Naşılıq,
qeyri-peşəkarlıq,
yoxsa düşmənə
xidmət
"Bu gün Azərbaycanın uğurlu inkişafını heç də hər kəs qəbul etmir. Ölkə daxilində də milli satqınlar var ki, onlar xarici antiazərbaycan dairələrinə öz vicdanını satıblar. Xarici dairələr var ki, çalışırlar Azərbaycanda sabitlik pozulsun, inkişaf dayansın, Azərbaycan asılı vəziyyətə düşsün. Biz bunu bilirik. Mən Prezident kimi gündəlik fəaliyyətimdə bu qüvvələrə qarşı açıq mübarizə aparıram. Ona görə də Azərbaycana qarşı mediada qarayaxma, böhtan kampaniyaları aparılır. Bunun səbəbi odur ki, biz müstəqilliyimizi qoruyuruq. Azərbaycan xalqının haqlı tələbini, müstəqil olmaq arzusunu qoruyuruq, qoruyacağıq".
İlham ƏLİYEV
"Unutmaq lazım deyil ki, vəzifəsindən, mövqeyindən, sosial statusundan asılı olmayaraq, hər bir Azərbaycan vətəndaşı vahid amal uğrunda-Azərbaycanın inkişafı, ümummilli problemlərin həlli, dövlət və milli maraqların təmin olunması üçün bütün qüvvəsini səfərbər etməyə və var gücü ilə çalışmağa borcludur."
Akademik Ramiz MEHDİYEV
Cari ilin avqust ayının əvvəllərində cəbhənin Ağdam-Tərtər istiqamətində erməni kəşfiyyat-təxribat qrupları Ermənistan-Azərbaycan dövlət sərhədində və qoşunların təmas xəttində Azərbaycan Silahlı Qüvvələrinin mövqelərinə basqın etdilər. Gərginlik bir neçə gün davam etdi, hər iki tərəfdən itkilər və yaralananlar oldu.
Azərbaycan ordusu və Azərbaycan əsgəri bu sınaqdan mərdliklə, bütün parametrlər üzrə düşməndən üstün olduğunu sübut edən nəticələrlə çıxdı!
Bu təxribatın səbəbi, məqsədi barədə danışmaq fikrində deyilik. Əsas nəticə o oldu ki, artıq Ermənistandan köçüb-qaçanların sayı əhəmiyyətli dərəcədə artıb, Ermənistan əhalisi və cəmiyyəti qorxu və təşvişə düşüb, daha ona rəhbərlik edən "Qarabağ klanı"na və onun siyasətinə inanmır, bunu açıq-aşkar etiraf edənlərin sayı da sürətlə artır!
Məqsədimiz cəbhədə gərginlik davam edən müddətdə Azərbaycan mediasının davranışı, hərbi əməliyyat barədə cəmiyyətə çatdırdığı informasiyalar və onun "keyfiyyəti", elektron və çap KİV-lərinin hərbi sirlərə, dövlət və milli maraqların qorunmasına yanaşması, jurnalist məsuliyyəti və vətənpərvərliyi, habelə peşəkarlıqla bağlı bir sıra məsələlər barədə fikir və mülahizələrimizi hörmətli oxucularla bölüşməkdir.
Əvvəlcədən qeyd edək ki, avqust ayının 29-da Prezident Administrasiyasının rəhbəri, akademik Ramiz Mehdiyevin rəhbərliyi və dövlət orqanlarının informasiya verilməsinə məsul struktur bölmələrinin və kütləvi informasiya vasitələri kapitanlarının iştirakı ilə geniş müşavirə keçirildi. Müşavirədə akademik Ramiz Mehdiyev Azərbaycan Respublikasının informasiya təhlükəsizliyi ilə bağlı bir sıra aktual məsələlər barədə dərin təhlilə və ətraflı araşdırmaya söykənən, dəyərli təkliflər və tövsiyələr irəli sürülən məruzə ilə çıxış etdi. Məruzədə gərginlik davam edən dövrdə bəzi kütləvi informasiya vasitələrinin, xüsusilə internet resurslarının qanunvericiliyin tələblərinə zidd və qeyri-peşəkar fəaliyyəti, media, habelə aidiyyəti dövlət orqanlarının informasiyanın verilməsinə məsul olan struktur bölmələrinin öz funksiyalarını lazimi qaydada yerinə yetirə bilmədiyi tənqid edilərək ciddi iradlar bildirildi.
