtisadi əməkdaşlıq, dünya iqtisadiyyatına inteqrasiya ölkəmizin yüksəlişində son dərəcə mühüm rol oynadı.

Bu gün Azərbaycanın dinamik sosial-iqtisadi inkişafı, ölkəmizin dünya birliyində öz yerini daha da möhkəmləndirməsi məhz Heydər Əliyev ideyalarının yaşamasının, ümummilli liderin siyasi kursunun uğurla davam etdirilməsinin nəticəsidir. Son 10 ildə məhz Heydər Əliyev siyasi kursunun layiqincə davam etdirilməsi ölkəmizə böyük uğurlar qazandırıb. Bu mənada ümummilli liderin müstəqillik konsepsiyasının, sosial-iqtisadi inkişaf strategiyasının uzaqgörənliyi Azərbaycan Respublikasının Prezidenti İlham Əliyevin rəhbərliyi ilə ölkəmizin qazandığı böyük uğurlarda bir daha təsdiqini tapır. Prezident İlham Əliyevin rəhbərliyi altında son 10 ildə sürətli inkişaf yolu keçən Azərbaycan dövlətçiliyini inkişaf etdirib, siyasi və iqtisadi müstəqilliyini daha da möhkəmləndirib. Sürətli iqtisadi inkişaf dinamikası nümayiş etdirən, liberal prinsiplərə əsaslanmış iqtisadi modelini yaradan Azərbaycanın bu dövrdə həm regional, həm qlobal miqyasda nüfuzu yüksəlib, ölkəmizin geoiqtisadi və geosiyasi rolu artıb.

Bütövlükdə ötən 10 il Azərbaycanda cəmiyyət həyatının bütün sahələrində əldə olunmuş mühüm nailiyyətlərlə yadda qaldı. İstər ictimai-siyasi, istər sosial-iqtisadi və eləcə də digər istiqamətlərdə müşayiət olunan nikbin dinamika respublikamızın inkişafının davamlı olduğunu təsdiq edir. Qarşımızda duran bütün sosial-iqtisadi məsələlərin öz həllini tapması ilə yanaşı, neft-qaz kəmərlərinin işə düşməsi, Azərbaycanın BMT Təhlükəsizlik Şurasına üzv seçilməsi, ilk süni peykimizin fəzaya göndərilməsi, ölkəmizin mühüm beynəlxalq tədbirlərə ev sahibliyi etməsi və "Şahdəniz" layihəsi üzrə yekun investisiya sazişinin imzalanması son onilliyin respublikamız üçün yaddaqalan bir dövr olduğunu göstərir.

BMT Təhlükəsizlik Şurasına üzvlüyünü layiqincə başa vuran Azərbaycan indi Avropa Şurasının Nazirlər Komitəsinə sədrlik edir. Bu dövrdə Azərbaycan sədrliyi uğurla həyata keçirərək Avropa Şurasının ali məramlarının tətbiq olunmasına özünün layiqli töhfələrini verəcək.

Təbii ki, hər bir ölkənin yüksəlişi iqtisadi sahənin inkişafından asılıdır. Çünki iqtisadi inkişaf olmazsa, kompleks inkişafdan söz gedə bilməz. Prezident İlham Əliyevin yeni dövrün tələblərinə uyğun, zamanın nəbzini tutmaqla həyata keçirdiyi düşünülmüş, sürətli və davamlı inkişaf strategiyasının nəticəsi olaraq Azərbaycan ötən 10 ili son dərəcə möhtəşəm iqtisadi uğurlarla başa vurub. Bu dövrdə ümumi daxili məhsulun 3 dəfədən çox, dövlət büdcəsinin gəlirlərinin 16 dəfə, sənaye məhsulları istehsalının 2,7 dəfə, strateji valyuta ehtiyatlarının 31 dəfə, daxili mənbələr hesabına əsas kapitala yönəldilən investisiyaların həcminin 18,4 dəfə, o cümlədən qeyri-neft sektoruna investisiyaların 21,6 dəfə artması ölkəmizdə, sözün əsl mənasında, sıçrayışlı sosial-iqtisadi inkişafa nail olunduğunu göstərir. 2003-cü ildən başlayaraq ölkəmizdə orta illik iqtisadi artım 12,9 faiz təşkil edib və Azərbaycanın bu uğuru dünyada ən yaxşı nəticələrdən biri kimi qeydə alınmışdır. ÜDM-in həcminə görə Azərbaycan dünya ölkələri arasında 40 pillə irəliləyib və 2003-cü ildəki 106-cı yerdən 66-cı yerə yüksəlib. Son "Qlobal Rəqabətlilik Hesabatı"na əsasən, ölkəmiz 7 pillə irəliləyərək 148 ölkə arasında 39-cu yerə yüksəlib. Bütün bu makroiqtisadi göstəricilər bir daha təsdiq edir ki, sürətli inkişaf dövrünü yaşayan, dünya iqtisadi sisteminə fəal inteqrasiya yolu seçmiş Azərbaycan iqtisadiyyatı hər il dinamik inkişafını davam etdirir, hər ötən ili yüksək sosial-iqtisadi göstəricilərlə, dayanıqlı inkişafa yönəlmiş mühüm tədbirlərin reallaşdırılması ilə başa vurur.

Prezident İlham Əliyevin hərtərəfli inkişaf etdirdiyi Azərbaycanın dinamik yüksəlişində Heydər Əliyev Fondunun prezidenti, Milli Məclisin deputatı, UNESCO-nun və ISESCO-nun xoşməramlı səfiri Mehriban xanım Əliyevanın xidmətləri əvəzolunmazdır. Bu yaxınlarda yaradılmasının 10 illiyini qeyd etdiyimiz Heydər Əliyev Fondu qlobal fəaliyyətdə həm respublikamızda, həm də onun hüdudlarından uzaqlarda böyük nüfuz qazanıb. Fondun təşəbbüsü və dəstəyi ilə ötən 10 ildə insanların sosial şəraitini yaxşılaşdırmaq məqsədilə respublikanın şəhər və rayonlarında yüzlərlə məktəb, uşaq evləri, mədəniyyət obyektləri tikilib və təmir edilib. Mehriban Əliyevanın təşəbbüsü ilə milli-mənəvi dəyərlərimizin qorunub saxlanılması, Azərbaycan xalqının mədəniyyətinin dünyada təbliği, görkəmli şəxsiyyətlərinin və əlamətdar hadisələrinin, yubileylərinin qeyd edilməsinin UNESCO-nun proqramına salınması, respublikada ümumbəşəri əhəmiyyət kəsb edən beynəlxalq konfransların keçirilməsi artıq ənənəyə çevrilib.

Azərbaycanın inkişaf strategiyasında regionların sosial-iqtisadi inkişafı mühüm yer tutur. Regionların sosial-iqtisadi inkişafına dair dövlət proqramlarının uğurla reallaşması iqtisadiyyatın neft amilindən asılılığının azaldılmasına, regionlar arasında sosial-iqtisadi inkişafa görə yaranmış uyğunsuzluqların, miqrasiya proseslərinin xeyli dərəcədə yumşaldılmasına, ölkənin malik olduğu resurslardan səmərəli istifadə olunmasına, sosial infrastrukturunun müasir tələblər səviyyəsində qurulmasına əhəmiyyətli dərəcədə müsbət təsir edib. Aparılan hesablamalar göstərir ki, "Regionların sosial-iqtisadi inkişafı Dövlət Proqramı" çərçivəsində həyata keçirilən tədbirlər nəticəsində ölkə üzrə yeni iş yerlərinin 80 faizdən çoxu regionların payına düşür.

2004-cü ildən həyata keçirilən regionların sosial-iqtisadi inkişafına dair dövlət proqramlarının nəticəsi olaraq bütün şəhərlərimiz, kənd və qəsəbələrimiz davamlı inkişaf yoluna qədəm qoyub. Azərbaycanın hər yerində abadlıq və quruculuq işləri görülür. İndi hansı bölgəyə getsən, hara baxsan, sürətli inkişafı, quruculuq işlərini görmək mümkündür. Bütün bunlar Salyan rayonunun timsalında da aydın görünür. Salyanın tarixən ticarət yollarının üstündə yerləşməsi bu bölgənin inkişafında mühüm rol oynayıb. Sovet hakimiyyəti illərində Heydər Əliyevin sayəsində Salyanda xüsusən kənd təsərrüfatı xeyli inkişaf etmişdi. Bu gün də Salyanda həyat qaynayır, iqtisadiyyatın bütün sahələri yüksəlir, istehsal artır.

Salyan həm də Azərbaycanın ən qədim yaşayış məskənlərindən biridir. Bunu Salyan rayonunda Muğan arxeoloji mədəniyyətinin mərkəzi kimi tanınmış Babazanlı ərazisində aparılan tədqiqatlar təsdiq edir. Burada üzə çıxarılan maddi mədəniyyət nümunələrinin 2800 il bundan əvvəlki dövrə aid olması sübut edir ki, Salyanın yaşayış məskəni kimi tarixi qədimdir.

Bugünkü "dəyirmi masa"da toxunulan məsələlərlə bağlı ətraflı söz açılacaq, hörmətli tədbir iştirakçılarını dinləyəcəyik. İndi isə çıxış üçün söz Salyan Rayon İcra Hakimiyyətinin başçısı Tahir Kərimova verilir.

