Xəzərdə beynəlxalq əməkdaşlıq
yeni mərhələdə
"Cənub"
qaz dəhlizi Avropanın enerji xəritəsini dəyişdirəcək
Xəzər dənizi tarix boyu qapalı hövzə olub. Dənizin sahillərində yaranmış dövlətlər heç vaxt onun sərvətlərindən birgə istifadə barədə düşünməyib. Neft erası başlayandan, dənizdə karbohidrogen ehtiyatları kəşf edildikdən sonra da Xəzərin qapıları dünyanın üzünə bağlı qalmışdı. Müasir tarixdə dənizin sahibi cəmi iki dövlət - keçmiş SSRİ və İran idi. Əslində isə hövzə mövcud coğrafi reallığa və ikitərəfli sazişlərə görə daha çox birincinin nəzarətində idi.
Sovet imperiyasının süqutundan sonra Xəzərin
"bəxt"i açıldı. Dəniz daha iki ölkənin deyil, həm
də yeni müstəqil dövlətlərin, o cümlədən
Azərbaycanın da oldu. Xəzərin
karbohidrogen ehtiyatlarını istismar edən və bu sahədə
təcrübəsi olan yeganə dövlət isə Azərbaycan
idi. Ölkəmizdə dənizin dibindən
neft hələ 1949-cu ildən çıxarılırdı.
Hövzənin karbohidrogen ehtiyatlarının əksər
hissəsi dəniz yataqlarında kəşf edilmişdi.
Gənc dövlətin təşəkkül
tapması, milli iqtisadiyyatın möhkəmlənməsi
birbaşa neft sənayesinin inkişafından asılı idi.
Beləliklə, neft adi məhsul, yanacaq deyil, Azərbaycanın
tale məsələsi idi.
Lakin Azərbaycan neftinin gələcəyi xeyli maneələrlə
qarşılaşmışdı. Ölkəmiz müstəqillik
yoluna çıxar-çıxmaz xarici hərbi təcavüzə
məruz qalmışdı. Üstəlik,
ümummilli böhran cəmiyyət həyatının
bütün sahələrini bürümüşdü.
Eyni zamanda, iri regional dövlətlər yeni
tarixi şəraitdə hər şeydən əvvəl Xəzərin
beynəlxalq hüquqi statusunun müəyyənləşdirilməsinin
zəruriliyi məsələsini qaldırır və dənizin
Azərbaycana aid sektorunda xarici şirkətlərin
iştirakı ilə neft hasilatına başlamağa mane
olurdu.
Təcrübəli dövlət xadimi Heydər
Əliyevin hakimiyyətə qayıdışı ilə vəziyyət
tamamilə dəyişdi. Milli iqtisadiyyatın
lokomotivi olan neft sənayesinin potensialını
reallaşdırmaq, nəticə etibarilə ölkəni
düşdüyü iqtisadi böhrandan çıxarmaq
üçün çoxistiqamətli tədbirlər
görüldü. Prezident Heydər
Əliyevin siyasi-diplomatik səyləri ilə düyün
çözüldü. 1994-cü il sentyabrın 20-də
dünyanın altı ölkəsini təmsil edən 11 neft
şirkəti ilə ARDNŞ arasında Xəzərin Azərbaycan
sektorunda "Azəri", "Çıraq" və
"Günəşli" yataqlarının birgə
istismarı haqqında müqavilə - "Əsrin müqaviləsi"
imzalandı. Beləliklə, Xəzər dənizində
ilk dəfə olaraq beynəlxalq əməkdaşlıq
prosesi başladı. Bu, Azərbaycan
tarixində dönüş nöqtəsi idi.
Sonrakı illərdə Xəzər neftini dünya
bazarına nəql etmək üçün kəmərlər
şəbəkəsi yaradıldı, Bakı-Supsa və
Bakı-Tbilisi-Ceyhan kəmərləri işə
düşdü. Beləliklə, Xəzər Qara dəniz
və Aralıq dənizi ilə birləşdirildi, sabit ixrac
marşrutu müəyyənləşdi, Azərbaycanın
dünya iqtisadiyyatına inteqrasiyasında mühüm
addım atıldı.
Eyni
zamanda Azərbaycanın təbii qaz ehtiyatlarını istismar
etmək üçün iş başladı. Hələ
1996-cı ildə "Şahdəniz" qaz-kondensat
yatağı üzrə saziş imzalandı. Ehtiyatı 1 trilyon kubmetrdən çox olan bu yataq gələcəkdə
"Cənub" qaz dəhlizinin resurs mənbəyi
olacaqdı. 2007-ci ildə
Bakı-Tbilisi-Ərzurum qaz kəmərinin inşası ilə
dəhlizin birinci hissəsi istifadəyə verildi. Bununla Azərbaycan dünya bazarında qaz
ixracatçısı kimi tanınmağa başladı.
