Vətənin obrazını canlandıran
bir romans haqqında düşüncələr
Şiş ucları buludlarla döyüşən
Dağlarında buzları var ölkəmin.
Bu beyt böyük sənətkar Cəfər Cabbarlının "Ölkəm" adlı şeirinin ilk misralarıdır. Onlarla tanışlığımın tarixi ötən əsrin 60-cı illərinin axırlarına gedib çıxır. Orta məktəbin 9-cu sinfində oxuyurduq. Dil və ədəbiyyat müəllimimiz həmin misraları yazı lövhəsinə yazıb, bizə o cümləni sintaksis təhlil etməyi, yəni, mübtədasını, xəbərini ayırmağı tapşırdı. O gündən bu sirli-sehirli misralar mənim yaddaşıma həmişəlik həkk olundu. Şeiri Qəni müəllimdən alıb oxudum və sonralar radioda, televizorda istedadlı bəstəkar Asəf Zeynallının bu şeirə bəstələdiyi eyniadlı romansı dönə-dönə dinlədim və dinlədikcə də onun sözlərinə, musiqisinə heyran oldum.
Elə indi də belədir, hər dəfə bu məşhur romansa qulaq asanda məni həzin duyğular ağuşuna alır, ruhuma sığal çəkir, mənə elə gəlir ki, səmanın ənginliklərində süzən bir ley quşunun qanadlarındayam və oradan ölkəmizin rəngarəng mənzərələrini seyr edirəm və ürəyimdə bu zövqü mənə və minlərlə digər insanlara bəxş edən dahi sənətkarlara minnətdar oluram.
İnternet səhifələrində də təsadüfən romansın tarixçəsi ilə bağlı Aliyə Haqverdinin bir yazısını oxudum və xeyli maraqlı məlumatlar əldə etdim. Sən demə, şeiri C.Cabbarlı cəmi 20 yaşında (1919-cu ildə), A.Zeynallı isə romansı 19 yaşı olanda (1928-ci ildə) yazıbmışlar. Hər ikisi gənc ikən dünyalarını dəyişsələr də, xalqımız üçün əvəzsiz xidmətlər göstərmiş və ədəbiyyatımızın, musiqimizin inciləri sayıla biləcək əsərlər qoyub getmişlər.
Və mənim üçün bir məlumat da çox gözlənilməz oldu: şeir altı bənddən ibarət imiş, amma sonuncu iki bənd sovet ideologiyasına uyğun gəlmədiyi üçün onu heç vaxt oxumayıblar. Budur o bəndlər:
Yanar dağlarında yalov coşarmış,
Ona tapınmaya ellər qoşarmış,
Bir çağ varmış, ölkəm azad yaşarmış,
Bu yollarda izləri var ölkəmin.
İpəyindən
qızlar çadra geyərlər,
Ölkələrin
azad görmək dilərlər,
Bu yerləri
bütün ellər sevərlər,
Yalnız bizdə gözləri var ölkəmin.
Həqiqətən, şeirin bu bəndlərində
keçmiş sovet ideologiyasına zidd fikirlərin yer
aldığı göz qabağındadır və bu səbəbdən
həmin misralara qadağa qoyulması o dövrün
ab-havasına tam uyğun idi. Misralarda xalqımızın qədimlərdə
oda sitayiş etməsinə, tarixən azad yaşamasına,
sonralar işğala məruz qalmasına, lakin ölkəsini
azad görmək istəyinə və s. bu kimi işarələrin
olması, müstəqillik
ideyalarının təbliği, xalqın oyadılması kimi anlaşıla bilərdi.
Misraların siyasi məna çalarlarını bir tərəfə
qoyub, diqqətimizi şeirdəki təbiət mənzərələrinin
təsvirinə yönəltmək istərdim. Məni bir
mütəxəssis - geoloq kimi özünə cəlb edən
məqamlardan biri də məhz budur. Böyük
sənətkar Vətənin təbiətini,
torpağını təsvir və tərənnüm etməklə
bərabər, həm də onların gerçək mənalarını
poetik ifadələrlə oxucuya çatdırmaq istəyir.