Köhnə səhvlərin təkrarı
"Azərbaycan xalqı 1990-cı illərin əvvəllərində Dağlıq Qarabağda hərbi əməliyyatlar alovlanan zaman hakimiyyət nümayəndələrinin, ayrı-ayrı "ekspertlərin", kütləvi informasiya vasitələrinin qeyri-peşəkar, qanunlara və milli maraqlara zidd, bəzi hallarda isə bilərəkdən təxribatçı fəaliyyətlərinin hansı ağır fəsadlara səbəb olduğunu unutmayıb. O vaxt məhz cəmiyyətdə hökm sürən xaosun, özbaşınalığın nəticəsi idi ki, bəzən Azərbaycan silahlı birləşmələrinin əməliyyat planı əvvəlcədən qəzet səhifələrində müzakirə olunur, hərbi arsenalın həcmi, texniki göstəriciləri, hərbi hissələrin zəif və ya güclü olduğu mövqelər, düşmənlə üzbəüz dayanmış yaşayış məntəqələrində əhalinin sayı və əhval-ruhiyyəsi dəqiqliklə təsvir edilirdi".
Akademik Ramiz MEHDİYEV
1991-1993-cü illər
Dağlıq Qarabağ uğrunda müharibənin aktiv
fazası idi. Müharibə dövlət səviyyəsində
aparılmadığından, nizami ordu olmadığından və
bu istiqamətdə real addımlar atılmadığından
torpaqlarımızı qarış-qarış, kəndbəkənd
itirirdik. Hakimiyyət uğrunda durmadan davam edən
mübarizə də düşmənlərimizə əlverişli
şərait yaratmışdı. Şübhəsiz,
müdafiə naziri, sonralar vətənə xəyanətə
görə ömürlük həbsə məhkum edilən Rəhim
Qazıyev, Müdafiə Nazirliyinin mətbuat xidmətinin rəhbəri
isə hazırda vətənə xəyanətə və
digər əməllərə görə şübhəli
şəxs qismində həbs edilən Leyla Yunus olan bir
ölkədə hərbi əməliyyatlar zamanı uğur
qazanmaq mümkün deyildi! Digər bir səbəb isə o
dövrdə KİV-lərin düşmən
üçün ən yaxşı "informasiya mənbəyi"nə
çevrilməsi idi. Müharibə və hərbi
əməliyyatlar, özünümüdafiə dəstələrinin
uğur və məğlubiyyətlərinin səbəblərindən
tutmuş insanların düşmən əhatəsindən
çıxarılmasına xidmət edən "gizli
cığırlar"adək hər şey barədə qəzetlər
yazır, televiziya kanalları "əyani reportaj"
verirdi. Hələ guya o dövrdə mətbuata
senzura nəzarəti vardı, üstəlik, Əbülfəz
Elçibəyin fərmanı ilə əlavə hərbi
senzura da yaradılmışdı. Amma bütün hərbi sirr
hesab olunan informasiyalar mətbuat vasitəsilə hamının
ovucunda idi.
Cari ilin
avqustun əvvəllərində cəbhədə yaranan gərginlik
zamanı KİV-lərdə gedən proseslər yenidən həmin
dövrü xatırlatdı. Doğrudur, ötən müddətdə
dövlətin iqtisadi və hərbi qüdrətinin
artmasında, müasir modern ordu quruculuğunda, Müdafiə
Nazirliyinin peşəkar, qətiyyətli və mobil fəaliyyətində
müsbətə doğru qeyri-adi dərəcədə yeniləşmə
baş vermişdi. Həm də yeniliklər təkcə bundan
ibarət deyildi. Mətbuata senzura nəzarəti ləğv
edilmişdi, İTK-nın sürətli inkişafı sayəsində
internet media resursları yaranmış, jurnalistlərin
informasiyanı operativ şəkildə
redaksiyalara çatdırmalarında inqilabi dəyişiklik səviyyəsində
texniki avadanlıqlar meydana gəlmişdi.
