AŞPA-nın sədri Ədliyyə Nazirliyində olub

Sentyabrın 22-də ədliyyə naziri, Məhkəmə-Hüquq Şurasının sədri Fikrət Məmmədov Azərbaycanda səfərdə olan Avropa Şurası Parlament Assambleyasının (AŞPA) sədri xanim Ann Brasör ilə görüşüb.

Ədliyyə Nazirliyinin mətbuat xidmətindən AzərTAc-a bildiriblər ki, Azərbaycanın Avropa Şurası ilə müxtəlif istiqamətlərdə, o cümlədən hüquqi sahədə sıx əməkdaşlıq etdiyini vurğulayan nazir dövlətimizin başçısı İlham Əliyevin rəhbərliyi ilə ölkədə insan haqları, demokratiya və qanunun aliliyinə xidmət edən islahatlardan danışıb. Nazir bu prinsiplərin ölkəmizin Avropa Şurası Nazirlər Komitəsinə sədrliyi dövründə prioritet təşkil etdiyini vurğulayıb və keçirilən tədbirləri qeyd edib.

Qonağa, həmçinin Avropa Şurasının iştirakı və dəstəyi ilə məhkəmə sisteminin və infrastrukturunun təkmilləşdirilməsi, hakimlərin Avropada ən şəffaf seçimi, habelə penitensiar sistemin inkişafı, məhkumların saxlanma şəraitinin yaxşılaşdırılması, yeni müasir cəzaçəkmə müəssisələrinin inşası üzrə və s. görülən tədbirlər barədə məlumat verilib.

Ölkəmizə yenidən səfər etməsindən məmnunluğunu bildirən qonaq Azərbaycan və Avropa Şurası arasındakı konstruktiv əməkdaşlığı qeyd edib, məhkəmə-hüquq sistemindəki yenilikləri məmnuniyyətlə qarşılayıb, vətəndaş cəmiyyətinin inkişafı, qanunvericiliyin təkmilləşdirilməsi və qeydiyyat prosedurları ilə maraqlanıb. A.Brasör penitensiar müəssisələrə baş çəkmək üçün imkan yaradılmasına görə minnətdarlığını ifadə edib.

Görüşdə, həmçinin ölkəmizin Avropa Şurası Nazirlər Komitəsinə sədrliyi dövrünə təsadüf edən 2014-2016-cı illər üzrə qəbul olunmuş birgə Fəaliyyət Planının implementasiyasına, yeni layihələrin həyata keçirilməsinə dair fikir mübadiləsi aparılıb, maraq kəsb edən digər suallara aydınlıq gətirilib.

Azərbaycan.-2014.- 23 sentyabr.- S.3.