Dolğun informasiya yüklü bu ifadələr isə
böyük dramaturq kimi tanıdığımız
C.Cabbarlını, nəinki Azərbaycan dili və ədəbiyyatını
dərindən bilən şair, onu Vətənin tarixi,
coğrafiyası, hətta deyərdim, iqtisadiyyatı, təbiəti,
fauna-florası haqqında da hərtərəfli biliyə malik
vətənpərvər bir ziyalı kimi dəyərləndirməyə
əsas verir. O, qısa ömrü ərzində ədəbiyyatın
və incəsənətin müxtəlif janrlarında
neçə-neçə uğurlara imza atmışdır: tərcüməçi
kimi dünya klassiklərinin (Şekspir, Şiller, Tolstoy və
b.) bir neçə əsərini Azərbaycan dilinə tərcümə
etmiş, jurnalist kimi qəzet və jurnallara məqalələr,
ssenarist kimi kinolara ssenarilər yazmış, rejissorluq
etmiş və hətta
bəstəkar kimi özünün
yazdığı bir neçə şeirə mahnı da bəstələmişdir
("Mən bir solmaz yarpağam ki", "Azad bir
quşdum" və s.).
"Ölkəm" şeirinin ilk misralarında
dağların təsvirinə fikir verin. Böyük ədib
"Şiş ucları buludlarla döyüşən"
ifadəsi əvəzinə, bəlkə daha sakit, mülayim,
məsələn, "Zirvələri buludlarla
görüşən" və ya "öpüşən"
kimi ifadələr işlədə bilərdi, amma işlətməyib,
çünki "şiş uclar" qılınca, oxa, nizəyə
və dolayısı ilə xalqın azadlıq uğrunda
mübarizliyinə, döyüş əzminə, iradəsinə
işarədir. Bu, eyni zamanda, C.Cabbarlı
ruhuna yaxın cavanlığa, üsyankarlığa bir
işarədir. İkinci misradakı
"Dağlarında buzları var" ifadəsinə diqqət
edin: "buzları" sözünü "qarları" kimi də
yaza bilərdi, onun üçün sonrakı bəndlərdə
qafiyə problemi ola bilməzdi, amma yazmayıb, çünki
buz yumşaq, tez əriyən qara nisbətən bərklik,
şəffaflıq, təmizlik, dözümlülük
nümunəsidir və bütün il ərzində ancaq
çox hündür dağların zirvəsində olur. Qafqaz, o cümlədən Azərbaycan ərazisinin
daxil olduğu mülayim iqlim qurşağı
üçün bu hündürlük təxminən 4000 metrə
bərabərdir. Ölkəmizdə 3-4 belə
hündür dağ var və hamısı Böyük Qafqaz
silsiləsinin cənub-şərq davamında Dağıstanla
sərhədə yaxın ərazidə yerləşmişlər
- Bazardüzü (4448 m), Şahdağ (4263 m), Tufandağ (4181
m) və bir də Cənubi Azərbaycanda Savalan dağı
(4811 m). Yüksəklikləri 3000-4000 metr arasında dəyişən
dağlarda (Babadağ, Murov, Qoşqar, Dəlidağ və s.)
isə qar örtüyü, adətən, yay aylarına qədər
qalsa da, yayda tamam əriyib qurtarır və payızın
axırlarından etibarən yeni qar örtüyü əmələ
gəlməyə başlayır. Orta məktəbdə
keçilən "Coğrafiya" dərsliyindən bilirik
ki, dağlarda yüksəkliyə qalxdıqca, təxminən
hər 100 metrdən bir havanın temperaturu bir dərəcə
aşağı düşür, yəni, yayda aran yerlərində
40 dərəcə isti olanda, Şahdağın zirvəsində
2-3 dərəcə şaxta olur. Ona görə də həmin
zirvələrdə qar örtükləri heç vaxt əriyib
yox olmur, illərlə üst-üstə yağan qar qalın buz təbəqələrinə
çevrilir ki, buna da elmi dildə "buzlaqlar" deyilir.