Tahir KƏRİMOV:

- Dövlət müstəqilliyinin qısa dövrü ərzində əsrlərə bərabər inkişaf yolu keçən Azərbaycan bu gün dünyada demokratik və sivil dövlət kimi tanınır. Bu, Prezident İlham Əliyevin rəhbərliyi ilə ölkədə həyata keçirilən məqsədyönlü iqtisadi və sosial siyasətin uğurlu nəticəsi olmaqla yanaşı, həm də Heydər Əliyev siyasi kursunun alternativsizliyinin sübutudur. İndi dünya və Avropa ölkələri sırasında Azərbaycan iqtisadi inkişaf tempinə və əhalinin durmadan yüksələn sosial rifahına görə öncül yerlərdə qərar tutub. Cənubi Qafqazın isə lider dövlətidir.

Fərəhlə qeyd etməliyik ki, ölkəmizin inkişaf tempini beynəlxalq qurumlar yüksək qiymətləndirir. Dünya İqtisadi Forumunun qlobal rəqabətqabiliyyətlik indeksinə görə Azərbaycan ötən il 7 pillə irəliləmiş və rəqabətlik reytinqinə görə 148 dövlət arasında 39-cu yerdə qərarlaşmışdır. Əlbəttə, bu, respublikada balanslaşdırılmış inkişaf strategiyası, neft kapitalının insan kapitalına yönəldilməsi, regionların sosial-iqtisadi inkişafına göstərilən diqqət və qayğının verdiyi ürəkaçan nəticələridir.

Əsası ümummilli lider Heydər Əliyev tərəfindən qoyulan, Prezident İlham Əliyev tərəfindən əzmlə davam etdirilən və müasir dövrün tələblərinə hesablanan sosial-iqtisadi inkişafın Azərbaycan modeli bu gün həm də dünyanın ən qabaqcıl şirkətlərinin diqqətini özünə cəlb etmişdir. Tanınmış şirkətlər dinamik inkişaf edən, ictimai-siyasi cəhətdən sabit məkan olan Azərbaycana sərmayə qoymağa, ölkəmizin iştirakı ilə beynəlxalq xarakterli iri layihələrdə iştirak etməyə həvəslə qoşulur.

İqtisadi uğurlar sosial sferada da mühüm layihələrin həyata keçirilməsinə şərait yaradır, əhalinin güzəranı gündən-günə yaxsılaşır. Vətəndaşlarımızın rahat yaşayıb fəaliyyət göstərmələri üçün dövlət hər cür şəraitin yaradılmasını özünün prioritet vəzifəsi hesab edir. Regionlarda sosial infrastrukturun yaradılması, şəhərlərin və kəndlərin qazlaşdırılması, yolların asfaltlaşması, körpülərin, təhsil və mədəniyyət ocaqlarının tikilməsi, yeni iş yerlərinin açılması əhalinin böyük razılığı ilə qarşılanır. Sevindirici hal ondan ibarətdir ki, şəhər və rayonlarda əhali bütün bu quruculuq və abadlıq işlərinə könüllü şəkildə qoşulmaqla daim ona dəstək verir.

Azərbaycanın hərtərəfli inkişaf prosesində digər bölgələrlə yanaşı, Salyan da mühüm yer tutur. Qədim yaşayış məskəni olan Salyan iqtisadi potensialına görə digər bölgələrdən seçilir. Coğrafi mövqeyinə görə Salyan magistral ticarət yolunun üstündə yerləşir. Xəzər dənizinin yaxın olması, Kür çayının rayon ərazisindən keçməsi, onu iki yerə ayırması, Babazanan və Kürsəngi kimi dağ massivləri, münbit düzən sahələrin çoxluğu bu rayonun digər bölgələrdən fərqli spesifik göstəriciləridir. Rayonun iqtisadi və coğrafi potensialı yaxın bölgələrin də iqtisadi inkişafı üçün zəmin yaradır.

Salyanda inkişaf etmiş aqrar sektor, sənaye müəssisələri, müasir infrastruktur formalaşmışdır. Bölgədə turizmin inkişafı üçün perspektivlər var. Lakin bölgənin iqtisadi potensialı və coğrafi imkanları burada aqrar və sənaye əhəmiyyətli istehsal mərkəzlərinin yaradılmasını zəruri edir. Bu isə, öz növbəsində, yaxın Neftçala, Biləsuvar, Cəlilabad, Sabirabad, Hacıqabul rayonlarının, habelə Şirvan şəhərinin iqtisadi və sosial inkişafı üçün şəraitin yaradılmasına səbəb olacaq.

Salyan rayon sakinləri də, respublikanın bütün əhalisi kimi, qurub-yaratmaq əzmi ilə fəaliyyət göstərir. Salyanlılar Azərbaycanın işıqlı, firavan sabahını Heydər Əliyev siyasətində görür və onu ürəkdən dəstəkləyirlər. Bu bölgənin insanları Heydər Əliyev siyasətinə, Heydər Əliyevin dövlətçilik prinsiplərinə sadiqliklərini öz əməlləri ilə sübut etmişlər. Ötən il respublikada keçirilən prezident seçkilərində Salyan rayon seçiciləri də yüksək mütəşəkkillik və siyasi fəallıqla iştirak etmişlər. Ümummilli lider Heydər Əliyev siyasətinin layiqli davamçısı, son on ildə Azərbaycanı dinamik inkişaf mərhələsinə çıxaran praqmatik dövlət xadimi, Azərbaycan Respublikasının Prezidenti cənab İlham Əliyevə səs verməklə ölkəmizin gələcək inkişafına öz inamlarını bir daha ifadə etmişlər.

Salyanlılar rayonun sosial-iqtisadi inkişafına, onun mədəni-tarixi irsinə göstərilən diqqətə görə ölkə Prezidentinə dərin minnətdarlıq hisslərini ifadə edirlər. Ötən il rayonun Muğan-Babazanlı abidələrinin 2800 illik tarixi ilə bağlı, bu ilin yanvar ayında isə Azərbaycanın böyük mütəfəkkiri və filosofu, türk dünyasının ideoloqu Əli bəy Hüseynzadənin 150 illik yubileyinin keçirilməsi barədə ölkə başçısının sərəncamları rayonun tarixinə, onun mədəniyyətinə, bütövlükdə milli-mənəvi dəyərlərimizə göstərilən yüksək diqqətin bariz nümunəsi kimi ən yüksək qiymətə layiqdir.

Salyan rayonunun son illərdəki iqtisadi nailiyyətləri siyasi və mədəni həyatdakı uğurlarını tamamlayır. Azərbaycan regionlarının sosial-iqtisadi inkişafına dair dövlət proqramları çərçivəsində rayonumuzda çox böyük işlər görülmüşdür. Belə ki, məhsul buraxılışının həcmi son bir ildə 38 faiz, kənd təsərrüfatı məhsullarının ümumi həcmi 6 faiz, rabitə xidmətinin həcmi 11,6 faiz, nəqliyyat xidmətinin həcmi 24 faiz, əhaliyə göstərilən pullu xidmətlərin həcmi 6 faiz çox olmuşdur. Əsas kapitala yönəldilən investisiya 76 milyon manat təşkil etmişdir. Ötən il rayonumuzda 571 daimi iş yeri açılmışdır. Ümumilikdə isə, dövlət proqramları qəbul edilən 2004-cü ildən bəri 22 min 80 yeni iş yeri açılmışdır ki, onun da 12 min 500-ü daimi iş yeridir.

Ötən müddət ərzində rayonda yeni sahibkarlıq subyektləri yaradılmış, ərzaq təhlükəsizliyi proqramı çərçivəsində işlər ardıcıllıqla görülmüşdür. Rayonda Azərbaycan Respublikasının İqtisadiyyat və Sənaye Nazirliyinin Sahibkarlığa Kömək Milli Fondunun kreditləri və sahibkarların vəsaiti hesabına yeni istehsal və emal sənayesi sahələri yaradılması istiqamətində işlər həyata keçirilmişdir. Bu gün adları respublikamızda məşhur olan "Hacı Camalxan", "NNEM" fermer təsərrüfatı, "Nurgün Aqro" MMC, "Ələddin-fermer" MMC və digər kollektivlər Salyan rayonu ərazisində fəaliyyət göstərir. Hazırda rayonumuzun iqtisadi inkişafı Azərbaycan dövlətinin iqtisadi inkişaf strategiyasına uyğun olaraq uğurla davam edir.

Kənd təsərrüfatının müxtəlif sahələrinin inkişafına dair dövlət proqramlarının da icrası ilə əlaqədar rayonda ardıcıl tədbirlər görülməkdədir. Belə ki, 2014-cü ilin məhsulu üçün 18 min hektara yaxın sahədə taxıl əkini aparılmışdır. Rayonda 1200 hektar sahədə üzüm bağları var. Hazırda isə yeni bağların salınması istiqamətində tədbirlər həyata keçirilir. 800 hektardan artıq meyvə bağı mövcuddur ki, onların da yarıya qədəri artıq məhsul verir. Rayonda kənd təsərrüfatının inkişafı üçün torpaqların meliorativ cəhətdən yaxşılaşdırılması, kənd təsərrüfatının suvarma suyu ilə vaxtında təmin edilməsi daim diqqət mərkəzində saxlanılır.

