Avropa Şurasının komissarı Azərbaycanda insan hüquqları haqqında məlumatlandırılıb

Azərbaycanda səfərdə olan Avropa Şurasının insan hüquqları üzrə komissarı Nils Mujniyeks ombudsman Elmira Süleymanova ilə görüşdə ölkəmizdə insan hüquqlarının mövcud vəziyyəti haqqında məlumatlandırılıb.

E.Süleymanova “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”nın icrası istiqamətində görülən işlərdən, ölkənin hər bir rayonunda keçirilən, əhalinin müxtəlif təbəqələrinin, o cümlədən xüsusi qayğıya ehtiyacı olan qrupların problemlərinin həllinə dair müzakirələrin aparıldığı ictimai dinləmələrdən danışıb.

Görüşdə Ombudsman Aparatının əməkdaşları ölkəmizdə qətimkan tədbirlərinin seçilməsi ilə bağlı mövcud qanunvericiliyin tələbləri barədə məlumat verib, İnsan hüquqlarının və əsas azadlıqların müdafiəsi haqqında Avropa Konvensiyasının implementasiyası ilə əlaqədar əhalinin müxtəlif qrupları, o cümlədən saxlanılan və təqsirləndirilən şəxslər üçün maarifləndirmə tədbirlərinin keçirildiyini diqqətə çatdırıblar.

Söhbət zamanı E.Süleymanova Ermənistanın Azərbaycana qarşı hərbi təcavüzü nəticəsində torpaqlarımızın 20 faizinin işğal edildiyini, bir milyondan artıq soydaşımızın öz ölkəsində qaçqın və məcburi köçkünə çevrildiyini, insan hüquqlarının kütləvi şəkildə, kobudcasına pozulduğunu söyləyib. O əlavə edib ki, bir sıra beynəlxalq təşkilatlar bu işğal faktını pisləyən qərar və qətnamələr qəbul etsələr də, həmin sənədlər hələ də yerinə yetirilməyib.

Azərbaycan. - 2014.- 25 oktyabr.- S.4.