Babək rayonunun Qahab kəndi müasirləşən
yaşayış məntəqələri
sırasına qoşulub
Bu gün Naxçıvan Muxtar Respublikasında həyata keçirilən kompleks quruculuq tədbirləri şəhər və rayon mərkəzləri ilə yanaşı, kəndləri də əhatə edib. Yeni kənd və xidmət mərkəzlərinin, abad yolların, məktəb binalarının və səhiyyə müəssisələrinin tikintisi müasir Naxçıvanın inkişaf göstəricisinə çevrilib. Bu, həm də əhalinin rifah halının yaxşılaşmasına göstərilən qayğının təzahürüdür.
Naxçıvan Muxtar Respublikası Ali Məclisinin mətbuat xidmətindən AzərTAc-a bildiriblər ki, sentyabrın 22-də Babək rayonunun Qahab kəndində yeni sosial obyektlər istifadəyə verilib.
Yarımca-Qahab-Nəcəfəlidizə-Naxışnərgiz
avtomobil yolu yenidən qurulub
Sentyabrın 22-də yol-nəqliyyat infrastrukturunun yeniləşməsi istiqamətində görülən tədbirlərin davamı olaraq Yarımca-Qahab-Nəcəfəlidizə-Naxışnərgiz avtomobil yolunun istifadə verilməsi münasibətilə tədbir keçirilib.
Qahab kənd sakini Hidayət Hacıyev minnətdarlığını bildirərək deyib ki, bu gün Naxçıvan Muxtar Respublikasının hər bir yaşayış məntəqəsi özünün abad yolu ilə seçilir. Yol rahatlıq, mədəniyyət, yüksək rifah deməkdir. Artıq Qahab və ətraf kəndləri birləşdirən bu yol yaşayış məntəqələrinin inkişafına öz töhfəsini verəcəkdir.
Naxçıvan Muxtar Respublikası Ali Məclisinin Sədri Vasif Talıbov yeni yolun istifadəyə verilməsi münasibətilə sakinləri təbrik edərək deyib: Bu gün Qahab kəndində yeni sosial obyektlər istifadəyə verilir. Kənddə yaradılan müasir infrastrukturlar içərisində yol tikintisi xüsusi əhəmiyyət kəsb edir. Ona görə ki, əsaslı şəkildə yenidən qurulan və 4 yaşayış məntəqəsini əhatə edən yoldan 6 minə yaxın sakin və gələn qonaqlar istifadə edəcəklər. Abad yol hər bir yaşayış məntəqəsinin inkişafı, əhalinin isə rahatlığı deməkdir. 14,5 kilometr uzunluğundakı Yarımca-Qahab-Nəcəfəlidizə-Naxışnərgiz avtomobil yolu da əhatə etdiyi kəndlərdə əhalinin rahatlığının təmin olunmasına şərait yaradacaqdır.
Sonra Ali Məclisin Sədri yolun açılışını bildirən lenti kəsib.
Məlumat verilib ki, əsaslı şəkildə yenidən qurulan yolun hərəkət hissəsinin eni 8 metrdir. Yola yeni asfalt örtük salınıb, 4 selötürücü, 75 suötürücü tikilib, yolun kənarı boyunca 1211 metr məsafədə kanal çəkilib. Yol yatağının genişləndirilməsi və müvafiq yol-hərəkət nişanlarının quraşdırılması avtomobillərin rahat və təhlükəsiz hərəkətinə imkan verəcəkdir.
Müasir məktəb binası tədrisin
keyfiyyətini yüksəldəcəkdir
Təhsil sahəsində həyata keçirilən islahatlar ölkənin gələcək inkişafına xidmət edir. Savadlı, intellektli, zəngin dünya görüşlü və vətənpərvər gənclik isə bu inkişafın əsas təminatçılarıdır. Hər il muxtar respublikada onlarla yeni məktəb binasının istifadəyə verilməsi, müasir tədris şəraitinin yaradılması da məhz bu məqsədə xidmət edir.
Sentyabrın 22-də Qahab kənd tam orta məktəbinin yeni binasının açılışı olub.