2013-cü ildə rayonun təhsil, səhiyyə və

mədəniyyət sahəsində böyük uğurları olmuşdur. Cənab Prezidentin sərəncamları ilə 1 nəfər əməkdar mədəniyyət işçisi, 1 nəfər əməkdar müəllim, 1 nəfər müəllim ikinci dəfə "İlin ən yaxşı müəllimi" fəxri adına layiq görülmüş, 1 müəllim "Tərəqqi" medalı ilə təltif edilmişdir. Rayonun 326 məzunu respublikanın müxtəlif ali məktəblərinə daxil olmuş, 18 abituriyent 600-dən yuxarı bal toplamış, 1 abituriyent Prezident təqaüdünə layiq görülmüşdür. Rayon abituriyentlərinin ana dili, ədəbiyyat, riyaziyyat, fizika, kimya, tarix, coğrafiya və ingilis dili fənləri üzrə göstəriciləri respublika üzrə orta göstəricilərdən yuxarı olmuşdur. Bunlarla yanaşı, rayonun 1 idmançısı Hollandiyada keçirilmiş gənclər arasında Avropa çempionatının, 1 idmançı isə Yunanıstanın Afina şəhərində keçirilmiş kikboksinq üzrə dünya çempionatının qalibi olmuşdur.

Respublikamızın iqtisadi və sosial həyatında Salyan rayonunun mövqeyi təkcə qeyd olunanlarla bitmir. Abadlıq-quruculuq işləri qədim Muğan şəhəri Salyanın görkəmini tamamilə dəyişmişdir. Azərbaycan Prezidenti İlham Əliyevin rayonumuza hər gəlişi Muğanın bu qədim diyarının sosial inkişafına yeni güclü təkan verir. Ölkə başçısının ayırdığı vəsaitlər hesabına rayon ərazisində, şəhərin mərkəzində yeni-yeni tikililər inşa edilir, abadlıq-quruculuq işləri getdikcə genişlənir.

Təkcə ötən il şəhərin mərkəzində möhtəşəm Heydər Əliyev Mərkəzi tikilmiş, ulu öndərin monumental abidəsi ucaldılmış, ətraf ərazidə fəvvarələr quraşdırılmış, xiyaban salınmış, müxtəlif ağac və bitki kolları əkilmişdir. Qeyd edilən ərazidə müasir görkəmdə modern memarlıq üslubunda icra hakimiyyətinin yeni inzibati binası inşa edilmişdir. Şəhər ərazisində iki hektar ərazidə Dövlət Bayrağı Meydanı salınmışdır. Meydanda fəvvarələr quraşdırılmış, üzlüklər döşənmiş, dekorativ ağaclar və gül kolları əkilmiş, 42 metr hündürlükdə Dövlət bayrağı dirəyi ucaldılmışdır.

Sadalanan bu obyektlərin açılışında Azərbaycan Prezidenti İlham Əliyev iştirak etmişdir. İndi Heydər Əliyev Muzeyi və parkı, habelə Dövlət bayrağı meydanı Salyan şəhər sakinlərinin ürək açıqlığı ilə istirahət etdiyi məkanlardır. Dövlət əhəmiyyətli bayram tədbirləri, kütləvi-mədəni tədbirlər bu yerlərdə rayon ictimaiyyəti nümayəndələrinin iştirakı ilə geniş şəkildə qeyd olunur.

Ötən il həmçinin təhsil şöbəsi üçün inzibati bina, şəhərin Plastmas yaşayış massivində 640 yerlik, Boranıkənd kəndində 220 yerlik yeni məktəb, şəhər 8 saylı tam orta məktəb üçün 160 yerlik yeni korpus, rayonlararası Şorsulu Psixiatriya Xəstəxanası üçün 100 çarpayılıq yeni korpus tikilib istifadəyə verilmiş, Qaraçala qəsəbə, Dayıkənd kənd və şəhər 8 saylı tam orta məktəbləri əsaslı təmir edilmişdir. Hazırda şəhərin mərkəzində Yeni Azərbaycan Partiyası Salyan rayon təşkilatı üçün yeni inzibati bina, Peyk kəndində 220 şagirdlik məktəb, 50 çarpayılıq rayonlararası ağciyər xəstəlikləri xəstəxanası tikilməkdədir. Azərbaycan Prezidentinin tapşırığına əsasən Mərkəzi Rayon Xəstəxanasına xroniki böyrək xəstəliyindən əziyyət çəkən xəstələrin müalicəsi məqsədilə 10 ədəd dializ aparatı verilmiş və dializ şöbəsi açılmışdır. Bu şöbənin xidmətindən Salyan rayonu ilə yanaşı, Neftçala və Biləsuvar rayonlarının da əhalisi istifadə edir.

Ölkə rəhbəri İlham Əliyev 2013-cü il sentyabrın 4-də Salyana səfəri zamanı aparılan abadlıq-quruculuq işləri ilə tanış olduqdan, yuxarıda qeyd etdiyimiz obyektlərin açılışını həyata keçirdikdən sonra ictimaiyyətin rəyini nəzərə alaraq rayonun abadlığı üçün Prezidentin Ehtiyat Fondundan 2 milyon manat vəsait ayırmışdır. Bundan başqa, şəhər mərkəzini Babazanlı yaşayış massivi ilə birləşdirəcək Kür çayı üzərində möhtəşəm körpünün inşası, həmçinin Salyan-Şirvan magistral yolunun yenidən salınması hesabına rayonun yol-nəqliyyat infrastrukturu əsaslı surətdə yeniləşəcək.

Bu gün Salyan şəhərinin siması gündən-günə təzələnir, müasirləşir. Şəhərin küçələri abadlaşır, avtomobil yolları asfaltlaşdırılır, müasir, yaraşıqlı binalar ucaldılır, yeni yaşıllıqlar salınır, binaların fasad hissələri müasir görkəm alır. Şəhər sakinlərinin iştirakı ilə XXI əsrin yeni Salyanı qurulur. Bütün bunlar şəhər sakinlərinin böyük razılığı ilə müşayiət olunur. Salyanlılar rayonun sosial-iqtisadi inkişafına göstərilən diqqət və qayğıya görə ölkə Prezidentinə dərin minnətdarlıq hisslərini ifadə edirlər. Əminik ki, öz gözəl ənənələri, zəngin tarixi keçmişi, böyük ziyalı potensialı, zəhmətsevər insanları ilə məşhur olan Salyan rayonu çiçəklənən respublikamızın ictimai-siyasi, sosial-iqtisadi həyatında bundan sonra da əhəmiyyətli rol oynayacaqdır.

Bəxtiyar SADIQOV:

- Salyan iqtisadiyyatda özünün ənənələri olan rayondur. Xüsusən kənd təsərrüfatı üçün münbit şəraitin olması burada heyvandarlığın və əkinçiliyin inkişafı üçün geniş imkanlar açır. Təsadüfi deyil ki, bu gün Azərbaycan rəhbərliyinin ölkədə aqrar sahənin inkişafı istiqamətində həyata keçirdiyi məqsədyönlü tədbirlərin bəhrəsini Salyanda daha yaxından görmək mümkündür. İndi Salyanda iqtisadi sahədə həm keçmiş ənənələr bərpa olunur, həm də tamamilə yeni istehsal sahələri formalaşır. Bu mövzuda çıxış üçün söz "Zöhrab" kəndli-fermer təsərrüfatının rəhbəri Emin Mirzəyevə verilir.

Emin MİRZƏYEV:

- Salyan rayonu bütün dövrlərdə ölkə iqtisadiyyatının əsas sahələrində mühüm rol oynamışdır. Rayonumuz, əsasən, kənd təsərrüfatı rayonu olsa da, sənayenin bir çox sahələri də burada sürətlə inkişaf etmişdir. Neft-qaz hasilatı ilə yanaşı, tikinti, emal sənayesi, kənd təsərrüfatı məhsullarının saxlanılması və başqa sahələr buna nümunədir.

Sovetlər birliyi dağıldıqdan sonra bütün ölkədə olduğu kimi, Salyanda da kənd təsərrüfatı müəssisələri tənəzzülə uğramışdı. Yalnız ümummilli lider Heydər Əliyev hakimiyyətə qayıtdıqdan sonra həyata keçirilən aqrar islahatların nəticəsi olaraq rayonumuzun iqtisadiyyatında dirçəliş dövrü başladı, kənd təsərrüfatı özünün yeni inkişaf mərhələsinə qədəm qoydu. Aqrar sahədəki islahatlar, torpaqların əhaliyə əvəzsiz verilməsi, kolxoz və sovxozların ləğv edilməsi bu sahəyə yeni baxışın, bazar iqtisadiyyatının formalaşması ilə nəticələndi. Bu gün rayonda kənd təsərrüfatına yararlı 63 min 735 hektar torpaq sahəsi var.

Prezident İlham Əliyevin regionların inkişafına göstərdiyi diqqət və qayğı kənd təsərrüfatında da yaxından hiss olunur. "2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı", kənd təsərrüfatı məhsulları istehsalçılarına əkin sahəsinin becərilməsində istifadə edilən yanacaq və motor yağlarına görə dövlət vəsaiti hesabına yardım verilməsi, "Aqrolizinq" ASC-nin yaradılması, kənd təsərrüfatı istehsalçılarına mineral gübrələrin güzəştlə satılması, ölkəyə damazlıq heyvanların gətirilməsi aqrar sahənin yüksəlişinə təkan verib.