Bircə
məsələ dəyişməz
qalmışdı: jurnalistlərin, onların
çalışdıqları elektron və çap
mediası rəhbərlərinin milli maraqları və
sözün məsuliyyətini unutmaları, dövlət və
hərbi sirrin qorunması ilə bağlı qanunvericiliyə əhəmiyyət
verilməməsi!
İnternet media
resurslarında "daha tez" "sensasiyalı",
"böyük ajiotaj doğuracaq" informasiya vermək
uğrunda "yarış-rəqabət"
gedirdi. Hərə cəbhəyə "öz
müxbiri"ni göndərərək "şahid
jurnalist"in dediklərini birbaşa oxucuya
çatdırmağa tələsirdi. Mənbəyi bəlli
olmayan informasiyalar ağına-bozuna baxmadan saytlara qoyulurdu. Nə dövlətin maraqlarının qorunmasına,
nə hərbi sirrin gizli saxlanılmasına, nə də cəbhə
bölgəsindəki kəndlərdə yaşayan əhalinin
psixoloji gərginliyinə mənfi təsir göstərəcək
məqamların ictimailəşdirilməsinə heç bir əhəmiyyət
verilmirdi! İnanmaq olmurdu ki, müharibə gedən
dövlətin mediası bu qədər məsuliyyətsizlik və
milli maraqlara laqeyidlik göstərsin! Amma fakt
faktlığında qalır.
Söz və mətbuat azadlığı,
yoxsa qanunlara hörmətsizlik
"Söhbət konkret olaraq bəzi kütləvi informasiya vasitələrinin, xüsusilə internet informasiya resurslarının Azərbaycan qanunlarının tələblərinə məhəl qoymadan, qeyri-peşəkar, bəzi hallarda isə ermənilərin maraqlarına uyğun fəaliyyətindən, habelə aidiyyətı dövlət orqanlarının informasiyanın verilməsinə məsul olan struktur bölmələrinin yaranmış situasiyada milli maraqlara zidd, qeyri-adekvat davranışından gedir".
Akademik Ramiz MEHDİYEV
Azərbaycanda mətbuat
və söz azadlığı var, kütləvi informasiya
vasitələrinə senzura nəzarəti birdəfəlik ləğv
edilib!
Ancaq, eyni zamanda, Azərbaycanda
dövlət sirrini qoruyan qanun və onun pozulmasına görə
həmin qanunun hüquqi məsuliyyət doğuran müvafiq
maddə və bəndləri də var!
Azərbaycanda
jurnalistlərin azad şəkildə, heç bir məhdudiyyət
qoyulmadan məlumat toplamaq hüququ var!
Ancaq toplanan hansı məlumatlardır,
necə mənbədən əldə edilib, həmin məlumatların
hansıları açıqlana, cəmiyyətə
çatdırıla bilər, bunun da qayda, prinsip və məhdudiyyətləri
də var!
Azərbaycan demokratik,
vətəndaş cəmiyyəti təsisatları
yaradılmış, sabit və daim inkişafda olan gənc,
müstəqil dövlətdir!
Ancaq eyni zamanda Azərbaycan
müharibə vəziyyətində olan, ərazisinin iyirmi
faizi düşmən işğalında qalan, atəşkəs
rejimi hökm sürən və hər zaman müharibənin
alovlana biləcəyi bir ölkədir!
Azərbaycanda
bütün sahələrlə bağlı mətbuat və
söz azadlığı qüvvədədir.
Ancaq
müharibə vəziyyətində olduğumuza görə
orduda, cəbhə bölgəsində, eyni zamanda, atəşkəs
pozularaq hücum-təxribat əməlləri baş verəndə
hadisələrlə bağlı
verilən bütün
informasiyalarda müharibə dövrünün tələbləri
qüvvəyə minir, hər bir informasiyada Müdafiə Nazirliyinin
açıqlamalarına istinad edilməsi zərurətə
çevrilir!
Burada heç bir
özfəaliyyətə yol verilməməlidir!