Naxçıvan Muxtar Respublikası Ali Məclisinin Sədri Vasif Talıbov açılış mərasimində iştirak edib.
Məktəbin direktoru Müzəffər Zamanov çıxış edərək deyib ki, aparılan quruculuq işlərindən sonra Qahab kənd tam orta məktəbi müasir görkəm alıb. Məktəbdə tədrisin günün tələbləri səviyyəsində qurulması üçün bütün imkanlar vardır. Bu da kollektivi daha səylə çalışmağa sövq edir. Yaradılan şərait gələcəkdə məktəbin nailiyyətlərini daha da artırmağa imkan verəcəkdir.
Naxçıvan Muxtar Respublikası Ali Məclisinin Sədri Vasif Talıbov Qahab kənd tam orta məktəbinin yeni binasının istifadəyə verilməsi münasibətilə sakinləri və kollektivi təbrik edərək deyib: Bu gün Qahab kəndinin həyatında əlamətdar gündür. Ona görə ki, aparılan kompleks quruculuq işlərinin nəticəsi olaraq kənddə yeni sosial obyektlər istifadəyə verilir. Tikilən müasir məktəb binası və digər sosial obyektlər ümumilikdə, kəndin inkişafına, əhalinin sağlamlığının qorunmasına, onların rahat yaşayışının təmin olunmasına və gənclərin hərtərəfli təhsil almasına xidmət edəcəkdir.
Ali Məclisin Sədri deyib: Təhsil hər bir ölkənin həyatında vacib sahədir. Ona görə də ölkənin gələcəyini təmin etmək üçün vətənpərvər və təhsilli gənclik yetişdirmək lazımdır. Bu gün ölkəmizdə gənclərin təhsil alması üçün lazımi şərait yaradılır, yeni məktəb binaları tikilir, bu sahəyə hərtərəfli dövlət qayğısı göstərilir. Yaradılan şərait isə qarşıya mühüm vəzifələr qoyur. Bu gün məktəblərin üzərinə düşən əsas vəzifə təhsil verməklə yanaşı, həm də gənclərimizə müstəqil qərarlar qəbul etməyi öyrətməkdir. Çünki hər bir gənc qabiliyyətinə və həvəsinə görə ixtisas seçir, gələcək həyatını bu ixtisaslara dərindən yiyələnməklə qurur. Bunun üçün ölkəmizdə lazımi şərait yaradılıb, ümumtəhsil, peşə, orta ixtisas və ali təhsil pillələri üzrə gənclərin təhsil alması təmin olunub.
Ali Məclisin Sədri deyib: Təhsil müəssisələrində yaradılan şərait şagirdlərin qarşısında mühüm vəzifələr qoyur. Hər bir şagird hansı təhsil pilləsi üzrə təhsil almasından asılı olmayaraq, ilk növbədə peşə öyrənməli, vətənpərvər böyüməli, gələcəkdə ölkəmizə xidmət etməlidir. Ümumtəhsil məktəblərində gənclərin maraqlarına və bacarıqlarına uyğun olaraq peşələrə yönəldilməsi diqqət mərkəzində saxlanılmalıdır. Qahab kənd tam orta məktəbində hər cür şərait yaradılıb. Məktəb yeni informasiya-kommunikasiya texnologiyaları ilə təmin olunub, lazımı tədris avadanlıqları quraşdırılıb. Bu da müəllimlərin yaradılan şəraitdən düzgün istifadə etməsinə, şagirdlərə müasir biliklərin öyrədilməsinə və onların gələcək peşə seçiminə şərait yaradacaqdır.
Ali Məclisin Sədri yaradılan şəraitdən səmərəli istifadə olunacağına, təhsilli və vətənpərvər gənclərin yetişdiriləcəyinə əminliyini bildirib, kollektivə tədrisdə uğurlar arzulayıb.
Sonra Ali Məclisin Sədri Babək rayonunun ümumtəhsil məktəblərində əla qiymətlərlə oxuyan bir qrup şagirdə kompyuter dəsti hədiyyə edib, açılışı bildirən lenti kəsib.