Dünyada ən böyük buzlaqlar hündürlükləri
7000 metrdən çox olan Himalay, Pamir və And
dağlarının zirvələrində qeydə
alınmışdır. Bu dağlar, o cümlədən də
bizim dağların da daxil olduğu Qafqaz dağları Alp
qırışıq əmələgəlmə prosesinin son
məhsulları kimi geoloji tarixin ən cavan dağları hesab
edilir və onlar inkişaflarını başa vurmuş qoca
dağlara (Ural, Appalaç və s.) nisbətən öz əzəmətli
görkəmləri, hündür, şiş uclu və
qarlı-buzlu zirvələri ilə fərqlənirlər. Böyük ədib başqa cür də yaza bilməzdi,
o, həmin misralarla dağların timsalında xalqın
ucalığını, vüqar və əzəmətini
göstərmiş və öz azadlığı uğrunda
düşmənə qarşı döyüşə həmişə
hazır olduğunu vurğulamışdır.
Şeirin 4-cü və 5-ci bəndlərinin birinci
misraları da çox diqqətçəkəndir. "Quzğun
dəniz oynar ayaqlarında" cümləsinə baxın.
Böyük ədibin dənizin xarakterini "mavi",
"coşqun" kimi nisbətən sakit, təkrarlanmış və ya
"azğın", "qızğın" kimi kəsərli sözlərlə
deyil, məhz "quzğun" sözü ilə ifadə etməsi
nədən xəbər verir? Bu, ya Xəzər dənizinin qədim
adlarından birinin "Quzğun" olmasına, ya da Xəzərin
ilin əksər vaxtlarında hədsiz aqressivliyinə işarə
ola bilər. Digər ifadə
- "oynar ayaqlarında" ifadəsilə dənizin
timsalında torpaqlarımıza göz dikən (şeirin
axırıncı misrasına diqqət edin) quzğun xislətli
düşmənlərin sonucda Azərbaycanın ayaqları
altında qalacağına şair inamı ifadə
edilmişdir.
Və ya "Yanar dağlarında yalov
coşarmış" cümləsinə fikir verin. Sadə sözlərlə,
kiçik bir cümlə ilə şair böyük, əhəmiyyətli
mənanı - Azərbaycanın odlar, alovlar yurdu, elmi dillə
desək, vulkanlar ölkəsi, təbii qazla, neftlə zəngin
bir ölkə olduğunu vurğulamışdır. Palçıq vulkanlarının da bir çox
hallarda odla-alovla püskürməsi və ölkəmizin bəzi
məntəqələrində (Suraxanı, Yanardağ,
Xınalıq və s.) təbii qazın dərin çatlarla
Yer səthinə çıxaraq alovlanması elmə
çoxdan məlumdur. Azərbaycan ərazisində geoloqlarımız tərəfindən
350-yə yaxın palçıq vulkanı aşkar edilib
qeydiyyata alınmışdır ki, bu da dünyadakı belə
tip vulkan sayının təxminən tən yarısı deməkdir.
Göründüyü kimi, C.Cabbarlının
"Ölkəm" şeiri ədəbi, tarixi və elmi
bilgilərlə zəngindir və yuxarıda söylənilənlər
onların kiçik bir qismidir. Bu şeir sevimli xalq şairi Səməd
Vurğunun, ustad M.Şəhriyarın "Azərbaycan",
Almaz İldırımın "Azərbaycan, mənim
baxtsız anam oy..." şeirləri ilə bərabər vətən,
ölkə haqqında yazılmış poetik əsərlər
sırasında öz layiqli yerini tutmaqdadır. Vətən
mövzusunda müxtəlif şairlər tərəfindən
ayrı-ayrı illərdə yüzlərlə şeir
yazılmış, lakin bir şeirdə vətənin tarixini,
coğrafiyasını, təbiətini, etno-kulturoloji və s. xüsusiyyətlərini
əks etdirmək hər sənətkara nəsib
olmamışdır. C.Cabbarlı da bu
baxımdan bəxti gətirənlər sırasında hesab
edilə bilər. O, ədəbiyyatımızda çox
ünlü dramaturq kimi tanınsa da, yazdığı poeziya
nümunələri ilə Azərbaycan şeirində öz
sözünü deməyi bacarmışdı. Bu
baxımdan onun "Ölkəm" şeiri öz
lirikası, zəngin məna çalarları, informasiya
yüklülüyü və ən əsası, coşqun vətənpərvərliyi
ilə xüsusi seçilir.
