Azərbaycan kənd təsərrüfatı nazirinin başçılıq etdiyi

nümayəndə heyəti Türkiyədə səfərdə olmuşdur

Azərbaycanın kənd təsərrüfatı naziri Heydər Əsədovun başçılıq etdiyi nümayəndə heyəti Türkiyədə səfərdə olmuşdur. Kənd Təsərrüfatı Nazirliyinin mətbuat xidmətindən AzərTAc-a bildirmişlər ki, səfər Türkiyənin kənd təsərrüfatı və aqrar-sənaye kompleksi sahəsində təcrübəsi ilə tanışlıq, iki ölkə arasında aqrar sektorda əməkdaşlığın perspektivlərinin müzakirə olunması məqsədi daşımışdır.

Səfər zamanı nazir Heydər Əsədov Türkiyənin qida, kənd təsərrüfatı və heyvandarlıq naziri Mehmet Mehdi Eker ilə görüşmüşdür. Görüşdə tərəflər iki ölkə arasında iqtisadiyyatın digər sahələri ilə yanaşı, aqrar sahədə də əməkdaşlığın dinamik surətdə inkişaf etdiyini bildirmiş və konkret məsələlərə dair fikir mübadiləsi aparmışlar. Nazir Heydər Əsədov Türkiyənin kənd təsərrüfatına dövlət dəstəyi, toxumçuluq, heyvandarlıq, bitki mühafizəsi və digər sahələrdəki qabaqcıl təcrübəsindən faydalanmaq üçün iki ölkənin müvafiq nazirlikləri arasında ekspert mübadiləsinin həyata keçirilməsinin məqsədəmüvafiq olduğunu qeyd etmişdir. Mehmet Mehdi Eker öz növbəsində Türkiyənin bu istiqamətdə əməkdaşlığa hazır olduğunu bildirmişdir.

Səfər çərçivəsində Azərbaycan nümayəndə heyəti Türkiyənin kənd təsərrüfatı üzrə elmi-tədqiqat institutları, damazlıq və toxumçuluq birlikləri, kənd təsərrüfatı məhsullarının satışı bazarları ilə əyani tanış olmuşdur.

Azərbaycan.-2014.- 10 yanvar.- S.4.