Nəqliyyat naziri Oğuzda vətəndaşların müraciət və təkliflərini dinləyib

Mərkəzi icra hakimiyyəti orqanları rəhbərlərinin şəhər və rayonlarda vətəndaşların qəbulu cədvəlinə uyğun olaraq nəqliyyat naziri Ziya Məmmədov sentyabrın 26-da Oğuz şəhərində növbəti qəbul keçirib.

AzərTAc xəbər verir ki, nazirliyin struktur bölmələri rəhbərlərinin iştirakı ilə Olimpiya İdman Kompleksində keçirilən qəbulda Qəbələ, Şəki və Oğuz rayonlarında yaşayan vətəndaşların yol infrastrukturu və nəqliyyat məsələləri ilə bağlı müraciət və təklifləri dinlənilib.

Vətəndaşların müraciətləri əsasən, kəndlərarası və kənddaxili yolların bərpası, körpülərin salınması və digər məsələlərlə bağlı olub.

Qəbul zamanı qaldırılan məsələlərin bir çoxu yerindəcə həllini tapıb, digər müraciətlərin araşdırılaraq həll olunması üçün nazirliyin aidiyyəti strukturlarının rəhbərlərinə müvafiq tapşırıqlar verilib.

Nazirliyin səlahiyyətlərinə aid olmayan, o cümlədən şəxsi xarakter daşıyan müraciətlər aidiyyəti qurumlara çatdırılmaq üçün qeydiyyata alınaraq nəzarətə götürülüb.

Ziya Məmmədov son illər ölkəmizdə, o cümlədən bu bölgədə yol-nəqliyyat infrastrukturunun yaxşılaşdırılması istiqamətində davamlı tədbirlərin həyata keçirildiyini, yaşayış məntəqələrini birləşdirən avtomobil yollarının yenidən qurulduğunu bildirib. Vətəndaşların diqqətinə çatdırılıb ki, bu istiqamətdə tədbirlər bundan sonra da ardıcıl davam etdiriləcək.

Vətəndaşlar qəbulla bağlı yaradılan şəraitdən razılıqlarını bildiriblər.

Azərbaycan.-2014.- 27 sentyabr.- S.6.