Bəs nədən gənc bəstəkar bu şeirə
müraciət etmiş və ona o dövr Azərbaycan
üçün yeni olan klassik Avropa janrında musiqi bəstələməyə
qərar vermişdir, bu, bir təsadüf idimi? Ümumiyyətlə, romans
janr etibarı ilə lirik, əsasən məhəbbət məzmunlu
kiçik həcmli şeirlərə yazılmış vokal əsərləri
kimi tanınır və ilk dəfə şeir kimi XV-XVI əsrlərdə
İspaniyada, Fransada meydana gəlmiş və sonralar bütün
Avropaya yayılmışdır. Həmin əsərlərdə,
adətən, konkret bir şəxsin qəhrəmanlıqlarından,
onun sevgi macəralarından və iztirablarından bəhs
edilir. İlk baxışda romans
janrının ruhuna uyğun gəlməyən bu şeirə
A.Zeynallının müraciət etməsi, təbii ki, bir təsadüf
sayıla bilməz. Əvvəla, hər
iki sənətkar bir-birini yaxından tanıyırdı və
yaradıcılıqları bir-birinə bəlli idi.
İkincisi,
şeirdə olan lirizmlə yanaşı, onun
üsyankarlıq, döyüşkənlik və azadlıq
ruhu konkret qəhrəmanın Azərbaycan ölkəsi, Azərbaycan
xalqı olması ehtimalını istedadlı bəstəkar
sezməyə bilməzdi. Nəticədə iki vətənpərvər istedad sahibinin əməyi ilə
möhtəşəm bir əsər - "Ölkəm"
romansı yarandı.
Kimlər oxumayıb bu romansı?!
Dahi Bülbül, musiqi sənətimizin korifeyləri: Firəngiz Əhmədova,
Lütfiyar İmanov, Gülağa Məmmədov, Fidan və
Xuraman Qasımova bacıları və neçə-neçə
tanınmış sənətçilər - Sona Aslanova, Rauf
Atakişiyev, Mobil Əhmədov, Rauf Adıgözəlov,
Yaşar Səfərov, Azər Zeynalov və başqaları. Hərəsinin özünəməxsus səsi, ifa
tərzi olsa da, hamısı gözəldir, könül
oxşayandır. Çünki musiqi
gözəldir, sözlər dəyərlidir. Mənbələrdə onların əksəriyyətinin
ifasında romansın qızıl fondda
saxlanıldığı bildirilir.
"Mətndə və bu romansın musiqisində Azərbaycanın
obrazı əks edilib". Razıyam, bu,
doğrudan da, belədir. Əgər
S.Vurğunun "Azərbaycan" şeiri Vətənin
qısaca ensiklopediyasıdırsa, C.Cabbarlının və Asəf
Zeynallının "Ölkəm" şeiri-romansı onun
obrazıdır, portretidir.
Bu ecazkar romansın yazılmasından bir əsrə
yaxın zaman keçməsinə baxmayaraq,
ifaçılarımızın repertuarında hələ də
qalmaqdadır və mən əminəm ki, uzun illər belə
davam edəcək, neçə nəsil insanlara zövq verəcək,
onları öz tilsimli aurasına qərq edəcəkdir.
Rəşid
FƏTƏLİYEV,
Azərbaycan
Respublikasının Nazirlər Kabineti Aparatının Neft və
kimya şöbəsi müdirinin müavini, geologiya-mineralogiya
elmləri namizədi
Azərbaycan.-2014.- 25 sentyabr.- S.6.