BTC Azərbaycanın qarşısında yeni üfüqlər açdı
Kəmərin təməli
2002-ci il sentyabrın 18-də qoyulmuşdur
Heydər Əliyev adına Bakı-Tbilisi-Ceyhan əsas ixrac neft kəmərinin təməlinin qoyulduğu gündən 12 il ötür. Bu qürur doğuran hadisənin növbəti ildönümünü "Əsrin müqaviləsi"nin 20 illik yubileyi ərəfəsində qeyd edirik. "Əsrin müqaviləsi" adı çəkiləndə BTC yada düşür. Çünki bu kəmər "Əsrin müqaviləsi"nin qanunauyğun məntiqi nəticəsidir.
Elə buradaca deyək ki, BTC də "Əsrin müqaviləsi" kimi ulu öndər Heydər Əliyevin əsəridir, uzaqgörən iqtisadi və siyasi kursunun qələbəsidir. Reallığa çevrilib təkcə Azərbaycana deyil, bütün regiona fayda gətirən bu layihələr ölkəmizin tarixində xüsusi əhəmiyyət kəsb edən, qürur doğuran nailiyyətdir.
2002-ci il sentyabrın 18-də Bakıdan 55 kilometr cənubda yerləşən Səngəçal terminalında keçirilən təməlqoyma mərasimində Azərbaycanın, Gürcüstanın, Türkiyənin dövlət başçıları, ABŞ-ın energetika naziri, kəmərin səhmdarları olan şirkətlərin səlahiyyətli nümayəndələri, bir çox ölkələrdən gəlmiş jurnalistlər iştirak edirdilər. Həmin tarixi hadisəni əyani görmək, ümummilli liderin tədbirdəki parlaq nitqini dinləmək mənə də qismət olub. Ulu öndərin hər fikri, hər müddəası, "Əsrin müqaviləsi", BTC, Azərbaycanla tərəfdaşlıq edən şirkətlər haqqında dediyi sözlər həmişəlik yaddaşımızda qalıb. Ümummilli lider özünün şah əsərlərindən biri olan BTC-ni xalqımızın və regionun gələcəyi üçün görülən işlərdən olduğunu dedi. Onun təkcə iqtisadi deyil, həm də siyasi əhəmiyyət kəsb etdiyini vurğuladı. Bu boru xəttini Azərbaycanı digər ölkələrlə sıx birləşdirən polad kəmər adlandırdı.
O vaxt BTC-nin reallaşması ilə bağlı bir çox maneələr arxada qalmış olsa da, qarşıda həllini gözləyən xeyli problem var idi. Hələ bir sıra qeyri-hökumət təşkilatları BTC-nin Gürcüstandakı "Borjomi" mineral su mənbəyinə guya ekoloji ziyan gətirəcəyi fikrini ortaya atacaqdı. Onlar layihənin ƏMSSTQ (Ətraf Mühitə və Sosial Sahəyə Təsirin Qiymətləndirilməsi) sənədlərinin imzalanmasını gecikdirməyə cəhd edəcəkdilər. Hələ BTC-nin bədxahlarından dəstək alan qruplar kəmərin tikintisini maliyyələşdirəcək beynəlxalq maliyyə qurumlarının ofisləri qarşısına toplaşacaq və işlərin irəliləməsinə əngəllər törətməyə səy göstərəcəklər...
Ümummilli lider təbii ki, qarşıda bu kimi bir çox çətinliklərin olacağını bilirdi. Bununla belə, BTC-nin bütün maneələrdən yenə də keçə biləcəyinə əmin idi. Ona görə də təməlqoyma mərasimində sanki bir çox bədxah qüvvələrə kəmərin bünövrəsinin möhkəm olduğunu böyük inam və qətiyyətlə xatırlatdı: "Bakı-Tbilisi-Ceyhan irəliyə gedəcək, gedəcək, gedəcəkdir!"
2003-cü ilin əvvəlində BTC-nin tikintisinin maliyyələşdirilməsində böyük müşküllər yaranmışdı. Layihənin əleyhdarları son üsula əl ataraq maliyyə qurumlarının ofisləri qarşısına toplaşır və layihəyə vəsaitin ayrılmasına mane olmağa cəhd edirdilər. Həmin ilin fevralında ABŞ-da keçirilən "Şərq-Qərb enerji dəhlizi reallıqdır" beynəlxalq konfransında iştirak edən ümummilli lider Heydər Əliyev beynəlxalq maliyyə institutlarının rəhbərləri ilə görüşdü, söhbətlər apardı və bu, öz müsbət nəticəsini göstərdi.
Mütəxəssislər deyirlər ki, belə nəhəng obyektlərin, infrastrukturların istifadəyə veriləcəyi tarix barədə tam dəqiq söz demək mümkün deyil. BTC isə elə dəqiq düşünülmüş, real layihə idi ki, ulu öndər onun istifadəyə veriləcəyi vaxtı da əvvəlcədən qəti bildirmişdi: "2005-ci ildə Bakı-Tbilisi-Ceyhan əsas ixrac neft kəməri tamamilə hazır olacaq və biz hamımız birlikdə buradan Türkiyənin Ceyhan limanına gedəcək və orada Azərbaycan neftinin, Xəzər neftinin Ceyhan limanından yola salınmasının şahidi olacağıq".
BTC-nin əməliyyatçısı olan BP şirkətinin prezidenti ilə sonuncu dəfə görüşərkən də ulu öndər onun əlini sıxıb demişdi: "Biz hələ Ceyhanda beləcə görüşəcəyik" .