Burada təsadüfi,
kiminsə ağzından eşidilən xəbərlərin
ictimailəşdirilməsi qəbuledilməzdir!
Burada hərə
öz müxbiri (yaxud yerlərdəki informatorları) şəxsində
"informasiya mənbəyi" yaradaraq
görüb-eşitdiyini dərhal cəmiyyətə
çatdırmalı deyil!
Hətta
bizim "demokratiya etalonu" hesab etdiyimiz dövlətlərdə
də dövləti və hərbi sirlərdən söhbət
gedən zaman mətbuat və söz azadlığı
qatlanaraq bir kənara qoyulur (ABŞ-ın Küveyt, İraq və
Əfqanıstan müharibələri zamanı yeritdiyi
informasiya siyasətini yada salın), bunu pozanlar isə ciddi şəkildə cəzalandırılır,
təqib edilir!
Jurnalistikanı
özünə peşə seçən hər bir jurnalist bu
sahədəki mövcud qanunvericiliyi diqqətlə öyrənməyə,
ona hörmətlə yanaşaraq dəqiq əməl etməyə
borcludur!
Hər bir Azərbaycan
vətəndaşının, o cümlədən hər bir
jurnalistin təkcə hüquqları yox, həm də qanunla
yerinə yetirməyə borclu olduğu vəzifələri də
var!
Redaktor həm
də "senzor"dur!
"Müasir
dövrdə vahid informasiya məkanının mövcud
olduğu şəraitdə medianın ən mühüm
funksiyalarından biri də milli maraqları hər şeydən
üstün tutmaq, vətəndaşları, cəmiyyəti
vahid məqsəd uğrunda səfərbər etməkdir.
KİV-lər Azərbaycanın konstitusiya quruluşu, ərazi
bütövlüyü, Ermənistan-Azərbaycan,
Dağlıq Qarabağ münaqişəsi, milli təhlükəsizlik
və digər bu kimi məsələlərdə kifayət qədər
həssas davranmalı, cəmiyyətə milli təəssübkeşliyin
nümunəsini təqdim etməli, onun obyektiv və operativ
informasiya ehtiyacını ödəmək missiyasını
milli maraqlarla uzlaşdırmalıdırlar. Vətənpərvərlik,
milli dövlətçiliyə sədaqət, milli maraqlar
uğrunda prinsipiallıq KİV-lərin fəaliyyətinin
başlıca elementlərini təşkil etməlidir".
Akademik Ramiz MEHDİYEV
Adətən yay aylarında, xüsusən
iyul və avqustda ictimai-siyasi həyatda bir sönüklük
müşahidə olunur. Bu da təbii
sayılır. Çünki həmin
dövrdə ölkə parlamentində yay tətili
başlayır, ictimai-siyasi xadimlər istirahətə
yollanır, yerli və beynəlxalq tədbirlərin
keçirilməsində fasilə yaranır. Müsahib və tədbir qıtlığı
kütləvi informasiya vasitələrini gərgin duruma
salır. Qəzetlər səhifələrinin
sayını azaldır, elektron media "maraqlı xəbərlər",
"ulduzların yay istirahəti" xəbərləri ilə
vəziyyətdən çıxmağa
çalışırlar. Bu dövrdə ictimai əhəmiyyət
kəsb etməyən xəbərlərin KİV-lərə
yol tapması, bir-birindən "köçürmə",
istifadə, eyni mövzuda dönə-dönə təkrar
xarakterli informasiyalar verilməsi ən çox müşahidə
olunan haldır. Redaksiyalarda (çap və
elektron) qeyri-peşəkarların üstünlük təşkil
etdiyi bir vaxtda "qıtlıq dövrü"nün "gərgin"
keçəcəyi şübhə doğurmur. Cəbhə bölgəsində atəşkəsin
pozulmasının avqust ayına təsadüf etməsi də
mətbuatın hərbi mövzuya daha çox diqqət yetirməsinin
səbəblərindən biridir. Amma
birinci səbəb deyildir.