Məlumat verilib ki, zirzəmi ilə birlikdə 3 mərtəbədən ibarət olan məktəb binası 612 şagird yerlikdir. Məktəbdə 34 sinif otağı, fizika və kimya laboratoriyaları, hərbi kabinə, 3 kompyuter otağı, 4 elektron lövhəli sinif, 2 müəllimlər otağı, kitabxana, bufet, idman zalı və açıq idman qurğuları vardır.
Pulsuz dərsliklərlə təminatla yanaşı, zəngin fonda malik kitabxanaların istifadəyə verilməsi də şagirdlərin dünyagörüşünün formalaşmasına xidmət edir. Məktəbin 14 min 314 kitab fonduna malik yeni kitabxanası bədii ədəbiyyat və tədris planlarında nəzərdə tutulmuş fənlərə dair dərsliklərlə zənginləşdirilib. Kitabxanada kompyuter dəstinin quraşdırılması və internetə qoşulması isə internet resurslarından səmərəli istifadə etməklə elektron nəşrlərin əldə olunmasına imkan verəcəkdir.
Ali Məclisin Sədri birinci sinifdə oxuyan
şagirdlərin dərs prosesi ilə maraqlanıb. Bildirilib ki, bu il
məktəbin birinci sinfinə 46 şagird qəbul olunub. Yaradılan müasir şərait, tətbiq olunan yeni
tədris metodları dərslərin daha səmərəli və
asan mənimsənilməsinə, şagirdlərin məntiqi təfəkkürünün
möhkəmləndirilməsinə imkan verir.
Lazımı cihaz və avadanlıqlarla təchiz
olunmuş fizika, kimya və biologiya laboratoriyaları biliklərin
təcrübi yolla möhkəmləndirilməsinə şərait
yaradacaqdır.
Şahmat zehni idman növü kimi, uşaqların əqli
inkişafına kömək edir, onlarda diqqətli olmaq,
müqayisə aparmaq vərdişlərinin
formalaşdırılmasına şərait yaradır. Bu səbəbdən
də muxtar respublikada şahmatın kütləviliyinə və
onun təbliğinə xüsusi diqqət yetirilir, ümumtəhsil
məktəblərində şahmat fənni tədris olunur.
Qahab kənd tam orta məktəbində
şahmat sinfinin istifadəyə verilməsi də bu sahədə
görülən işlərin tərkib hissəsidir.
Məlumat verilib ki, kompyuter otaqlarındakı 57 kompyuter
dəstinin hər biri internetə qoşulub. Bütün
bunlar informatika fənninin daha səmərəli keçirilməsinə
və informasiya-kommunikasiya texnologiyalarına əsaslanan tədris
metodlarından istifadəyə köməklik göstərəcəkdir.
Elektron
lövhəli sinfə baxış zamanı 55 ümumtəhsil
məktəbi ilə Naxçıvan Dövlət Tarix Muzeyi
arasında videobağlantı vasitəsilə
“Naxçıvanın 5 min illik tarixi” mövzusunda dərs tədris
olunub.
Ali Məclisin Sədri distant təhsilin əhəmiyyətini
vurğulayıb, məktəb-muzey əlaqələrinin tədris
formasına keçirilməsi barədə müvafiq
tapşırıqlar verib.
İdman gənclərin fiziki cəhətdən
sağlam böyüməsində mühüm əhəmiyyətə
malikdir. Ona görə də təhsil müəssisələrində
bədən tərbiyəsi və fiziki tərbiyə dərslərinin
müasir tələblər səviyyəsində tədrisi
vacib şərtdir. Qahab kənd tam orta məktəbində
də bədən tərbiyəsi və fiziki tərbiyə fənninin
tədrisi üçün müasir şərait
yaradılıb, idman zalı istifadəyə verilib.
Gənclərin hərbi vətənpərvərlik
ruhunda tərbiyəsi üçün hərbi kabinədə
bütün imkanlar vardır. Burada sıra, atəş,
mühəndis və tibb hazırlıqlarını əks
etdirən stendlər və digər əyani vasitələr
qoyulub.
