“Bakı Beynəlxalq Caz
Festivalı – 2014” başa çatıb
“Bakı
Beynəlxalq Caz Festivalı – 2014” başa çatıb.
AzərTAc
xəbər verir ki, festival çərçivəsində
sonuncu konserti Bakı Caz Mərkəzində Arslan Növrəsli
və qrupu təqdim edib.
Arslan
Növrəsli tarda muğam ilə cazın sintezini edən,
eyni zamanda tarda caz kompozisiyaları, klassik ənənəvi caz
üslublu əsərlər, ənənəvi pop janrlı
nümunələr ifa edən ilk tar
ifaçısıdır.
Konsertdən
əvvəl müsahibə verən Arslan Növrəsli
Bülbül adına orta ixtisas musiqi məktəbini və Azərbaycan
Milli Konservatoriyasını bitirdiyini söyləyib. Bildirib ki,
hazırda Milli Konservatoriyanın müəllimidir. İfa
etdiyi musiqidə bütün janrlardan istifadə etməyə
çalışır.
A.Növrəsli konsertdə 6 kompozisiya təqdim edib. Onların sırasında Mayls Deyvisin “Solar”, Şahin Növrəslinin “Əlində sazın qurbanı”, Dizzy Gillespi və Frank Paparellinin: “A night in Tunisia”, Rafiq Babayevin “Freska” musiqiləri yer alıb. Tar ifaçısı, həmçinin özünün “Blues” əsəri və “Dədə Qorqud” bədii filmindən “Yallı” musiqisi əsasında improvizasiyasını təqdim edib. Bütün bu kompozisiyalar ilk dəfə səslənib.
“The first time in jazz” adlı konsertdə Arslan Növrəslini (tar), Etibar Əsədov (piano), Ruslan Hüseynov (bass), Elvin Bəşirov (zərb) və Xalid Babayev (bonq) müşayiət edib. Yeni formada - tarda ilk dəfə sırf caz janrında ifa olunan kompozisiyalar musiqisevərlərə xoş anlar bəxş edib.
Bununla da Bakıda keçirilən daha bir Beynəlxalq Caz Festivalı tarixə qovuşub.
Qeyd edək ki,
“Bakı Beynəlxalq Caz Festivalı – 2014”
Mədəniyyət və Turizm Nazirliyinin və Azərbaycan Mədəniyyət
Fondunun birgə təşkilatçılığı
ilə baş tutub.
Azərbaycan.-2014.- 1 noyabr.- S. 8.