Əvvəla, müstəqil mətbuatda (buraya adını "tənqidçi
media" qoyan müxalifət elektron və çap mediası
da daxildir) "sensasiyalı" xəbər vermək hərisliyi,
xəstəliyi baş alıb gedir. Peşəkarlıqları
olmayan jurnalistlər və təcrübəsiz "baş
redaktor"lar oxucu diqqəti cəlb etmək üçün
adi hadisələrə də "sensasiya donu" geyindirməklə
cəmiyyətə təqdim etməyə
çalışırlar. Bu halda ilk
növbədə ziyan çəkən jurnalistikanın
obyektivlik və dəqiqlik prinsipi olur.
İkincisi, peşəkarlığı bir yana, işlədiyi
sahəyə dair elementar nəzəri bilgisi olmayan insanlar nəyin
"olar", nəyin "olmaz"lığını dərk
etmədiklərindən qulaqlarına və
ağızlarına gələni dəqiqləşdirmədən
informasiya adı ilə ictimailəşdirirlər.
Üçüncüsü, "Kütləvi
informasiya vasitələri haqqında", "Məlumat
azadlığı haqqında", "İnformasiya əldə
etmək azadlığı haqqında", "Dövlət
sirri haqqında" qanunların, habelə Azərbaycan
Respublikasının Milli Təhlükəsizlik
Konsepsiyasının müvafiq maddələrindən xəbərsizlikləri
hüquqi məsuliyyət xəbərsizlikləri ilə nəticələnir.
Bu isə onları heç də qanunun mıəsuliyyətindən
azad etmir! Akademik Ramiz Mehdiyev bununla bağlı çox ciddi
şəkildə xəbərdarlıq da etdi: "2007-ci ildə
təsdiq olunmuş Azərbaycan Respublikasının Milli Təhlükəsizlik
Konsepsiyasında qeyd olunmuşdur ki, Azərbaycan
Respublikasının ərazisi vahiddir, toxunulmazdır və
bölünməzdir. Beynəlxalq hüquqda təsbit
olunmuş bütün vasitələrdən istifadə etməklə
öz ərazi bütövlüyünü bərpa etmək
Azərbaycan Respublikasının milli təhlükəsizlik
siyasətinin ən ümdə vəzifəsidir. Buna görə də formasından və məzmunundan
asılı olmayaraq Azərbaycanın müstəqilliyi,
suverenliyi, ərazi bütövlüyü və konstitusiya quruluşu
əleyhinə istənilən qəsdə və ya qəsd cəhdlərinə,
o cümlədən cəmiyyətin informasiya təhlükəsizliyini
təhdid edən hallara qarşı hüquqi çərçivədə
zəruri addımlar atılmalıdır və xəbərdarlıq
edirəm ki, atılacaqdır".
Təbii ki,
istənilən şəxs özünə görə
doğru bildiyi (yaxud qəsdən yalandan) məlumatı hər
hansı bir media təmsilçisinə ötürə bilər.
O, buna görə heç bir məsuliyyət
daşımır. Bərkə düşəndə "mən
elə bilirəm", yaxud "mən belə eşitmişəm"
deməklə yaxasını qırağa çəkə biləcəkdir!
Müxbir əsasən qurum rəhbəri
qarşısında məsuliyyət daşıyır. İnformasiyanı dəyərləndirən, onun
ictimailəşdirilməsinə həlledici qərar verən
isə baş redaktordur. Odur ki, sonda da o özü məsuliyyət
daşıyır! Mətbuatda heç nə abstrakt deyil! Sözü deyən də, yazan da bəlli olur.
Onun cəmiyyətə çatdırılması,
tirajlanması hüququ isə yalnız bircə nəfərdədir:
baş redaktorda!
Deməli, bir nömrəli cavabdeh də baş
redaktordur! Nəyisə bilib-bilməyib, materialı
oxuyub-oxumayib - dəxli yoxdur!
Sorğu-suala o çəkilir!
Heç birimizin "senzor" və
"senzura" sözündən xoşu gəlmir. Amma bu qurum
düz 123 il əlində qayçı Azərbaycan
mətbuatının başı üzərində dayanıb!