Salyanlı fermerlər onlar üçün yaradılan dövlət qayğısını yaxından hiss edir və yaradılan imkanlardan lazımınca faydalanırlar. Belə ki, 2013-cü ilin məhsulu üçün 17 min 879 hektar sahədə taxıl əkini aparılmışdır. Nəticədə taxıl sahələrinin hər hektarından məhsuldarlıq 31,8 sentner olmaqla, ümumilikdə, 56 min 824 ton məhsul istehsal olunmuşdur ki, bu da 2012-ci ildəkindən 3 min 414 ton çox idi. Dövlət qayğısının, ayrılan subsidiyaların nəticəsi olaraq 2014-cü ilin məhsulu üçün 17 min 404 hektar sahədə taxıl əkilmişdir. Bunun 6 min 215 hektarı buğda, 11 min 189 hektarını isə arpa təşkil edir. Digər dənli-paxlalı və çoxillik yem bitkilərinin də əkin sahəsi ötən ilin müvafiq dövrünə nisbətən artmışdır.

Kənd təsərrüfatını inkişaf etdirmək üçün ən vacib olan sahələrdən biri texnikaya olan tələbatdır. "Aqrolizinq" ASC-nin yaradılması bu sahədə olan problemləri köklü surətdə həll etməkdədir. Taxıl əkinlərinin çox olması ilə əlaqədar ötən il biçin zamanı kombayn çatışmazlığı problemi yaşandı. Rayon rəhbərliyinin Kənd Təsərrüfatı Nazirliyinə rəsmi müraciətindən sonra bu problem həll edildi. Bu il isə rayonumuza əlavə olaraq 10 ədəd kombayn verilib, əlavə olaraq daha 5 ədəd kombaynın ayrılması nəzərdə tutulur.

Salyanda kənd təsərrüfatının ən mühüm sahələrindən biri olan heyvandarlıq sahəsində də son illər mühüm irəliləyiş əldə edilmişdir. Hazırda rayonda qaramalın sayı 62 min 315 baş təşkil edir ki, bu da ötən ilin müvafiq dövrü ilə müqayisədə 1,3 faiz çoxdur. Davarın sayı isə 185 min 285 başdır. Bu, ötən ilin müvafiq dövrü ilə müqayisədə 2 min 938 baş artıqdır. Bu artımların nəticəsində rayonda ət istehsalı 12 min 825 tona, süd istehsalı isə 44 min 762 tona, yun istehsalı 335 tona, yumurta istehsalı isə 3 milyon 445 min ədədə çatdırılmışdır. Rəqəmlərdən göründüyü kimi, istər heyvanların baş sayında, istərsə də bir başdan alınan məhsulun həcminə görə son illər müsbət artım müşahidə olunur.

Salyanda kənd təsərrüfatının inkişaf etdirilməsi məqsədilə yeni istehsal sahələrinin yaradılması istiqamətində də bir sıra tədbirlər həyata keçirilmişdir. Bunlardan biri heyvandarlığın inkişafı məqsədilə lizinq yolu ilə rayona Almaniya və Avstriyadan məhsuldarlığı yüksək holştin-friz, simmental, aberdin-anqus cinslərindən olan 771 baş heyvanın gətirilməsidir. Hazırda rayonda fəaliyyət göstərən "Hacı-Camalxan" və "Nurgün Aqro" MMC kimi damazlıq təsərrüfatları heyvandarlığın inkişafına böyük töhfələr verir.

Ölkə başçısı tərəfindən sahibkarlığın inkişafına yaradılmış münbit şəraitin nəticəsi olaraq rayonda "BRM üzüm" MMC, "Gilə" MMC, "Qaraçala" MMC, "Balacans" MMC, "Qarabağlı kooperasiya" və sair kimi iri təsərrüfatlar fəaliyyətə başlamışdır. Eyni zamanda, Kürsəngi kəndində "NNEM" fermer təsərrüfatı tərəfindən illik istehsal gücü 100 min dekalitr olan şərab zavodunun və "Ələddin Fermer" MMC-nin illik istehsal gücü 600 ton olan meyvəqurutma müəssisəsinin, Kürqaraqaşlı kəndində "Nurgün Aqro" MMC-də 400 başlıq heyvandarlıq kompleksinin, Çuxanlı kənd ərazisində kənd təsərrüfatı məhsullarının saxlanılması üçün gücü 10,5 min ton və 5 min ton olan iki soyuducu anbarın, 10 min tonluq taxılsaxlama anbarının, illik gücü 600 ton olan meyvəqurutma sexinin, tara və qablaşdırma sexinin tikintisi başa çatdırılmışdır. Hazırda Sahibkarlığa Kömək Milli Fondunun kreditləri və sahibkarların vəsaiti hesabına yeni istehsal və emal sənayesi sahələrinin yaradılması istiqamətində işlər, o cümlədən Qaraçala qəsəbəsində 2 min 400 başlıq heyvandarlıq kompleksinin tikintisi davam etdirilir.

Salyan rayonunda süd məhsulları emal edən "Hacı-Camalxan" və "Bəyaz Sud" zavodları fəaliyyət göstərir. "Bəyaz Sud" zavodunun gün ərzində istehsal gücü 30 tondur. Hazırda burada 14 çeşiddə məhsul istehsal olunur. "Hacı-Camalxan" kəndli-fermer təsərrüfatında isə 10 adda süd məhsulu, 54 adda meyvə-tərəvəz və bostan məhsulları konservləşdirilir. Bu təsərrüfatda un dəyirmanı, miniçörək zavodu, daxili tələbatı ödəmək məqsədilə yem emalı zavodu və mexaniki təmir sexi də fəaliyyət göstərir. Burada sağım kompüterləşdirilərək İsveçrənin "De-Laval" şirkətinin istehsal etdiyi avadanlıqla həyata keçirilir. Bütün bunlardan əlavə, təsərrüfatda damazlıq və toxumçuluq sahələri də fəaliyyət göstərir və respublikanın bütün bölgələrinə damazlıq heyvan və toxum satılır.

Bu il rayonda 45 min hektar suvarılan torpaq sahəsində əkin aparılmışdır. Həmin torpaqlar Kür çayı üzərində qurulmuş 79 ədəd nasos stansiyası vasitəsilə mexaniki üsulla suvarılır. Kür çayında suyun lazımi səviyyədən və ayrılan elektrik enerjisinin limitinin az olması səbəbindən bəzən suvarmada müəyyən fasilələr və ya problemlər yaranır.

Bu problemləri aradan qaldırmaq üçün müasir suvarma texnologiyalarından istifadə etmək salyanlı fermerlərin ən böyük istəyidir və bu, şoranlaşmaya meyilli olan rayonumuzun əkin sahələrini həmin ciddi problemdən birdəfəlik qurtarmağın yeganə yoludur. "Hacı-Camalxan" və bəzi böyük təsərrüfatlar bu işə başlasa da, rayonun bütün ərazilərində müasir texnologiyaların tətbiqinə hələlik başlanmamışdır.

2014-cü ilin "Sənaye ili" elan edilməsi ölkə iqtisadiyyatının, xüsusilə aqrar sahənin yeni inkişaf mərhələsinə qədəm qoymasından xəbər verir. Sahibkarlara və iş adamlarına yaradılan bu əlverişli şərait rayonumuzun inkişafına güclü təkan verəcək, ölkə iqtisadiyyatının formalaşmasında Salyan rayonunun xüsusi çəkisini daha da artıracaqdır.

Bəxtiyar SADIQOV:

- Azərbaycan iqtisadiyyatının inkişafı və ölkəmizin maliyyə imkanlarının artması paralel olaraq digər sahələrin inkişafı üçün imkanlar açır. Biz bunu sosial sahədə həyata keçirilən uğurlu fəaliyyətin timsalında aydın görürük. Sosial sahəyə diqqət, xüsusi kateqoriyalı insanlara sosial dəstək hər yerdə uğurlu bəhrələrini verir. Eyni zamanda, bu gün Azərbaycanın bütün şəhər və kəndləri abadlaşır, yenidən qurulur, gözəlləşir. Təbii ki, Salyan da bu proseslərdən kənarda deyil və bu barədə rayon statistika idarəsinin rəis müavini H.Mənsimov danışacaq.

H.MƏNSİMOV:

- Prezident İlham Əliyevin təsdiq etdiyi regionların sosial-iqtisadi inkişafına dair dövlət proqramlarının uğurlu icrası müddətində bütün bölgələrdə yeni istehsal və xidmət müəssisələri fəaliyyətə başlayıb, əsaslı quruculuq və abadlıq işlərinə start verilib. Bu proqramlar sosial sahədə qarşıda duran problemlərin də həllində mühüm rol oynayır. Yeni müəssisələrin yaradılması tarazlı inkişafla bərabər, əhalinin məşğulluq problemlərinin yoluna qoyulması və yeni iş yerlərinin açılması ilə müşayiət edilir. Dövlət proqramları çərçivəsində regionlarda infrastrukturun bərpası və inkişafı, əhalinin kommunal xidmətlərlə, o cümlədən elektrik enerjisi, qaz və su ilə təchizatının yaxşılaşdırılması, səhiyyə və təhsil müəssisələrinin tikintisi istiqamətində mühüm tədbirlər həyata keçirilir.

Bütün bu işlər Salyan rayonunda da əyani hiss olunmaqdadır. Hər zaman Salyana və salyanlılara xüsusi qayğı ilə yanaşan Prezident İlham Əliyevin son üç ildə rayona etdiyi 3 səfər dövlət başçısının bizə olan diqqətinin göstəricisidir. Eyni zamanda, son illərdə rayon sakinlərinin sosial rifah halının daha da yaxşılaşdırılmasına xidmət edən mühüm infrastruktur layihələrin həyata keçirilməsi, dayanmadan aparılan abadlıq və quruculuq işləri də dövlət başçısının diqqətinin bariz nümunəsidir.

