Azərbaycan və Türkiyə xalqları bir-birinin

mədəniyyətini daha yaxından öyrənirlər

Noyabrın 23-də Azərbaycanın mədəniyyət və turizm naziri Əbülfəs Qarayevin türkiyəli həmkarı Ömər Çelikin başçılıq etdiyi nümayəndə heyəti ilə görüşündə ölkələrimiz arasında mədəniyyət sahəsində əməkdaşlığın inkişaf etdirilməsi ilə bağlı müzakirələr aparılıb.

AzərTAc xəbər verir ki, Əbülfəs Qarayev ötən il Türkiyənin üç şəhərində keçirilmiş Azərbaycan Mədəniyyəti Günlərinin mədəniyyətimizə və incəsənətimizə böyük maraq doğurduğunu söyləyib. Nazir ümidvar olduğunu bildirib ki, Azərbaycanda ilk dəfə keçirilən Türkiyə Mədəniyyəti Günləri də əlamətdar hadisəyə çevriləcək, ölkələrimiz arasında mədəni əlaqələrin inkişafına təkan verəcək. Bu həm də Türkiyə mədəniyyəti ilə daha yaxından tanışlıq üçün böyük əhəmiyyət kəsb edir.

Bodrumda türkiyəli nazirlə keçirdiyi görüşü xatırladan Ə.Qarayev mədəniyyətin və turizmin inkişafına, birgə layihələrin həyata keçirilməsinə dair aparılan fikir mübadiləsinin, imzalanan bir çox sənədlərin önəmini qeyd edib. O, hər iki tərəfdən turistlərin sayının ildən-ilə artdığını, bir neçə birgə layihənin həyata keçirilməsinə başlandığını diqqətə çatdırıb.

Türkiyənin mədəniyyət və turizm naziri Ömər Çelik deyib: “Biz qardaş Azərbaycanda özümüzü evimizdəki kimi hiss edirik. Bizim dilimiz, dinimiz, tariximiz birdir, gələcəyə ümumi baxışlarımız var. Demək olar ki, ümumi razılığa gələ bilmədiyimiz heç bir məsələ yoxdur. Biz öz irsimizi hər zaman dəyərləndirməli, qardaşlıq əlaqələrimizi daha da dərinləşdirməliyik”.

Türkiyəli nazir hər iki ölkədə keçirilən mədəniyyət günlərinin qardaş xalqlarımızın bir-birinin mədəniyyətini daha yaxından öyrənmələri baxımından önəmini vurğulayıb.

Görüşdə Türkiyənin Azərbaycandakı səfiri İsmail Alper Coşkun da iştirak edib.

Azərbaycan.-2014.- 25 noyabr.- S.4.