Senzura nəzarəti
həm də qəzeti və onun rəhbərini sonrakı
çək-çevirdən qoruyurdu. İndi isə hərə
özünü qorumalıdır! Senzura getsə də, onun
funksiyası redaktorun boynunda qalıb! Onun bilgisindən, peşəkarlığından,
hətta bəzən fəhmindən asılıdır!
Baş redaktor rəhbərlik etdiyi media vahidində ilk
növbədə "vicdan senzurası"nı
həyata keçirməlidir! Vətənpərvər insan
kimi dövlətin və xalqın maraqlarını qorumalıdır!
Hansı "həvəskar"ınsa hərbi qüvvələrin
dislokasiyası ilə bağlı çəkib göndərdiyi
süjeti saytına qoymazdan əvvəl düşünməlidir
ki, bu təkcə informasiya deyil, həm də hərbi manevrlər
barədə düşmənə ötürülən hərbi
sirdir və əsl adı xəyanətdir! Baş redaktor mövcud
qanunların qadağanedici maddələrinin tələblərinin
yerinə yetirilməsini təmin etməlidir! Əks halda məhkəmə
məsuliyyətinə cəlb ediləcəkləri təqdirdə
həmin qanunların bəlli maddələrinin tətbiqindən
dəyən zərbəni qurum rəhbəri kimi o daha dərindən
və ağrılı hiss edəcəkdir!
Müşavirədə
göstərilən ciddi
nöqsanlar və qarşıya qoyulan vəzifələr
"Açıq
deməliyəm, bir sıra informasiya resursları bir tərəfdən
Ermənistan kəşfiyyatı üçün məlumat
ötürücüsünə çevrilir, digər tərəfdən
də düşmənin Azərbaycan əleyhinə
apardığı mənəvi-psixoloji müharibəyə
"töhfə" verərək həm əsgərlər,
həm də əhali arasında çaşqınlıq, ruh
düşkünlüyü yaranmasına səbəb
olurlar".
Akademik Ramiz MEHDİYEV
Avqustun əvvəllərində Ermənistan-Azərbaycan
cəbhə xəttində baş verən gərginlik ölkə
kütləvi informasiya vasitələrinin müharibə şəraitində
işləməyə hazır olmadığını
göstərdi! Bu amil özünü bütün parametrlərdə
büruzə verdi. Mətbuatımızın
peşəkarlıq səviyyəsi çox
aşağıdır! Çap və elektron media rəhbərləri
tərəfindən dövlət və hərbi sirlərin
qorunmasına laqeyd münasibət var! Jurnalistikaya qeyri-sahələrdən
gələnlərin əksəriyyəti milli mətbuatın nəzəriyyə
və prinsiplərindən xəbərsizdirlər!
Məlumat
toplamaq və söz azadlığı ilə
bağlı qanunların bir sıra vacib maddələrini bilməyənlər
qanun qarşısında məsuliyyət
daşıdıqlarının fərqində deyillər! Vətənpərvərlik
duyğuları zəif olan jurnalistlər milli maraqların
qorunmasına çalışmırlar! Elektron media vasitəsilə
düşmənə xəbər ötürən xəyanətkarların
mövcudluğu isə şübhə doğurmur!
Vəziyyət həm də təsirli və
təxirəsalınmaz tədbirlər görülməsini tələb
edir.
Müşavirədəki çıxışında
akademik Ramiz Mehdiyev bununla bağlı kəskin fikirlərini
bildirdi:
"Bütün bunlar təkcə Azərbaycan
hakimiyyətinə qarşı deyil, Azərbaycan xalqına
qarşı düşmənçilik və milli xəyanətdir. Onların bu fəaliyyəti Ermənistanın və
erməni lobbisinin Azərbaycana qarşı apardığı
informasiya müharibəsinə əlavə nəfəs verir,
düşmənin mövqeyinin güclənməsinə xidmət
edir. Ən əsası, ölkəmizin Ermənistan-Azərbaycan,
Dağlıq Qarabağ münaqişəsinin ədalətli həlli
istiqamətində apardığı ardıcıl, fəal
diplomatiyanı gözdən salmaq məqsədi
güdür".