Sosial sahədəki nəticələrdən söz açmazdan əvvəl rayonumuzun ötənilki iqtisadi yekunlarına toxunmaq istəyirəm. 2013-cü ildə Salyanda məhsul istehsalının həcmi əvvəlki illə müqayisədə 8 milyon 388 min manat, yəni 3,8 faiz artaraq 230 milyon 919 min manat təşkil edib. Bu dövrdə sənaye məhsulunun həcmi 1 faizə yaxın, kənd təsərrüfatı məhsullarının həcmi 6 faiz, nəqliyyat xidməti 24,1 faiz, pərakəndə satış 3,8 faiz, pullu xidmət 5,9 faiz çox olmuşdur. Əsas kapitala yönəldilən investisiya 76 milyon 543 min manat təşkil edib. Bir nəfərə düşən orta aylıq əməkhaqqı 238 manat, adambaşına düşən ümumi məhsul istehsalının həcmi isə 1774 manat olub.

İqtisadi artım sosial sahədəki nailiyyətləri tamamlayır. Məlum olduğu kimi, ölkəmizdə sosial siyasətin başlıca istiqamətlərindən biri sosial infrastrukturun yenilənməsidir. Bundan irəli gələrək son illər Salyanda 18 məktəb binası, 9 səhiyyə, 9 mədəniyyət müəssisəsi, 1 uşaq bağçası, 11 gənclər və idman müəssisəsi tikilib istifadəyə verilmiş, 18 məktəb, 4 uşaq bağçası, 4 səhiyyə, 2 mədəniyyət, 2 gənclər və idman müəssisəsi əsaslı təmir edilmişdir.

Təbii ki, iqtisadi sahədə yüksəlişin əsas səbəbi yeni istehsal müəssisələrinin yaradılmasıdır. Bu isə, öz növbəsində, əsas sosial prioritetlərdən olan işsizliyin aradan qaldırılmasında mühüm rol oynayır. Yeni müəssisələr məhsul artımına səbəb olduğu kimi, əhalinin məşğulluğunun təmin edilməsində də mühüm rol oynayır. Son 10 ildə Salyanda 12 min 629 daimi iş yeri yaradılması bunu təsdiq edir.

Sosial təminat sahəsində dövlət siyasətinin ən mühüm istiqamətlərindən biri sosial müavinətlərin ünvanlığının təmin edilməsindən, əlillərə, müharibə veteranlarına, gənc ailələrə, əhalinin ən aztəminatlı hissəsinə xüsusi diqqətin yetirilməsindən ibarətdir. Sosial müdafiəyə ehtiyacı olan şəxslərin maddi vəziyyətinin, həyat şəraitinin yaxşılaşdırılması nəticəsində ümumilikdə ölkəmizdə yoxsulluq səviyyəsi azalaraq minimuma enmişdir. Ölkəmizdə 2006-cı ildən ünvanlı sosial yardım mexanizminin işə düşməsi ilə əlaqədar Salyanda 13 min 785 nəfər ailə üzvü sosial yardım alır.

Rayon əhalisinin sosial qayğıları daim Salyan Rayon İcra Hakimiyyətinin diqqət mərkəzində saxlanılır. Belə ki, son illər rayonda Qarabağ müharibəsi əlilləri və şəhid ailələrinin mənzil şəraitinin yaxşılaşdırılması üçün bir 8 mənzilli, iki 16 mənzilli, iki fərdi ev tikilib istifadəyə verilmişdir. Hazırda 32 mənzilli binanın tikintisi üçün torpaq sahəsi ayrılmışdır. Xüsusi kateqoriyalı insanların mənzil şəraitinin yaxşılaşdırılması üçün onlar rayon icra hakimiyyətində mənzil növbəsinə götürülür və nəzarətdə saxlanılır. Rayon icra hakimiyyətində istənilən vaxt fərdi ev tikintisi və ticarətlə məşğul olan vətəndaşlara torpaq sahəsi ayrılır və icrası nəzarətə götürülür. Rayonda Qarabağ müharibəsi əlillərinə ötən il 18 minik avtomobili verilmiş və bu iş növbəlik əsasında davam etdirilir.

2013-cü ildə sosial məsələlərin həllində önəmli addımlardan biri sovet vaxtından qalan əmanətlərin qaytarılması olmuşdur. Salyanda da əmanətlərin qaytarılması, yəni kompensasiya şəklində ən böyük əmsalla əhaliyə verilməsi prosesi uğurla başa çatmışdır. Ümumilikdə 10 min 428 nəfər vətəndaş "KapitalBank"ın rayon filialına müraciət etmiş və onlara 4 milyon 124 min manat vəsait ödənilmişdir.

Bütün bu nailiyyətləri yüksək dəyərləndirən salyanlılar da həmişə olduğu kimi, Prezident İlham Əliyevin ətrafında sıx birləşəcək, dövlətimizin insanlara olan qayğısından bəhrələnərək sosial-iqtisadi və ictimai həyatın müxtəlif sahələrində fəallıq göstərəcəklər.

Bəxtiyar SADIQOV:

- Ulu öndər Heydər Əliyevin 21 il əvvəl siyasi hakimiyyətə dönüşü ilə xalqımız təhlükələrdən, müstəqilliyini itirməkdən qurtuldu. Xilaskarlıq missiyasını uğurla başa vuran Heydər Əliyevin əsasını qoyduğu siyasi kurs bu gün Azərbaycanı regionun lider və dinamik inkişaf edən dövlətinə çevirib. Bu mənada Azərbaycanın 21 il əvvəllə bugününün müqayisəsi Milli Qurtuluş missiyasının dövlətçilik tariximizin parlaq səhifəsi olduğunu göstərir. Milli Qurtuluş missiyasının əyani nəticəsi Salyanın da dünəni ilə bugününün müqayisəsində öz real təsdiqini tapır. Bu barədə danışmaq üçün söz Azərbaycan Müəllimlər İnstitutunun Salyan filialının müəllimi Aliyə Əmrahovaya verilir.

Aliyə ƏMRAHOVA:

- Adətən, şəxsiyyətlər haqqında danışarkən onları mühitin, tarixin yetişdirməsi kimi qeyd edirlər. Lakin bəzi xalqlara tarixi yaradan şəxsiyyətlər qismət olmuşdur. Belə şəxsiyyətlər mənsub olduqları xalqın, dövlətin üzləşdiyi fəlakətlərin, çətinliklərin aradan qaldırılmasında qətiyyətlə, prinsipiallıqla, möhkəm siyasi iradə və fədakarlıqla çalışırlar.

Heydər Əliyev məhz tarixi yaradan şəxsiyyətlərdəndir. Azərbaycanın inkişafında, müstəqilliyində, gələcəyində müstəsna rol oynayan, insanların qəlbində alovlandırdığı azadlıq arzusunu boğulmağa qoymayan, cahanşümul əməlləri ilə yaddaşlarda sarsılmaz, möhtəşəm abidə ucaldan ümummilli lider Heydər Əliyev xalqımızın xilaskarıdır. 1993-cü ilin iyununda xalqın təkidli çağırışlarından sonra Azərbaycana rəhbərlik missiyasını yenidən öz üzərinə götürən böyük siyasətçi, təcrübəli dövlət xadimi Heydər Əliyevin idarəçilik məharəti sayəsində ölkəmiz onu təhdid edən fəlakətlərdən xilas oldu, sabit sosial-iqtisadi, siyasi və mədəni inkişaf yoluna qədəm qoydu. Müstəqilliyimiz möhkəmləndirildi, bazar iqtisadiyyatı və demokratiyanın həyata keçirilməsi sahəsində nəhəng addımlar atıldı, ölkəmizin beynəlxalq nüfuzu yüksək səviyyəyə qaldırıldı.

Heydər Əliyev siyasi kursunun layiqli davamçısı Prezident İlham Əliyevin rəhbərliyi ilə Azərbaycan dünya birliyində layiqli yerini tutmaqdadır. Heydər Əliyevin müəyyənləşdirdiyi strategiyanın Prezident İlham Əliyev tərəfindən uğurla həyata keçirilməsi Azərbaycanın qarşısında böyük imkanlar açıb. Azərbaycanın beynəlxalq aləmdə iqtisadi və siyasi mövqeyini daha da möhkəmləndirməsi, beynəlxalq qurumların hesabatlarında islahatçı ölkə kimi yer tutması, dünyanın nüfuzlu təşkilatlarının Azərbaycanın mövqeyini dəstəkləyən qərar və qətnamələr qəbul etməsi bir həqiqəti ortaya qoyur ki, ölkəmizin seçdiyi yol düzgündür və bizi daha uğurlu gələcəyə aparır.