Pedaqoji kollektivlə görüşən Ali Məclisin
Sədri deyib ki, təhsilin inkişafında əsas amillərdən
biri də müasir tədris şəraitinin
yaradılmasıdır. Qahab kənd tam orta məktəbi
informasiya texnologiyaları ilə təmin edilib, ən yeni tədris
metodlarının tətbiqinə başlanılıb. Bu da kollektiv qarşısında yeni vəzifələr
qoyur. Vətənpərvər, savadlı və
intellektli gənclik yetişdirmək pedaqoji heyəti daim
düşündürməli, yaradılanlardan səmərəli
istifadə olunmalı, məktəbdə tədrisin səviyyəsi
yüksəldilməlidir.
Müəllimlər göstərilən qayğı
müqabilində səylə çalışacaqlarına
söz veriblər.
Binanın həyətində də abadlıq tədbirləri
görülüb, gül-çiçək əkilib və
meyvə bağı salınıb.
Kənd mərkəzində
müasir iş şəraiti
yaradılıbdır
Naxçıvan
Muxtar Respublikasında aparılan quruculuq tədbirləri
çərçivəsində hər il
onlarla yeni kənd mərkəzi istifadəyə verilir. Sakinlərə göstərilən xidmətlərin
mərkəzləşmiş qaydada təşkilinə şərait
yaradan kənd mərkəzlərinin inşası cari ildə
də diqqət mərkəzində saxlanılıb.
Sentyabrın 22-də Qahab Kənd Mərkəzinin
açılışı olub.
Kənd inzibati ərazi dairəsi üzrə nümayəndə
Mirzəmməd Qasımov deyib ki, göstərilən dövlət
qayğısı Qahab kəndinin simasını tamamilə dəyişib. Bu gün kənddə
insanların rahat yaşayışına xidmət edən ən
müasir infrastruktur yaradılıb. Kənd
qazlaşdırılıb, mənzillərə telefon çəkilib,
elektrik enerjisi təminatı fasiləsiz həyata
keçirilir. Bu gün istifadəyə
verilən sosial obyektlər isə Qahab kəndinə daha
müasir görkəm bəxş edib. Yaradılan
şəraitin nəticəsidir ki, sakinlər fərdi təsərrüfatlarını
genişləndirir, kənddə əkinçilik, maldarlıq
inkişaf etdirilir. Bütün bunlar isə
insanların rifahının
yaxşılaşdırılmasına səbəb olur. İnzibati ərazi dairəsi üzrə nümayəndə
göstərilən qayğıya görə sakinlər adından
minnətdarlığını bildirib.
Naxçıvan
Muxtar Respublikası Ali Məclisinin Sədri Vasif Talıbov
Qahab kəndində aparılan quruculuq işlərinin
mühüm əhəmiyyətə malik olduğunu bildirərək
deyib: Bu gün istifadəyə verilən yeni məktəb
binası kənddə uşaqların yaxşı təhsil
almasına, kənd mərkəzi dövlət
qurumlarının fəaliyyətinin səmərəli təşkilinə,
həkim ambulatoriyası insanların
sağlamlığının qorunmasına, yol isə
onların rahatlığının təmin olunmasına xidmət
edəcəkdir. Ümumilikdə isə
bütün bunlar kəndin inkişafına hesablanmış tədbirlərdir.
Ali Məclisin
Sədri deyib: Kəndlə şəhər arasındakı fərqin
aradan qaldırılması aparılan abadlıq-quruculuq
işlərindən, yaradılan müasir infrastrukturdan
asılıdır. Belə ki, kəndlərin
tamamilə qazlaşdırılması, elektrik enerjisinin fasiləsiz
verilməsi, internetdən istifadə, televiziya
yayımlarının həyata keçirilməsi insanların
rahat yaşayışına və əhalinin daha sıx məskunlaşmasına
səbəb olur. Bu gün Qahab kəndində
yaradılan şərait də əhalinin problemlərinin
vaxtlı-vaxtında həll olunmasına, onların öz təsərrüfatları
ilə rahat məşğul olmalarına imkan verəcəkdir.