2005-ci il mayın 25-də kəmərin Azərbaycan hissəsinin istifadəyə verilməsi münasibətilə Səngəçalda, daha sonra Bakıda təntənəli mərasimlər keçirildi. Azərbaycan Respublikasının Prezidenti İlham Əliyevlə yanaşı, bu təntənələrdə daha üç ölkənin - Türkiyənin, Gürcüstanın və Qazaxıstanın dövlət başçıları da iştirak etdilər.
Bir il bundan
sonra - 2006-cı il mayın 28-də Azərbaycan
nefti Ceyhana çatdı. BTC-nin tam bir sistem kimi
istifadəyə verilməsi
münasibətilə həmin
il iyulun
13-də Ceyhan şəhərində
və Türkiyənin
digər yerlərində
təntənələr keçirildi.
Təəssüflər olsun ki, ulu
öndər bütün
bunları görmədi. Prezident İlham
Əliyev sözügedən
təntənələrdə "İndi onun ruhu buradadır" söylədi. Qardaş ölkədə
çıxan "Milliyyət"
və "Sabah" qəzetləri
həmin sözləri
başlığa çıxardı.
Bu gün BTC üç
ölkə - Azərbaycan,
Gürcüstan və
Türkiyə ərazisində
1768 kilometr məsafə
qət edir. İkisi Azərbaycanda
(Səngəçalda və
Yevlaxda), ikisi Gürcüstanda və dördü Türkiyə
ərazisində yerləşən
nasos stansiyaları nefti mərhələ-mərhələ
ötürür.
Hazırda kəmərə Xəzərin
Azərbaycan sektorundakı
"Azəri-Çıraq-Günəşli"
yataqlarından çıxarılan
neft vurulur. Xəttə həmçinin
"Şahdəniz" yatağından
çıxarılan kondensat
da qoşulur. Artıq bir neçə ildir BTC müəyyən həcmdə Türkmənistan
nefti də nəql edir. Keçən ilin payızından
isə kəmərlə
eləcə də Qazaxıstanın "Tengiz"
yatağından çıxarılan
neftin ixracı bərpa olunub.
Bundan əlavə,
cari ilin fevral ayında ARDNŞ-nin əməliyyatçısı
olduğu Şimal İxrac Boru Kəmərinin (ŞİBK) axın
istiqaməti uğurla
dəyişdirildi. Bu, BP ilə ARDNŞ-nin
ŞİBK boyunca bir neçə obyektin yenidən işə salınması üçün
birgə səylərinin
nəticəsi idi.
Kommersiya razılaşmalarının
yekunlaşması ŞİBK-dən neft həcmlərinin
BTC vasitəsilə ixracına
imkan verdi.
Hazırda BTC-nin ötürmə
gücü gündə
1,2 milyon bareldir. Bu il
avqustun 11-də BTC istifadəyə
verildiyi tarixdən bəri Ceyhan terminalından 2 milyardıncı
barel nefti yola saldı. İndiyədək Ceyhandan dünya
bazarlarına BTC-nin gətirdiyi neftlə yüklənmiş 2580-dən çox
tanker göndərilib.
BP Azərbaycan şirkətinin
məlumatına görə,
bu ilin birinci
yarısında kəmər
vasitəsilə təqribən
17,8 milyon ton (134 milyon barel) xam
neft ixrac olunub. Bu neft
Ceyhanda 185 tankerə yüklənib.
BTC gələcəyə hesablanmış böyük
bir layihədir. O, Azərbaycanın
qarşısında yeni
üfüqlər açmış,
ölkəyə geniş
iqtisadi imkanlar yaratmışdır. "Əsrin müqaviləsi"
çərçivəsində, yəni AÇG yataqlarından
çıxarılan və
BTC-yə vurulan neftin gətirdiyi gəlirlər Azərbaycanda
bir sıra sosial məsələlərin
qısa müddətdə
öz həllini tapmasında, ölkənin
dünya iqtisadiyyatına
inamla inteqrasiya etməsində böyük
rol oynamışdır.
Prezident İlham Əliyevin sözləri ilə desək, "Bakı-Tbilisi-Ceyhan neft kəmərinin
tikilməsi nəticəsində
biz artıq pəncərədən
başlayaraq böyük
qapı açdıq".
BTC həm də
özündən sonra
gələn qlobal layihələrə yol açıb. Əgər BTC ilə eyni
dəhliz boyu "Şahdəniz" qazını
daşıyan kəmər
tikilməsəydi, bu gün Azərbaycan TANAP,
TAP kimi layihələrə
qovuşa bilməzdi.
Bu ilin iyun ayında Bakıda keçirilən XXI Beynəlxalq
Xəzər neft və qaz sərgisinin
açılış mərasimində
dövlət başçısı
demişdir: "Əgər
o kəmər olmasaydı,
Azərbaycan öz neft və ondan
sonra qaz potensialını dünya
bazarlarına çatdıra
bilməzdi. Beləliklə, dəhliz yaradıldı.
Xəzər dənizi-Qara dəniz-Aralıq
dənizi əməkdaşlıq
formatı formalaşmışdır.
Xəzər dənizini Aralıq
dənizi ilə birləşdirən Bakı-Tbilisi-Ceyhan bu gün
uğurla fəaliyyət
göstərir və başqa ölkələrə
də xidmət edir. Dəhliz formalaşandan sonra
əlbəttə ki, Azərbaycan öz tranzit rolunu oynamağa başlamışdır.
Bu gün biz qeyd
edə bilərik ki, artıq Azərbaycan öz coğrafi vəziyyətindən
və logistika imkanlarından tam şəkildə
istifadə edir".
Müəllifi Heydər Əliyev olan və onun adını şərəflə daşıyan BTC ölkəmizi beynəlxalq enerji ailəsinə qovuşdurdu. Azərbaycana həm siyasi, həm iqtisadi uğurlar gətirdi.
Flora SADIQLI,
Azərbaycan.-2014.- 18 sentyabr.- S. 1.