Avropa Parlamenti şantaj yolunu tutub

Dövlət müstəqilliyini bərpa etdikdən və ulu öndər Heydər Əliyevin hakimiyyətə qayıdışından sonra Azərbaycan insan hüquq və azadlıqlarının aliliyinə əsaslanan hüquqi dövlət quruculuğu yolunu seçib. Bu yolda zaman-zaman qarşıya çıxan çoxsaylı maneələrə, təzyiqlərə və təhdidlərə baxmayaraq, respublikamız demokratik dəyərlərə sadiq olub, Avropaya inteqrasiya siyasətini əzmlə davam etdirib.

Son illərdə isə Azərbaycan dinamik və davamlı inkişaf yoluna qədəm qoyub. İstər siyasi, istər iqtisadi, istər sosial, idman, mədəniyyət və digər sahələrdə qazanılan nailiyyətlər respublikamızın regional və beynəlxalq nüfuzunun artmasına, dünyada daha yaxından tanınmasına böyük töhfələr verməkdədir. Bu gün Cənubi Qafqazın lideri olan, Avropanın və bir sıra aparıcı dövlətlərin enerji təhlükəsizliyinin təmin olunmasında mühüm rol oynayan Azərbaycanla dünyada hesablasır, mövqeyini bölüşürlər. Bu günlərdə Azərbaycanda "Cənub" qaz dəhlizinin təməlinin qoyulması ilə bağlı keçirilən təntənəli mərasim deyilənlərin əyani təsdiqidir.

Azərbaycanla müqayisədə Ermənistan nəinki yerində sayır, geriyə addımlayır. Ermənistan iqtisadiyyatının səviyyəsi 20 il əvvəlki göstəricilərlə təxminən eynidir. Bu ölkə siyasi tərəfdən olduğu kimi, iqtisadi tərəfdən də tamamilə asılı vəziyyətə düşüb. Seçkilərin insan ölümü, namizədin güllələnməsi ilə müşahidə olunduğu bir ölkədə, əlbəttə ki, demokratik dəyərlərdən və insan hüquqlarından danışmağa dəyməz.

Bütün bunları dünya görür və xüsusən Qərbin bəzi dairələri Ermənistanın Azərbaycan qarşısında miskin durumda olmasını qısqanclıqla qarşılayırlar. Üstəlik, Azərbaycanın modern, aydın mövqeyi olan, siyasi və iqtisadi baxımdan tam müstəqil siyasət yeridən dövlət kimi beynəlxalq birlikdə öz yerini möhkəmləndirməsi Avropanın bəzi təşkilatlarının, xüsusən erməni təəssübünü çəkən dairələrin, erməni lobbisinin maraqlarına xidmət edən mərkəzlərin ölkəmizə qarşı qərəzli münasibət ortaya qoymaları ilə müşahidə olunur. Belə təşkilatlardan biri də Avropa Parlamentidir (AP).

AP-nin bu günlərdə Azərbaycanda insan hüquqlarına dair qəbul etdiyi qərəzli qətnamə də əvvəlkilər kimi tamamilə əsassız və qeyri-obyektiv olmaqla ölkəmizin uğurlarına olan qısqanclığın növbəti nümunəsidir. Heç bir əsas olmadan, tələm-tələsik çağırılmış və Avropa Parlamentinin 751 deputatından cəmi 46 nəfərinin iştirakı ilə keçirilən iclasda belə bir qətnamənin qəbul olunması onun sifarişli olmasından xəbər verir. Qətnamədə Azərbaycana qarşı ədalətsizlik, onun beynəlxalq nüfuzuna ləkə yaxmaq niyyəti, dövlət strukturlarına, hüquq-mühafizə orqanlarına hörmətsizlik, ölkəmizdə daxili ictimai-siyasi vəziyyəti gərginləşdirmək cəhdi açıq şəkildə özünü büruzə verir. Konkret cinayət əməllərinə görə həbs olunmuş və ya məhkum edilmiş şəxslərin "dərhal, qeyd-şərtsiz azad olunması", anarxiya və özbaşınalığa yol aça biləcək "sərhədsiz azadlıq" tələbləri, Azərbaycanla əməkdaşlıq edən digər beynəlxalq qurumlara qarşı təzyiq və şantaj cəhdi və s. bu sənədin, onu qəbul edən bir qrup deputatın məkrli simasını açıq nümayiş etdirir. AP-nin Azərbaycana təzyiq göstərmək üçün Beynəlxalq Olimpiya Komitəsinə və quruma üzv olan ölkələrə çağırışı bunu bir daha təsdiq edir.

