Əli Həsənov:
Gənclər siyasəti üzrə I Qlobal
Forumun Bakıda keçirilməsi Azərbaycanın
uğurlu siyasətinin nəticəsidir
Bakıda Gənclər siyasəti
üzrə I Qlobal Forumun keçirilməsi böyük əhəmiyyətə
malikdir.
AzərTAc xəbər verir ki, bu
sözləri Azərbaycan Prezidenti Administrasiyasının
ictimai-siyasi məsələlər şöbəsinin
müdiri Əli Həsənov oktyabrın 28-də Heydər
Əliyev Mərkəzində keçirilən Gənclər
siyasəti üzrə I Qlobal Forumda jurnalistlərə
müsahibəsində deyib.
Tədbirdə dünyanın müxtəlif ölkələrindən gənclər, gənclər təşkilatlarının nümayəndələri, bu sahədə siyasəti həyata keçirən dövlət qurumlarının, akademik dairələrin, QHT-lərin rəhbərlərinin iştirak etdiyini vurğulayan Ə.Həsənov deyib: “Forumda dünya və Azərbaycan gənclərinin problemləri müzakirə olunacaq, yekun sənəd qəbul ediləcək. Tədbirin Bakıda keçirilməsi 20 ildə Azərbaycanda reallaşdırılan davamlı və səmərəli gənclər siyasətinə verilən qiymətin göstəricisidir. Ümummilli lider Heydər Əliyev tərəfindən təməli qoyulmuş gənclər siyasəti bu gün uğurla davam etdirilir. Gənclər siyasətinin həyata keçirilməsində dövlət strukturları ilə yanaşı, gənclərin özləri də yaxından iştirak edirlər”.
Azərbaycanın dünyanın 200-dən artıq dövləti sırasında əhalisinin sayına və ərazisinə görə sonuncu 50 dövlətdən biri olduğunu bildirən Prezident Administrasiyasının rəsmisi vurğulayıb: “Lakin ölkəmiz yürütdüyü siyasətə, inkişafına, gənclərə, ümumiyyətlə, insanlara yaratdığı şəraitə, dünya dövlətləri siyahısındakı iqtisadi, siyasi, sosial inkişaf reytinqlərinə görə ilk 30 dövlət arasındadır. Bu siyasət isə diqqətdən kənarda qala bilməzdi. Bugünkü Forumun keçirilməsini təmin edən əsas amillərdən biri də Azərbaycanda uğurlu siyasət aparılmasıdır. Hesab edirəm ki, Forum Azərbaycan gənclərinin dünya gəncləri sırasına daha sıx inteqrasiyasına dəstək verəcək, gənclər siyasətinin inkişaf etdirilməsində mühüm amilə çevriləcək”.
Forumdan gözləntilərə
gəlincə, Ə.Həsənov qeyd edib ki, Azərbaycan gənclərinin
də iştirakı ilə müasir gəncliyi
düşündürən bütün
sahələr, o cümlədən gənclərin
potensialından, imkanlarından istifadə üzrə dövlətlərin
siyasəti üçün vahid tövsiyələr hazırlanacaq. Bu tövsiyələr Forumda
iştirak edən dövlət
qurumları tərəfindən öz
ölkələrində də istifadə olunacaq.
Həmçinin tədbirdə BMT, AŞPA, UNESCO və digər
beynəlxalq təşkilatların iştirakını nəzərə
alsaq, Forumun qlobal gənclər siyasətinin
formalaşmasına da təsir göstərəcəyini
demək olar.
Azərbaycan.
- 2014.- 29 oktyabr.- S.4.