Ölkəmizdə reallaşan inkişaf strategiyasının uğurlu nəticəsi olaraq Azərbaycanın cənub bölgəsinin qapısı hesab edilən Salyan gündən-günə böyüyür, müasirləşir, gözəlləşir, respublikamızın sayılıb-seçilən şəhərinə çevrilir. Sakinlərin sosial şəraiti yaxşılaşır, yaşam tərzi dəyişir. Ötən 10 ildə regionların sosial-iqtisadi inkişafına dair dövlət proqramlarına uyğun olaraq Salyan şəhəri, eləcə də rayonumuzun qəsəbə və kəndlərində möhtəşəm tikinti-quruculuq və abadlıq işləri aparılıb. Bu işlərdə Prezident İlham Əliyevin rayonumuza olan diqqət və qayğısı mühüm rol oynayıb. Təkcə onu göstərmək kifayətdir ki, Prezident İlham Əliyev son üç ildə 3 dəfə Salyanda səfərdə olmuş, rayonun sosial-iqtisadi inkişafına dair dörd sərəncam imzalamışdır. Son illərdə rayonumuzun ayrı-ayrı kəndlərinə magistral qaz xəttinin çəkilişi, kəndlərin qazlaşdırılması, məktəblərin, uşaq bağçalarının, poçt binalarının tikintisi və digər quruculuq- abadlıq işləri ölkə rəhbərliyinin salyanlıların daha firavan yaşamasına göstərdiyi yüksək diqqət və qayğısının əyani təzahürüdür.

Ataların yaxşı sözü var: mədəniyyət yoldan başlayır. Bu gün Salyanda da avtomobil yollarının və küçələrin əsaslı şəkildə təmir olunub yenidən qurulması prosesi sürətlə davam edir. Prezident İlham Əliyevin sərəncamı ilə ümumi uzunluğu 23,5 kilometr olan Kürsəngi-Yolüstü kəndlərarası yol inşa edildi və açılışında dövlət başçısı iştirak etdi. Rayonun Arbatan, Marışlı kəndlərinə gedən, ümumi uzunluğu 4 kilometrə qədər olan asfalt yolun da yenidən qurularaq bu yaxınlarda istifadəyə verilməsi əhalinin böyük sevincinə səbəb olub. Prezident İlham Əliyevin açılışında iştirak etdiyi "Kür-hotel" mehmanxanasının istifadəyə verilməsi isə Salyan rayonuna gələn qonaqlara daha yüksək səviyyədə xidmət göstərməyə imkan verir. Salyan şəhərində yeni istifadəyə verilən "Muğan" şadlıq evi və ticarət mərkəzi isə əhalinin məişət qayğılarının aradan qaldırılmasına xidmət edir. Bütün bunlarla yanaşı, Salyan şəhərində yaşayış binalarının, inzibati binaların dam örtüyündə və fasad hissələrində aparılan təmir-bərpa işləri şəhərin dizayn tərtibatına gözəllik verir.

Son illərdə Salyan rayonu yaşıl libasa bürünmüşdür desək, mübaliğə etmərik. Qısa müddətdə şəhərin özündə, habelə qəsəbə və kəndlərdə 31 mindən çox ağac, o cümlədən dekorativ ağaclar və gül kolları əkilib. Eyni zamanda, şəhərimizdə 5500 kvadratmetrdən çox yaşıl çəmənlik salınıb ki, bu da şəhərimizə xüsusi gözəllik verir. Bunlarla yanaşı, Dövlət bayrağı meydanında genişmiqyaslı abadlıq-quruculuq işləri və Kür çayı üzərindəki yeni salınmaqda olan körpü Salyanın bugünü ilə dünəni arasındakı fərqə çox gözəl nümunədir.

Respublikamızın ən qədim yaşayış məskənlərindən biri olduğu təsdiq edilən Salyan şəhəri özünün yeni donunu, libasıni geyinir. Şəhərin küçə və prospektlərində, park və xiyabanlarında, yaşayış məhəllələrində aparılan yenidənqurma işləri zövq oxşayır. Salyanın yaxşı mənada dəyişdiyini, yeniləşdiyini hiss etmək üçün şəhərimizin, rayonumuzun qəsəbə və kəndlərinin tamaşasına çıxmaq yetərlidir. Hər yerdə tikinti-quruculuq, abadlıq işləri nəzərə çarpır. Hiss olunur ki, rayonda hər kəs işində-gücündə, vəzifəsinin başındadır.

Bəxtiyar SADIQOV:

- 2004-cü ildən fəaliyyətə başlayan Heydər Əliyev Fondu ötən 10 ildə ulu öndərin adını layiqincə daşıdığını təsdiq edib. Bu gün Heydər Əliyev Fondu təkcə Azərbaycanda deyil, dünyanın bir çox yerində mərhəmət və xeyirxahlıq ünvanı kimi tanınır. Fond ölkəmizdə, demək olar ki, bütün sosial və humanitar istiqamətlər üzrə, o cümlədən mədəniyyət sahəsində müxtəlif layihələr həyata keçirir, Azərbaycanın dünyada tanıdılmasına xidmət edir. Fond Salyanda da xeyirxahlığın, mərhəmətin və quruculuğun əsas ünvanına çevrilib. Söz Salyan şəhər 4 saylı tam orta məktəbin müəllimi Razıgül Dadaşovaya verilir.

Razıgül DADAŞOVA:

- Unudulmaz rəhbərimiz Heydər Əliyev hələ sağlığında xalqımızın qəlbində özünə əbədi abidə ucaltmış, müdrikliyi, təkrarsız siyasi keyfiyyətləri ilə el-obamızı dünyada tanıtmışdır. Ulu öndər demişdir: "Mənim həyat amalım yalnız bütün varlığım qədər sevdiyim Azərbaycan xalqına, dövlətçiliyimizə, ölkəmizin iqtisadi, siyasi, mənəvi inkişafına xidmət olmuşdur".

Bu gün Heydər Əliyev cismən aramızda olmasa da, dövlətçiliyimizin güclənməsinə və inkişafa yol açan ideyaları ilə hər bir azərbaycanlının qəlbində yaşayır. Bu ideyaların həyata keçirilməsində çox mühüm rol oynayan Heydər Əliyev Fondu isə mərhəmət və ümid məbədinə çevrilib.

Ulu öndərin ideyalarını yeni nəsillərə aşılayan, onun amallarını rəhbər tutaraq fəaliyyət göstərən, ümumbəşəri mədəniyyətə, sülhə öz töhfələrini verən fond Mehriban xanım Əliyevanın rəhbərliyi altında ölkəmizin dünya miqyasında daha geniş spektrdən tanınmasına, qədim və zəngin mədəniyyətə, milli mədəniyyətimizin dəyərlərinin qorunmasına və təbliğinə əvəzsiz töhfələr verir. Fondun missiyalarını layiqincə yerinə yetirən onun Rusiyadakı nümayəndəliyinin rəhbəri Leyla Əliyeva isə fərqli mədəniyyətlər arasında dialoqun qurulmasında, xaricdəki Azərbaycan gənclərinin təşkilatlanmasında mühüm xidmətlərin müəllifi kimi çıxış edir.

Heydər Əliyev Fondunun təşəbbüsü ilə Azərbaycanda, həmçinin Salyanda keçirilən mədəni, sosial-iqtisadi tədbirlər, humanitar aksiyalar, aparılan quruculuq-abadlıq işləri nəticəsində ölkəmizin siması dəyişir, modernləşir. Fond tərəfindən rayonumuzun xüsusən təhsil sahəsində mühüm işlər görülmüşdür. Belə ki, Heydər Əliyev Fondunun dəstəyi ilə 2004-cü ildə şəhər 2 və 3 saylı, 2008-ci ildə şəhər 1 saylı humanitar-lisey məktəbləri tam təmir olunub, şagirdlərin ixtiyarına verilmişdir.

2005-ci ildə isə Salyanda internat məktəbi Heydər Əliyev Fondu tərəfindən əsaslı təmir edilib və bütün dərs vəsaiti və ləvazimatı ilə təmin olunub. Həmin il, həmçinin, fondun təşəbbüsü ilə daha iki məktəb - 100 şagirdlik Peyk kənd məktəbi və 200 şagirdlik Pambıq kənd məktəbi tikilərək istifadəyə verilmişdir. 2007-ci ildə Xələc kənd orta məktəbində 100 şagirdlik yardımçı bina tikilmişdir.

Salyanda dövlət rəsm qalereyası da Heydər Əliyev Fondunun təşəbbüsü ilə 2008-ci ildə yenidən qurularaq istifadəyə verilmişdir. Burada rəsm sərgilərinin nümayişi ilə yanaşı, peşəkar rəssamlar tərəfindən gənc istedadlar üçün ustad dərsləri də keçilir.