Ali Məclisin Sədri aparılan quruculuq işləri
münasibətilə kənd sakinlərini təbrik edib,
açılışı bildirən lenti kəsib.
Məlumat verilib ki, kənd mərkəzi 4 minə
yaxın sakinə xidmət edəcəkdir. Mərkəzdə rabitə
evi, polis sahə və baytarlıq məntəqələri,
kitabxana, Yeni Azərbaycan Partiyası ərazi ilk təşkilatı,
inzibati ərazi dairəsi üzrə nümayəndəlik, bələdiyyə,
arxiv, mədəniyyət evi və 83 yerlik iclas zalı
vardır. Kitabxana fonduna 8 min 466 kitab verilib.
Onlardan 1266-sı latın, 7 min 200-ü isə
kiril əlifbası ilə çap olunmuş ədəbiyyatlardır.
Rabitə evində 512 nömrəlik yeni ATS
quraşdırılıb. Burada 385-i Qahab və
70-i Naxışnərgiz kəndlərində olmaqla 455 abonentə
xidmət göstərilir. Yeni poçt məntəqəsində
gündəlik mətbuatın, eləcə də
danışıq və internet kartlarının
satışı təşkil olunub.
Lazımı avadanlıq və dərman preparatları ilə
təmin olunan baytarlıq məntəqəsi də Qahab və
Naxışnərgiz kəndlərində
heyvandarlığın inkişafına xidmət göstərəcəkdir. Bildirilib ki, hər
iki kənddə heyvandarlıq təsərrüfatının
inkişafı baytarlıq xidmətinin günün tələbləri
səviyyəsində qurulmasını zəruri edir. Məntəqənin həkimləri mütəmadi
olaraq fərdi təsərrüfatlarda dezinfeksiya işləri
aparır, yoluxucu xəstəliklərinin qarşısının
alınması məqsədilə müvafiq tədbirlər
görürlər.
Binada Yeni
Azərbaycan Partiyası Qahab kənd ərazi ilk təşkilatı
və inzibati ərazi dairəsi üzrə nümayəndəlik
üçün də müasir iş otaqları
yaradılıb. Məlumat verilib ki, Yeni Azərbaycan
Partiyası Qahab kənd ərazi ilk təşkilatının
143 üzvü vardır. Onlar arasında gənclər
və qadınlar üstünlük təşkil edir.
Binanın
ikinci mərtəbəsində Qahab kənd bələdiyyəsi
və mədəniyyət evinin işçiləri
üçün ayrılan iş otaqlarında da nümunəvi
xidmət şəraiti vardır.
Qahab kəndində
əhaliyə nümunəvi
səhiyyə xidməti göstəriləcəkdir
Sentyabrın 22-də Qahab kənd həkim
ambulatoriyasının yeni binasının
açılışı olub.
Həkim Leylan Həsənova yaradılan şəraitə
görə minnətdarlıq edib, sakinlərin
sağlamlığının qorunması istiqamətində səylə
çalışacaqlarını bildirib.
Naxçıvan
Muxtar Respublikası Ali Məclisinin Sədri Vasif Talıbov həkim
ambulatoriyasının istifadəyə verilməsi münasibətilə
kollektivi təbrik edərək deyib: Yeni həkim
ambulatoriyası kənddə əhaliyə göstərilən
səhiyyə xidmətinin günün tələbləri səviyyəsində
qurulmasına imkan verəcəkdir. Binada
lazımi şərait yaradılıb. Kollektiv
göstərilən qayğıdan səmərəli istifadə
etməli, insanların sağlamlığının
keşiyində dayanmalıdır. Əhali
arasında mütəmadi olaraq maarifləndirmə işləri
aparılmalı, gigiyena qaydalarına əməl olunmalı,
hamilə qadınlar qeydiyyata götürülərək
onlara patronaj xidməti göstərilməli, uşaqlara
vaxtlı-vaxtında peyvəndlər vurulmalıdır. Bütün bunların həyata keçirilməsi
insanların sağlamlığının daha etibarlı
qorunmasına, yoluxucu və digər xəstəliklərin
qarşısının vaxtında alınmasına imkan verəcəkdir.
