Səhiyyə naziri Ağdam rayonunda vətəndaşları qəbul edib

Azərbaycan Respublikasının Prezidenti İlham Əliyevin göstəriş və tövsiyələrinə əsasən regionlarda vətəndaşların qəbulu davam etdirilir.

AzərTAc xəbər verir ki, mərkəzi icra hakimiyyəti orqanlarının rəhbərləri tərəfindən şəhər və rayonlarda vətəndaşların qəbulu cədvəlinə uyğun olaraq səhiyyə naziri Oqtay Şirəliyev sentyabrın 19-da Ağdam rayonunun Quzanlı qəsəbəsində vətəndaşlar üçün qəbul keçirib.

Ağdam Rayon Mərkəzi Xəstəxanasında keçirilən qəbulda Ağdam, Tərtər, Ağcabədi, Bərdə və Beyləqan rayonlarının sakinləri iştirak ediblər.

Qəbul zamanı sağlamlıq problemləri, işlə təminat və s. məsələlərlə bağlı, ümumilikdə, 50 nəfərin müraciəti dinlənilib, səhiyyə sahəsinə dair vətəndaşları maraqlandıran suallar cavablandırılıb.

Vətəndaşların müraciətində qaldırılan məsələlər nazirliyin müvafiq qurumlarının əməkdaşlarının iştirakı ilə araşdırılıb, onların bəziləri yerindəcə həllini tapıb. Nazirliyin səlahiyyətlərinə aid olmayan məsələlər aidiyyəti üzrə çatdırılmaq üçün qeydiyyata alınaraq nəzarətə götürülüb.

Azərbaycan.-2014.- 20 sentyabr.- S.9.