Heydər Əliyev Fondu uşaqların asudə vaxtlarını səmərəli keçirmələrini də unutmur. 2012-cı il mart ayının 13-də Azərbaycan Prezidenti İlham Əliyevin iştirakı ilə Salyanda Heydər Əliyev Fondunun dəstəyi ilə tikilmiş Uşaq Texniki Yaradıcılıq Mərkəzinin açılışı oldu. Bu gün mərkəz Salyanda uşaqların asudə vaxtlarını səmərəli keçirmələrində mühüm rol oynayır. Burada fəaliyyət göstərən fizika, gənc şahmatçılar, modelçılik, ibtidai texniki modelləşdirmə, bacarıqlı əllər, gənc dizayner, ingilis dili dərnəkləri uşaqların intellektual inkişafı üçün nəzərdə tutulmuşdur. Mərkəzdə ümumilikdə 1772 uşaq 10 dərnəkdə məşğul olur. Bütün bunlar göstərir ki, uşaqları hər zaman diqqətdə saxlayan Mehriban xanım Əliyeva, əslində, bu missiyası ilə həmin uşaqların xoşbəxt gələcəyinə, onların layiqli vətəndaş kimi formalaşmasına təminat yaradır. Hər bir ailəni birləşdirən, bir araya gətirən onun isti ocağıdır. Hər bir qadının, hər bir ananın arzusu isə belə isti ocağının olmasıdır. Mehriban Əliyeva həyat yoldaşı və ana kimi Azərbaycan qadınlarını çox gözəl duyur, anlayır. 2010-cu ildə Heydər Əliyev Fondunun təşəbbüsü ilə Salyan rayonunda tənha, aztəminatlı və əlil ailələr üçün 150 evdən ibarət yeni şəhərcik salındı. Bu humanitar aksiya ailələrin həyatında yeni bir səhifə açdı. Bu ailələrin öz isti ocağı, başı üzərində damı, ürəklərində isə dövlətimizə inamı güvən, qürur hissi alovlandı. İllər boyu arzu etdikləri, onlara möcüzə kimi görünən artıq reallığa çevrildi. Onlar ev sahibləri oldular. Bu insanlar göstərilən diqqət və qayğıya görə Prezident İlham Əliyevə və Mehriban xanım Əliyevaya minnətdardırlar. Heydər Əliyev Fondunun məqsəd və məramının ən başlıcası insan amilidir. Çünki ehtiyacı olana kömək etmək, kimsəsizə arxa olmaq Azərbaycan xalqının bəşəri əxlaqi keyfiyyətlərindəndir. Fond bu kimi milli-mənəvi dəyərlərimizi qoruyaraq Salyan şəhər 1 saylı məktəb-liseyin müəllimi Şahin Zərbəliyevə oğlunun böyrəyinin əməliyyat olunması üçün, Noxudlu kənd sakini Şirqasım Ağayevə oğlunun ilkin müayinəsi üçün yardım etmişdir. Atasını itirmiş bir tələbənin təhsil haqqını, I qrup Qarabağ müharibəsi əlili Cəmaləddin Quliyevin iki qızının illik təhsil haqlarını və aylıq təqaüdlərini Heydər Əliyev Fondu öz üzərinə götürmüşdür. Heydər Əliyev Fondu artıq 10 ildir ki, fəaliyyət göstərir. Azərbaycan xalqının milli-mənəvi irsinin qorunub saxlanılması, Azərbaycanı dünyaya tanıtmaq, xeyriyyəçilik və xeyirxahlıq missiyası fondun öz dövlətinə, xalqına verdiyi dəyərli töhfələrdir. Fonda rəhbərlik edən, ölkənin ictimai həyatında xüsusi fəaliyyəti ilə seçilən ISESCO və UNESCO-nun xoşməramlı səfiri adlarını ləyaqətlə daşıyan, təkcə statusuna görə deyil, real əməli ilə də ölkəmizin birinci xanımı olduğunu sübuta yetirən Mehriban Əliyeva müasir Azərbaycan qadınının ən yüksək keyfiyyətlərini özündə layiqincə təcəssüm etdirir.

Hər bir salyanlı Heydər Əliyev Fondunun fəaliyyətini böyük diqqət və maraq hissi ilə izləyir və hər birimiz bu qənaətdəyik ki, Heydər Əliyev Fondu genişmiqyaslı fəaliyyəti ilə Azərbaycanın sosial-iqtisadi, mədəni tərəqqisinə böyük töhfələr verir.

Bəxtiyar SADIQOV:

- Azərbaycan ərazilərinin qədim yaşayış məskəni olduğu tarixi araşdırmalarla təsdiq edilib. Lakin tarixi tam öyrənmək mümkün deyil. Ölkə rəhbərliyinin diqqəti və təşəbbüsü ilə müxtəlif yerlərdə aparılan arxeoloji tədqiqatlar nəticəsində yeni tarixi faktların ortaya çıxması Azərbaycanın dünyanın qədim yaşayış məskənlərindən biri olduğunu bir daha sübut edib. Son illərdə aparılan tarixi araşdırmalar Salyanla da bağlı yeni tarixi faktları ortaya çıxarıb. Bu barədə danışmaq üçün söz AMEA-nın Arxeologiya və Etnoqrafiya İnstitutunun şöbə müdiri, Salyan arxeoloji ekspedisiyasının rəisi, tarix üzrə elmlər doktoru, professor Arif Məmmədova verilir.

Arif MƏMMƏDOV:

- Azərbaycanın cənub-şərq bölgəsinin qədim tarixinin və mədəniyyətinin hərtərəfli şəkildə öyrənilməsində Salyan rayonunda aparılan arxeoloji qazıntıların əhəmiyyəti böyükdür. Bu baxımdan Azərbaycan Milli Elmlər Akademiyası Arxeologiya və Etnoqrafiya İnstitutu əməkdaşlarının Salyan rayonunda apardıqları arxeoloji qazıntılar diqqəti cəlb edir.

Məlum olduğu kimi, Ələt-Masallı magistral yolunun çəkilişi ilə əlaqədar Babazanlı karxanasında torpaq işləri görülərkən qədim qəbiristanlıq və ona müvafiq yaşayış yeri aşkarlanıb. Salyan arxeoloji ekspedisiyası da məhz bu tapıntılarla əlaqədar Salyan Rayon İcra Hakimiyyətinin instituta ünvanladığı məktub əsasında yaradılmışdı. Arxeoloji qazıntıların nəticələri bu bölgənin Azərbaycanda ən qədim əkinçi-maldar tayfalarının məskunlaşdığı mədəniyyət ocaqlarından biri olduğunu sübut edir. Bunun əsas səbəbi Kür çayının bu ərazidən keçməsi və insanların ilk məşğuliyyətləri içərisində balıqçılığın xüsusi yer tutmasıdır.

Tarixi mənbələrə əsasən Azərbaycanda orta əsrlərdə Muğan adlı şəhərin mövcud olduğu bildirilir. Orta əsr ərəb tarixçiləri bu şəhərin Xəzər sahilində, iki çay arasında, Ərdəbildən iki günlük məsafədə yerləşdiyini, gözəlliyini və əhalisinin də qonaqpərvər olduğunu qeyd edirlər. Şəhərin XIII əsrdə monqol yürüşləri, XV əsrdə Teymuri sultanı Əbu Səidlə Ağqoyunlu Uzun Həsən arasında baş verən döyüşlər zamanı dağıdıldığı bildirilir. Arxeoloji qazıntıların nəticələri Muğan adlı şəhərin VII əsrdən sonra yarandığını söyləməyə əsas verir. Antik dövr müəlliflərindən Patroklun, Pompeyin sərkərdələrindən olan Mark Terensi Varronun, Strabonun, IX əsr ərəb tarixçisi Əbdülqasımın, sonrakı dövrlərdə əl-Məsudi, əl-İstəxri, əl-Bəlxi və digərlərinin əsərlərində Salyan bölgəsinin də daxil olduğu Kürətrafı ərazilər haqqında geniş məlumatlar verilir. Bu məlumatlar Kür çayının bölgənin həyatındakı rolu, onun gəmiçilik üçün yararlı olması, həm də bölgəyə yadelli hücumları haqqında məlumatlar verir. Belə ki, Kür Salyan ərazisinə çatdıqda sakit axdığından həm balıqçılığın və gəmiçiliyin inkişafına, həm də torpaqların suvarılmasına əlverişli imkan yaradırdı. Dərbənddən Ərdəbilə, Tiflisə və Bərdəyə doğru istiqamətlənən quru yolları isə Salyanın beynəlxalq ticarətdəki rolunu daha da artırırdı.

Əhalinin bu bölgədə məskunlaşması həm də torpağın məhsuldarlığının yüksək olması ilə əlaqədardır. Bu baxımdan Muğan bölgəsini, Nil sahillərində ildə üç dəfə məhsul verən Misir torpaqları ilə müqayisə etmək olar. Nəzərə alsaq ki, məhz bu xüsusiyyətinə görə Misir dünyada ilk dövlətlərin təşəkkül tapdığı ərazidir, bu mənada Muğan, o cümlədən Salyan bölgəsində insanların qədimdən məskunlaşdığını söyləyə bilərik. Paxomovun e.ə. IV əsrə aid etdiyi Makedoniyalı İsgəndərin, eləcə də Parfiya, Sasani, ərəb, səlcuq, monqol, Atabəy, Şirvanşah, Qaraqoyunlu və Ağqoyunlu hökmdarlarının adına kəsilmiş pulların Muğan bölgəsindən tapılması da ərazinin qədim tarixindən xəbər verməklə yanaşı, həm də bölgədə yaşayışın ardıcıl olaraq davam etdiyini, maddi mədəniyyətdəki varisliyi göstərən amillərdəndir.

Salyanın qədim tarixindən xəbər verən Muğan mədəniyyəti abidələri Cənubi Qafqazda ilkin tayfa birliklərinin yarandığı dövrlərdə (6000-2700 il bundan əvvəllər) Azərbaycanda gedən sosial-iqtisadi prosesləri, ilkin dövlətçilik qurumlarının yaranmasında Salyanın özünəməxsus rolunu, Muğan tayfalarının qonşu Şirvan, Mil-Qarabağ, Naxçıvan, Urmiya, Ön Asiya və Yaxın Şərq dövlətləri ilə iqtisadi, mədəni əlaqələrini, eləcə də Xəzər dənizinin cənub-qərb sahili boyunca uzanıb Mazandaran, Ərdəbil istiqamətində Azərbaycanın cənub ərazilərində yüksək mədəniyyətə sahib olan tayfalarla əlaqələrini araşdırıb tədqiq etmək üçün yeganə maddi qaynaqlardır. Muğanın qədim türk mənşəli oturaq, əkinçi, maldar və sənətkar əhalisi bütövlükdə Qafqazın Cənubla əlaqələndirilməsində çox əhəmiyyətli mövqe tutub.