"Azərbaycan dövlətini gözdən salmaq, əldə
olunmuş böyük nailiyyətlərə qara yaxmaq, əsassız,
uydurma məsələləri qabardaraq Azərbaycan ictimaiyyətini
çaşdırmaq "Azadlıq" qəzeti,
"Azadlıq" radiosu və digər bir çox müxalifət
mediasının fəaliyyətinin başlıca qayəsini təşkil
edir".
"Ermənistanın Azərbaycana qarşı
bütün resurslarının tükəndiyi, heç bir
mübarizə potensialının, arqumentinin
qalmadığı bir vaxtda daxili antimilli ünsürlər, Vətəni
satanlar, müxalifətə yaxın QHT-lər və media
öz xalqına, dövlətinə qarşı xəyanət
yolu tutaraq düşmənlə işbirliyinə gedir və
onun mövqeyini gücləndirməyə
çalışır".
"Qəzəbləndirici hal ondan ibarətdir ki, bir
sıra KİV-lər
düşmən kəşfiyyatı
üçün açıq informasiya mənbəyi rolu
oynayırlar".
Mətbuatın avqust sınağı
göstərdi ki, bu sahədə kifayət qədər
boşluqlar və nöqsanlar mövcuddur. Müharibə
vəziyyətində olan bir ölkə üçün isə
belə vəziyyət bağışlanmazdır! Odur ki,
müşavirədə göstərilən nöqsanların ən
qısa müddətdə aradan qaldırılmasına nail
olunmalı, hərbi və dövləti sirlə bağlı
yazılara tələbkarlıq artırılmalı, qanun
pozuntusu halında isə ən qəti və kəskin
ölçü götürülməlidir!
Akademik Ramiz Mehdiyev bununla bağlı konkret vəzifələr
də irəli sürdü:
"Ümidvaram ki, vəziyyətin təhlili,
nöqsanların müəyyənləşdirilməsi,
onların aradan qaldırılması üçün verilən
tövsiyələr qarşıdan gələn dövrdə həm
informasiya sahiblərinin, həm də KİV-lərin
qanunauyğun və səmərəli fəaliyyətinin tənzimlənməsinə
öz müsbət təsirini göstərəcəkdir".
"Hesab edirəm ki, Azərbaycanın
kütləvi informasiya vasitələri ölkədə
görülən işləri, cənab Prezidentin həyata
keçirdiyi uğurlu siyasəti daha geniş və obyektiv
şəkildə işıqlandırmalıdırlar".
"Mətbuat işıqlı
simaların timsalında insanlara mənəvi saflıq
aşılamalı, onlarda əsl vətəndaşlıq
mövqeyinin formalaşmasına öz dəyərli töhfəsini
verməlidir. Hesab edirəm ki, bu amal
onların fəaliyyətinin əsasını təşkil
etməlidir. Eyni zamanda Azərbaycan jurnalistikası
peşəkarlıq, obyektivlik, qərəzsizlik, yüksək
milli şüur və vətənpərvərlik prinsiplərinə
dönmədən əməl etməli, söz və məlumat
azadlığından sui-istifadənin qarşısı qətiyyətlə
alınmalıdır".
Bu məsələdə mətbuatla əlaqədə
işləyən qurumların da üzərinə böyük
məsuliyyət düşür. Jurnalist təşkilatları,
qəzet və jurnal redaksiyaları, QHT-lər (hər il
onların bir qismi jurnalistikanın problemlərinin "həlli"
ilə bağlı müxtəlif qrantlar da alırlar) maarifləndirmə
işini gücləndirməli, jurnalist sənətkarlığının
və peşəkarlığının daim yüksəldilməsinə
çalışmalıdırlar. Avqust gərginliyinin
aşkara çıxardığı durum bu sahədə
naşılıq, qeyri-peşəkarlıqla yanaşı,
düşmənə xidmət göstərənlərin də
mövcudluğunu sübuta yetirdi!
Artıq vəziyyətin qanunun aliliyi əsasında və
qanunun gücü ilə nizamlanması qaçılmaz zərurətə
çevrilib!
Bəxtiyar
SADIQOV
Azərbaycan.-
2014.- 4 sentyabr.- S.5.