Qarşıda duran əsas vəzifə isə "Cənub"
qaz dəhlizinin genişləndirilməsi, "Şahdəniz"
yatağının ikinci mərhələsinin istismarı və
nəticə etibarilə Azərbaycan qazının Avropa
bazarına çıxarılması idi.
2012-ci ildə Azərbaycan və Türkiyə hökumətləri
arasında Trans-Anadolu təbii qaz boru kəməri (TANAP) sisteminə dair
saziş imzalandı. TANAP-ın davamı olaraq təbii
qazı Avropaya çatdıracaq kəmər - Trans-Adriatik boru
kəməri (TAP) əsas ixrac marşrutu kimi seçildi.
Beləcə, "Cənub" qaz dəhlizi
formalaşması üçün müqavilə bazası
yarandı.
Ötən
ayın 20-də isə daha bir tarixi hadisə baş verdi: tammiqyaslı "Cənub" qaz dəhlizinin
təməli qoyuldu. Bu, milli iqtisadiyyatın
inkişafı və şaxələndirilməsi naminə
indiyədək görülmüş işlərin yekunu, Azərbaycanın
yeni neft strategiyasının təntənəsi idi.
"Cənub"
qaz dəhlizi adi
layihə deyil. "Əsrin müqaviləsi" XX əsrin
layihəsi olduğu kimi, "Cənub" qaz dəhlizi də XXI yüzilliyin layihəsidir.
Yeni layihəyə 45 milyard dollar investisiya
qoyulacaq. Boru kəməri sistemi 3600
kilometrlik məsafə qət edərək Xəzər dənizini
Avropanın mərkəzi ilə birləşdirəcək.
İndiyədək Azərbaycanın neft-qaz
layihələrində cəmi üç ölkə - Azərbaycan,
Gürcüstan və Türkiyə iştirak edirdi.
Bundan sonra isə iştirakçı ölkələr
çox olacaq, cənub-şərqi Avropanın bir çox
ölkələri - Yunanıstan, Bolqarıstan, Albaniya,
İtaliya, perspektivdə isə Monteneqro, Bosniya, Xorvatiya və
başqaları Xəzərdə başlamış əməkdaşlıq
prosesinə qoşulacaq. Yeni qaz kəmərinin
inşası Xəzər, Qara dəniz və Aralıq dənizi
hövzələrinin ölkələri üçün yeni
imkanlar yaradacaq, geniş bir coğrafiyada regional iqtisadi
inkişafa böyük töhfə verəcək.
Əlavə iş yerləri açılacaq, nəticə
etibarilə yoxsulluğun səviyyəsi azalmış olacaq.
Eyni zamanda "Cənub" qaz dəhlizi xalqların
bir-birinə yaxınlaşması, qarşılıqlı
anlaşmanın dərinləşməsi üçün
vasitə olacaq. Söhbət təkcə qaz kəmərlərinin,
yaxud dəmir yolu xətlərinin inşasından deyil, həm
də çoxtərəfli əməkdaşlıqdan, milli
iqtisadiyyatların birləşməsindən,
bütövlükdə regional inteqrasiyadan gedir. Qarşılıqlı faydalı əməkdaşlıq
isə dostluq şəraitini möhkəmlədən
mühüm amillərdəndir.
Başqa sözlə, XXI əsrin layihəsindən
hamı faydalanacaq. İlk növbədə Azərbaycan karbohidrogen
potensialını reallışdırmaq üçün yeni imkanlar əldə
edir. İndiyədək həyata
keçirilmiş neft-qaz layihələri milli iqtisadiyyatın
möhkəmlənməsi və onun şaxələndirilməsinə
gətirib çıxarmış, formalaşmış maliyyə
ehtiyatları yeni layihələrin icrasına şərait
yaratmışdır. Vaxtilə Azərbaycan
bu və ya digər layihəni reallaşdırmaq
üçün xaricdən kredit alırdısa, indi heç
bir borca ehtiyac yoxdur. Hazırda Azərbaycan "Şahdəniz",
TANAP, TAP və digər layihələrdə öz
payını özü maliyyələşdirir. Azərbaycan həm də kredit verən ölkədir.
Məsələn, region üçün mühüm inkişaf layihəsində
- Bakı-Tbilisi-Qars dəmir
yolunun inşasında Gürcüstan tərəfi
payını maliyyələşdirmək üçün Azərbaycandan
kredit almışdır. "Cənub" qaz dəhlizi ölkəmizin maliyyə
imkanlarını daha da artıracaq, onun dünya
iqtisadiyyatına inteqrasıyasına güclü təkan verəcək.