Salyan rayonunda arxeoloji tədqiqatlar 2001-ci ildə Nəcəf Müseyiblinin rəhbərliyi ilə Qırxçıraqda, 1970-ci ildə isə V.A.Kvaçidzenin rəhbərliyi ilə Xəzər dənizinin suları altında qalmış I Bəndovan, II Bəndovan kimi orta əsr şəhərlərində davam etdirilib. Salyan arxeoloji ekspedisiyasının fəaliyyəti nəticəsində e.ə. VIII-VII əsrlərdən başlayaraq son orta əsrlərə qədər bütün mərhələləri, təqribən 2800 illik dövrü əhatə edən arxeoloji abidələr tədqiqatlara cəlb edilib.

Arxeoloji tədqiqatların nəticələri e.ə. VIII-VII əsrlərə aid Muğan mədəniyyətinin mərkəzinin məhz Salyan bölgəsi olduğunu söyləməyə əsas verir. Babazanlıda qədim qəbiristanlıqda və ona müvafiq yaşayış yerində aparılan arxeoloji tədqiqatlar bölgənin tarixinə dair yeni faktları üzə çıxarmağa imkan yaradır. Daha qədim dövrü əhatə edən Noxudlu kurqanlarında aparılan ilkin müşahidələr isə yerin şoran olması ilə əlaqədar kurqanların çökməsi faktını aşkarlamağa imkan verir. Babazanlı yaşayış yerində küp qəbirlər və onlara aid yaşayış məskənlərinin eyni ərazidə qeydə alınması Azərbaycan arxeologiyasında mühüm yeniliklərdəndir. Məhz ilk dəfə Salyan qazıntıları əsasında bölgənin antik və ilk orta əsrlər dövrü əhalisinin təsərrüfatı, həyat tərzi, məişəti barədə geniş məlumatlar əldə edilib. Qəbir abidələri əsasında bölgənin qədim və ilk orta əsrlər dövrünün dəfn adətləri öyrənilib. Tədqiqatlar göstərir ki, Babazanlıda küp hazırlayan sexlər fəaliyyət göstərib. Gilli torpağın, su ehtiyatının və yanacaq materiallarının bolluğu bu sənətin inkişafına şərait yaradıb. Tədqiqatlar Salyanda ilk insan məskənlərinin küp qəbirlərdə dəfnetmə adətindən çox əvvəl, ən azı e.ə. II minilliyin ortalarından yarandığını söyləməyə də əsas verir.

Salyan rayonunda tapılmış küp qəbirlərdən əldə olunmuş maddi-mədəniyyət qalıqlarının müqayisəli təhlili onların Cənub bölgəsindəki qəbirlərdən daha qədim olduğunu söyləməyə əsas verir. Babazanlı küp qəbirləri şimal rayonlarından tapılan eyni tip qəbirlərdən də qədimdir. Böyüklər üçün olan qəbir küplərinin bəzilərinin dibinə yaxın hissədə kiçik deşiklər açılıb. Əksər küplərin baş hissəsi qismən yuxarıya doğru basdırılıb. Nisbətən kök adamların küpə yerləşdirilməsi üçün onun ağız hissəsi xüsusi alətlər vasitəsilə sındırılıb və ölü yerləşdirildikdən sonra həmin hissə yerinə qoyulub. Ağzı çox kiçik olan küplərdə ölünün yerləşdirilməsi üçün küpün dib hissəsi sındırılıb. Bu halda skeletin ayağının küpün ağız hissəsinə doğru olduğu görünür. Qəbir küplərinin bəzilərinin üzərindəki dini inanclarla bağlı təsvirlər qədim türklərdəki şamançılıq adətini xatırladır və bu, şər qüvvələrin qəbirdən uzaqlaşdırılması ilə bağlı ola bilər. Küplərin ağız hissəsinə yaxın yerdə tapılan kömür qalıqları pis ruhları qovmaq və s. məqsədilə burada tonqal qalandığını söyləməyə əsas verir. Yanlarındakı əşyalara əsasən Salyandan tapılmış qəbir küplərini iki dövrə bölmək olar. Qədim qəbir küplərinin yanına lüləli, sonrakıların yanına isə ağzı əyməli qablar qoyulub. Salyan rayonundakı qəbir küplərindən, əsasən, metal silahlar, möhürlər, muncuqlar, asmalar, sırğalar, üzüklər və s. tapılıb.

Salyan arxeoloji ekspedisiyasının Qırxçıraq yaşayış yerində apardığı arxeoloji tədqiqatlar isə ərazinin əsasının Qazan xan tərəfindən qoyulmuş Mahmudabad şəhərinin qalıqları olduğunu bir daha təsdiqləyib. Şəhərin yüksək sürətli inkişafında ticarət karvan yollarının qovşağında yerləşməsinin mühüm əhəmiyyət kəsb etdiyi qənaətinə gəlinib. Çıxdaşlara və dulus kürələrinin izlərinə əsasən Qırxçıraqdan əldə edilən arxeoloji materialların yerli şəraitdə istehsal olunduğu bildirilib. Maddi mədəniyyətdəki varislik həm də bölgə əhalisinin yekcins olduğu fikrini təsdiqləyib.

Salyanda aparılan elmi tədqiqatlara yüksək qiymət verilməsi arxeologiya elminə xüsusi dövlət qayğısının təzahürüdür. 2013-cü il dekabrın 29-da respublika Prezidenti İlham Əliyevin sərəncamına əsasən Muğan-Babazanlı küp qəbirlər nekropolunun 2800 illik yubileyi ilə əlaqədar tədbirlər planının hazırlanmasına dair verilən göstərişlər də bu qayğının nəticəsidir.

"Dəyirmi masa"ya yekun vuran Bəxtiyar SADIQOV dedi:

- Prezident İlham Əliyevin rəhbərliyi ilə ölkəmizdə bütün sahələrdə aparılan uğurlu islahatlar, əldə olunan nəticələr getdiyimiz yolun ən düzgün və alternativinin olmadığını göstərir. Siyasi və iqtisadi baxımdan sabit, davamlı və dayanıqlı inkişaf edən Azərbaycanın bugünkü nailiyyətləri Heydər Əliyev siyasi kursunun və bu kursun Prezident İlham Əliyev tərəfindən uğurla, qətiyyətlə davam etdirilməsinin məntiqi nəticəsidir. Bu inkişaf kursu Azərbaycanı daha böyük zəfərlərə, möhtəşəm qələbələrə aparır. Ümummilli lider Heydər Əliyevin anadan olmasının 91-ci ildönümünə və Heydər Əliyev Fondunun 10 illik yubileyinə həsr olunmuş təntənəli mərasimdə Prezident İlham Əliyev bu barədə deyib: "Bu gün Azərbaycan inamla, uğurla inkişaf edir. Biz Heydər Əliyevin davamçıları onun siyasi xəttinə sadiqik. Son on il ərzində Azərbaycan bu yolla gedir, Heydər Əliyevin siyasi vəsiyyətinə sadiqdir və ölkəmizin bugünkü reallıqları, bugünkü vəziyyəti bu yolun nə qədər düzgün olmasını əyani şəkildə sübut edir".

Bu siyasətin uğurla həyata keçirilməsi nəticəsində müstəqil Azərbaycan dövlətinin dünyadakı nüfuzu artır, iqtisadi potensialı güclənir. Hazırda isə qarşıda duran ən başlıca məqsədlərdən biri, Prezident İlham Əliyevin bəyan etdiyi kimi, Azərbaycanı inkişaf etmiş dövlətlər səviyyəsinə çatdırmaqdır. Bu məqsədə çatmaq üçün dövlət başçısının fərmanı ilə ixracyönümlü iqtisadiyyata transformasiya və insan inkişafı konsepsiyası əsas götürülməklə sosial-iqtisadi sahələrin inkişafına kompleks yanaşma prinsiplərini özündə əks etdirən "Azərbaycan 2020: gələcəyə baxış" İnkişaf Konsepsiyası təsdiq edildi. Bu konsepsiya Azərbaycanın gələcək inkişaf perspektivlərini dərin elmi əsaslarla müəyyənləşdirən konseptual əhəmiyyətli sənəddir. Hazırda konsepsiyada müəyyən edilmiş hədəflərin reallaşdırılması ilə bağlı ardıcıl və zəruri tədbirlər həyata keçirilir ki, bu da növbəti illərdə ölkəmizin davamlı inkişafını, onun dünyada mövqeyinin daha da möhkəmlənməsini və xalqımızın sosial-iqtisadi vəziyyətinin daha da yaxşılaşmasını təmin edəcək.

Təbii ki, Salyan ictimaiyyəti də Prezident İlham Əliyevin ayrı-ayrı proqramlar üzrə qarşıya qoyduğu məqsədlərin uğurla reallaşmasında fəal iştirak edəcək və üzərlərinə düşən vəzifələri layiqincə yerinə yetirəcəklər. Bu işdə hər birinizə uğurlar arzulayırıq.

Azərbaycan.-2014.- 31 may.- S.4-5.