Ali Məclisin Sədri qarşıya qoyulan vəzifələrin
icrasında kollektivə uğurlar arzulayıb,
açılışı bildirən lenti kəsib.
Bildirilib ki, ikimərtəbəli ambulatoriya binasında 8
tibb işçisi əhalinin sağlamlığının
qayğısına qalır. Ambulatoriyada stomatoloji
kabinə, peyvənd, aptek, mama, baş həkim, tibb
bacısı, manipulyasiya otaqları və doğuş zalı
vardır. Səhiyyə müəssisəsi
lazımi dərman vasitələri ilə təmin olunub, burada
ilkin tibbi yardım və peyvənd çantaları qoyulub.
Bina istilik sistemləri ilə təchiz olunub, həyətdə
abadlıq işləri görülüb.
Yeni xidmət
mərkəzi istifadəyə
verilib
Qahab kəndində aparılan kompleks quruculuq tədbirləri
çərçivəsində yeni xidmət mərkəzi də
tikilərək istifadəyə verilibdir.
Ali Məclisin Sədri xidmət mərkəzinin
açılışını edib.
Xidmət mərkəzində yaradılan müasir şərait sakinlərin gündəlik tələbatını tamamilə ödəyəcəkdir. Mərkəzdə bərbərxana, qadın gözəllik salonu, dərzi, ət satışı yeri, ərzaq və sənaye malları mağazaları fəaliyyət göstərir. Xidmət mərkəzində 10 nəfər işlə təmin olunub.
Xidmət mərkəzi ilə tanışlıqdan sonra Ali Məclisin Sədri kənd sakinləri ilə görüşüb.
Sakin Yəhya Əsgərov deyib ki, bu gün ölkəmizdə Ümummilli Liderimizin siyasi xəttinin davam etdirilməsi hər bir yaşayış məntəqəsinə inkişaf, tərəqqi və müasirlik gətirib. Qahab kəndinə də bu qayğıdan pay düşüb. Kənddə yaşayışın təmin olunması üçün bütün şərait yaradılıb. Sakinlər görülən bu işləri insan amilinə verilən qiymət kimi dəyərləndirirlər.
Ali Məclisin Sədri Qahab kəndinin müasirləşməsini ölkəmizin ümumi inkişafının və xalq-dövlət birliyinin nəticəsi kimi dəyərləndirərək deyib: Bu gün ölkəmizin hər yerində abadlıq işləri görülür, yeni iş yerləri açılır, insanların rifahı yüksəldilir. Kənd yaşayış məntəqələrində həyata keçirilən kompleks quruculuq işləri insanların ölkəmizin sabahına olan ümidini artırır. Bu gün Qahab kəndində istifadəyə verilən yeni sosial obyektlər, ilk növbədə, əhalinin rahatlığına hesablanmışdır. Kənd əhalisi də qurulanların qorunub saxlanılmasında fəal iştirak etməli, ölkəmizin inkişafına öz töhfələrini verməlidirlər.
* * *
Qahab kəndində aparılan abadlıq işləri
çərçivəsində rabitə xidmətinin təkmilləşdirilməsi
məqsədilə 400 metr fiber-optik, 2500 metr uzunluğunda
müxtəlif tutumlu yeraltı kabel çəkilib. Həmçinin
600 metr uzunluğunda elektrik xətti çəkilib, 250
kilovoltamper gücündə yeni transformator yarımstansiyası
quraşdırılıb. Qahab kənd tam orta məktəbinə
Nəcəfəlidizə kənd kəhrizindən 3 min 900 metr
uzunluğunda içməli su xətti çəkilib. Həmçinin
kənddə yolların kənarları boyu 320 metr
uzunluğunda hasar tikilib
Azərbaycan.-2014.- 23 sentyabr.- S.6.