Öz növbəsində Avropanın Azərbaycanla
energetika sahəsində əməkdaşlığı qitə
ölkələri üçün böyük əhəmiyyət
kəsb edir. Məlum olduğu kimi, Köhnə dünya enerji tələbatını
ödəmək üçün xarici mənbələrə
möhtacdır. Avropa İttifaqı
(Aİ) enerji təhlükəsizliyini təmin etmək
üçün yollar axtarır. İlk
növbədə təbii qaz təchizatı xüsusi əhəmiyyət
kəsb edir. Doğrudur, Avropa ölkələri
müxtəlif mənbələrdən qaz idxal edir. Amma enerjidən asılılıq qitənin ən zəif,
həssas tərəfi olaraq qalır. Avropanın,
demək olar ki, bütün ölkələri, Rusiya
qazından asılıdır.
Hazırda Almaniya kimi iqtisadi nəhəngin
Rusiyadan qaz asılılıgı 38 faiz təşkil edir.
Bir sıra digər ölkələr
üçün bu asılılıq 100 faizə
çatır. Qitə ölkələri cəmi
bir kəmərdən qaz alır və hələlik alternativ
mövcud deyil. Alternativsizlik isə Avropaya
baha başa gəlir. 2009-cu ildə Ukrayna
ilə Rusiya arasında baş vermiş qaz böhranı qitə
ölkələrinin iqtisadiyyatına ağır zərbə
vurdu və bir daha göstərdi ki, enerji təchizatının
şaxələndirilməsi həyati əhəmiyyət
daşıyır. Odur ki, bu problem Aİ-nin gündəliyində ən
başlıca məsələyə çevrilmişdir. Bu mənada
Bolqarıstan Prezidenti Rosen Plevneliyevin "Cənub" qaz dəhlizinin
təməlqoyma mərasimində dediyi sözlər ibrətamizdir: "Avropaya yenidən heç bir xəbərdarlıq
lazım deyil, biz artıq dərslərimizi öyrənmişik".
Avropa
enerji təhlükəsizliyini təmin etmək məqsədilə
müxtəlif
yollar axtarır. Alternativlərdən biri maye qaz
idxalını artırmaq ola bilər. Lakin
bu elə də cəlbedici deyil: maye qaz "kəmər
qazı"ndan təxminən 30 faiz bahadır. Başqa
bir variant daxili hasilatı (qitə təbii qaz
ehtiyacının 30 faizini özü ödəyir)
artırmaqdır. Bunun üçün
şist qazı yataqlarının istismarına başlamaq olar.
Qitənin şist qazı ehtiyatları təqribən
600 trilyon kubmetrdir. Avropa bu potensialdan istifadə
etmir, çünki şist süxurlarından qaz hasilatı
zamanı tətbiq edilən hidropartlayış metodu ciddi
ekoloji problemlərə, xüsusilə qrunt sularının
çırklənməsinə gətirib çıxara bilər.
Ona görə də Avropaya yeni qaz kəmərlərinin
çəkilişi prioritet məsələ olaraq önə
çıxır.
Xəzər hövzəsinin, ilk növbədə Azərbaycanın təbii qaz ehtiyatları çoxdandır Avropada xüsusi maraq doğurur. Avropalı siyasətçılərin fikrincə, yenicə təməli qoyulmuş "Cənub" qaz dəhlizi qitəni asılılıqdan azad edəcək. Avropa Komissiyasının sədri Joze Manuel Barrozu hesab edir ki, bu layihə yalnız kəmər deyil, XXI əsrin mühüm strateji, enerji dəhlizidir. Bu, sözün əsl mənasında, geostrateji layihə olacaq.
Dünyada enerji mənbələri çoxdur. Avropa ya bu mənbələrdən uzaqdır, ya da enerji təchizatı marşrutları iqtisadi baxımdan sərfəli, yaxud təhlükəsiz deyil. Azərbaycan isə avropalı enerji istehlakçıların istəklərinə, ilk növbədə etibarlı təchizata və ədalətli qiymətlərin təklif edilməsinə cavab verir.
Beləliklə, "Cənub" qaz dəhlizi üçün yol açıldı. Prezident İlham Əliyevin vurğuladığı kimi, bu layihə Avropanın enerji xəritəsini dəyişdirəcək. Layihənin təməlqoyma mərasiminin iştirakçıları bu fikri dönə-dönə təkrarladılar. Çünki söhbət qitənin gələcək taleyindən - enerji təhlükəsizliyindən gedir. Enerji təhlükəsizliyi isə əslində hər bir ölkənin milli təhlükəsizlik məsələsidir.
Allahverdi
MEHDİYEV,
Azərbaycan.-2014.- 3 oktyabr.- S.11.