Son dərəcə qərəzli olan bu qətnamə başdan-ayağa iftira ilə doludur. Burada yer alan müddəalar demək olar ki, yoxlanılmayıb. Daim Azərbaycana qarşı qərəzli davranan təşkilatların hesabatları ilə AP-nin qətnaməsi arasında heç bir fərq yoxdur. Bu mənada AP-nin bu addımının antiazərbaycançı şəbəkənin sifarişi ilə ölkəmizə qarşı aparılan çirkin siyasi kampaniyanın tərkib hissəsi olmasına heç bir şübhə yoxdur. Bu qətnamə regionun lider dövləti olan, beynəlxalq imici yüksələn Azərbaycanın artan siyasi nüfuzuna xələl gətirilməsinə yönəlib. Əslində isə, Azərbaycana qarşı məqsədyönlü şəkildə yürüdülən siyasi sifariş və ikili standartlardan qaynaqlanan bu qətnamə Avropa Parlamenti daxilində Avropa İttifaqının özünün təməl maraqlarına zidd fəaliyyət göstərən qüvvələrin mövcudluğuna dəlalət edir.

Ümumiyyətlə, AP həmişə Azərbaycana qarşı ədalətsiz mövqeyi ilə seçilib. İndiyədək dəfələrlə antiazərbaycançı şəbəkənin əlində alətə çevrilərək ölkəmizlə bağlı həqiqətdən uzaq olan, yalnız bəzi müxalifət və QHT təmsilçilərinin təqdim etdikləri yalan məlumatlar əsasında hesabatlar hazırlayıb. Bu təşkilat hesabatlarını hazırlayarkən heç vaxt Azərbaycanın rəsmi dövlət qurumlarına istinad və ya müraciət etmir və beləliklə də, bilərəkdən qərəzə yol verir. Maraqlıdır ki, AP Azərbaycanla bağlı əlamətdar hadisələr, ölkəmizin uğur qazandığı dönəmlərdə xüsusilə "fəallaşır", qərəzli mövqeyini ortaya qoyur. Bu dəfə də belə oldu. "Əsrin müqaviləsi"nin 20 illik yubileyi və "Cənub" qaz dəhlizinin təməlinin qoyulması ərəfəsində AP əvvəllər olduğu kimi Azərbaycanla bağlı qeyri-obyektiv qətnamə qəbul etdi.

Bu gün Avropaya inteqrasiya yolu tutan Azərbaycan həm də bütün bəşəriyyətə qarşı təhlükə olan terrorizmlə mübarizə aparır. Azərbaycan həm də Avropanın enerji təhlükəsizliyinə böyük töhfə verən strateji tərəfdaşdır. Torpaqlarının Ermənistan tərəfindən işğalına baxmayaraq, Azərbaycan demokratiya yolu ilə inkişaf edir, cəmiyyətimiz öz tolerantlıq ənənələrini saxlayır və inkişaf etdirir. Lakin AP-nin bütün bunları görmək, Azərbaycanın torpaqlarının Ermənistan tərəfindən işğalı nəticəsində 1 milyona yaxın azərbaycanlının hüquqlarının pozulmasına münasibət bildirmək əvəzinə antiazərbaycançı şəbəkənin sifarişi ilə iftira dolu qətnamə ortaya qoyması sadəcə təəssüf doğurur.

Rəşad CƏFƏRLİ,

Azərbaycan.-2014.- 23 sentyabr.- S.4.